Daily Practices
༈ སྐད་ཅིག་རང་ཉིད་རྡོ་རྗེ་གཞོན་ནུ་ནི། །མཐིང་ནག་དབུ་གསུམ་གཡས་དཀར་གཡོན་དམར་ཞལ། །ཕྱག་དྲུག་གཡས་གཉིས་རྡོ་རྗེ་རྩེ་དགུ་ལྔ། །གཡོན་གཉིས་འབར་བའི་མེ་དང་ཁ་ཊྭཱཾ་ཀ །ཐ་གཉིས་རི་རབ་ཕུར་བུ་འདྲིལ་ཞིང་འདེབས། །ཞབས་བཞི་འདོར་སྟབས་རུ་དྲ་ཕོ་མོ་མགོན། །སྐུ་ལ་དཔལ་དང་དུར་ཁྲོད་ཆས་རྣམས་རྫོགས། །པང་དུ་ཡུམ་མཆོག་འཁོར་ལོ་རྒྱུས་འདེབས་མ། །མཐཐིང་སྐྱ་ཨུཏྤལ་དུང་ཁྲག་འཛིན་པས་འཁྲིལ། །པདྨ་ཉི་སྟེང་ཡེ་ཤེས་མེ་དབུས་རོལ། །ཐུགས་དབུས་ཡེ་ཤེས་སེམས་དཔའ་རྡོར་སེམས་ཀྱི། །སྙིང་གར་ཧཱུཾ་མཐིང་སྔགས་ཀྱིས་བསྐོར་བ་ལས། །འོད་འཕྲོས་སྒོ་གསུམ་མ་དག་འཁྲུལ་ཞེན་སྦྱངས། །སྣང་གྲགས་རིག་པ་ལྷ་སྔགས་ཆོས་སྐུར་སད། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུཾ་ཕཊ། མཐར་ཧའུཾ་གསུམ་གྱིས་བསྡུས། ཕཊ་གསུམ་གྱིས་ལྡང་ལ། དགེ་ཚོགས་མཐའ་ཡས་འགྲོ་བ་ཡོངས་ལ་བསྔོ། །ཀུན་ཀྱང་རྡོ་རྗེ་གཞོན་ནུའི་ས་ཐོབ་ཅིང་། །བདག་ཅག་ཚེ་དང་སྒྲུབ་པ་མཐར་ཕྱིན་ནས། །དོན་གཉིས་ལྷུན་གྱིས་འགྲུབ་པའི་བཀྲ་ཤིས་ཤོག །ཅེས་པའང་པདྨ་ཡེ་ཤེས་ཆོས་སྒྲོན་གྱི་ངོར་ཛྙཱ་ནས་སོ།། །།
༈ །ཡང་ཁྲོས་རྒྱུན་ཁྱེར་ནི།ན་མོ། བླ་མ་དབང་ཆེན་འབར་བར་སྐྱབས་སུ་མཆི། །འགྲོ་བའི་དོན་དུ་ཟབ་མོའི་རྣལ་འབྱོར་བསྒོམ། །སྐད་ཅིག་རང་ཉིད་རྟ་མགྲིན་ཡང་ཁྲོས་ནག །རྡོ་རྗེ་ཐོད་ཁྲག་འཛིན་པ་ཁྲོ་ཆས་ཅན། །ཞབས་གཉིས་འདོར་སྟབས་དུར་ཁྲོད་ཆས་ཀྱིས་བརྒྱན། །ཡེ་ཤེས་མེ་འབར་སྲིད་གསུམ་ཟིལ་གྱིས་གནོན། །ཐུགས་ཀར་ཡེ་ཤེས་སེམས་དཔའ་རྡོ་རྗེའི་ལྟེར། །ཧཱུཾ་མཐིང་མཐའ་མར་སྔགས་ཕྲེང་རང་སྒྲར་བཅས། །གཡས་སུ་འཁོར་ལས་བསམ་ཡས་འོད་ཟེར་འཕྲོས། །རང་ལུས་ནད་གདོན་སྡིག་སྒྲིབ་ཀུན་སྦྱངངས་ཏེ། །སྣོད་བཅུད་དག་མཉམ་ཡེ་ཤེས་ཆེན་པོར་གྱུར། ཨོཾ་ཧྱ་གྲཱི་ཝ་བཛྲ་ཙཎྜ་ཧཱུྃ་བྷྱོ་ཧྲཱིཿཧཱུྃ་ཕཊ༔ རྗེས་ཧཱུྃ་གསུམ་གྱིས་བསྡུ་ཞིང་ཕཊ་གསུམ་གྱིས་ལྡང་ལ།）དགེ་བ་འདི་ཡིས་མྱུར་དུ་བདག །དབང་དྲག་འབར་བ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དབང་ཆེན་དྲག་པོ་མྱུར་འགྲུབ་ཤོག །（ཅེས་པའང་ཛྙཱ་ནས་སོ།། །།
