TTDL-ZABTER-14-PHA-003

Previous Text Back to Volume Page Next Text

Wylie title
Location	bdud 'joms gling pa zab gter Volume 14, Text 3, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

བརྡ་ཡིག༠༠༠༠༠༠༧༔ ཆོས་ཉིད་ནམ་མཁའི་ཀློང་མཛོད་ལས༔ བླ་མའི་གསོལ་འདེབས་བྱིན་རླབས་ཆར་འབེབས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ བླ་མར་རྩེ་གཅིག་གདུང་བའི་མོས་གུས་ཀྱིས༔ དུས་གསུམ་རྒྱུན་ཆད་མེད་པར་འདི་བརྗོད་བྱ༔ ཨེ་མ་ཧོཿཀ་དག་སྤྲོས་བྲལ་བླ་མ་ཆོས་ཀྱི་སྐུ༔ ལྷུན་གྲུབ་བདེ་ཆེན་བླ་མ་ལོངས་སྤྱོད་རྫོགས༔ ཐུགས་རྗེ་མ་འགགས་བླ་མ་སྤྲུལ་པའི་སྐུ༔ གང་འདུལ་སྒྱུ་འཕྲུལ་ཆུ་ཟླའི་རོལ་གར་གྱིས༔ ཕན་བདེའི་དཔལ་སྟེར་ལོག་ལམ་ཁ་ལོ་བསྒྱུར༔ ཨོ་རྒྱན་བརྒྱུད་པར་བཅས་ལ་གསོལ་བ་འདེབས༔ ཚེ་རབས་སྐྱེ་བའི་ཕྲེང་བ་ཐམས་ཅད་དུ༔ སྐད་ཅིག་མི་འབྲལ་ཁྱེད་ཀྱིས་རྗེས་བཟུང་ནས༔ དགའ་རབ་རྗེ་དང་ཏེ་ལོ་ཇི་བཞིན་དུ༔ དངོས་ཉམས་རྨི་ལམ་དག་པའི་སྣང་ངོ་རུ༔ ཞལ་གཟིགས་ལུང་བསྟན་དབང་བསྐུར་གདམས་པ་སྟོན༔ བར་ཆད་རྐྱེན་བགེགས་བདུད་དབང་མི་འགྱུར་ཞིང་༔ རྩེ་གཅིག་ཡང་དག་སྙིང་པོའི་དོན་སྤྱོད་ཅིང་༔ ཆོས་ཉིད་བདེན་པ་མངོན་སུམ་མཐོང་ནས་སུ༔ ས་ལམ་ཡོན་ཏན་གོང་ནས་གོང་དུ་འཕེལ༔ རང་རིག་སྐུ་དང་ཡེ་ཤེས་ཚད་དུ་ཕེབས༔ གཟུང་འཛིན་འཁྲུལ་པའི་སྤུན་ཐག་དབྱིངས་སུ་ཞིག༔ རིག་པ་ཀ་དག་གདོད་མའི་དབྱིངས་སུ་གྲོལ༔ པད་འབྱུང་རྗེ་དང་བི་མ་མི་ཏྲ་བཞིན༔ འཇའ་ལུས་ཆོས་ཀྱི་སྐུ་རུ་སངས་རྒྱས་ཏེ༔ སླར་ཡང་གདུལ་བྱར་རང་སྣང་སྟོན་པ་རུ༔ ཡེ་ཤེས་སྒྱུ་མའི་སྐུ་ཡི་རོལ་པ་ཡིས༔ ཁམས་གསུམ་འཁོར་བ་དོང་ནས་སྤྲུགས་གྱུར་ཅིག༔ ཅེས་པ་འདི་ཡང་སྨོན་ལམ་ལས་ཀྱིས་འབྲེལ་བའི་སྐལ་བཟང་དམ་པ་སྦྱིན་པ་རྒྱ་མཚོས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡེ་ཤེས་ཀློང་གི་མཛོད་ལས་བསྒྱུར་བའོ།།དགེའོ།།དགེའོ།།དགེའོ།།།།