TTDL-ZABTER-03-GA-064

ཟབ་གསང་མཁའ་འགྲོའི་སྙིང་ཐིག་ལས༔ དཔལ་ཆེན་ཕྱག་ན་རྡོ་རྗེའི་སྲེག་བླུགས་ཞལ་ཧོམ་ཡངས་པ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༥༩༥སྲེག་བླུགས་ཞལ་གྱི་ཧོམ་ཁུང་འདི༔ མ་འོངས་དུས་ཀྱིས་ཐ་མ་ལ༔ སྒྲུབ་པ་ལྷུར་ལེན་རྣལ་འབྱོར་པས༔ བྱ་བའི་དུས་ནི་འདི་ལྟ་སྟེ༔ རྟ་ཕྱུགས་ནོར་ལ་གོད་ལང་ངམ༔ གློ་བུར་ནད་དྲག་བྱུང་བ་དང་༔ དགྲ་གདོན་གློ་བུར་ལང་བྱུང་ན༔ འདི་ནི་བསྟབ་པའི་ཐབས་ཡིན་ཏེ༔ ཚོགས་བསགས་ཕྱིར་དུ་བྱེད་ཀྱང་མཆོག༔ འདི་ཡི་ལག་ལེན་རིམ་པ་ནི༔ མདུན་དུ་མེ་ཐབ་གྲུ་གསུམ་ནག༔ དབུས་སུ་ཧཱུྃ་མཚན་མེ་རི་འབར༔ སྟེང་དུ་ཚེར་མ་ཅན་གྱི་ཤིང་༔ སྒྲུབ་མཁན་རང་གི་མཐོ་གང་ཚད༔ མེ་ཧོམ་གྲུ་གསུམ་ཟུར་ལྡན་བརྩིགས༔ མེ་དར་ནག་པོ་ཤར་དུ་བཙུགས༔ མེ་ཐབ་ཤར་ལྷོའི་མཚམས་སུ་བཞག༔ འབུལ་རྫས་འབྱོར་ཚད་ཟས་སྣ་བསགས༔ མངོན་སྤྱོད་ཆེད་དུ་བྱེད་འདོད་ན༔ འབྲུ་ནག་ལིང་ག་མིང་ཤམ་བྲི༔ དེ་ནས་ལྷ་གསལ་བ་ནི༔ ཨོཾ་ཨཱཿཧཱུྃ༔ སྐད་ཅིག་གིས་མེ་ཐབ་མི་དམིགས་པའི་ངང་ལས་སྐུ་གསུམ་ལྷུན་གྱིས་གྲུབ་པའི་གཞལ་ཡས་ཁང་གྲུ་གསུམ་མཐིང་ནག་ཡེ་ཤེས་ཀྱི་མེ་དཔུང་འབར་བའི་ཀློང་དུ་པདྨ་ཉི་མ་རོའི་གདན་གྱི་སྟེང་དུ་དུས་གསུམ་རྒྱལ་བ་ཐམས་ཅད་ཀྱི་ཐུགས་ཀྱི་ངོ་བོ་ཧཱུྃ་མཐིང་ནག་ཡེ་ཤེས་ཀྱི་མེ་འབར་བ་ལས་འོད་ཟེར་དཔག་ཏུ་མེད་པ་འཕྲོས་པས་རྒྱལ་བ་སྲས་དང་བཅས་པ་མཆོད༔ ཁམས་གསུམ་གྱི་འཁོར་བ་དོང་ནས་སྤྲུགས༔ ཚུར་འདུས་ཡོངས་སུ་གྱུར་པ་ལས༔ དཔལ་གསང་བདག་ཕྱག་ན་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་ཡེ་ཤེས་ཀྱི་མེ་དཔུང་འབར་བའི་ཀློང་ན་འགྱིང་བ༔ ཕྱག་གཡས་པས་གནམ་ལྕགས་ཀྱི་རྡོ་རྗེ་ནམ་མཁའ་ལ་ཕྱར་ཞིང་གཡོན་པས་སྡིགས་མཛུབ་ཀྱིས་སྦྲུལ་ཞགས་བསྣམས་པ༔ ཞལ་གདངས་ཤིང་ལྗགས་འདྲིལ་བ་སྤྱན་གསུམ་ནམ་མཁར་གཟིགས་པ༔ དབུ་སྐྲ་དམར་སེར་གྱེན་དུ་བརྫེས་ཤིང་སྨ་ར་དང་སྨིན་མ་མེ་ཡི་ཚྭ་ཚྭ་གློག་ཞགས་ལྟར་འཁྱུག་པ༔ དུར་ཁྲོད་ཀྱི་ཆས་ཐམས་ཅད་ཀྱིས་བརྒྱན་ཅིང་རཱུ་དྲ་ཕོ་མོ་ཞབས་ཀྱིས་གནོན་པའི་སྐུར་བསྒོམ༔ སྐུ་ཡི་གནས་ལྔར་ཁྲག་འཐུང་རིགས་ལྔ༔ བ་སྤུའི་སྒོ་རྣམས་སུ་ཁྲོ་བོ་བཅུ་སྒོ་མ་བཞི༔ གཞན་ཡང་ཡི་དམ་རྒྱུད་སྡེ་བཞི་དྲུག་གི་དཀྱིལ་འཁོར་ལྷ་ཚོགས་ཐམས་ཅད་མ་འདྲེས་ཤིང་ཡོངས་སུ་རྫོགས་པར་བསམ༔ དེ་ལྟར་གསལ་བའི་སྤྱི་བོར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུྃ་མཐིང་ནག་ལས་འོད་དང་འོད་ཟེར་ཀུན་ཏུ་ཁྱབ་པར་འཕྲོས་པས་རང་སྣང་དོན་གྱི་འོག་མིན་ཆེན་པོའི་དབྱིངས་ནས་ཡེ་ཤེས་པ་དཔག་ཏུ་མེད་པ་སྤྱན་དྲངས་ལ་བསྟིམ་མོ༔ ཨོཾ་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛཿདེ་ནས་སྤྱན་འདྲེན་པ་ནི༔ ཧཱུྃ༔ ལྕང་ལོ་ཅན་གྱི་གནས་མཆོག་ནས༔ གསང་བའི་བདག་པོ་གཤེགས་སུ་གསོལ༔ མ་ལ་ཡ་ཡི་རྩེ་མོ་ནས༔ རྡོ་རྗེ་འཆང་ཆེན་གཤེགས་སུ་གསོལ༔ རང་སྣང་དོན་གྱི་འོག་མིན་ནས༔ རྡོ་རྗེ་གཏུམ་པོ་གཤེགས་སུ་གསོལ༔ དམ་ཚིག་ཡེ་ཤེས་གཉིས་མེད་ཀྱི༔ རོལ་པ་ཆེན་པོར་བཞུགས་སུ་གསོལ༔ བདག་ཉིད་རྗེས་སུ་བཟུང་དུ་གསོལ༔ བར་ཆད་བདུད་བགེགས་དགྲ་ཡི་དཔུང་༔ མངོན་སྤྱོད་དྲག་པོའི་ཕྲིན་ལས་ཀྱིས༔ བསྒྲལ་ནས་རོལ་པའི་ཕྲིན་ལས་མཛོད༔ བཛྲ་ས་མ་ཡ་ཛ་ཛཿས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧཱུྃ༔ དུས་གསུམ་སངས་རྒྱས་འདུས་པའི་སྐུ༔ གསང་བདག་ཕྱག་ན་རྡོ་རྗེ་དང་༔ རྒྱུད་སྡེ་རྒྱ་མཚོའི་དཀྱིལ་འཁོར་ལ༔ བརྣག་དོན་འགྲུབ་ཕྱིར་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོཿདེ་ནས་མཆོད་པ་འབུལ་བ་ནི༔ དྲག་པོའི་སྣོད་དུ་ཤ་ཁྲག་རུས་པ་བཤམ་ལ༔ ཧཱུྃ༔ དམ་ཉམས་དགྲ་བགེགས་ཡོངས་བསྒྲལ་བའི༔ དམར་ཆེན་ཁྲག་གི་ཨརྒྷཾ་དང་༔ དྲི་ཆུ་ཆུ་སེར་ཞབས་བསིལ་དང་༔ དབང་པོ་རྣམ་ལྔའི་མེ་ཏོག་དང་༔ ཤ་ཆེན་བདུག་སྤོས་དུད་པ་དང་༔ ཞུན་ཆེན་མར་མེ་འབར་བ་དང་༔ མཁྲིས་པ་ཆེན་པོའི་དྲི་ཆབ་དང་༔ ཤ་རུས་རྐང་ཚིལ་ཞལ་ཟས་དང་༔ རྐང་གླིང་ཐོད་རྔའི་རོལ་མོ་དང་༔ བདུད་རྩི་རྣམ་ལྔ་བཞུས་པའི་མཚོ༔ དོན་སྙིང་ཤ་ཡི་གཏོར་ཆེན་པོ༔ རཀྟ་སྙིང་གི་ཁྲག་དང་བཅས༔ གསང་བདག་དཀྱིལ་འཁོར་མཉེས་ཕྱིར་འབུལ༔ འབུལ་ལོ་བཞེས་ཤིག་དགྱེས་པར་མཛོད༔ དུག་ལྔ་དུག་གསུམ་ལས་ཉོན་གྱི༔ བག་ཆགས་རྟོག་སྒྲིབ་སྦྱང་བ་དང་༔ ནད་གདོན་བར་ཆད་དགྲ་བགེགས་ཀུན༔ རྗེས་ཤུལ་མེད་པར་བསྲེགས་མཛོད་རོལ༔ ཨོཾ་ཨཱཿཧཱུྃ༔ ནྲྀ་ཏྲི་ཤ་ཏྲུཾ་མཱ་ར་ཡ་མཱཾ་ས་རཀྟ་ཨརྒྷཾ་སོགས་ནས་ཤཔྡ་སརྦ་པཉྩ་བ་ལིང་ཏ་རཀྟ་ཁཱ་ཧི༔ དེ་ནས་བསྟོད་པ་ནི༔ ཧཱུྃ༔ རིགས་དང་དཀྱིལ་འཁོར་ཐམས་ཅད་ཀྱི༔ ཁྱབ་བདག་དཔལ་ལྡན་རྡོ་རྗེ་འཆང་༔ སངས་རྒྱས་ཀུན་གྱི་ཐུགས་ཆེ་བ༔ སངས་རྒྱས་ཀུན་གྱི་ཐུགས་ལ་གནས༔ སངས་རྒྱས་གསུང་དབང་སྐུ་ཡི་དཔལ༔ རྫོགས་པའི་སངས་རྒྱས་ཁྱོད་ལ་བསྟོད༔ དེ་ནས་ཚོགས་བསགས་ཆེད་དུ་བྱེད་འདོད་ན༔ ཧཱུྃ༔ གསང་བའི་བདག་པོ་རྡོ་རྗེ་འཆང་༔ རྒྱུད་སྡེ་རྒྱ་མཚོའི་དཀྱིལ་འཁོར་ལྷས༔ བདག་གི་སྡིག་སྒྲིབ་བག་ཆགས་ཀུན༔ བསྲེག་ཅིང་སྦྱང་བར་མཛད་དུ་གསོལ༔ སྲེག་བླུགས་མེ་མཆོད་འདི་བཞེས་ལ༔ བདག་ནི་རྗེས་སུ་བཟུང་དུ་གསོལ༔ ཞེས་མེ་མཆོད་ལྷར་དམིགས་ནས་ཤར་ལྷོ་མཚམས་ནས་སྦར་རོ༔ བསྲེགས་རྫས་འབུལ་བ་ནི༔ ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ ཅེས་ཕུལ་ལོ༔ དགྲ་བགེགས་བསྒྲལ་བ་དྲག་པོ་མངོན་སྤྱོད་ཀྱི་ལས་བྱེད་ན་མེ་གཡོན་ནས་བསྐོར་སྟེ་བྱང་ནས་སྦར༔ མིང་ཤམ་དང་ལིང་ག་ལ་འགུགས་གཞུག་བྱ་བ་ནི༔ ན་མོ༔ མཆོག་གསུམ་སྐུ་གསུམ་རྩ་གསུམ་རྒྱལ་བ་རྒྱ་མཚོའི་ཚོགས་དང་བདེན་གཉིས་བསླུ་བ་མེད་པའི་མཐུས༔ ཆེ་གེ་མོའི་བླ་སྲོག་རྣམ་པར་ཤེས་པ་གཟུགས་ལིང་ག་འདི་ལ་ཁུག་ཅིག་བསྟིམ་ཅིག༔ ཛཿཧཱུྃ་བྃ་ཧོཿབརྒྱ་རྩ་བརྒྱད་བརྗོད་ནས་མཐར༔ ཧཱུྃ༔ གསང་བའི་བདག་པོ་རྡོ་རྗེ་འཆང་༔ རྒྱུད་སྡེ་དཀྱིལ་འཁོར་སྲུང་མའི་ཚོགས༔ མ་ལུས་དབྱིངས་ནས་སྐུར་བཞེངས་ལ༔ ཡིད་ལ་བརྣག་པའི་དགྲ་བགེགས་འདི༔ རྗེས་ཤུལ་ལྷག་མ་མ་ལུས་པ༔ བཞེས་ཤིག་དྲག་པོའི་ཞལ་དུ་རོལ༔ རྩ་སྔགས་མཐར༔ ཆེ་གེ་མཱ་ར་ཡ་ཛྭ་ལ་རཾ་ཁཱ་ཧི༔ ཞེས་བཏགས་ལ་བཟླའོ༔ བྱོན་པའི་དུས་སུ་སྐྱེམས་ཀྱིས་མཉེས་པར་བྱ་བ་ནི༔ ཧཱུྃ༔ རྡོ་རྗེ་ཅན་གྱི་དཀྱིལ་འཁོར་ལྷ༔ གནས་འདིར་བྱོན་ནས་བདག་སྨིན་ཕྱིར༔ བདུད་རྩི་སྐྱེམས་མཆོད་བཞེས་སུ་གསོལ༔ འཁོར་བ་མྱང་འདས་ཆེན་པོར་སྒྲོལ༔ ཨོཾ་ཨ་མྲྀ་ཏ་ཁཱ་ཧི༔ སརྦ་སིདྡྷི་ཕ་ལ་ཨཱཿལན་བདུན་ཕུལ༔ གཤེགས་དུས་འགྲོ་ཀུན་རྗེས་བཟུང་ཕྱིར༔ བདུད་རྩིའི་སྐྱེམས་ཀྱིས་ཚིམ་པར་བྱ༔ དེ་ལ༔ ཧཱུྃ༔ རྡོ་རྗེ་ཅན་གྱི་དཀྱིལ་འཁོར་ལྷ༔ རང་བཞིན་གནས་སུ་གཤེགས་ནས་ཀྱང་༔ འགྲོ་ཀུན་རྗེས་སུ་བཟུང་བའི་ཕྱིར༔ བདུད་རྩི་སྐྱེམས་ཀྱི་མཆོད་པ་བཞེས༔ ཨོཾ་ཨ་མྲྀ་ཏ་ཁཱ་ཧི༔ པྲཛྙཱ་ཛྙཱ་ན་ས་མ་ཏི་སིདྡྷི་སྭཱ་ཧཱ༔ ལན་བདུན་ཕུལ༔ དེ་ནས་བཟོད་གསོལ་བྱས་པའི་མཐར༔ ཧཱུྃ༔ ཡེ་ཤེས་དབྱིངས་ནས་བཞེངས་པའི་ལྷ༔ སྒྱུ་མའི་འཁྲུལ་འཁོར་ཞིག་པ་བཞིན༔ སྐྱེ་མེད་ཆོས་ཀྱི་དབྱིངས་སུ་གཤེགས༔ རྟག་ཏུ་བདག་ནི་ཐུགས་རྗེས་ཟུངས༔ བཛྲ་མུ༔ དམ་ཚིག་པ་ཉིད་མེ་རུ་ཞུ༔ སྦྱིན་སྲེག་ཟ་བའི་གདོན་འཇོམས་གྱུར༔ རཾ་རཾ་པ་ཡེ་སྭཱ་ཧཱ༔ དགྲ་བགེགས་བསྒྲལ་ལས་བྱས་པ་ཡི༔ ཐལ་སོལ་ལམ་གྱི་ཁྲམ་མདོར་མནན༔ ཡང་ན་མཆོད་རྟེན་འོག་ཏུ་མནན༔ ཚོགས་བསགས་ཆེད་དུ་བྱས་པ་ཡི༔ ཐལ་སོལ་གཙང་མའི་ས་རུ་གཤེགས༔ འདི་ལ་རྟག་བརྩོན་རྣལ་འབྱོར་གྱིས༔ བསམ་དོན་ཐམས་ཅད་ཐོགས་མེད་འགྲུབ༔ འདི་ནི་ཤིན་ཏུ་ཟབ་པའི་གནད༔ སྐལ་ལྡན་དག་གི་སྐལ་བའོ༔ བཀའ་སྲུང་དྲང་སྲོང་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་བའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།སརྦ་མངྒ་ལཾ།།།།