TTDL-ZABTER-15-BA-124

དག་སྣང་ཡེ་ཤེས་དྲྭ་བ་ལས༔ སྙི་ནང་རོལ་མཚོ་དཀར་མོའི་བསང་མཆོད་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ མཆོད་རྫས་དངོས་སུ་འབྱོར་པ་ལ༔ ཡིད་ཀྱི་ནམ་མཁའ་མཛོད་དུ་སྤེལ༔ རང་ཉིད་ཡི་དམ་ལྷར་གསལ་བའི༔ སྒྱུ་འཕྲུལ་རོལ་པའི་ཏིང་འཛིན་གྱིས༔ ནམ་མཁའ་མཛོད་སྔགས་དང་བསྒྲིལ་ཏེ༔ ཀྱཻ༔ ཡུལ་ནི་སྙི་སྟོད་ས་ཡི་ཆར༔ བདུད་རྩི་འོ་མཚོ་རོལ་པའི་ཀློང་༔ རིན་ཆེན་དངུལ་གྱི་སྐུ་མཁར་མཛེས༔ བ་གམ་གནམ་དུ་ཟངས་སེ་ཟང་༔ འོད་དང་འཇའ་ཚོན་ལམས་སེ་ལམ༔ འདོད་རྒུའི་དཔལ་ཡོན་ལྷུན་རེ་འཐུག༔ དེ་དབུས་སྣང་སྲིད་མངའ་བདག་མོ༔ སྲིད་རྒྱལ་རྡོ་རྗེ་ཕག་བྱིན་མ༔ མཐིང་ནག་གཡུ་ཡི་རལ་པ་ཅན༔ ལན་ཚར་གནམ་ལྕགས་ཕུར་པས་བརྒྱན༔ ཕུར་པའི་ཚྭ་ཚྭ་སྐར་ལྟར་འཁྲིགས༔ ཕྱག་གཡས་གཡུ་ཡི་ཞགས་པ་འཕེན༔ གཡོན་པས་གནམ་ལྕགས་ཕུར་པ་འདེབས༔ ཆིབས་སུ་ཆུ་རྟ་སྔོ་ནག་ཆིབས༔ གོས་སུ་དར་ནག་འཇོལ་བེར་གསོལ༔ འཁོར་དུ་བསྭེ་མོ་བཅུ་བཞི་དང་༔ གཉན་ཆེན་ས་བདག་ཀླུ་བཙན་བདུད༔ གསོལ་མཆོད་མགྲོན་དུ་སྤྱན་འདྲེན་ནོ༔ མ་ཐོགས་གནས་འདིར་གཤེགས་སུ་གསོལ༔ དམ་ཚིག་ཆེན་པོའི་གདན་ལ་བཞུགས༔ ཁྱེད་ལ་མཆོད་རྫས་འབུལ་བ་ནི༔ བཟང་ཤིང་ཕྱེ་མར་འབྲུ་སྨན་རིགས༔ དཀར་གསུམ་མངར་གསུམ་བཟའ་བཏུང་དང་༔ ཤ་ཁྲག་བཤོས་སྐྱེམས་སྣ་ཚོགས་དང་༔ ལྷབ་ལྷུབ་དར་ཟབ་གོས་ཀྱི་རིགས༔ གོ་མཚོན་སྣ་ཚོགས་རྒྱན་ཆའི་ཚོགས༔ གཟུགས་འགྲོས་ཆ་མ་ཆོ་དགུ་སོགས༔ འདོད་འཇོའི་བདུད་རྩིའི་བསང་མཆོད་འབུལ༔ དཀར་མོ་ཟླ་བཟང་མ་མོ་བསང་༔ སེར་མོ་དཔལ་བསྐྱེད་མ་མོ་བསང་༔ དམར་མོ་དབང་སྡུད་མ་ཚོགས་བསང་༔ ལྗང་མོ་མངོན་སྤྱོད་མ་ཚོགས་བསང་༔ སྣ་ཚོགས་འཕྲུལ་གྱི་མ་མོ་བསང་༔ ཀླུ་གཉན་ས་བདག་བཙན་སྡེ་བསང་༔ ཀུན་བྱེད་རྡོ་རྗེ་ཕག་བྱིན་མ༔ ཁྱེད་ནི་ཕུར་པའི་སྲུང་མ་སྟེ༔ རྡོ་རྗེ་ཕུར་པའི་གཉེར་འཛིན་པས༔ ཡུལ་གཞིའི་བདག་མོ་མཛད་པ་རུ༔ ཐུགས་ལ་བཞེད་པ་མི་མངའ་ཡང་༔ ད་དུས་ལྔ་བརྒྱའི་སྙིགས་དུས་འདིར༔ བསྟན་འགྲོའི་བདེ་བསྐྱིད་དཔལ་ཉམས་པས༔ རེ་ས་སྐྱབས་གནས་གཞན་མ་མཆིས༔ ཨོ་རྒྱན་ཆེན་པོ་གཙུག་ཏུ་ཁུར༔ དམ་ཚིག་གཉན་པོ་གཏའ་རུ་བཞག༔ སྲིད་པའི་མ་ཆེན་ཁྱེད་ལ་བརྟེན༔ ཐུགས་བརྩེ་ཐུགས་རྗེས་བདག་སྐྱོངས་ལ༔ འདོད་རྒུའི་ལོངས་སྤྱོད་ཆར་དུ་ཕོབ༔ མི་མཐུན་འགལ་རྐྱེན་བར་ཆད་སོལ༔ མི་ནད་ནོར་གྱི་གོད་ཁ་ཆོད༔ སད་སེར་བཙའ་ཐན་མུ་གེ་བཟློག༔ དགྲ་བགེགས་གནོད་བྱེད་ཆོམ་ལ་ཕོབ༔ སྲིད་པའི་ལེགས་ཉེས་ཁྱོད་ཀྱི་དབང་༔ བདག་ཅག་བདེ་ལེགས་མཛད་དུ་གསོལ༔ དུས་གསུམ་རྒྱལ་དང་རྒྱལ་སྲས་ཀྱིས༔ བཀའ་བསྒོ་ཡིན་གྱི་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ བཅོལ་བའི་ལས་རྣམས་ཡོངས་གྲུབ་མཛོད༔ ཅེས་པ་འདི་སློབ་བུ་ཚེ་རིང་རྡོ་རྗེས་ནན་དུ་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ།།ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།སརྦ་མངྒ་ལཾ།།།།