TTDL-ZABTER-06-CHA-022

Previous Text Back to Volume Page Next Text

Wylie title
Location	bdud 'joms gling pa zab gter Volume 6, Text 22, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 6: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms bka' brgyad gsang 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	བདེ་གཤེགས་བཀའ་བརྒྱད་གསང་བ་འདུས་པ་ (bde gshegs bka' brgyad gsang ba 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	bka' brgyad

[edit]

དབུ་ཁྲིད་བརྡ་ཡིག༔ ༣༡༧ཟབ་གསང་མཁའ་འགྲོའི་སྙིང་ཐིག་ལས༔ བདེ་གཤེགས་གསང་བ་འདུས་པའི་བསྐང་བ་པདྨའི་ཆུན་པོ་བཞུགས༔ དབུ་ཁྲིད་བརྡ་ཡིག༔ ༣༡༨ན་མོ་གུ་རུ་པདྨ་ཀ་ར་ཡེ༔ ༠༠༠༠༠བརྡ་ཡིག༔ ༣༡༨རྣལ་འབྱོར་ཉམས་ཆག་བསྐང་བ་དང་༔ བསོད་ནམས་ཡེ་ཤེས་ཚོགས་རྫོགས་ཕྱིར༔ བསྐང་བ་པདྨའི་ཆུན་པོ་བསྟན༔ ཕྱི་མཆོད་ཉེར་སྤྱོད་འདོད་ཡོན་དང་༔ ནང་མཆོད་སྨན་གཏོར་རཀྟ་དང་༔ གསང་བ་སྦྱོར་སྒྲོལ་ཟབ་མོའི་རྫས༔ གཞན་ཡང་རི་དྭགས་གཡུང་དྭགས་དང་༔ ཆུ་གནས་བྱ་རིགས་དར་ཟབ་འབྲུ༔ རི་རབ་གླིང་བཞི་གླིང་ཕྲན་དང་༔ དར་ཟབ་ལ་སོགས་རིན་ཆེན་རིགས༔ མ་ཚང་མེད་པར་ཡིད་ཀྱིས་སྤྲུལ༔ ནམ་མཁའ་མཛོད་ཀྱི་འཁོར་ལོར་བརླབས༔ རང་གི་སྙིང་གའི་འོད་ཟེར་གྱིས༔ ཕྱོགས་དུས་རྒྱལ་བ་སྲས་དང་བཅས༔ མཁའ་ཁྱབ་འཁོར་ལོར་སད་པར་བྱས༔ སོ་ཐར་བྱང་སེམས་གསང་སྔགས་ཀྱི༔ སྡོམ་དང་བསླབ་པ་དམ་ཉམས་པ༔ མི་འཆབ་མི་སྦེད་གནོང་འགྱོད་ཀྱིས༔ སྟོབས་བཞི་ལྡན་པའི་ངང་ནས་བཤགས༔ དཀྱིལ་འཁོར་འཁོར་ལོའི་འོད་ཟེར་གྱིས༔ རང་གཞན་སེམས་ཅན་ཐམས་ཅད་ཀྱིས༔ ལས་ཉོན་སྒྲིབ་པ་ཀུན་སྦྱངས་ཏེ༔ ཀུན་ཀྱང་དཔལ་ཆེན་གོ་འཕང་ལ༔ སྐད་ཅིག་ཉིད་ལ་བཀོད་བསམ་སྟེ༔ གདུང་བའི་དབྱངས་ཀྱིས་འདི་སྐད་དོ༔ ཧཱུྃ་ཧྲཱིཿརང་སྣང་རྣམ་དག་བདེ་ཆེན་དག་པའི་ཞིང་༔ སྐུ་དང་ཡེ་ཤེས་བཀོད་པ་རབ་རྫོགས་པ༔ བསམ་གྱིས་མི་ཁྱབ་ཡོན་ཏན་རྒྱ་མཚོའི་གནས༔ འོག་མིན་གནས་དང་ངེས་པ་ལྔ་ལྡན་ཞིང་༔ ཚངས་ཆེན་རྔ་སྒྲ་མི་མཇེད་འཇིག་རྟེན་གྱི༔ གནས་དང་ཉེ་གནས་ཞིང་དང་ཉེ་བའི་ཞིང་༔ དུར་ཁྲོད་བརྒྱད་དང་ཧེ་རུའི་གནས་བཅུ་དང་༔ གནས་ཡུལ་ཉེར་བཞི་སུམ་ཅུ་རྩ་གཉིས་སོགས༔ དག་པའི་ཞིང་ཁམས་བཀོད་པ་བསམ་ཡས་ནས༔ ཀུན་བཟང་རིགས་ལྔ་སེམས་དཔའ་སེམས་མ་དང་༔ ཐུབ་དྲུག་སྒོ་བ་ཡབ་ཡུམ་བརྒྱད་དང་ནི༔ དགའ་རབ་འཇམ་དཔལ་བཤེས་གཉེན་ཤྲཱི་སེང་༔ ཡེ་ཤེས་མདོ་དང་བི་མ་ལ་མི་ཏྲ༔ པད་འབྱུང་ཆོས་རྒྱལ་མཚོ་རྒྱལ་བཻ་རོ་དང་༔ རྗེ་འབངས་ཉེར་ལྔ་གཏེར་ཆེན་བརྒྱ་རྩ་བརྒྱད༔ རིག་འཛིན་རྩ་བརྒྱུད་བླ་མའི་ཚོགས་རྣམས་ཀུན༔ བསྐང་བའི་གནས་འདིར་སྤྱན་འདྲེན་གཤེགས་སུ་གསོལ༔ ཆེ་མཆོག་ཡང་དག་གཤིན་རྗེ་རྟ་མགྲིན་དང་༔ ཕུར་པ་བླ་མེད་རིག་འཛིན་མཆོད་བསྟོད་དང་༔ དམོད་པ་དྲག་སྔགས་དཔལ་གྱི་བཀའ་སྡོད་བཅས༔ བསྐང་བའི་གནས་འདིར་སྤྱན་འདྲེན་གཤེགས་སུ་གསོལ༔ དཔལ་མགོན་ཞིང་སྐྱོང་གཟའ་བདུད་ཤན་པ་དང་༔ དབྱིངས་ཀྱི་རྗེ་མོ་རྒྱལ་པོ་པེ་ཧ་ར༔ དབང་ཕྱུག་རྡོར་ལེགས་རྣམ་ཐོས་སྲས་ལ་སོགས༔ ཟབ་གཏེར་སྤྱི་ཡི་སྲུང་མ་མ་ལུས་པ༔ བསྐང་བའི་གནས་འདིར་སྤྱན་འདྲེན་གཤེགས་སུ་གསོལ༔ ཉི་ཟླ་པདྨའི་གདན་ལ་བཞུགས་སུ་གསོལ༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ ཕྱི་ནང་གསང་གསུམ་འདོད་ཡོན་རྒྱན་གྱིས་མཆོད༔ དུས་གསུམ་ནས་བསགས་སྡིག་ལྟུང་མཐོལ་ཞིང་བཤགས༔ ཐེག་གསུམ་དགེ་ཚོགས་རྒྱ་མཚོར་རྗེས་ཡི་རང་༔ གང་ལ་གང་འདུལ་ཆོས་འཁོར་བསྐོར་བར་བསྐུལ༔ མྱ་ངན་མི་འདའ་རྟག་པར་བཞུགས་གསོལ་འདེབས༔ དགེ་ཚོགས་རྒྱ་མཚོ་འགྲོ་བ་ཡོངས་ལ་བསྔོ༔ ཀུན་ཀྱང་དཔལ་ཆེན་གོ་འཕང་ཐོབ་པར་ཤོག༔ བཛྲ་ས་མ་ཡ་ཛ་ཛ༔ པདྨ་ཀ་མ་ལ་ཡེ་སྟྭཾ༔ སརྦ་ག་ཎ་པཉྩ་པཱུ་ཛ་ཨཱཿཧཱུྃ༔ དེ་ནས་བསྐང་བ་དངོས་ནི༔ ཧཱུྃ་ཧྲཱིཿའོག་མིན་ཆོས་ཀྱི་དབྱིངས་ཀྱི་ཞིང་ཁམས་ནས༔ ཆོས་སྐུ་ཀུན་བཟང་ཡབ་ཡུམ་ཐུགས་དམ་བསྐང་༔ ངེས་པ་ལྔ་ལྡན་ལོངས་སྐུའི་ཞིང་ཁམས་ནས༔ ལོངས་སྐུ་རྒྱལ་བ་རིགས་ལྔའི༴བདེ་སྟོང་འདུ་འབྲལ་མེད་པའི་ཞིང་ཁམས་ནས༔ སྤྲུལ་སྐུ་རྡོ་རྗེ་སེམས་དཔའི༴སྣང་བཞི་མཐར་ཕྱིན་གདོད་མའི་ཞིང་ཁམས་ནས༔ རིག་འཛིན་དགའ་རབ་རྡོ་རྗེའི༴ཟག་བཅས་ཕུང་པོ་འོད་ཀྱི་སྐུར་གྲུབ་པ༔ སློབ་དཔོན་འཇམ་དཔལ་བཤེས་གཉེན༴འོད་གསལ་རྒྱུན་ཆད་མེད་པའི་ཞིང་ཁམས་ནས༔ རིག་འཛིན་ཤྲཱི་སེང་ཧའི༴ཟུང་འཇུག་འཕོ་བ་ཆེན་པོའི་སྐུ་བརྙེས་པ༔ པཎ་ཆེན་བི་མ་མི་ཏྲའི༴སྣང་སྲིད་ཟིལ་གྱིས་གནོན་པའི་དཀྱིལ་འཁོར་ནས༔ རྒྱལ་དབང་པདྨ་ཐོད་ཕྲེང་༴ཆོས་ཉིད་དགོངས་པ་བར་མཚམས་མེད་པའི་ཞིང་༔ ཆོས་རྒྱལ་ཁྲི་སྲོང་ལྡེའུ་བཙན༴འཇའ་ལུས་རྡོ་རྗེ་གྲུབ་པའི་སྐུ་བརྙེས་པ༔ མཁའ་འགྲོ་ཡེ་ཤེས་མཚོ་རྒྱལ༴མཆོག་ཐུན་དངོས་གྲུབ་འབྱུང་བའི་ཞིང་ཁམས་ནས༔ གྲུབ་ཆེན་རྗེ་འབངས་ཉེར་ལྔའི༴འགྲོ་དོན་རྒྱུན་ཆད་མེད་པའི་ཞིང་ཁམས་ནས༔ གཏེར་སྟོན་བརྒྱ་དང་རྩ་བརྒྱད༴སྣང་སྲིད་ཆོས་སྐུར་རྫོགས་པའི་ཞིང་ཁམས་ནས༔ གར་དབང་བདུད་འཇོམས་རྡོ་རྗེའི༴སྤྱི་གཙུག་བདེ་ཆེན་འཁོར་ལོའི་ཞིང་ཁམས་ནས༔ དྲིན་ཆེན་རྩ་བརྒྱུད་བླ་མའི༴ཕྱི་མཆོད་ཉེར་སྤྱོད་བདུན་གྱིས་ཐུགས༴ནང་མཆོད་འདོད་ཡོན་ལྔ་ཡིས༴གསང་མཆོད་སྨན་རཀ་གཏོར་མས༴ཡང་གསང་སྦྱོར་སྒྲོལ་མཆོད་པས༴དར་ཟབ་འབྲུ་སྣ་གོས་ཀྱིས༴རི་དྭགས་གཡུང་དྭགས་ཚོགས་ཀྱིས༴ཆུ་གནས་བྱ་རིགས་ཚོགས་ཀྱིས༴བསྐང་བ་མེད་དེ་ཁམས་གསུམ་ཡོངས་ཀྱིས་བསྐང་༔ སྦྱོར་དུ་མེད་དེ་ཟུང་འཇུག་ཆེན་པོར་སྦྱོར༔ སྒྲོལ་དུ་མེད་དེ་མཉམ་ཉིད་ཆེན་པོར་སྒྲོལ༔ ཡེ་སྦྱོར་ཡེ་མཆོད་ཆེན་པོས་ཐུགས་དམ་བསྐང་༔ ཧཱུྃ་ཧྲཱིཿཞི་བ་ལྷུན་གྱིས་གྲུབ་པའི་དཀྱིལ་འཁོར་ནས༔ བཞི་བཅུ་རྩ་གཉིས་རྒྱལ་བའི་ཐུགས་དམ་བསྐང་༔ གཞི་དབྱིངས་བདེ་ཆེན་འགྱུར་མེད་ཞིང་ཁམས་ནས༔ ཀུན་ཁྱབ་ཀུན་གཟིགས་ཡབ་ཡུམ༴དབུས་ཕྱོགས་སྟུག་པོ་བཀོད་པའི་ཞིང་ཁམས་ནས༔ རྣམ་སྣང་དབྱིངས་ཕྱུག་ཡབ་ཡུམ༴ཤར་ཕྱོགས་མངོན་པར་དགའ་བའི་ཞིང་ཁམས་ནས༔ མི་བསྐྱོད་མཱ་ཀཱི་ཡབ་ཡུམ༴ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས༔ རིན་འབྱུང་སྤྱན་མ་ཡབ་ཡུམ༴ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ སྣང་མཐའ་གོས་དཀར་ཡབ་ཡུམ༴བྱང་ཕྱོགས་ལས་རབ་གྲུབ་པའི་ཞིང་ཁམས་ནས༔ དོན་གྲུབ་སྒྲོལ་མ་ཡབ་ཡུམ༴ཚོགས་བརྒྱད་གནས་དག་ས་བཅུའི་ཞིང་ཁམས་ནས༔ བྱང་ཆུབ་སེམས་དཔའ་བརྒྱད་ཀྱི༴ཡུལ་བརྒྱད་གནས་དག་རྒྱལ་བ་མཆོད་པའི་ཞིང་༔ བྱང་ཆུབ་སེམས་མ་བརྒྱད་ཀྱི༴ཚད་མེད་བཞི་ལྡན་ཡེ་ཤེས་དཀྱིལ་འཁོར་ནས༔ ལས་བྱེད་སྒོ་བ་བཞི་ཡི༴ཕྲིན་ལས་རྣམ་བཞི་ལྷུན་གྲུབ་དཀྱིལ་འཁོར་ནས༔ ལས་མཛད་སྒོ་མ་བཞི་ཡི༴འགྲོ་བ་རིགས་དྲུག་རིམ་གྱིས་བསྒྲལ་མཛད་པ༔ སྤྲུལ་སྐུ་ཐུབ་པ་དྲུག་གི༴ཕྱི་མཆོད་ཉེར་སྤྱོད་བདུན་གྱིས་ཐུགས༴ནང་མཆོད་འདོད་ཡོན་ལྔ་ཡིས༴གསང་མཆོད་སྨན་རཀ་གཏོར་མས༴ཡང་གསང་སྦྱོར་སྒྲོལ་མཆོད་པས༴དར་ཟབ་འབྲུ་སྣ་གོས་ཀྱིས༴རི་དྭགས་གཡུང་དྭགས་ཚོགས་ཀྱིས༴ཆུ་གནས་བྱ་རིགས་ཚོགས་ཀྱིས༴བསྐང་བ་མེད་དེ་ཁམས་གསུམ་ཡོངས་ཀྱིས་བསྐང་༔ སྦྱོར་དུ་མེད་དེ་ཟུང་འཇུག་ཆེན་པོར་སྦྱོར༔ སྒྲོལ་དུ་མེད་དེ་མཉམ་ཉིད་ཆེན་པོར་སྒྲོལ༔ ཡེ་སྦྱོར་ཡེ་མཆོད་ཆེན་པོས་ཐུགས་དམ་བསྐང་༔ ཧཱུྃ་ཧྲཱིཿཁྲོ་བོ་རོལ་པའི་དུར་ཁྲོད་ཆེན་པོ་ནས༔ ལྔ་བཅུ་རྩ་བརྒྱད་ཁྲོ་བོའི་ཐུགས་དམ་བསྐང་༔ ཧཱུྃ༔ སྨུག་ནག་གྲུ་གསུམ་འབར་བའི་དཀྱིལ་འཁོར་ནས༔ ཆེ་མཆོག་ཧེ་རུ་ཀ་ཡི་ཐུགས༴གཉིས་མེད་བདེ་སྦྱོར་འཁོར་འདས་མཁར་སྡུད་མ༔ གནམ་ཞལ་དབྱིངས་ཕྱུག་མ་ཡི༴སྙིང་རྗེ་ཞི་ལ་ཁྲོས་པའི་སྐུར་བཞེངས་པ༔ རཀྴ་ཧེ་རུ་ཡབ་ཡུམ༴བྱམས་པ་ཆེན་པོས་འགྲོ་ཀུན་རྗེས་སུ་འཛིན༔ གུ་ཧྱ་ཧེ་རུ་ཡབ་ཡུམ༴འགྲོ་ཁམས་མ་ལུས་དབང་དུ་སྡུད་མཛད་པ༔ བྷི་ཤ་ཧེ་རུ་ཡབ་ཡུམ༴ཕྲིན་ལས་དྲག་པོས་དགྲ་བགེགས་སྒྲོལ་མཛད་པ༔ ཡཀྴ་ཧེ་རུ་ཡབ་ཡུམ༴ལྷ་གདོན་ཟིལ་གནོན་ཡེ་ཤེས་ཁྲོས་པའི་རྒྱལ༔ ཧཱུྃ་ཀཱར་མདའ་གཞུ་འཛིན་པའི༴ཤར་ཕྱོགས་དྲི་ཟ་ཟིལ་གནོན་ཁྲོས་པའི་རྒྱལ༔ རྣམ་རྒྱལ་ཏྲི་ཤུལ་འཛིན་པའི༴ཤར་ལྷོ་མེ་ལྷ་ཟིལ་གནོན་ཁྲོས་པའི་རྒྱལ༔ དབྱུག་སྔོན་དབྱུག་ཏོ་འཛིན་པའི༴ལྷོ་ཕྱོགས་གཤིན་རྗེ་ཟིལ་གནོན་ཁྲོས་པའི་རྒྱལ༔ གཤེད་པོ་བེ་ཅོན་འཛིན་པའི༴ལྷོ་ནུབ་སྲིན་པོ་ཟིལ་གནོན་ཁྲོས་པའི་རྒྱལ༔ མི་གཡོ་རྡོ་རྗེ་འཛིན་པའི༴ནུབ་ཕྱོགས་ཆུ་ལྷ་ཟིལ་གནོན་ཁྲོས་པའི་རྒྱལ༔ དབང་ཆེན་གྲི་ཐོད་འཛིན་པའི༴ནུབ་བྱང་རླུང་ལྷ་ཟིལ་གནོན་ཁྲོས་པའི་རྒྱལ༔ འདོད་རྒྱལ་བ་དན་འཛིན་པའི༴བྱང་ཕྱོགས་གནོད་སྦྱིན་ཟིལ་གནོན་ཁྲོས་པའི་རྒྱལ༔ བདུད་འཁྱིལ་རྒྱ་གྲམ་འཛིན་པའི༴བྱང་ཤར་དབང་ལྡན་ཟིལ་གནོན་ཁྲོས་པའི་རྒྱལ༔ ཁམས་གསུམ་ཁ་ཊྭཱྃ་འཛིན་པའི༴འོག་ཕྱོགས་ས་བདག་ཟིལ་གནོན་ཁྲོས་པའི་རྒྱལ༔ སྟོབས་ཆེན་ཐོ་བ་འཛིན་པའི༴དགྲ་བགེགས་གདུག་ཅན་བསྒྲལ་བའི་བམ་སྟེང་ནས༔ དཔལ་གྱི་ལྕེ་སྤྱང་མ་བརྒྱད༴ཕྱི་མཆོད་ཉེར་སྤྱོད་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿཆོས་ཉིད་མི་འགྱུར་ཨེ་ཡི་དཀྱིལ་འཁོར་ནས༔ ཡང་དག་ཁྲོས་པའི་རྒྱལ་པོའི་ཐུགས་དམ་བསྐང་༔ གཉིས་མེད་བདེ་སྟོང་བསྐྱེད་མཛད་ཁྲོ་མོ་ཡུམབཛྲ་ཀྲོ་ཏི་མ་ཡི༴ས་ཁམས་གཏི་མུག་རྟོག་པ་གཞོམ་མཛད་པ༔ བུདྡྷ་ཧེ་རུ་ཡབ་ཡུམ༴ནམ་མཁའ་ཞེ་སྡང་རྟོག་པ་གཞོམ་མཛད་པ༔ བཛྲ་ཧེ་རུ་ཡབ་ཡུམ༴ཆུ་ཁམས་ང་རྒྱལ་རྟོག་པ་གཞོམ་མཛད་པ༔ རཏྣ་ཧེ་རུ་ཡབ་ཡུམ༴མེ་ཁམས་འདོད་ཆགས་རྟོག་པ་གཞོམ་མཛད་པ༔ པདྨ་ཀྲོ་ཏ་ཡབ་ཡུམ༴རླུང་ཁམས་ཕྲག་དོག་རྟོག་པ་གཞོམ་མཛད་པ༔ ཀརྨ་ཧེ་རུ་ཡབ་ཡུམ༴ཀཽ་རཱི་ཙཽ་རཱི་པྲ་མོ་བཻ་ཏ་ལི༔ པུསྐ་གསྨ་སྨེ་ཤ་ཙནྡྷ་ལཱི༔ ཀཽ་རཱི་མ་མོ་བརྒྱད་ཀྱི༴སེང་ཧ་བྱ་གྲི་སྲི་ལ་ཤྭ་ན་མ༔ ཀྲི་ཏ་ཀང་ཀ་ཁ་ཁ་ཧུ་ལུ་མ༔ ཕྲ་མེན་སེང་ཧ་བརྒྱད་ཀྱི༴རྟ་གདོང་ཕག་གདོང་སྤྲེལ་གདོང་སྤྱང་གདོང་མ༔ ཡེ་ཤེས་སྒོ་མ་བཞི་ཡི༴དབང་ཕྱུག་ཆེན་མོ་ཉི་ཤུ་རྩ་བརྒྱད་སོགས༔ བཀའ་སྡོད་སྲུང་མའི་ཚོགས་ཀྱི༴ཕྱི་མཆོད་ཉེར་སྤྱོད་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿསེར་ནག་གྲུ་གསུམ་འབར་བའི་དཀྱིལ་འཁོར་ནས༔ འཇམ་དཔལ་གཤིན་རྗེ་གཤེད་ཀྱི་ཐུགས་དམ་བསྐང་༔ གཉིས་མེད་བདེ་སྦྱོར་ཆོས་ཉིད་མཁའ་རུ་སྡུད༔ གསོད་བྱེད་དུར་ཁྲོད་བདག་མོའི༴གཟུང་འཛིན་རྟོག་པ་ཆོས་སྐུའི་དབྱིངས་སུ་སྒྲོལ༔ སྒྲོལ་ཡུམ་ཨེ་ཀ་ཙ་ཏིའི༴འགྲོ་བའི་སྲོག་དབུགས་སྡུད་མཛད་ཁྲོས་པའི་གཟུགས༔ ཡ་མ་རཱ་ཛ་ཡབ་ཡུམ༴དམ་ཉམས་དགྲ་ལ་གློ་བུར་ཧུར་ཐུམ་འགྱེད༔ མྱོས་བྱེད་འབར་བ་ཡབ་ཡུམ༴ཁམས་གསུམ་འགྲོ་བའི་བླ་སྲོག་སྡུད་མཛད་པ༔ ཨཱཪྻ་མེ་རུ་ཡབ་ཡུམ༴དམ་ཉམས་དགྲ་ལ་འཇིགས་གཟུགས་ཆོ་འཕྲུལ་འགྱེད༔ རལ་པ་ཚར་དགུ་ཡབ་ཡུམ༴གཤིན་རྗེའི་བཀའ་ཉན་སྒྲོལ་བའི་ལས་བྱེད་མ༔ གསོད་བྱེད་འབར་མ་བཞི་ཡི༴ཡེ་ཤེས་གཅིག་ལ་ལྡོག་པ་ཐ་དད་ཚུལ༔ ཐབས་རྣམ་དུ་མས་འགྲོ་བ་བདེ་ལ་འགོད༔ ཕྱོགས་སྐྱོང་བཅུ་གཉིས་རང་རང་ལས་བྱེད་དང་༔ སྤྲུལ་དང་ཡང་སྤྲུལ་བཅས་པའི༴ཕྲིན་ལས་བཞི་སྒྲུབ་སྒོ་བ་བཞི་དང་ནི༔ བདུད་བཞི་གིང་བཞི་རྩིས་བཞི་ཤྭ་ཐོགས་བཞི༔ ཤན་པ་བཞི་དང་སྲོག་གཅོད་མ་མོ་བཞི༔ འཇམ་དཔལ་སྐུ་ཡི་ལྷ་ཚོགས༴ཕྱི་མཆོད་ཉེར་སྤྱོད་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿབདེ་ཆེན་རོལ་པ་དབང་གི་གཞལ་ཡས་ནས༔ ཁྲོ་རྒྱལ་རྟ་མགྲིན་རྒྱལ་པོའི་ཐུགས་དམ་བསྐང་༔ གཉིས་མེད་ཡུམ་ཆེན་བདེ་བ་སྦྱོར་མཛད་མ༔ པདྨ་གཟི་ལྡན་ཁྲོ་མོའི༴ཡབ་ཡུམ་བཀའ་ཉན་ཕྲིན་ལས་བསྒྲུབ་མཛད་པའི༔ བྱི་ལ་པུ་ཤད་མགོ་ཅན༴ཁྲོ་རྒྱལ་ཆེན་པོའི་ཕྲིན་ལས་རོལ་པའི་གར༔ ཞི་བ་ཟིལ་གནོན་ཡབ་ཡུམ༴ཁྲོ་བོ་ཟིལ་གནོན་ཡབ་ཡུམ་ཐུགས༴མ་མོ་ཟིལ་གནོན་ཡབ་ཡུམ༴ཁྱུང་ཆེན་ཟིལ་གནོན་ཡབ་ཡུམ༴ཕོ་རྒྱུད་ཟིལ་གནོན་ཡབ་ཡུམ༴མོ་རྒྱུད་ཟིལ་གནོན་ཡབ་ཡུམ༴གཤིན་རྗེ་ཟིལ་གནོན་ཡབ་ཡུམ༴ཀླུ་རྣམས་ཟིལ་གནོན་ཡབ་ཡུམ༴གཟའ་བདུད་ཟིན་གནོན་ཡབ་ཡུམ༴སྒོ་མ་ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཁམས་བརྒྱ་མ་དྲུག་དམུས་ལོང་བཅུ་དྲུག་དང་༔ ཁྱི་བརྒྱད་སྤྱང་བརྒྱད་མེ་འབྲུག་རླུང་འབྲུག་སོགས༔ པདྨ་གསུང་གི་ལྷ་ཚོགས༴ཕྱི་མཆོད་ཉེར་སྤྱོད་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿལྗང་ནག་གྲུ་གསུམ་འབར་བའི་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུའི་ཐུགས་དམ་བསྐང་༔ འཁོར་འདས་ཆོས་ཉིད་དབྱིངས་སུ་སྦྱོར་མཛད་མ༔ ཡུམ་མཆོག་འཁོར་ལོ་རྒྱས་འདེབས༴གཟུང་འཛིན་རྟོག་པ་མཉམ་ཉིད་དབྱིངས་སུ་སྒྲོལ༔ སྒྲོལ་ཡུམ་ཨེ་ཀ་ཙ་ཏིའི༴སྐུ་དང་གཉིས་མེད་སྐུ་ལས་སྤྲུལ་པའི་སྲས༔ བུདྡྷ་ཀཱི་ལ་ཡ་ཡི༴ཐུགས་དང་དབྱེར་མེད་ཐུགས་ལས་སྤྲུལ་པའི་སྲས༔ བཛྲ་ཀཱི་ལ་ཡ་ཡི༴ཡོན་ཏན་དབྱེར་མེད་ཡོན་ཏན་སྤྲུལ་པའི་སྲས༔ རཏྣ་ཀཱི་ལ་ཡ་ཡི༴གསུང་དང་དབྱེར་མེད་གསུང་ལས་སྤྲུལ་པའི་སྲས༔ པདྨ་ཀཱི་ལ་ཡ་ཡི༴ཕྲིན་ལས་དབྱེར་མེད་ཕྲིན་ལས་སྤྲུལ་པའི་སྲས༔ ཀརྨ་ཀཱི་ལ་ཡ་ཡི༴སྟེང་གདོན་འདུལ་མཛད་ཁྲོ་ཆེན་ཧཱུྃ་ཀཱ་ར༔ ཡུམ་དང་ཟ་གསོད་བཅས་པའི༴དྲི་ཟ་འདུལ་མཛད་ཁྲོ་ཆེན་རྣམ་པར་རྒྱལ༔ ཡུམ་དང་ཟ་གསོད་བཅས་པའི༴མེ་ལྷ་འདུལ་མཛད་ཁྲོ་ཆེན་དབྱུག་སྔོན་ཅན༔ ཡུམ་དང་ཟ༴གཤིན་རྗེ་འདུལ་མཛད་ཁྲོ་ཆེན་གཤིན་རྗེ་གཤེད༔ ཡུམ་དང་ཟ༴སྲིན་པོ་འདུལ་མཛད་ཁྲོ་ཆེན་མི་གཡོ་མགོན༔ ཡུམ་དང་ཟ༴ཆུ་ལྷ་འདུལ་མཛད་ཁྲོ་ཆེན་རྟ་མགྲིན་རྒྱལ༔ ཡུམ་དང་ཟ༴རླུང་ལྷ་འདུལ་མཛད་ཁྲོ་ཆེན་འདོད་པའི་རྒྱལ༔ ཡུམ་དང་ཟ༴གནོད་སྦྱིན་འདུལ་མཛད་ཁྲོ་ཆེན་བདུད་རྩི་འཁྱིལ༔ ཡུམ་དང་ཟ༴དབང་ལྡན་འདུལ་མཛད་ཁྲོ་ཆེན་ཁམས་གསུམ་རྒྱལ༔ ཡུམ་དང་ཟ༴ས་བདག་འདུལ་མཛད་ཁྲོ་ཆེན་སྟོབས་པོ་ཆེ༔ ཡུམ་དང་ཟ༴སྐུ་གསུང་ཐུགས་ལས་སྤྲུལ་པའི་སྲས་མཆོག་དཔལ༔ ཁྲ་ཐབས་ཉི་ཤུ་རྩ་གཅིག༴དཔལ་གྱི་བཀའ་བཞིན་ཕྲིན་ལས་རབ་འབྱམས་སྒྲུབ༔ ཤྭ་ན་ས་བདག་རེ་ཏཱི་སྐྱེས་བུ་བཞི༔ དབང་ཕྱུག་ཉེར་བརྒྱད་སྒོ་མ་གིང་ལང་ཀ༔ ཕུར་པ་ཕྲིན་ལས་ལྷ་ཚོགས་ཐུགས༴ཕྱི་མཆོད་ཉེར་སྤྱོད་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿམ་མོ་རོལ་པའི་དུར་ཁྲོད་ཆེན་པོ་ནས༔ མངོན་རྫོགས་ཧེ་རུ་ཀ་ཡི་ཐུགས་དམ་བསྐང་༔ གཉིས་མེད་བདེ་སྦྱོར་སྟོང་ཆེན་དབྱིངས་ཀྱི་བདག༔ ཉིད་བཞི་མུ་ཁ་ལེ་ཡི༴སྐུ་དང་དབྱེར་མེད་མཆོག་གི་དངོས་གྲུབ་སྟེར༔ རྟག་རྒྱལ་རྣམ་སྣང་གསལ་གྱི༴གསུང་དང་དབྱེར་མེད་ཕྲིན་ལས་རབ་འབྱམས་བསྒྲུབ༔ འོད་གསལ་ཁྱབ་བརྡལ་མ་ཡི༴ཐུགས་དང་དབྱེར་མེད་འཁོར་པ་ཆོས་སྐུར་གྲོལ༔ གཉན་གསལ་འོད་འཕྲོ་མ་ཡི༴ཡོན་ཏན་དབྱེར་མེད་ཚེ་ཡི་དངོས་གྲུབ་སྟེར༔ ཡང་གསང་སྟོང་ཁམས་བདག་མོའི༴ཕྲིན་ལས་དབྱེར་མེད་འགྲོ་ཁམས་དོང་ནས་སྤྲུགས༔ བཀྲག་གསལ་རྒྱན་བཟང་མ་ཡི༴གཞན་ཡང་ཡེ་ཤེས་པ་དང་འཇིག་རྟེན་ཚུལ༔ ལེགས་ཉེས་ཤན་འབྱེད་སྟོན་མཛད་མ་མོའི་སྡེ༔ སྲིད་པ་བདེ་འགྲོ་མ་ཡི༴ཉི་ཟླ་ཐོད་ཕྲེང་མ་ཡི༴རྡོ་རྗེ་ཉི་མ་ཁྲོས་པའི༴སྲིད་གསུམ་བདེ་སྦྱོར་ཁྲོས་པའི༴པདྨ་ཁྲག་འཐུང་ཁྲོས་པའི༴ཁམས་གསུམ་འཚོ་བྱེད་ཁྲོས་པའི༴དབྱིངས་ཕྱུག་ནོར་གྱི་བདག་མོའི༴རྒྱན་གྱི་རྒྱལ་མོ་གསལ་བྱེད༴བདག་ཉིད་མ་མོ་ཆེན་མོའི༴གཅིག་པུ་འགྲོ་སྲོག་སྡུད་པའི༴དཀར་མོ་མིག་གཅིག་མ་ཡི༴ནག་མོ་རལ་གཅིག་མ་ཡི༴དམར་མོ་དབང་སྡུད་མ་ཡི༴སེར་མོ་ལས་མཁན་མ་ཡི༴སྲིད་པ་ཆགས་སྙོམས་མ་ཡི༴རྣལ་འབྱོར་སྲིད་གསུམ་དབང་བྱེད༴མ་མོ་ཨེ་ཀ་ཙ་ཏིའི༴ཨེ་ཀ་ཙ་ར་མ་ཡི༴མདོག་བཟང་བདུད་ཀྱི་ལྕམ་གཅིག༴མདོག་བཟང་སྲིད་འདེགས་མ་ཡི༴མདོག་བཟང་སྤྱི་འགྲོ་མ་ཡི༴དཀར་མོ་མཆེ་གཅིག་མ་ཡི༴ནག་མོ་ཁ་འཕྱལ་མ་ཡི༴དམར་མོ་མཆུ་འཇིབ་མ་ཡི༴སེར་མོ་རྐང་ལྡག་མ་ཡི༴ཧར་ཏིང་དཀར་མོ་གྲུ་འདེགས༴ཏུན་ཏིང་ནག་མོ་གྲུ་འདེགས༴ཤན་ཏིང་དམར་མོ་གྲུ་འདེགས༴གྲུབ་ཏིང་སེར་མོ་གྲུ་འདེགས༴རྡོ་རྗེ་ཀུན་གྲགས་མ་ཡི༴རྡོ་རྗེ་ཀུན་བཟང་མ་ཡི༴རྡོ་རྗེ་རྟག་སྙེམས་མ་ཡི༴རྡོ་རྗེ་ཡེ་ཤེས་ཆེན་མོའི༴རྡོ་རྗེ་འོད་གསལ་ཆེན་མོའི༴རྡོ་རྗེ་གསལ་འཕྲོ་མ་ཡི༴རྡོ་རྗེ་གཡུ་སྒྲོན་མ་ཡི༴མ་མོ་རྣམས་ཀྱིས་ལས་ཀུན་ཐོགས་མེད་སྒྲུབ༔ སྲིང་མོ་བཞི་དང་ཡང་གབ་མཆེད་བཞི་དང་༔ སྦས་པའི་མ་བཞི་གདོང་མོ་མཆེད་སྡེ་བཞི༔ གཙིག་གི་མ་གསུམ་ཕུང་བྱེད་མ་གསུམ་དང་༔ དབང་མོ་ཉེར་བརྒྱད་དཀྱིལ་འཁོར་མཐའ་སྐྱོང་ཚོགས༔ རྦོད་གཏོང་མ་མོའི་ལྷ་ཚོགས༴ཕྱི་མཆོད་ཉེར་སྤྱོད་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿརིག་འཛིན་རོལ་པའི་དུར་ཁྲོད་ཆེན་པོ་ནས༔ རྡོ་རྗེ་རྒྱལ་པོ་ཆོས་ཀྱི་ཐུགས་དམ་བསྐང་༔ གཉིས་མེད་བདེ་སྟོང་སྦྱོར་མཛད་རིགས་ཀྱི་ཡུམ༔ རང་སྣང་གཉིས་མེད་ཡུམ་གྱི༴འཇམ་དཔལ་སྐུ་ཡི་རྣལ་འབྱོར་རིག་པ་འཛིན༔ མཉྫུ་མི་ཏྲ་ཡབ་ཡུམ༴པདྨ་གསུང་གི་རྣལ་འབྱོར་རིག་པ་འཛིན༔ ཀླུ་སྒྲུབ་སྙིང་པོ་ཡབ་ཡུམ༔ ཡང་དག་ཐུགས་ཀྱི་རྣལ་འབྱོར་རིག་པ་འཛིན༔ ཧཱུྃ་ཆེན་ཀཱ་ར་ཡབ་ཡུམ༴ཆེ་མཆོག་ཡོན་ཏན་རྣལ་འབྱོར་རིག་པ་འཛིན༔ པདྨ་ཐོད་ཕྲེང་ཡབ་ཡུམ༴ཕུར་པ་ཕྲིན་ལས་རྣལ་འབྱོར་རིག་པ་འཛིན༔ པྲ་བྷ་ཧསྟི་ཡབ་ཡུམ༴མ་མོ་རྦོད་གཏོང་རྣལ་འབྱོར་རིག་པ་འཛིན༔ དྷ་ན་སཾསྐྲྀ་ཡབ་ཡུམ༴རིག་འཛིན་སློབ་དཔོན་རྣལ་འབྱོར་རིག་པ་འཛིན༔ བི་མ་མི་ཏྲ་ཡབ་ཡུམ༴འཇིག་རྟེན་མཆོད་བསྟོད་རྣལ་འབྱོར་རིག་པ་འཛིན༔ ཤཱནྟིཾ་གརྦྷ་ཡབ་ཡུམ༴དམོད་པ་དྲག་སྔགས་རྣལ་འབྱོར་རིག་པ་འཛིན༔ རམ་བུ་གུ་ཧྱ་ཡབ་ཡུམ༴ཞི་བའི་ལས་མཛད་རྡོ་རྗེ་མཁའ་འགྲོ་མ༔ འབུམ་ཕྲག་ཡངས་པའི་ཚོགས་ཀྱི༴རྒྱས་པའི་ལས་མཛད་རིན་ཆེན་རིགས་ཀྱི་ཡུམ༔ འབུམ་ཕྲག་ཡངས་པའི་ཚོགས་ཀྱི༴དབང་གི་ལས་མཛད་པདྨ་རིགས་ཀྱི་ཡུམ༔ འབུམ་ཕྲག་ཡངས་པའི་མཁའ་འགྲོའི༴དྲག་པོའི་ལས་མཛད་ཀརྨ་རིགས་ཀྱི་ཡུམ༔ འབུམ་ཕྲག་ཡངས་པའི་མཁའ་འགྲོའི༴གདུག་པ་འདུལ་མཛད་ལས་གིང་ཁྱོ་ཤུགས་བཅས༔ རིག་འཛིན་བླ་མའི་ལྷ་ཚོགས༴ཕྱི་མཆོད་ཉེར་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿམཆོད་བསྟོད་རོལ་པའི་དུར་ཁྲོད་ཆེན་པོ་ནས༔ གསང་བདག་དྲེགས་པ་ཀུན་འདུལ་ཐུགས་དམ་བསྐང་༔ དེ་དང་གཉིས་མེད་སྦྱོར་བའི་ཡུམ་ཆེན་མོ༔ ཁྲོ་མོ་ཁམས་གསུམ་སྤྱི་གདུལ༴སྣང་སྲིད་ཕོ་རྒྱུད་ཡོངས་ཀྱི་དེད་དཔོན་མཆོག༔ དབང་ཕྱུག་མ་ཧཱ་དཱེ་ཝའི༴སྣང་སྲིད་མོ་རྒྱུད་ཡོངས་ཀྱི་དེད་དཔོན་མཆོག༔ ལྷ་མོ་ཨུ་མ་དཱེ་ཝིའི༴སྣང་སྲིད་གཤིན་རྗེའི་ཡོངས་ཀྱི་དེད་དཔོན་མཆོག༔ ལས་གཤིན་ཡ་མ་རཱ་ཛའི༴གཤིན་རྗེ་མོ་རྒྱུད་ཡོངས་ཀྱི་དེད་དཔོན་མཆོག༔ གསོད་བྱེད་ནག་མོ་ཡུམ་གྱི༴སྣང་སྲིད་མ་མོ་ཡོངས་ཀྱི་དེད་དཔོན་མཆོག༔ མ་མོ་སྲིད་པའི་རྒྱལ་མོའི༴སྔགས་སྲུང་སྨུག་ནག་འབུམ་གྱི་དེད་དཔོན་མཆོག༔ སྔགས་སྲུང་ཨེ་ཀ་ཙ་ཏིའི༴སྣང་སྲིད་བདུད་རྣམས་ཡོངས་ཀྱི་དེད་དཔོན་མཆོག༔ བདུད་པོ་སྐོས་རྗེ་བྲང་དཀར༴སྣང་སྲིད་བདུད་མོ་ཡོངས་ཀྱི་དེད་དཔོན་མཆོག༔ བདུད་མོ་རེ་མ་ཏཱི་ཡི༴སྣང་སྲིད་རྒྱལ་པོ་ཡོངས་ཀྱི་དེད་དཔོན་མཆོག༔ རྒྱལ་པོ་པེ་ཧ་ར་ཡི༴གིང་ཕོ་གིང་མོ་ཡོངས་ཀྱི་དེད་དཔོན་མཆོག༔ སྲོག་བདག་ཚངས་པ་དཀར་པོའི༴སྣང་སྲིད་དགྲ་ལྷ་ཡོངས་ཀྱི་དེད་དཔོན་མཆོག༔ དགྲ་ལྷ་སྐུ་རྗེ་གསང་བའི༴སྣང་སྲིད་གཟའ་རྣམས་ཡོངས་ཀྱི་དེད་དཔོན་མཆོག༔ གཟའ་བདུད་རཱ་ཧུ་ལ་ཡི༴སྲིན་པོ་མི་ཟན་ཡོངས་ཀྱི་དེད་དཔོན་མཆོག༔ ནག་པོ་གློག་གི་ཕྲེང་ཅན༴སྲིན་མོ་གསོད་བྱེད་ཡོངས་ཀྱི་དེད་དཔོན་མཆོག༔ སྦལ་མགོ་ཁྲག་མིག་མ་ཡི༴སྣང་སྲིད་གནོད་སྦྱིན་ཡོངས་ཀྱི་དེད་དཔོན་མཆོག༔ གནོད་སྦྱིན་ཡཀྴ་མེ་དབལ༴གནོད་སྦྱིན་མ་མོ་ཡོངས་ཀྱི་དེད་དཔོན་མཆོག༔ གནོད་སྦྱིན་མོན་མོ་ནག་མོའི༴ཆོས་སྐྱོང་མགོན་པོ་ཡོངས་ཀྱི་དེད་དཔོན་མཆོག༔ དཔལ་ལྡན་མ་ཧཱ་ཀཱ་ལའི༴རཱུ་ཏྲ་རིག་འཛིན་ཡོངས་ཀྱི་དེད་དཔོན་མཆོག༔ བན་ཆེན་རྡོ་རྗེ་བདུད་བདུལ༴སྣང་སྲིད་དམུ་བདུད་ཡོངས་ཀྱི་དེད་དཔོན་མཆོག༔ དམུ་བདུད་ནག་པོ་བཀྲག་མེད༴སྣང་སྲིད་མུ་སྟེགས་ཡོངས་ཀྱི་དེད་དཔོན་མཆོག༔ མུ་སྟེགས་གུ་ལང་ནག་པོའི༴སྣང་སྲིད་ལྷ་རྣམས་ཡོངས་ཀྱི་དེད་དཔོན་མཆོག༔ སྲིད་པའི་ལྷ་རབས་ཤམ་པོའི༴སྣང་སྲིད་སྨན་མོ་ཡོངས་ཀྱི་དེད་དཔོན་མཆོག༔ གནམ་སྨན་ཐོག་གི་བུ་ཡུག༴སྣང་སྲིད་མ་སངས་ཡོངས་ཀྱི་དེད་དཔོན་མཆོག༔ སྤྱི་བདུད་རྒྱལ་པོ་དགུ་རིམ༴སྣང་སྲིད་བཙན་རྣམས་ཡོངས་ཀྱི་དེད་དཔོན་མཆོག༔ སྲོག་བཙན་མི་ཟན་དམར་པོའི༴སྣང་སྲིད་ཐེའུ་རང་ཡོངས་ཀྱི་དེད་དཔོན་མཆོག༔ སྐྱེས་བུ་གནམ་ཐིལ་དཀར་པོའི༴སྣང་སྲིད་འགོང་པོ་ཡོངས་ཀྱི་དེད་དཔོན་མཆོག༔ འགོང་པོ་ཁུ་ལེ་ལག་དགུའི༴སྣང་སྲིད་བགེགས་རྣམས་ཡོངས་ཀྱི་དེད་དཔོན་མཆོག༔ བགེགས་རྒྱལ་བཱི་ན་ཡ་གའི༴སྣང་སྲིད་མཁའ་འགྲོ་ཡོངས་ཀྱི་དེད་དཔོན་མཆོག༔ ནག་མོ་མགྱོགས་བྱེད་མ་ཡི༴སྣང་སྲིད་ཀླུ་རྣམས་ཡོངས་ཀྱི་དེད་དཔོན་མཆོག༔ ཀླུ་བརྒྱད་ནག་པོ་མགོ་དགུའི༴སྣང་སྲིད་ཀླུ་མོ་ཡོངས་ཀྱི་དེད་དཔོན་མཆོག༔ ཀླུ་མོ་ཡཀྴ་ནག་མོའི༴དཀྱིལ་འཁོར་མཐའ་སྐྱོང་ཕྲིན་ལས་ཐོགས་མེད་སྒྲུབ༔ བཀའ་སྡོད་དམ་ཅན་རྒྱ་མཚོའི༴ཕྱི་མཆོད་ཉེར་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿདྲག་སྔགས་རོལ་པའི་དུར་ཁྲོད་ཆེན་པོ་ནས༔ ཁྲོ་རྒྱལ་སྟོབས་ལྡན་ནག་པོའི་ཐུགས་དམ་བསྐང་༔ དེ་དང་གཉིས་མེད་སྦྱོར་བའི་ཡུམ་ཆེན་མོ༔ འབྱུང་བ་ལྔ་ཡི་བདག་མོའི༴བཀའ་ཉན་དགྲ་བགེགས་གདུག་པ་ཚར་གཅོད་མཛད༔ སྔགས་བདག་གཤིན་རྗེ་ནག་པོའི༴སྔགས་བདག་སྲོག་གི་བདག་མོའི༴སྔགས་བདག་ཀཱ་ལ་ནག་པོའི༴སྔགས་བདག་གྲིབ་ཀྱི་ཁ་རླངས༴སྔགས་བདག་བདུད་མོ་ཁྲག་འཛག༴སྔགས་བདག་མ་ཧཱ་དཱེ་ཝའི༴སྔགས་བདག་སྲིན་པོ་ནག་པོའི༴སྔགས་བདག་སྲིན་མོ་ནག་མོའི༴སྔགས་བདག་ཁྱབ་འཇུག་ཆེན་པོའི༴སྔགས་བདག་རཱུ་ཏྲ་ནག་པོའི༴སྔགས་བདག་གང་བ་བཟང་པོའི༴སྔགས་བདག་ཤ་ཟ་རལ་གཅིག༴སྔགས་བདག་ལི་བྱིན་ཧར་ལེགས༴སྔགས་བདག་ཡམ་ཤུད་དམར་པོའི༴སྔགས་བདག་དམུ་རྗེ་བཙན་པོའི༴སྔགས་བདག་རྡོ་རྗེ་ལེགས་པའི༴སྔགས་བདག་ཁུ་ལེ་ལག་དགུའི༴སྔགས་བདག་གཞོན་ནུ་གཏུམ་པོའི༴ཕྲིན་ལས་ཀུན་སྒྲུབ་གདུག་པའི་སྙིང་ཁྲག་འབྱིན༔ དེ་འཁོར་ཡང་འཁོར་ཚོགས་ཀྱི༴ཕྱི་མཆོད་ཉེར་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿདཔལ་གྱི་བཀའ་ཉན་དཀྱིལ་འཁོར་མཐའ་སྐྱོང་ཞིང་༔ ཕྲིན་ལས་བཞི་བསྒྲུབ་དངོས་གྲུབ་ཀུན་གྱི་བདག༔ དབང་མོ་ཉི་ཤུ་རྩ་བརྒྱད་ཐུགས་དམ་བསྐང་༔ མཁའ་འགྲོ་སུམ་ཅུ་རྩ་གཉིས༴གིང་ཆེན་ཁྱོ་ཤུགས་བཅོ་བརྒྱད༴འབར་མ་ཆེན་མོ་བརྒྱད་ཀྱི༴མ་བདུན་སྲིང་མོ་བཞི་ཡི༴ཕོ་ཉ་དྲུག་ཅུ་རྩ་བཞིའི༴ས་བདག་སུམ་ཅུ་རྩ་གཉིས༴འབུམ་ཕྲག་ཡངས་པའི་མཁའ་འགྲོའི༴ཕྱི་མཆོད་ཉེར་སྤྱོད་བདུན་སོགས་ཐུགས་དམ་བསྐང་༔ ཧཱུྃ་ཧྲཱིཿལྷ་གནས་གསུམ་སོགས་གཙང་མའི་གནས་རིགས་ནས༔ མགོན་པོ་ཕྱག་བཞི་ཕྱག་དྲུག་ཚོགས་ཀྱི་བདག༔ ལེགས་ལྡན་གུར་མགོན་བྱ་རོག་གདོང་ཅན་དང་༔ ཏྲག་ཤད་བེར་ནག་སོགས་ཀྱི༴ས་སྤྱོད་མཁའ་སྤྱོད་དག་པའི་ཞིང་མཆོག་ནས༔ ཞིང་སྐྱོང་ཀུན་དགའ་གཞོན་ནུའི༴རྩུབ་འགྱུར་ཚལ་སོགས་ཆོས་འཁོར་དབེན་གནས་ནས༔ དྲང་སྲོང་གཟའ་བདུད་འཁོར་བཅས༴ཧེ་ཆེན་བརྡལ་བའི་དུར་ཁྲོད་ཆེན་པོ་ནས༔ གནོད་སྦྱིན་ཤན་དམར་འཁོར་བཅས༴དག་པ་དབྱིངས་ཀྱི་དཀྱིལ་འཁོར་ཆེན་པོ་ནས༔ སྔགས་སྲུང་ཨེ་ཀ་ཙ་ཏིའི༴གཙུག་ལག་དབུ་རྩེ་རིམ་གསུམ་ཆོས་འཁོར་ནས༔ རྒྱལ་པོ་པེ་ཧར་འཁོར་བཅས༴ཁམས་གསུམ་དབང་དུ་སྡུད་པའི་ཕོ་བྲང་ནས༔ དབང་ཕྱུག་མ་ཧཱ་དཱེ་ཝའི༴འོ་ཡུག་ཤང་གི་གནས་མཆོག་དམ་པ་ནས༔ དམ་ཅན་རྡོ་རྗེ་ལེགས་པའི༴བྱང་ཕྱོགས་རིན་ཆེན་གཏེར་གྱི་གཞལ་ཡས་ནས༔ རྒྱལ་ཆེན་རྣམ་སྲས་འཁོར་བཅས༴བཀའ་དང་དམ་ཚིག་གཉན་པོའི་ཕོ་བྲང་ནས༔ བཀའ་གཏེར་སྲུང་མ་རྣམས་ཀྱི༴ཕྱི་མཆོད་ཉེར་སྤྱོད་བདུན་གྱི་ཐུགས༴ནང་མཆོད་འདོད་ཡོན་ལྔ་ཡིས༴གསང་མཆོད་སྨན་རཀ་གཏོར་མས༴ཡང་གསང་སྦྱོར་སྒྲོལ་མཆོད་པས༴དར་ཟབ་འབྲུ་སྣ་གོས་ཀྱིས༴རི་དྭགས་གཡུང་དྭགས་ཚོགས་ཀྱིས༴ཆུ་གནས་བྱ་རིགས་ཚོགས་ཀྱིས༔ བསྐང་བ་མེད་དེ་ཁམས་གསུམ་ཡོངས་ཀྱིས་བསྐང་༔ སྦྱོར་དུ་མེད་དེ་ཟུང་འཇུག་ཆེན་པོར་སྦྱོར༔ སྒྲོལ་དུ་མེད་དེ་མཉམ་ཉིད་ཆེན་པོར་སྒྲོལ༔ ཡེ་སྦྱོར་ཡེ་མཆོད་ཆེན་པོས་ཐུགས་དམ་བསྐང་༔ ལྟ་བ་ཁྱབ་བརྡལ་སྤྲོས་མཐའ་བྲལ་བར་བསྐང་༔ བསྒོམ་པ་བློ་འདས་འོད་གསལ་ཆེན་པོར་བསྐང་༔ སྤྱོད་པ་སྤང་བླང་རེ་དོགས་བྲལ་བར་བསྐང་༔ འབྲས་བུ་གཉུག་མ་ཡེ་ཤེས་ཀློང་དུ་བསྐང་༔ བསྐང་བྱ་བསྐང་བྱེད་གཉིས་མེད་ཆོས་ཀྱི་སྐུ༔ མཐའ་བྲལ་བློ་འདས་རྫོགས་པ་ཆེན་པོར་ཨཱཿདེ་ནས་བཤགས་པ་ནི༔ ཧོཿབདེ་གཤེགས་ཡོངས་རྫོགས་དགོངས་སུ་གསོལ༔ བདག་ནི་མ་རིག་དབང་གྱུར་ཏེ༔ རྒྱལ་བའི་བཀའ་དང་བླ་མའི་ལུང་༔ ཇི་བཞིན་མ་སྤྱད་སློབ་དཔོན་སྨད༔ རྡོ་རྗེ་སློབ་དཔོན་མཆེད་ལྕམ་ལ༔ ལྟ་ལོག་ངན་སེམས་ངག་ཏུ་སྨྲས༔ བརྡེགས་བཙོགས་གནོད་པ་དངོས་སུ་སྤྱད༔ ལྷ་དང་དཀྱིལ་འཁོར་ཉམས་མ་གསལ༔ འཛབ་བཟླས་མ་དག་ཟུར་ཆག་ཉམས༔ གསང་བར་འོས་དང་གཉེར་གཏད་སྨྲས༔ གསང་བཅུ་བསྒྲགས་ཤིང་བླ་མ་བསླུས༔ རྩ་བའི་དམ་ཉམས་མཐོལ་ཞིང་བཤགས༔ སྤྱད་པར་བྱ་བའི་དམ་ཚིག་ལྔ༔ ཤེས་བྱ་ལྔ་དང་བསྒྲུབ་བྱ་ལྔ༔ མི་སྤང་ལྔ་དང་དང་ལེན་ལྔ༔ ཡན་ལག་དམ་ཉམས་མཐོལ་ཞིང་བཤགས༔ བསྙེན་སྒྲུབ་ཏིང་འཛིན་དམ་གཡེལ་ཞིང་༔ ཉ་སྟོང་དུས་དྲུག་དུས་མཆོད་ཆག༔ ལེ་ལོ་གསོག་འཇོག་ཚོགས་སྤྱང་བྱས༔ ཕུད་ལྷག་ཉམས་ཤིང་ཁ་ཚར་ཤོར༔ ཚོར་དང་མ་ཚོར་རྐྱེན་དབང་གིས༔ སྒོ་གསུམ་བག་མེད་དམ་ཉམས་བཤགས༔ ཡིད་ཀྱི་དམ་ཉམས་ལྟ་བས་བཤགས༔ དེ་ཡང་ཀུན་གཞི་བྱང་ཆུབ་སེམས༔ ཡིན་པ་མེད་པའི་ལྟ་བ་རྟོགས༔ མིན་པ་མེད་པའི་དགོངས་ཉམས་ལེན༔ ཡིན་མིན་མེད་པའི་སྤྱོད་པ་རྟོགས༔ རེ་དོགས་མེད་པའི་བྱང་ཆུབ་སེམས༔ རྩ་བ་ཡན་ལག་དམ་ཚིག་ཀུན༔ ཆག་ཉམས་མ་བྱུང་མ་སྐྱེས་པ༔ བཤགས་བྱ་བཤགས་བྱེད་གཉིས་མེད་དུ༔ ཀ་དག་ཀློང་ཆེན་ཡངས་པར་གྲོལ༔ ཨོཾ་བཛྲ་སཏྭ་ས་མ་ཡ༔ སོགས་ཡི་གེ་བརྒྱ་པ་ཅི་ནུས་བཟླ༔ དེས་ནི་ཉམས་ཆག་ཉེས་ལྟུང་ཀུན༔ མེ་ལོང་ཕྱིས་པ་བཞིན་དུ་གསལ༔ མཆོག་དང་ཐུན་མོང་དངོས་གྲུབ་ཐོབ༔ བསོད་ནམས་ཡེ་ཤེས་ཚོགས་ཆེན་རྫོགས༔ རིག་འཛིན་རྒྱལ་བའི་ཞིང་དུ་གྲོལ༔ ཉེས་ལྟུང་བཤགས་པའི་གཉེན་པོ་མཆོག༔ དུས་རྣམས་རྒྱུན་དུ་ཉམས་ལེན་འབུངས༔ མི་བསླུ་ངེས་པ་རྡོ་རྗེའི་ཚིག༔ བཀའ་སྲུང་དྲེགས་པ་སྡེ་དགུར་གཉེར༔ མ་འོངས་སུམ་ཅུ་ཁ་རལ་དུས༔ ང་ཉིད་བདུད་འཇོམས་རྡོ་རྗེར་བཞེངས༔ ཟབ་མོའི་གཏེར་གྱིས་གདུལ་བྱ་སྐྱོངས༔ ཐུགས་དང་ལྟེ་སྨེ་རྣ་ལྟག་ཏུ༔ ཕག་ཞལ་མཚན་པའི་སྨེ་བ་ཡོད༔ ལས་ལྡན་བུ་ལ་སྤྲད་སོ་གྱིས༔ ལས་ཅན་དེ་དང་མ་འཕྲད་པར༔ གཏེར་བུག་རྡོལ་དང་གཞན་དབང་དུ༔ མ་གཏོང་དུས་ཀུན་མེལ་རྩེ་མཛོད༔ ཕྱི་རབས་སྐྱེས་བུ་ཉམས་ལེན་མཁན༔ ཀུན་གྱི་སྐུ་ཚེ་མཛད་ཕྲིན་འཕེལ༔ ཆོས་ལོག་སྒྲོ་འདེབས་བཀའ་རྫུན་མཁན༔ ཀུན་ལ་མ་ཤོར་ཨ་ཐམ་རྒྱ༔ གསང་བ་སྐུ་གསུང་ཐུགས་ཀྱི་རྒྱ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཉིད་གར་དབང་བདུད་འཇོམས་རྡོ་རྗེས་གཏེར་ནས་དྲངས་ཏེ་མཐར་སློབ་བུ་སྣ་ཚོགས་རང་གྲོལ་དང་མཁྱེན་རབ་རྒྱ་མཚོ་ཀློང་ཆེན་རྡོ་རྗེ་རྣམས་ཀྱིས་ཡང་ཡང་བསྐུལ་ངོར་ཤོག་སེར་ལས་ཞལ་བཤུས་ཏེ་དག་པར་ཕབ་པའོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།