TTDL-ZABTER-01-KA-046

Previous Text Back to Volume Page Next Text

Wylie title
Location	bdud 'joms gling pa zab gter Volume 1, Text 46, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

[edit]

༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ ཆེ་མཆོག་བདུད་འཇོམས་རྡོ་རྗེའི་སྒྲུབ་པ་ཡི༔ ཚོགས་མཆོད་འདོད་འཇོའི་བུམ་བཟང་བཞུགས་སོ༔ ༠༠༠༠༠བརྡ་ཡིག༔ ན་མོ་གུ་རུ་པདྨ་ཀྲོ་དྷ་ཡེ༔ རྡོ་རྗེ་ཐོད་ཕྲེང་རྗེས་འཇུག་རྣམས༔ གསང་སྔགས་ཟབ་མོའི་སྒོར་ཞུགས་ཚེ༔ དམ་ཚིག་ཉམས་ཆག་གསོ་བ་དང་༔ ཚོགས་རྫོགས་སྒྲིབ་པ་སྦྱོང་བའི་ཐབས༔ ཚོགས་ཀྱི་འཁོར་ལོ་ལ་བརྩོན་འབད༔ དེ་ཡི་ལག་ལེན་རིམ་པ་ལ༔ སྒྲུབ་པའི་གཞུང་བསྲང་སྔགས་རྫོགས་མཐར༔ སྣོད་གཙང་ཆག་གས་མེད་པའི་ནང་༔ འབྲུ་སྣ་ཟས་སྣ་སྤོད་ཀྱི་རིགས༔ ལོངས་སྤྱོད་འབྱོར་ཚོགས་ཐམས་ཅད་བསགས༔ རི་རབ་རོལ་མཚོའི་ཚུལ་དུ་སྤུངས༔ ཡེ་ཤེས་བདུད་རྩིར་བྱིན་བརླབ་ནི༔ ཧཱུྃ༔ རང་ཉིད་ལྷ་ཡི་ཐུགས་ཀ་ནས༔ རྃ་འཕྲོས་མ་དག་ཉེས་སྐྱོན་བསྲེགས༔ ཡྃ་འཕྲོས་འབག་བརྩོག་ཐམས་ཅད་གཏོར༔ ཁྃ་འཕྲོས་བག་ཆགས་ཐམས་ཅད་བཀྲུས༔ རྃ་ཡྃ་ཁྃ༔ སྦྱངས་ནས་འབྲུ་གསུམ་ནུས་པས་བརླབ༔ ཨོཾ་གྱིས་སྐུ་ཡི་བདུད་རྩི་དཀར༔ ཨཱཿཡིས་དམར་གསལ་གསུང་གསང་བཅུད༔ ཧཱུྃ་གིས་མཐིང་ནག་ཐུགས་བཅུད་ལྡན༔ འཁོར་འདས་ཡོངས་ཁྱབ་འདོད་ཡོན་སྤྲིན༔ ཨོཾ་ཨཱཿཧཱུྃ༔ ལན་གསུམ་བརྗོད་ཅིང་སྤྱན་འདྲེན་ནི༔ ཧཱུྃ༔ རང་སྣང་དོན་གྱི་འོག་མིན་ནས༔ བརྒྱུད་གསུམ་བླ་མ་ཡོངས་འདུས་དཔལ༔ པདྨ་འབྱུང་གནས་སྟོན་འཁོར་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ དབང་དྲག་རོལ་པའི་དཀྱིལ་འཁོར་ནས༔ ཆེ་མཆོག་བཛྲ་ཁྲོ་བོ་ལོད༔ མཁའ་འགྲོ་གིང་དང་རྒྱལ་ཆེན་བཞི༔ ཚོགས་ལ་སྤྱན་འདྲེན་གཤེགས་སུ་གསོལ༔ ལེགས་ལྡན་དབང་ཕྱུག་ཨེ་ཀ་ཛ༔ སྲིད་པའི་རྒྱལ་མོ་ཆེན་མོ་དང་༔ གནས་ཡུལ་དུར་ཁྲོད་ཧེ་རུའི་ཞིང་༔ དབང་མཛད་དཔའ་བོ་རྣལ་འབྱོར་མ༔ ཆོས་སྐྱོང་ཞིང་སྐྱོང་གིང་ཕོ་མོ༔ ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛཿསྤྱན་དྲངས་ནས་བདུད་རྩིའི་ཆང་མཆོད་ནི༔ ཨོཾ་ཨཱཿཧཱུྃ༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་དམ་ཅན་རྒྱ་མཚོ་ལ༔ ཡེ་ཤེས་བདུད་རྩིའི་རྒྱ་མཚོ་འབུལ༔ མཆོག་དང་ཐུན་མོང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁཱ་ཧི༔ དེ་ནས་ཚོགས་ཕུད་འབུལ་བ་ནི༔ ཧཱུྃ༔ རིག་འཛིན་རྒྱལ་པོ་པདྨ་འབྱུང་༔ ཡང་ཁྲོས་བཛྲ་ཁྲོ་བོ་ལོད༔ རྩ་གསུམ་སྲུང་མར་བཅས་པ་ལ༔ འདོད་ཡོན་ལོངས་སྤྱོད་ཚོགས་མཆོད་འབུལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནི་སརྦ་དྷརྨ་པཱ་ལ་ཀྵེ་ཊ་པཱ་ལ་སརྦ་ས་པ་རི་ཝཱ་ར་གྷ་ཎ་ཙཀྲ་ལ་ཁཱ་ཧི༔ མཆོད་ཅིང་བཤགས་པ་བྱ་བ་ནི༔ ཧོཿདཀྱིལ་འཁོར་ལྷ་ཚོགས་དགོངས་སུ་གསོལ༔ བདག་ནི་མ་རིག་དབང་གྱུར་ཏེ༔ རྩ་བ་ཡན་ལག་དམ་ཚིག་དང་༔ འགལ་འཁྲུལ་ཉམས་ཆག་ལས་བསགས་ཀུན༔ ཚོགས་ཀྱི་བསྐང་ཞིང་བཤགས་བགྱིའོ༔ དག་ཚངས་མཆོག་གི་དངོས་གྲུབ་སྩོལ༔ ཨོཾ་གྷ་ཎ་ཙཀྲ་སཏྭ་ས་མ་ཡ་སོགས་ཚང་བར་བརྗོད༔ བཤགས་ནས་ཞིང་བཅུ་བསྒྲལ་བ་ནི༔ ཧཱུྃ་ཧཱུྃ་ཧཱུྃ༔ ཨོ་རྒྱན་པདྨ་ཐོད་ཕྲེང་རྩལ༔ ཆེ་མཆོག་བཛྲ་གྲོ་བོ་ལོད༔ ཆོས་ཀྱི་དབྱིངས་ལས་སྐུར་བཞེངས་ལ༔ མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་བགེགས་བསྒྲལ་བའི་ལས་མཛོད་ཅིག༔ ཧཱུྃ༔ རྡོ་རྗེ་ཕུར་པ་མཚོན་གྱི་མཆོག༔ དགྲ་བགེགས་ཉོན་འཁྲུལ་ཕུང་པོར་གདབ༔ ཁམས་གསུམ་ལས་ཀྱི་བག་ཆགས་བསྒྲལ༔ རྣམ་ཤེས་ཆོས་ཀྱི་དབྱིངས་སུ་ཕཊ༔ ཨོཾ་གུ་རུ་བཛྲ་རཀྴ་ཀྲོ་དྷ་སརྦ་ས་མ་ཡ་གནོད་བྱེད་སརྦ་ཤ་ཏྲུཾ་མཱ་ར་ཡ་རྦད་རྦད་སོད་སོད་བྷྱོ་ནན༔ དྲག་སྔགས་བརྗོད༔ བསྒྲལ་ནས་ཞལ་དུ་བསྟབ་པ་ལ༔ ཧཱུྃ༔ ཆེ་མཆོག་བཛྲ་ཁྲོ་བོ་ལོད༔ འཁོར་དང་བཅས་པ་ཞལ་ཕྱེས་ཤིག༔ དགྲ་བགེགས་མ་ལུས་ཞལ་དུ་བསྟབ༔ ལྷག་མ་མེད་པར་བཞེས་སུ་གསོལ༔ ཨོཾ་གུ་རུ་བཛྲ་རཀྴ་ཀྲོ་དྷ་སརྦ་ས་མ་ཡ་དགྲ་བགེགས་ཀྱི་མ་ཧཱ་མཱཾ་ས་རཀྟ་ཙིཏྟ་ཀིཾ་ནི་རི་ཏི་ལ་ཁཱ་ཧིཿབསྟབ་ནས་ལྷག་མ་འབུལ་བ་ནི༔ ཧཱུྃ་ཛཿསྔོན་ཚེ་རྒྱལ་བ་སྲས་བཅས་ཀྱི༔ སྤྱན་སྔར་ཁས་བླངས་དམ་བཅས་པའི༔ ལྷག་སྐྱོང་གནས་ཉུལ་ཕོ་མོའི་ཚོགས༔ ལྷག་ལ་དབང་བ་ཐམས་ཅད་ཀུན༔ འདིར་གཤེགས་ལྷག་མའི་ལོངས་སྤྱོད་བཞེས༔ བཀའ་དང་ཐ་ཚིག་དཔང་དུ་མཆིས༔ ཕྲིན་ལས་རྣམ་བཞི་རྟག་ཏུ་སྒྲུབས༔ མ་གཡེལ་བཛྲ་ས་མ་ཡ༔ སརྦ་ཌཱ་ཀི་ནཱི་དྷརྨ་པཱ་ལ་ཀྵེ་ཊ་པཱ་ལ་ལོ་ཀ་པཱ་ལ་ས་མ་ཡ་ཨུཙྪིཥྚ་བ་ལིཾ་ཏ་ཁཱ་ཧི༔ འབུལ་ཞིང་དཔང་དུ་བསྐུལ་བ་ནི༔ ཧཱུྃ་ཧཱུྃ་ཧཱུྃ༔ རབ་འཇིགས་མི་སྲུན་སྲིན་པོའི་གྲོང་ཁྱེར་དབུས༔ བཀོད་པ་རབ་རྫོགས་ཟངས་མདོག་དཔལ་རིའི་རྩེར༔ ལྷུན་གྲུབ་པདྨ་འོད་ཀྱི་གཞལ་ཡས་ནས༔ ཨོ་རྒྱན་པདྨ་བདུད་འདུལ་སྐུ་བཞེངས་ཤིག༔ ཧཱུྃ་ཧཱུྃ་ཧཱུྃ༔ གྲུ་གསུམ་ཐོད་མཁར་རྡོ་རྗེས་བསྡམས་པའི་ནང་༔ མ་རུངས་གདུག་པ་བསྣོལ་བའི་རོ་གདན་ནས༔ སྲིན་རྒྱལ་རཀྴ་ཐོད་ཕྲེང་སྐུ་བཞེངས་ཤིག༔ ཆད་དོན་ཁྲིམས་ཀྱི་དཔང་པོར་ད་དགོངས་འཚལ༔ ཧཱུྃ་ཧཱུྃ་ཧཱུྃ༔ བདེ་ཆེན་ཆོས་དབྱིངས་རོལ་པའི་དཀྱིལ་འཁོར་དུ༔ རྔམས་བརྗིད་ཟ་བྱེད་སྟག་མོ་གྲུས་མའི་སྟེང་༔ ཡེ་ཤེས་མེ་རི་འབར་བའི་ཀློང་དཀྱིལ་ནས༔ ཆེ་མཆོག་རྡོ་རྗེ་གྲོ་ལོད་སྐུ་བཞེངས་ཤིག༔ ཆད་དོན་ཁྲིམས་ཀྱི་དཔང་པོར་ད་དགོངས་འཚལ༔ དྲག་པོ་མངོན་སྤྱོད་ལས་ལ་ད་དགོངས་འཚལ༔ ནད་མུག་མཚོན་འཁྲུགས་བདུད་སྤྲུལ་གཡུལ་འགྱེད་མཁན༔ དགྲ་ཇག་ཆོམ་རྐུན་བཀའ་ལོག་ཞིང་བཅུའི་དགྲ༔ དམ་སྲི་སྒབ་འདྲེ་རྒྱལ་བསེན་ནག་ཕྱོགས་བདུད༔ མ་ལུས་ཐལ་བའི་རྡུལ་ཕྲན་བཞིན་དུ་རློག༔ བརྒྱུད་འཛིན་མོས་གུས་གདུང་བས་འབོད་བསྐུལ་ལོ༔ འགྲོ་བའི་མགོན་པོ་ཐུགས་དམ་དབྱིངས་ལས་བཞེངས༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ སྤྲུལ་པ་ཡང་སྤྲུལ་བསམ་ཡས་འགྱེད་དུ་གསོལ༔ མ་རུངས་བདུད་སྤྲུལ་རྒྱལ་བློན་དམ་ལ་ཐོགས༔ ནག་ཕྱོགས་གཞི་བདག་ལྷ་འདྲེ་དམ་ལ་ཐོགས༔ མི་སྲུན་དམ་མེད་སྡེ་བརྒྱད་དམ་ལ་ཐོགས༔ སྲོག་ལེན་གདུག་འདྲེ་རྒྱལ་འགོང་དམ་ལ་ཐོགས༔ དྲེགས་ཅན་དུས་མཐའི་འགོང་པོ་དམ་ལ་ཐོགས༔ བསླུ་བྱེད་དམ་སྲི་ཆུང་སྲི་དམ་ལ་ཐོགས༔ ཕུང་བྱེད་འདྲེ་སྲིན་གོད་སྲི་དམ་ལ་ཐོགས༔ བཟློག་མེད་རྡོ་རྗེའི་ཚིག་གིས་བཀའ་བསྒོས་ཤིག༔ འདའ་མེད་བཀའ་རྟགས་གཉན་པོས་རྒྱས་ཐོབ་ཅིག༔ འཕྱུག་མེད་བྱང་ཆུབ་སེམས་ཀྱི་དགོངས་པས་རློབས༔ ཐུགས་དམ་རྒྱུད་བསྐུལ་མངོན་སྤྱོད་ཕྲིན་ལས་མཛོད༔ བཅོལ་བའི་ཕྲིན་ལས་མ་གཡེལ་ས་མ་ཡ༔ བསྐུལ་ནས་ཆད་མདོ་བཏང་བ་ནི༔ ཧཱུྃ་ཧཱུྃ་ཧཱུྃ༔ བྷྱོ༔ སྔོན་ཚེ་འདས་དུས་བསྐལ་པའི་དང་པོ་ལ༔ རི་བོ་གནམ་ལྕགས་འབར་བའི་རྩེ་མོ་རུ༔ ཀུན་ཏུ་བཟང་པོ་ཆེ་མཆོག་ཧེ་རུ་ཀས༔ བདུད་པོ་མ་ཏྲཾ་རཱུ་ཏྲ་བསྒྲལ་བའི་ཚེ༔ ཁས་བླངས་དམ་བཅས་བཀའ་ཡི་སྲུང་མ་རྣམས༔ འདིར་གཤེགས་ཤ་ཁྲག་དམར་གྱི་གཏོར་མ་ལོངས༔ ཟབ་གསང་བསྟན་པ་ཕྱོགས་མཐར་རྒྱས་པ་དང་༔ བརྒྱུད་འཛིན་ཐར་པ་ཆེན་པོའི་ལམ་དུ་གཟུད༔ བསྟན་འགྲོ་བདེ་ལ་འགོད་པའི་ཕྲིན་ལས་མཛོད༔ བཀའ་དང་དམ་ལས་མ་འདའ་ས་མ་ཡ༔ ཧཱུྃ་ཧཱུྃ་ཧཱུྃ༔ བྷྱོ༔ དེ་འོག་བར་གྱི་བསྐལ་པའི་དབུས་མ་ལ༔ རྗེ་བཙུན་ཆེན་པོ་པདྨ་རྒྱལ་པོ་ཡིས༔ སྤྲུལ་པ་ཡང་སྤྲུལ་གང་འདུལ་ཐབས་མང་གིས༔ གནས་མཆོག་ཉེར་བཞི་ཡུལ་ནི་སོ་གཉིས་དང་༔ དུར་ཁྲོད་བརྒྱད་དང་ཧེ་རུའི་གནས་བཅུ་སོགས༔ འཛམ་བུའི་གླིང་གི་ལྷ་འདྲེ་སྡེ་བརྒྱད་རྣམས༔ དམ་བཏགས་བཀའ་བསྒོས་གཉེར་གཏད་ལས་བཅོལ་བའི༔ སྲུང་མ་དམ་ཅན་རྒྱ་མཚོ་འཁོར་དང་བཅས༔ འདིར་གཤེགས་ཤ་ཁྲག་དམར་གྱི་གཏོར་མ་ལོངས༔ ཟབ་གསང་བསྟན་པ་ཕྱོགས་མཐར་རྒྱས་པ་དང་༔ བརྒྱུད་འཛིན་ཐར་པ་ཆེན་པོའི་ལམ་ལ་གཟུད༔ བསྟན་འགྲོའི་བདེ་ལེགས་ཡོན་ཏན་གོང་འཕེལ་ནས༔ ནད་མུག་མཚོན་འཁྲུགས་ཚར་གཅོད་ཕྲིན་ལས་མཛོད༔ བཀའ་དང་དམ་ཚིག་གཉན་པོས་ལས་བཅོལ་ལོ༔ མ་གཡེལ་མ་འདའ་བཛྲ་ས་མ་ཡ༔ ཧཱུྃ་ཧཱུྃ་ཧཱུྃ༔ བྷྱོ༔ དེ་འོག་བསྐལ་པ་སྙིགས་མ་རྩོད་ལྡན་དུས༔ འཁོར་འདས་འུབ་ཆུབ་རོལ་པའི་ཀློང་ཆེན་དུ༔ ཡེ་ཤེས་སྒྱུ་མའི་རྣལ་འབྱོར་ཆེན་པོ་ལ༔ ངོ་བོ་ཀ་དག་ཀུན་བཟང་ཐོད་ཕྲེང་གིས༔ མཁའ་འགྲོའི་སྙིང་ཐིག་གཉན་པོ་གཏད་རྒྱ་བྱས༔ ཟབ་གསང་སྙིང་པོའི་བཅུད་ལ་རོལ་པའི་ཚེ༔ ཁས་བླངས་དམ་བཅས་བྲན་བཀོལ་དམ་ཅན་ཚོགས༔ འདིར་གཤེགས་ཤ་ཁྲག་དམར་གྱི་གཏོར་མ་ལོངས༔ ཟབ་གསང་བསྟན་པ་ཕྱོགས་མཐར་རྒྱས་པ་དང་༔ བརྒྱུད་འཛིན་ཐར་པ་ཆེན་པོའི་ལམ་ལ་གཟུད༔ བསྟན་འགྲོ་བདེར་འཁོད་དགེ་ལེགས་གོང་འཕེལ་ནས༔ ནད་མུག་མཚོན་འཁྲུགས་ཚར་གཅོད་ཕྲིན་ལས་མཛོད༔ ཞིང་བཅུའི་དགྲ་སྡེ་ཐལ་བའི་རྡུལ་དུ་རློག༔ བཀའ་དང་དམ་ཚིག་གཉན་པོའི་ལས་བཅོལ་ལོ༔ མ་གཡེལ་མ་འདའ་བཛྲ་ས་མ་ཡ༔ ཧཱུྃ་ཧཱུྃ་ཧཱུྃ༔ བྷྱོ༔ ང་ནི་རིག་འཛིན་དེ་ཡི་རྗེས་འཇུག་ཡིན༔ ཁྱོད་ཅག་ལྷ་འདྲེ་དེ་ཡི་རིགས་ཡིན་པས༔ བཀའ་སྲུང་དམ་ཅན་སྡེ་བརྒྱད་ལྷ་འདྲེའི་ཚོགས༔ མ་ལུས་འདིར་གཤེགས་དམར་གྱི་གཏོར་མ་ལོངས༔ ཟབ་གསང་བསྟན་པ་ཕྱོགས་མཐར་རྒྱས་པ་དང་༔ བརྒྱུད་འཛིན་ཐར་པ་ཆེན་པོའི་ལམ་ལ་གཟུད༔ བསྟན་འགྲོ་བདེར་འཁོད་དགེ་ལེགས་གོང་འཕེལ་ནས༔ ནད་མུག་མཚོན་འཁྲུགས་ཚར་གཅོད་ཕྲིན་ལས་མཛོད༔ ཞིང་བཅུའི་དགྲ་སྡེ་ཐལ་བའི་རྡུལ་དུ་རློག༔ བཀའ་དང་དམ་ཚིག་གཉན་པོའི་ལས་བཅོལ་ལོ༔ མ་གཡེལ་མ་འདའ་བཛྲ་ས་མ་ཡ༔ སླར་ཡང་བརྟན་མ་བསྐྱང་བ་ལ༔ ཧཱུྃ་ཧཱུྃ་ཧཱུྃ༔ བྷྱོ༔ སྔོན་ཚེ་བདུད་འཇོམས་རྡོ་རྗེ་ཐོད་ཕྲེང་གིས༔ དམ་བཏགས་བཀའ་བསྒོས་གཉེར་གཏད་དབང་བསྐུར་ཞིང་༔ ལུང་བསྟན་མཚན་གསོལ་མ་མོ་བརྟན་མའི་ཚོགས༔ འདིར་གཤེགས་ཤ་ཁྲག་དམར་གྱི་གཏོར་མ་ལོངས༔ བཀའ་དང་དམ་ཚིག་ཆད་དོན་ཚུལ་བཞིན་དུ༔ སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད༔ ཟབ་གསང་བསྟན་པ་ཕྱོགས་མཐར་རྒྱས་པ་དང་༔ བརྒྱུད་འཛིན་ཐར་པ་ཆེན་པོའི་ལམ་དུ་ཚུད༔ ནད་མུག་མཚོན་འཁྲུགས་སྒོ་བཞིའི་བདུད་སྡེ་དཔུང་༔ སངས་རྒྱས་བསྟན་དགྲ་རྣལ་འབྱོར་སྒོས་དགྲ་སོགས༔ ལོག་འདྲེན་གདུག་ཅན་ཐམས་ཅད་རྡུལ་དུ་རློག༔ བཀའ་དང་དམ་ལས་མ་འདའ་ས་མ་ཡ༔ མ་མ་ཧྲཱིཾ་ཛཿབྷྱོ་བཛྲ་ས་མ་ཡ་ཨེ་དམ་བ་ལིཾ་ཏ་ཁཱ་ཧི༔ སླར་ཡང་རྟ་བྲོ་བརྡུང་བ་ནི༔ ཧཱུྃ་ཧཱུྃ་ཧཱུྃ༔ ཛཿདྲག་པོ་ཆེན་པོའི་དྲག་ཤུལ་གྱིས༔ བདུད་དང་དམ་སྲི་རྒབ་འདྲེ་རྣམས༔ རིམ་དགུ་ས་ཡི་འོག་ཏུ་མནན༔ ཀླུ་བདུད་ནག་པོའི་ལག་ཏུ་གཏད༔ ཆུ་སྲིན་གདུག་པའི་གྲེ་བར་བརྫང་༔ འཆི་བདག་གཤིན་རྗེའི་ཁ་རུ་བསྟབ༔ ལས་བདུད་ནག་པོའི་ལྟོ་བར་བྲུབ༔ གནམ་ལྕགས་ཕུར་པས་ཡན་ལག་གཟིར༔ དབང་ཆེན་གསེར་གྱི་གཞི་རུ་བརྒྱང་༔ འབྱུང་བ་ཆེན་པོ་ལྔ་ཡིས་མནན༔ ཡེ་ཤེས་ལྔ་ཡི་བྲོ་རྒྱས་གདབ༔ ཐེག་པ་རིམ་དགུའི་དམ་རྒྱས་འདེབས༔ ནམ་ཡང་འཕར་དང་ལྡང་མེད་གྱུར༔ ཨོཾ་ཨཱཿཧཱུྃ་སྭཱ་ཧཱ་ལཾ་ལཾ་སྟྭཾ་བྷ་ཡ་ནན༔ བརྡུང་ནས་རྗེས་ཀྱི་རིམ་པ་ལ༔ དང་པོ་མཆོད་བསྟོད་དངོས་གྲུབ་ལེན༔ ཧཱུྃ༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་ནོར་ལྷ་གཏེར་བདག་གིས༔ སྒྲུབ་པའི་རྣལ་འབྱོར་མཆེད་ལྕམ་ལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་བཛྲ་གུ་རུ་གྲོ་བོ་ལོད་མ་ཧ་རི་ནི་ས་སརྦ་སིདྡྷི་ཕ་ལ་ཧཱུྃ་ཨཱ༔ དེ་ནས་བཤགས་པ་བྱ་བ་ནི༔ ཧོཿརྩ་གསུམ་དམ་ཅན་རྒྱ་མཚོ་ལ༔ རྒྱུད་ལུང་མན་ངག་དང་འགལ་བའི༔ ཉེས་བྱས་ཉམས་ཆག་རྟོག་སྒྲིབ་ཀུན༔ ཚེ་རབ་སྡིག་དང་བཟླུམས་ཏེ་བཤགས༔ དག་ཚངས་མཆོག་གི་དངོས་གྲུབ་སྩོལ༔ ཡིག་བརྒྱ་དབྱངས་གསལ་ཅི་འགྲུབ་བཟླ༔ སླར་ཡང་བཀྲ་ཤིས་བྱ་བ་ནི༔ ཧཱུྃ༔ ཆེ་མཆོག་རྡོ་རྗེ་བདུད་འཇོམས་ཀྱི༔ སྐུ་གསུང་ཐུགས་ཡོན་ཕྲིན་ལས་ལ༔ བཀྲ་ཤིས་དགེ་ལེགས་ཇི་སྙེད་པས༔ བདག་ཅག་དགེ་ལེགས་མཛད་དུ་གསོལ༔ སངས་རྒྱས་བསྟན་པ་དར་བ་དང་༔ དམ་ཆོས་མི་ནུབ་རྒྱས་པ་དང་༔ བསྟན་འཛིན་འདོད་དོན་འགྲུབ་པ་དང་༔ སྦྱིན་བདག་མངའ་ཐང་དཔལ་རྒྱས་ཏེ༔ རྒྱལ་ཁམས་བདེ་ལེགས་ཆོས་བཞིན་སྤྱོད༔ ཕུན་སུམ་ཚོགས་པའི་བཀྲ་ཤིས་ཤོག༔ དེ་ནས་དགེ་བསྔོ་བྱ་བ་ནི༔ ཧཱུྃ༔ འདི་དང་དུས་གསུམ་དགེ་བའི་ཚོགས༔ མ་ལུས་བསྡུས་ཤིང་བཟླུམ་ནས་ནི༔ མར་གྱུར་འགྲོ་བ་སེམས་ཅན་རྣམས༔ སངས་རྒྱས་འཐོབ་པའི་རྒྱུ་རུ་བསྔོ༔ བསྔོས་ནས་སྨོན་ལམ་གདབ་པ་ནི༔ ཧཱུྃ༔ དཀོན་མཆོག་རྩ་གསུམ་བདེན་སྟོབས་ཀྱིས༔ བདག་ཅག་རྣལ་འབྱོར་མཆེད་ལྕམ་དྲལ༔ ཡང་གསང་སྒྲུབ་པའི་དཀྱིལ་འཁོར་འདིར༔ གྲོལ་ནས་འཁོར་བ་དོང་སྤྲུགས་ཤོག༔ གདབ་ཅིང་མཐའ་སྡུད་བྱ་བ་ལ༔ ཧཱུྃ་ཧཱུྃ་ཧཱུྃ༔ གདོད་ནས་མ་བཅོས་ལྷུན་གྲུབ་ལྷ༔ སྤྲོས་བྲལ་རྣམ་ཐར་གསུམ་དང་ལྡན༔ སྐུ་ལྔ་ཡེ་ཤེས་ཡོན་ཏན་རྫོགས༔ མ་བཅོས་དེ་བཞིན་ཉིད་ཀྱི་ངང་༔ ཧཱུྃ་ཧཱུྃ་ཧཱུྃ༔ ཕཊ་ཕཊ་ཕཊ༔ རྗེས་སུ་སྤྱོད་པའི་རིམ་པའོ༔ ས་མ་ཡ༔ འདི་ཉིད་ཚུལ་བཞིན་ཉམས་ལེན་པས༔ ཡུལ་ལ་བཀྲ་ཤིས་དགེ་ལེགས་འཕེལ༔ གནས་ལ་བསོད་ནམས་ལོངས་སྤྱོད་རྒྱས༔ དགྲ་ཇག་ཆོམ་རྐུན་ནད་མཚོན་མེད༔ སྒྲུབ་པའི་སྐྱེས་བུ་ཕོ་མོ་རྣམས༔ པད་འབྱུང་ང་དང་གཉིས་སུ་མེད༔ ཚེ་འདིར་མངོན་སངས་རྒྱས་འགྱུར་དུ༔ གདོན་མི་ཟའོ་པདྨའི་བཀའ༔ སྒྲུབ་གཞན་འོ་མའི་རྒྱ་མཚོ་ལ༔ འདི་ནི་སྙིང་པོའི་མར་དང་མཚུངས༔ ས་ཡི་གསེར་དང་སྙིང་གི་ཁྲག༔ ལྟ་བུའི་བཅུད་འདྲིལ་འདི་ཡིན་ཏེ༔ བླ་མ་ལྷ་དང་རང་རིག་གསུམ༔ དབྱེར་མེད་བསྒྲུབ་པའི་ཡང་ཏིག་ཡིན༔ མ་འོངས་བསྐལ་པའི་སྙིགས་མ་ལ༔ གཏིང་དཔོག་མེད་པའི་འོལ་ཚོད་མཁན༔ མཁས་རློམས་ཁ་ལྟ་སྟོང་སྐད་མཁན༔ གཡོ་སྒྱུས་རྒྱུད་དཀྲིས་གཞན་ཁྱད་གསོད༔ བྱི་ལ་ལྟ་བུའི་བཅོས་མར་གདབ༔ བླ་མ་མཆེད་ལྕམ་དགྲ་ལྟར་བསླུ༔ དམ་ཉམས་དྲེད་པོ་བདུད་ཀྱི་རིགས༔ ཁྱོད་ལ་ངེས་དོན་སྐལ་པ་ཆད༔ ང་ཡི་བཀའ་ལ་བསླད་མ་གཞུག༔ སངས་རྒྱས་པདྨ་འབྱུང་གནས་ངས༔ དུས་གསུམ་མཁྱེན་པའི་མངོན་ཤེས་གཟིགས༔ འགྲན་ཟླ་འཇིག་རྟེན་གསུམ་གྱིས་མིན༔ མྱང་འདས་རང་མཚན་པས་ཀྱང་མིན༔ དེ་ཕྱིར་བཀའ་ལ་མི་བསླུ་བའི༔ ཡང་དག་དགོངས་པའི་རྒྱས་བཏབ་ནས༔ བྱིན་རླབས་དངོས་གྲུབ་གཏེར་དུ་བསྔགས༔ སངས་རྒྱས་ཀུན་གྱི་དགོངས་པ་འདུས༔ དམ་ཆོས་ཀུན་གྱི་སྙིང་པོ་དྲིལ༔ དགེ་འདུན་རྒྱ་མཚོའི་སྲོག་བཅུད་འདུས༔ ཡང་ཟབ་བླ་མ་སྒྲུབ་པའི་ཐབས༔ འདི་ལས་ལྷག་པའི་སྒྲུབ་པ་ནི༔ སྟོང་གསུམ་གང་ལ་བཙལ་ཀྱང་མེད༔ བསྒྲུབ་ནས་ཆུད་མི་ཟ་བའི་ཆོས༔ འབྲེལ་ཚད་དོན་ལྡན་འདི་ཁོ་ན༔ སྣོད་ལྡན་བུད་མེད་མཚོ་རྒྱལ་ཁྱོད༔ བཀའ་འདི་གསང་བ་བརྡ་རུ་ཐོབ༔ མ་འོངས་དུས་ཀྱི་སྙིགས་མ་ལ༔ ང་དང་མི་གཉིས་ངའི་སྤྲུལ་པ༔ སྦས་པའི་རྣལ་འབྱོར་ཞིག་པོའི་ཚུལ༔ ཆོས་ཉིད་བདེན་པ་མངོན་གཟིགས་ཤིང་༔ ཆོས་ཀུན་ཀློང་བརྡོལ་གཏེར་གསུམ་འདོམས༔ ལྷུན་གྲུབ་རིག་འཛིན་སྒྱུ་འཕྲུལ་རོལ༔ ཁྲག་འཐུང་རྡོ་རྗེ་གྲོ་བོ་ལོད༔ པདྨའི་གསང་མཛོད་བདག་པོ་འབྱུང་༔ འདི་འཕྲད་རྟེན་འབྲེལ་གནད་ལྡན་ན༔ སྐལ་ལྡན་སྟོང་གི་རིག་འཛིན་བརྙེས༔ མངའ་བདག་རྗེ་འབངས་ཞལ་འཛོམས་གྱུར༔ དེ་ཕྱིར་སྙིང་ཁྲག་ལས་འཕངས་པའི༔ བཀའ་འདི་ཀུན་དགའ་གཞོན་ནུ་དང་༔ རྡོར་ལེགས་གཟའ་བདུད་བཅས་ལ་གཏད༔ སྲུངས་ཤིག་དམ་ཚིག་གཉན་པོའི་རྒྱ༔ དམ་ལྡན་བུ་ལ་བུ་ལྟར་སྐྱོངས༔ དམ་ཉམས་སྲོག་གི་གཤེད་མ་མཛོད༔ བདུད་སྤྲུལ་ལོག་འདྲེན་ཕོ་མོ་སོད༔ མ་གཡེལ་བཛྲ་ས་མ་ཡ༔ བརྡ་ཐིམ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གཉན་རྒྱ༔ པདྨ་འོད་དུ་ཨ་ཐམ་རྒྱ༔ ཨྠིྀ༔ ཞེས་ཨོ་རྒྱན་རྡོ་རྗེ་འཆང་གི་ཡང་གསང་སྲོག་སྒྲུབ་ཟབ་མོ་འདི་ཡང་།ཁྲག་འཐུང་རཀྴ་ཐོད་ཕྲེང་གི་དངོས་སྤྲུལ་རིག་འཛིན་བདུད་འཇོམས་རྡོ་རྗེ་གྲོ་ལོད་རྩལ་གྱིས།ས་མོ་ལུག་གི་ལོ་ཧོར་ཟླ་བཅུ་གཅིག་པའི་ཚེས་བཅུའི་ཉིན་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ནས་བཏོན་ཏེ་མི་ལོ་བཅོ་ལྔའི་བར་དུ་བཀའ་རྒྱས་བཏབ་ནས།མཐར་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་རང་སློབ་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།