TTDL-ZABTER-15-BA-016

Previous Text Back to Volume Page Next Text

Wylie title
Location	bdud 'joms gling pa zab gter Volume 15, Text 16, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

དག་སྣང་ཡེ་ཤེས་དྲྭ་བ་ལས༔ འཇམ་དཔལ་སྨྲ་བའི་སེང་གེའི་སྒྲུབ་ཐབས་བཞུགས་སོ༔ ན་མོ་གུ་རུ་ཝེ༔ ༠༠༠༠བརྡ་ཡིག༧༡འཇམ་དཔལ་སྨྲ་སེང་སྒྲུབ་པ་ལ༔ འདི་ལྟར་བསྐྱེད་རིམ་གནད་ལྡན་བྱཿཨཿསྣང་སྲིད་ཐམས་ཅད་སྟོང་པ་ཉིད༔ ཆུ་ལས་ཆུ་ལྦུར་རྡོལ་བ་བཞིན༔ ཡེ་ཤེས་ལྔ་ཡི་འོད་ཀློང་དུ༔ རྩལ་ཆེན་སེང་གེ་སྔོན་པོའི་སྟེང་༔ པདྨ་ཉི་ཟླའི་གདན་སྟེང་དུ༔ ཧྲཱིཿལས་མགོན་པོ་འཇམ་དཔལ་དབྱངས༔ དམར་གསལ་ལོངས་སྐུའི་ཆས་རྫོགས་ཤིང་༔ ཞི་འཛུམ་མཚན་དཔེའི་ལང་ཚོས་མཛེས༔ ཕྱག་གཡས་ཤེས་རབ་རལ་གྲི་ཕྱར༔ གཡོན་པས་བརྒྱད་སྟོང་གླེགས་བམ་བསྣམས༔ ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ ཐུགས་ཀར་འཁོར་ལོ་རྩིབས་བཞིའི་སྟེང་༔ རལ་གྲི་ཧྲཱིཿདམར་མཚན་པ་ལ༔ སྔགས་ཕྲེང་གཡས་སུ་འཁོར་བར་བསམ༔ བདུན་དུ་པདྨ་ཟླ་རྒྱས་སྟེང་༔ ཧྲཱིཿལས་དབྱངས་ཅན་ལྷ་མོ་སྔོཿབཞེངས་སྟབས་རལ་གྲི་པུསྟི་བསྣམས༔ ཞི་འཛུམ་དར་དང་རཏྣས་བརྒྱན༔ མཚན་དཔེས་མཛེས་ཤིང་ལང་ཚོ་རྒྱས༔ ཐུགས་ཀར་པདྨ་འདབ་བརྒྱད་སྟེང་༔ ཧྲཱིཿལ་སྔགས་ཕྲེང་གཡོན་དུ་འཁོར༔ ཡབ་ཡུམ་སྐུ་ཡི་གཟི་འོད་ཀྱིས༔ དུས་གསུམ་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་དཔལ་ཡོན་ཏན་དང་༔ བརྟན་གཡོའི་དྭངས་བཅུད་མ་ལུས་པ༔ འོད་ཀྱི་རྣམ་པར་བསྡུས་ནས་སུ༔ ཐུགས་སྲོག་སྔགས་ཀྱི་འཁོར་ལོར་བསྟིམ༔ ཤེས་རབ་ཡེ་ཤེས་འབར་བར་བསྒོམ༔ ཨོཾ་ཧྲཱིཿདྷི་མ་མི་དྷི་པཾ་མཉྫུ་ཤྲཱི་མུཾ་ཧྲཱིཿཔྲཛྙཱ་ཝརྡྷ་ནི་ཧྲཱིཿདྷི་སྭཱ་ཧཱ༔ ཤེས་བ་གཞན་དུ་མ་ཡེངས་པར༔ ལྷ་ཡི་ཏིང་འཛིན་ཉིད་དང་འགྲོགས༔ མི་ཚིག་དག་གིས་མ་བསླད་པར༔ སྔགས་ཀྱིས་བཟླས་པ་གནད་དུ་བསྣུན༔ གནད་དེས་ཤེས་རབ་ཡེ་ཤེས་དཔལ༔ འཕེལ་རྒྱས་མཆོག་གི་དངོས་གྲུབ་ཐོབ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་བཙུན་པ་པདྨས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།།དགེའོ།།དགེའོ།།དགེའོ།།སརྦ་མངྒ་ལཾ།།།།