TTDL-ZABTER-13-PA-104

ཆོས་ཉིད་ནམ་མཁའི་ཀློང་མཛོད་ལས༔ གཏེར་སྲུང་སྤྱི་བསྐང་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ སྒྱུ་མའི་རྫས་ལྡན་འབྱོར་བའི་ཚོགས༔ སྒྱུ་མའི་སྔགས་བཞིན་སྤེལ་བའི་སྔགས༔ སྒྱུ་མཁན་བསམ་པའི་བྱེ་བྲག་བཞིན༔ འདོད་ཡོན་མི་ཟད་ཡིད་ཀྱིས་འཕྲུལ༔ ལྷ་རྣམས་ཡིད་ལ་དྲན་བཞིན་དུ༔ ཨོཾ་ཨཿཧཱུྃ༔ ཆོས་ཉིད་ནམ་མཁའ་རྣམ་དག་མཁའ་ཀློང་དུ༔ རྒྱ་མཚོའི་གཟའ་སྐར་ལྟ་བུའི་ལྷ་སྣང་བཀོད༔ ཡེ་ཤེས་རོལ་པའི་སྒྱུ་འཕྲུལ་འདོད་ཡོན་གཏེར༔ འཁོར་འདས་ཡོངས་ལ་རྒྱུན་མི་འཆད་པར་སྤྲོས༔ ལྷ་ཆེན་དབང་ཕྱུག་འཁོར་བཅས་ཐུགས་དམ་བསྐང་༔ གནོད་སྦྱིན་ཤན་དམར་འཁོར་བཅས༴བཀའ་སྲུང་མ་མགོན་ལྕམ་དྲལ༴དཔལ་མགོན་ཕྱག་བཞི་འཁོར་བཅས༴ཞིང་སྐྱོང་སེང་གདོང་འཁོར་བཅས༴དྲང་སྲོང་གཟའ་བདུད་འཁོར་བཅས༴ཀླུ་རྒྱལ་མི་མགོན་འཁོར་བཅས༴ཡ་མ་རཱ་ཛ་འཁོར་བཅས༴བཙན་རྒྱལ་སྲོག་བདག་འཁོར་བཅས༴མ་གཅིག་དཔལ་ལྡན་འཁོར་བཅས༴གནོད་སྦྱིན་ཙི་དམར་འཁོར་བཅས༴འགོ་ཞིང་རང་འཁོར་ལྷ་སྲུང་ཐུགས་དམ་བསྐང་༔ ཐུགས་དང་འགལ་གྱུར་ཅི་མཆིས་ཉེས་པ་བཤགས༔ བདག་གི་ཆོས་སྲིད་དགེ་ལེགས་ཡོན་ཏན་སྤེལ༔ ཕྲིན་ལས་རབ་འབྱམས་ཐོགས་པ་མེད་པ་ཡིས༔ བསམ་པའི་དོན་ཀུན་འབད་མེད་ཡོངས་གྲུབ་མཛོད༔ འགལ་རྐྱེན་ཀུན་བཟློག་སྡང་དགྲ་གནོད་པའི་བགེགས༔ མ་ལུས་མི་འགྱང་མངོན་སྤྱོད་དྲག་པོ་ཡིས༔ བཀུག་བསྒྲལ་མནན་བསྲེགས་གསོད་གཅོད་ཕྲིན་ལས་མཛོད༔ བཀའ་དམ་དཔང་བཙུགས་ལས་བཅོལ་ཚིག་དེ་དག༔ མ་འགྱང་མྱུར་དུ་སྒྲུབ་མཛོད་ས་མ་ཡ༔ དེ་ལྟར་གྲངས་ལྡན་བསྐྱར་བས་བྲན་བཞིན་འདུ༔ ཕྲིན་ལས་འགྲུབ་ཅིང་དགེ་ལེགས་གོང་འཕེལ་བྱེད༔ སྤྱི་བསྐུལ་བརྗོད་ཚེ་དགྲ་དཔུང་ཕྱེ་མར་བརླག༔ དེ་ཕྱིར་འདི་ལ་ནན་དུ་བརྩོན་པར་མཛོད༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ནི་རང་ལ་ཉེར་མཁོའི་ཆེད་དུ་བདུད་འཇོམས་རྡོ་རྗེས་གཏན་ལ་ཕབ་པའོ།།།།