TTDL-ZABTER-18-TSHA-118

འགྲོ་བའི་མགོན་པོ་པདྨ་འབྱུང་། །མཐོན་མཐིང་རལ་པའི་ཅོད་པན་དུ། །རྟག་བཞུགས་ཐུགས་རྗེས་བདག་སྐྱོངས་ལ། །རྣམ་དག་ལེགས་པའི་ལམ་དུ་ཚུད། །ཆོས་ལམ་ཞུགས་པའི་སྐྱེས་བུ་ཁྱོད། །ཐར་པ་དོན་དུ་གཉེར་འདོད་ན། །དལ་འབྱོར་རྙེད་དཀའི་ཚུལ་དྲན་ནས། །དོན་དང་ལྡན་ཕྱིར་དགེ་སྦྱོར་འབུངས། །འཆི་བ་སྙིང་ནས་དྲན་མཛོད་ལ། །དལ་ཁོམ་མེད་པར་ཆོས་ལ་འབུངས། །རྒྱུ་འབྲས་བླང་དོར་མ་ནོར་བར། །རྟག་ཏུ་ལག་ལེན་ཐེབས་པར་གྱིས། །འཁོར་བའི་སྡུག་བསྔལ་དྲན་མཛོད་ལ། །མྱུར་དུ་ཐར་བའི་ཐབས་ལ་འབུངས། །བདེ་སྐྱིད་ཆེ་གྲགས་ཕྱུག་འདོད་ཀྱང་། །བསམ་པ་ཐོག་ཏུ་ཁེལ་དུས་མེད། །འཇིག་རྟེན་བྱ་བ་ལ་འབད་ཀྱང་། །འགྲུབ་ཅིང་ཟིན་དུས་མི་འོང་བས། །ལས་སྣ་ཟིན་པ་ལྷ་ཆོས་ཡིན། །གཉེན་དང་ཉེ་དུ་ཕན་ཚུན་ཀུན། །བརྩེ་བས་བསྐྱངས་ཀྱང་མཐར་ཐུག་མེད། །རང་སྡུག་རང་གིས་ཉོས་པ་ལས། །དྲིན་ལན་དྲན་དང་གཟོ་མི་འོང་། །དེ་དོན་སོམས་ལ་རང་ཚོད་ཟུངས། །རང་ལུས་ཤ་ཁྲག་མ་གཏོགས་པ། །ཟས་ནོར་གཞན་ལ་བྱིན་ནའང་། །མགུ་ཞིང་ངོམས་པའི་དུས་མི་འོང་། །སྒྲུབ་རྒྱག་ཁོ་ནར་འགྲོ་བ་གལ། །ནོར་རྫས་བསགས་པ་རྒྱ་ཆེ་ཡང་། །ཤི་ཚེ་གཞན་གྱིས་ཧབ་ཤ་བྱེད། །ཆགས་དང་འཁྲུལ་པའི་གཞི་མ་ཡིན། །ཆོག་ཤེས་བརྟེན་པ་གནད་དུ་ཟུངས། །ཁ་ཡེངས་མིག་ཡེངས་རྣམ་གཡེང་གིས། །མི་ཚེ་སྟོང་ཟད་བྱེད་པ་དག༔ འཆི་ཁ་འགྱོད་དང་སྙིང་སྡུག་གིས། །ཅི་བྱ་གཏོལ་མེད་ལ་ཐུག་ངེས། །དེ་དོན་མ་བརྗེད་སེམས་ལ་ཞོག།སྡུག་བསྔལ་སེམས་ལ་བཏགས་བཞིན་དུ། །འཇིག་རྟེན་ཕ་རོལ་འགྲོ་བའི་ཚེ། །སྐྱབས་མགོན་དཔུང་གཉེན་གང་ཡང་མེད།སྡུག་བསྔལ་སྒོས་ཁུར་བྱེད་དགོས་འབྱུང་། །ཚེ་འདིའི་བྱ་བའི་འཕྲོ་བསྟུང་ལ། །རྒྱལ་བ་གོང་མའི་གཤེགས་ཤུལ་སྙོགས། །ཁམས་གསུམ་འཁོར་བར་འཁྱམས་པའི་རྒྱུ། །ང་མེད་ང་རུ་འཛིན་པའི་སེམས། །གཞི་རྩ་བྲལ་བའི་ངང་ལ་ལྟོས། །གཞི་དབྱིངས་ཁྱབ་བརྡལ་ནམ་མཁའ་ཆེ། །བདག་ཏུ་འཛིན་པས་གུད་དུ་བཅད། །སྒྱུ་མ་ལྟ་བུའི་རྟེན་འབྲེལ་ལས། །འདོད་ཡོན་ལྔ་ཡི་སྣང་བ་ཤར། །མིང་དང་དངོས་པོ་མཚན་མ་བྲལ། །ཆུ་ཡི་གཟའ་སྐར་ནམ་མཁའི་འཇའ། །སྣང་བཞིན་གཞི་དབྱིངས་སྟོང་གསལ་ཉིད། །སྣོད་བཅུད་འདོད་ཡོན་ཆོས་སུ་ཤར། །གཞི་དབྱིངས་ཉིད་དུ་རོ་གཅིག་པས། །ངང་ཚུལ་རྟོགས་པའི་ཤེས་རབ་ཆེ། །ལྟ་བའི་རྒྱལ་པོ་བླ་ན་མེད། །སྐུ་དང་ཡེ་ཤེས་ཡོན་ཏན་དཔལ། །ལམ་དང་འབྲས་བུའི་ཆོས་རྣམས་ཀུན། །ཡེ་གཞི་ཉིད་ལ་རང་ཆས་རྫོགས། །རྫོགས་པའི་སངས་རྒྱས་བཅོམ་ལྡན་འདས། །མངོན་གྱུར་ངང་ནས་བསྒྲུབ་པ་མཆོག།འཁོར་འདས་དག་མཉམ་ཆེན་པོའི་དབྱིངས། །ལུང་མ་བསྟན་དུ་མ་སོང་བར། །ཇི་ལྟ་ཇི་སྙེད་ཡེ་ཤེས་ཀྱིས། །མཁྱེན་དང་གཟིགས་པའི་གདིང་ལྡན་ཅིང་། །སྒོ་གསུམ་བྱ་བ་དགུ་ཕྲུགས་དང་། །བྱར་མེད་ངང་དུ་ཆམ་གྱིས་བཞག།ཕྱོགས་ལྷུང་བྲལ་བ་ལྟ་བའི་ཚད། །གཟའ་གཏད་མེད་པ་སྒོམ་པའི་ཚད། །བྱར་མེད་ངང་གནས་སྤྱོད་པའི་ཚད། །ཚད་གསུམ་དང་ལྡན་རྣལ་འབྱོར་ལམ།འཁོར་འདས་དག་མཉམ་གཞིའི་ཆོས་སྐུ། །མངོན་གྱུར་ངང་གནས་ལམ་གྱི་མཆོག།རང་ཐོག་རང་གྲོལ་འབྲས་བུ་སྟེ། །ཇི་བཞིན་ཡེ་གནས་ཡེ་ཤེས་ཀྱིས། །གནས་ལུགས་ཡིན་ལུགས་རྟོགས་ནས་སླར། །སྒྲོན་མ་རྣམ་བཞིའི་གསང་ལམ་ལ། །བརྟེན་ནས་གོལ་འཕྱུགས་མེད་པ་ཡི། །གནད་ལ་བསླབ་ཅིང་རྒྱུད་ལ་ཁེལ། །རིང་པོར་མི་ཐོགས་མྱུར་བའི་ལམ། །ཚེ་འདིར་ཡང་དག་སངས་རྒྱས་པའི། །གདམས་ངག་ཟབ་བརྒྱའི་ཡང་བཅུད་མཆོག།ཡལ་བར་མ་དོར་སྐལ་ལྡན་བུ། །སྔོན་བསགས་བསོད་ནམས་ལས་འབྲས་བུ། །ད་ལྟ་མི་ལུས་རིན་ཆེན་ཐོབ། །འཁོར་འདས་གཉིས་ཀྱི་ས་མཚམས་ཡིན། །གར་འགྲོ་གང་ཟག་ཁྱོད་ལ་རག།མི་རྒན་བདག་གི་སྙིང་གཏམ་ཡིན། །མ་བརྗེད་སྙིང་གི་མེ་ལོང་གྱིས། །ཡི་གེ་ཉར་ཚགས་མ་བྱེད་པར། །དོན་ལ་གཞོལ་ཏེ་ལག་ལེན་ཐོབ། །ལས་ངན་དྲེད་པོའི་རྗེས་མ་འབྲང་། །ཡ་རབས་དག་གི་རྗེས་སུ་སྙོགས། །གདམས་ངག་རྩ་བ་དེ་ལས་མེད། །ཅེས་པ་འདི་སློབ་བུ་ཡེ་ཤེས་ཉི་མ་དང་དོན་དམ་ཞེས་བྱ་བ་གཉིས་ཀྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་སྨྲས་པ་ཡོངས་སུ་དགེ་བར་གྱུར་ཅིག།དགེའོ། །། །