DJYD-KABUM-16-MA-045

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 16, Text 45, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: . Kalimpong: Dupjung Lama, 1979-1985.*
Side notes	Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)

[edit]

（1ན） ༄༅། །ཨོཾ་སྭསྟི། ཟབ་ལམ་མཁའ་འགྲོའི་ཐུགས་ཐིག་གི་རིམ་གཉིས་ཀྱི་རྣལ་འབྱོར་སྟན་ཐོག་གཅིག་ཏུ་ལོ་གསུམ་ཕྱོགས་གསུམ་གྱི་ངེས་པས་ཉམས་སུ་ལེན་པ་ལ། ཐོག་མར་ཕྱི་མཚམས་བཅད་དེ་བློ་ལྡོག་རྣམ་བཞིའི་དམིགས་རིམ་སྔོན་དུ་འགྲོ་བས་ཕྱག་དང་སྐྱབས་འགྲོ་སྦྲགས་མ་འབུམ། སེམས་བསྐྱེད་འབུམ། ཡིག་བརྒྱ་འབུམ། མཎྜལ་འབུམ། བླ་མའི་རྣལ་འབྱོར་བྱེ་བ་རྣམས་སོ་སོར་ཁ་སྐོང་བཅས་ལ་ཁྱོན་ཟླ་བ་དྲུག །དེ་ནས་ནང་མཚམས་བཅད་དེ་ཐུན་མོང་དབྱིབས་ཀྱི་རྣལ་འབྱོར་ལ། གསལ་བརྟག་དག་གསུམ་གྱི་དམིགས་པ་གཙོ་བོར་བྱས་ཏེ་བསྙེན་པ་ཟླ་བ་གསུམ། སྒྲུབ་པ་ཟླ་བ་གསུམ། ལས་སྦྱོར་ལས་བཞི་སོ་སོར་ཞག་བདུན་རེ་དང་ཕྱེད་རེ་བརྩིས་པས་ཁྱོན་ཟླ་བ་གཅིག་བཅས་དེ་ཡན་གྱིས་སྔོན་འགྲོ་བསྐྱེད་རིམ་ཡོངས་དྲིལ་ལོ་གཅིག་དང་ཟླ་བ་གཅིག་སོང་། དེ་ནས་རྫོགས་རིམ་ཟབ་པ་སྔགས་ཀྱི་རྣལ་འབྱོར་ལ། སྟོང་ར་གསུམ་དང་འཇམ་རླུང་བུམ་པ་ཅན་ལ་ཟླ་བ་གཅིག །འབྲུ་གསུམ་རྡོར་བཟླས་ལ་ཟླ་བ་ཕྱེད། རྡོར་བཟླས་བུམ་པ་ཅན་སྦྱོར་བ་བཞི་ལྡན་ལ་ཟླ་ཕྱེད། ཁྱད་པར་བདེ་བའི་རྣལ་འབྱོར་ལ། གཏུམ་མོ་དྲོད་སྐྱེད་པ་ལ་ཟླ་བ་གཅིག །བདེ་བ་སྤེལ་བ་ལ་ཟླ་བ་གཅིག །ཡན་ལག་ཆོས་ལྔའི་སྒྱུ་ལུས་ཟླ་ཕྱེད། རྨི་ (1བ)ལམ་ཟླ་ཕྱེད། འོད་གསལ་ཟླ་ཕྱེད། འཕོ་བ་ཟླ་ཕྱེད། བར་དོ་ཟླ་ཕྱེད། དེ་ནས་ཕྱག་རྒྱའི་རྣལ་འབྱོར་ལ། རང་ལུས་ཐབས་ལྡན་ཟླ་བ་གཅིག་དང་ཕྱེད་བཅས་མཚན་བཅས་རྫོགས་རིམ་སྐོར་ལ་ཁྱོན་ཟླ་བ་བརྒྱད། འདིར་གཞན་ལུས་ཕོ་ཉའི་ལམ་ལ་ནུས་ཚད་དང་སྦྱར་བ་ལས་ཡུན་ཚད་མེད་ཅིང་ཉམས་སུ་ལེན་ནུས་པའི་བརྩོན་འགྲུས་ཅན་དཀོན་པས་འདིར་ཁྲིགས་སུ་མ་བཅད་ལ། གལ་ཏེ་ཉམས་སུ་ལེན་ན་མན་ངག་བཞིན་ལག་ཏུ་བླངས་ཏེ་དུས་ཡུན་སྤེལ། དེ་ནས་མཐར་ཐུག་ཡེ་ཤེས་ཀྱི་རྣལ་འབྱོར་ལ། སྔོན་འགྲོ་རྫོགས་ཆེན་སྤྱི་གཞུང་ནས་ལེན་དགོས་པས་འདིར་མདོར་བསྡུས་གསང་ཁྲིད་བཀའ་རྒྱ་མ་ལྟར། ལུས་རྡོ་རྗེ་སྦྱོར་བ་ལ་ཟླ་བ་གཅིག །ངག་ཧཱུྃ་སྦྱང་ལ། རྒྱས་གདབ། རྩལ་སྦྱང་། གཉེན་བཙལ། གཉེན་བཙལ། ལམ་ཞུགས་སོ་སོར་ཞག་བདུན་རེ་དང་ཉིན་ཕྱེད་རེ་བརྩིས་ཟླ་བ་གཅིག །ཡིད་སྦྱང་ཟུར་དུ་མ་བྱས་ཀྱང་རུང་བས། དངོས་གཞི་ཞི་གནས་ལ་ཞག་བཅུ། ལྷག་མཐོང་ལ་ཞག་བཅུ། ཟུང་འཇུག་ལ་ཞག་བཅུ་སྟེ་ཁྱོན་ཟླ་བ་གཅིག །སྟོང་པ་ནམ་མཁའ་ལྟ་བུ། གསལ་བ་མེ་ལོང་ལྟ་བུ། འཆར་བ་རྦ་རླབས་ལྟ་བུ་སྟེ། སྒོམ་ཚུལ་གསུམ་གྱིས་བོགས་དབྱུང་སྟེ་ཁྲེགས་ཆོད་ཁོ་ན་ལ་ཟླ་བ་བདུན། བཞུགས་སྟངས་དང་གཟིགས་སྟངས་སོགས་ཀྱི་གནད་ （2ན）གཅུན་ཏེ་ཐོད་རྒལ་ལ་ཟླ་བ་བདུན། མཐའ་རྒྱས་ཚེ་སྒྲུབ་དང་ཁ་སྐོང་མེ་མཆོད་བཅས་ལ་ཟླ་བ་གཅིག་སྟེ། ཚད་མེད་རྫོགས་རིམ་མཐའ་རྒྱས་བཅས་ལ་ཁྱོན་ལོ་གཅིག་དང་ཟླ་བ་དྲུག །དེས་སྤྱིར་བཏང་ལོ་གསུམ་ཕྱོགས་གསུམ་གྱི་ཉམས་ལེན་ལག་ཁྲིད་ཡོངས་སུ་ཚང་ཞིང་། གོང་གི་བསྐྱེད་རྫོགས་སོ་སོར་ལམ་རྟགས་དང་བསྟུན་པའི་སྨིན་སློབ་ལ་ནི་རང་རང་གི་དད་བརྩོན་དང་སྐལ་བའི་ཁྱད་པར་གྱི་རྗེས་སུ་འགྲོ་བས་ན་མཐའ་གཅིག་ཏུ་ངེས་པ་མ་ཡིན་ནོ། །ཞེས་པའང་སྒྲུབ་བརྩོན་བླ་མ་འཆི་མེད་རྡོ་རྗེའི་ངོར་འཇིགས་བྲལ་ཡེ་ཤེས་རྡོ་རྗེས་སོ། །༎