DJYD-KABUM-17-TSA-029

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 17, Text 29, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 17: . Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །དགེ་བསྙེན་བཙན་རྒོད་གདུག་པ་སྙིང་འབྱིན་ཇག་པ་མེ་ལེན་གྱི་མཆོད་སྤྲིན་ལས་བྱང་ཁྲག་འཐུང་དགྱེས་པའི་གད་རྒྱངས་ཞེས་བྱ་བ་བཞུགས་སོ། །

༄༅། །ཨོཾ་སྭ་སྟི། སྣང་སྲིད་ཟིལ་གྱིས་གནོན་པའི་ཧེ་རུ་ཀ ། བརྟན་གཡོ་ཀུན་གྱི་ཁྱབ་བདག་དེར་བཏུད་ནས། །གང་གི་བཀའ་སྡོད་དྲག་རྩལ་བསྭེའི་སྐྱེས་བུ། །བསྒྲུབ་ཅིང་མཆོད་པའི་ཕྲིན་ལས་དེང་འདིར་སྤྲོ། །（འདིར་དབང་ཐོབ་ཅིང་དམ་ཚིག་ལ་གནས་པའི་སྔགས་པས་དགེ་བསྙེན་གདུག་པ་སྙིང་འབྱིན་ནམ་བཙན་རྒོད་ཇག་པ་མེ་ལེན་ཉིད་སྒྲུབ་པའི་ཕྲིན་ལས་ལག་ཏུ་བླང་བའི་རིམ་པ་ལ་གསུམ། སྦྱོར་བ། དངོས་གཞི། རྗེས་སོ། །） （དང་པོ་ནི་ཉེར་དགུ་སོགས་ཁྱད་པར་ཅན་གྱི་དུས་ལ་ཡིད་དང་མཐུན་པའི་གནས་ཁང་ལེགས་པར་བརྒྱན། བྲིས་སྐུ་སོགས་རྟེན་བཀྲམ་པའི་མདུན་དུ་སྟེགས་བུ་ཁེབས་དང་ལྡན་པ་ལ་ཟངས་གཞོང་འབྲུ་ནག་གིས་བཀང་བའི་དབུས་སུ་སྲོག་འཁོར་བླ་རྡོ་བཀོད། དེའི་མདུན་འབྲུ་ནག་གི་ངར་ཕྱེ་སོགས་གཙང་ཞིང་བཟང་བའི་རྒྱུ་དམ་རྫས་དང་བཅས་པ་（2ན）ལ་གཏོར་མ་གདན་གྲུ་གསུམ་བྲག་རིས་ཀྱིས་མཚན་པའི་ཁར་བཙན་བཤོས་དམར་པོ་གྲུ་གསུམ་སྦྲུལ་དཀྲིས་ར་མགོས་བརྒྱན་པའི་མཐའ་བསྐོར་དུ་སྡེ་བརྒྱད་ཀྱི་བཤོས་བུ། དེའི་མདུན་དུ་གཏོར་གདན་གོང་མཚུངས་ལ་བཙན་བཤོས་དམར་པོ་རང་འདྲའི་འཁོར་བདུན། གཡས་སུ་གཏོར་གདན་གོང་མཚུངས་ལ་བདུད་བཤོས་ནག་པོ་སྦྲུལ་གྱིས་དཀྲིས་པ་རང་འདྲའི་འཁོར་བདུན། གཡོན་དུ་གཏོར་གདན་གོང་མཚུངས་སྟེང་གཤིན་རྗེའི་བཤོས་བུ་རྩེ་རལ་ཅན་རང་འདྲའི་འཁོར་བདུན། རྒྱབ་ཏུ་གཏོར་གདན་ཟླུམ་པོར་སྨན་བཤོས་དཀར་ཟླུམ་ལ་འཁོར་རང་འདྲ་བཞི། དེ་དག་གི་གཡས་སུ་སྨན་ཕུད། གཡོན་དུ་རཀྟ། མདུན་ངོས་སུ་ཕྱིའི་ཉེར་སྤྱོད་ལྔ་དང་། དབང་པོའི་མེ་ཏོག་ལ་སོགས་པ་ཁྱད་པར་གྱི་མཆོད་པ་རྣམས་དང་། གཞན་ཡང་ཡི་དམ་དང་ཆོས་སྐྱོང་གཞན་གྱི་གཏོར་མ་ཡོད་ནའང་གོ་རིམ་མ་ནོར་བར་ལག་ལེན་སྤྱི་འགྲེ་ལྟར་བསྒྲིག །གཙོ་བོའི་གཏོར་མར་སྨྱུག་རྒོད་ཀྱི་མདའ་འུག་སྒྲོ་（2བ）མར་དར་དམར་གྱི་ཅོད་པན་བཏགས་པ་འཛུགས། གཞན་ཡང་ཛ་གད་ཇ་ཕུད་ཁྲག་སྐྱེམས་ཞོ་དང་འོ་མ། འབྲང་རྒྱས་ཕྱེ་མར་འབུལ་གཏོར་སོགས་ཕྱི་ནང་གསང་བིའ་མཆོད་རྫས། མཐུན་རྫས། རྟེན་རྫས། སྐོང་རྫས་རྣམས་ཅི་འབྱོར་བ་དང་། སྒྲུབ་པ་པོའི་མདུན་དུ་རྡོ་དྲིལ་ནང་མཆོད་གཡབ་དར་དམར་པོ་སོགས་དང་། རོལ་མོའི་ཆས་ཉེ་བར་མཁོ་བའི་ཡོ་བྱད་ཐམས་ཅད་ཚོགས་པར་བཤམ་མོ། །） （གཉིས་པ་ཆོ་ག་དངོས་ལ། ཉིན་ཞག་དེ་ཉིད་ཀྱི་ཁོངས་སུ་བདག་བསྐྱེད་གཞན་སྔོན་དུ་སོང་ན་སྐབས་འདིར་སྙིང་པོ་ངག་ཏུ་བརྗོད་པའི་སྒོ་ནས་སྐད་ཅིག་གིས་ལྷར་གསལ་བཏབ་པས་ཆོག་ལ། དེ་ལྟར་མ་སོང་ན་ཐོག་མར་བདག་བསྐྱེད་བྱ་སྟེ། དེའང་སྤྱིར་ཡི་དམ་ཞི་ཁྲོ་གང་རུང་ལ་བསྟེན་ཀྱང་རུང་མོད། སྐབས་འདིར་འབྲེལ་ཆགས་སུ་རྟ་མཆོག་ཧེ་རུ་ཀའམ་པདྨ་ཁྲག་འཐུང་གཏུམ་པོ་གང་རུང་གི་བསྐྱེད་བཟླས་ཀྱི་ང་རྒྱལ་ལ་གནས་པར་བྱའོ། །དེ་ནས་མཆོད་རྫས་བྱིན་གྱིས་བརླབ་པ་ནི།） རཾ་ཡཾ་ཁཾ། ཡེ་ཤེས་མེ་རླུང་ཆུ་ཡིས་དངོས་འཛིན་སྦྱངས། །དུར་ཁྲོད་ཞིང་ཁམས་ནམ་མཁའི་མཛོད་ཀྱི་སྤྲིན། །ཕྱི་ནང་འདོད་ཡོན་མཆོད་པའི་ཆར་འབེབས་པས། །རབ་འབྱམས་ནམ་མཁའི་ཁམས་རྣམས་གང་བར་གྱུར། །ཨོཾ་བཛྲ་ཨརྒྷཾ་ཨཱཿཧཱུྃ་（དེ་བཞིན་དུ།） པཱདྱཾ། པུཥྤེ། ངྷཱུཔེ། ཨཱ་ལོ་ཀེ ། གནྡྷེ། ནཻ་ཝི་དྱ། ཤཔྡ་ཨཱཿཧཱུྃ། （ཞེས་བརྗོད་ཅིང་རོལ་མོའི་སྒྲ་སྦྱར། སྨན་རཀ་གཏོར་མ་ལ་དམིགས་ཏེ།） རཾ་ཡཾ་ཁཾ། སྟོང་པའི་ངང་ལས་རླུང་མེ་ཐོད་སྒྱེད་སྟེང་། །ཨ་ལས་ཐོད་པར་ཤ་ལྔ་བདུད་རྩི་ལྔ། །ས་བོན་གྱིས་མཚན་སྟེང་དུ་འབྲུ་གསུམ་གྱི། །（3ན）འཕྲོ་འདུས་རྫས་ཞུ་ཉེས་སྐྱོན་དྲི་མ་སྦྱངས། །ཡེ་ཤེས་བཅུད་དྲངས་གཉིས་མེད་བདུད་རྩིར་འཁྱིལ། །བཀའ་སྲུང་འཁོར་བཅས་དགྱེས་སྐོང་ནུས་པར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ （ལན་གསུམ་གྱིས་བྱིན་བརླབ། གཉིས་པ་དངོས་གཞི་ནི། མདུན་རྟེན） ཨོཾ་སྭ་བྷཱ་ཝ་ཤུདྔྷ་སརྦ་ངྷརྨཱ་སྭ་བྷཱ་ཝ་ཤུདྡྷོ་྅་ཧཾ་གིས་སྦྱང་། སྟོང་པའི་ངང་ལས་མདུན་དུ་བཙན་ཡུལ་ཟངས་ཐང་དམར་པོ་གཤིན་ཐང་སྐྱ་མོ་ལས་འཇིགས་སུ་རུང་བ། སྟེང་ན་བྱ་རྒོད་དང་སྲིན་བྱ་འུག་པ་ལ་སོགས་པ་བཙན་བྱ་མང་པོས་ཤ་ཟན་གྱི་རྐན་སྒྲ་སྒྲོགས་པ། སྤྲིན་ནག་མུན་ལྟར་གཏིབས་ཤིང་འབྲུག་སྟོང་དུས་གཅིག་ཏུ་ལྡིར་ནས་གནམ་ལྕགས་ཀྱི་ཚྭ་ཚྭ་འཕྲོ་བ། སྲིན་ཡུལ་ལངྐ་པུ་རི་དང་མཚུངས་པར་འཇིགས་ཤིང་སྐྱི་གཡའ་བའི་བྲག་དམར་གྱི་རི་རབ་མཆོང་ལྟར་དམར་བ་སྲིད་རྩེར་བསྙེགས་པའི་ངོས་ནས་སྟག་གཟིག་དོམ་དྲེད་འཕར་བ་སྤྱང་ཀི་ལ་སོགས་པ་གཅན་གཟན་མང་པོས་ངར་སྐད་སྒྲོགས་པས་ཡིད་རྩ་ཞུམ་པ། དུག་ཤིང་དང་རྩུབ་ཤིང་དང་སེང་ལྡེང་ལ་སོགས་པ་ཚང་ཚིང་རབ་ཏུ་འཁྲིགས་པའི་ཀློང་ན་རོ་ལངས་དང་ལྕེ་སྤྱང་སྣ་ཚོགས་པ་ཕྱོགས་བཅུར་རྒྱུ་བ། རི་རབ་ཀྱི་སྟེང་དུ་ཁྲག་མཚོ་དམར་ནག་རྦ་ཀློང་གནམ་དུ་ཁོལ་ནས་སིར་སྒྲ་སྒྲོགས་པའི་དབུས་སུ་བཙན་གྱི་བསྭེ་མཁར་དམར་པོ་གྲུ་གསུམ་སྒོ་གཅིག་པ། （3བ）དྲག་པོའི་བཀོད་པ་ཡོངས་སུ་རྫོགས་ཤིང་རྒྱ་ཁྱོན་ཆོས་ཀྱི་དབྱིངས་དང་མཉམ་པའི་ལྟེ་བར་རྟ་དམར་རླུང་གི་ཤུགས་ཅན་གསེར་སྒ་རིན་ཆེན་འབར་བས་མཛེས་པའི་སྟེང་དུ་ཧྲཱིཿདམར་པོ་ལས་འོད་ཟེར་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས་དགེ་བསྙེན་ཆེན་པོ་མོན་པ་དམར་པོ་རྡོ་རྗེ་དགྲ་འདུལ་རྩལ་སྐུ་མདོག་བྱེ་རུའི་ལྷུན་པོ་འོད་དུ་འཚེར་བ་ལ་ཉི་མ་བྱེ་བས་འཁྱུད་པའི་གཟི་བྱིན་ཅན། རབ་ཏུ་མི་བཟད་པས་ཁྲོས་ཤིང་འཁྲུགས་པ་སྲིན་པོ་ལྟར་རྔམས་པའི་སྤྱན་གསུམ་ཁྲག་མཚོ་ལྟར་ཁོལ་ཞིང་། ཁྲོ་གཉེར་མུན་ལྟར་གཏིབ་པ་སྨིན་མཚམས་སུ་སྡུད་པ། རྣམ་པར་ཁྲོས་པའི་ཞལ་ཡས་སོས་མ་མཆུ་མནན་ཏེ་ཨམ་གཙིགས་གཤིན་རྗེ་ལྟར་བསྡམས་ནས་མཆེ་བ་གངས་རི་ལྟར་གཙིགས་པ། དབུ་སྐྲ་རལ་པ་དམར་པོ་གནམ་དུ་གཟེངས་པའི་རྩེ་ནས་མེ་སྟག་གི་ཚྭ་ཚྭ་འཕྲོ་བ། སྐུ་ལ་དབང་གི་བསྭེ་ཁྲབ་དང་དབུ་ལ་བསྭེ་རྨོག་པདྨ་རཱ་གའི་མདངས་ཅན་ལ་དར་གྱི་དཀྱུས་ཁྲ་ཐོད་སྐམ་ལྔས་མཚན་ཅིང་སྟེང་དུ་དར་འཕྲུ་ལྔ་ལྡན་དང་། རྩེ་མོར་རྒྱལ་མཚན་དམར་པོ་ནོར་བུའི་ཏོག་གིས་མཛེས་པ་ནས་འདོད་རྒུའི་ཆར་འབེབས་པ། བསྭེ་ཁྲབ་ཀྱི་སྟེང་དུ་རྒོད་པོའི་གཤོག་རྐྱང་གི་མཚོན་བྱེད་ལྕོག་དར་གནམ་དུ་གཟིངས་ཤིང་འཁོར་（4ན）གསུམ་རྐེད་ལ་བསྐོར་བ། ཕྱག་གཡས་མདུང་དམར་ལ་དར་དམར་གྱི་བ་དན་བཏགས་པ་གནམ་དུ་བསྒྲེངས་ཤིང་། གཡོན་པས་དམ་ཉམས་ཀྱི་ཙིཏྟ་དམར་པོ་ཞལ་དུ་འདྲེན་བཞིན་ཞགས་དམར་གློག་ལྟར་འཁྱུག་པ། དེའི་མདུན་དུ་འགུགས་བྱེད་དམར་པོ་ལྕགས་ཀྱུ་དང་བཙན་ཞགས། གཡས་སུ་སྒྲོལ་བྱེད་ནག་པོར་རལ་གྲི་དང་བདུད་ཞགས། གཡོན་དུ་སྲོག་གཅོད་དམར་ནག་གློ་སྙིང་དང་ཟངས་གྲི། གསུམ་ཀའང་སྟག་ཆས་ཁྲབ་རྨོག་གིས་བརྗིད་ཅིང་རང་མདོག་གི་རྟ་ལ་བཞོན་པ། རྒྱབ་ཏུ་ཀླུ་སྨན་དཀར་མོ་མཛེས་སྡུག་དང་ལྡན་པ་དར་དང་རིན་པོ་ཆེའི་རྒྱན་གྱིས་སྤྲས་ཤིང་མདའ་དར་དང་ནོར་གཞོང་འཛིན་པ། འདོ་བ་བྲོ་དཀར་ལ་ཞོན་པ། གཞན་ཡང་ས་བཙན་དང་ཆུ་བཙན། མེ་བཙན་དང་རླུང་བཙན། གློག་བཙན་དང་ཐོག་བཙན། བྲག་བཙན་དང་དམུ་བཙན། གཡའ་བཙན་དང་གངས་བཙན་སོགས་ཉི་ཟེར་གྱི་རྡུལ་ལྟར་འཁྲིགས་པ། ཐམས་ཅད་ཀྱང་ཟ་ཟ་རྔམས་རྔམས་མཆོངས་ཤིང་རྒྱུག་པའི་ཚུལ་ཅན་སྒྲུབ་པ་པོའི་ཕྲིན་ལས་འདོད་དགུར་སྒྲུབ་པའི་ཚུལ་གྱིས་གནས་པའོ། །གཙོ་འཁོར་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་དང་སྲོག་གི་སྙིང་པོ་ལས་འོད་ཟེར་འཕྲོས་པས་ལྷ་ཡི་གནས་མཆོག་（4བ）རྩུབ་འགྱུར་ཚལ། རི་རབ་ཀྱི་ཟོམ། ཤམྦྷ་ལ་དང་ཨོ་རྒྱན་དང་རྒྱ་གར། ལི་ཡུལ་དང་རྒྱ་ནག །གེ་སར་གྱི་ཡུལ་དང་མོན་ཡུལ་དུང་ལ་དཀར་པོ། དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་། མཆིམས་ཕུའི་བྲག་དམར་དང་ཡར་ལུང་ཤེལ་གྱི་བྲག་ཕུག །གངས་ཏི་སེ་དང་བལ་ཡུལ་ཡང་ལེ་ཤོད། དཔལ་གྱི་ཙཱ་རི་དང་ཙཱ་འདྲ། རོང་ཡུལ་ཁ་བ་དཀར་པོ། གནམ་འབྲུག་དངར་ལུང་སོགས་གནས་ཡུལ་སྤྱི་དང་། བདུད་ཡུལ་ཁ་རག་མགོ་དགུ། མོན་གྱི་ཐིམ་ཡུལ་བདེ་ཆེན་ཕུག །ཁྱད་པར་བླ་མ་གོང་མ་རྣམས་ཀྱི་གདན་ས་སོགས་རང་བཞིན་གར་བཞུགས་ཀྱི་གནས་ནས་སྐད་ཅིག་གིས་སྤྱན་དྲངས་པར་（བསམ་ལ།） ཨོཾ་ཧྲཱིཿཤུ་ཏྲི་གུར་ལང་ཨ་ར་བཛྲ་བྷྱོ་ཛ་ཛཿ （ཞེས་འབོད་སྔགས་བཟླ་ཞིང་། སྦྱར་བའི་སྤོས་བསྲེག་རོལ་མོའི་འགྱུར་བ་དང་བཅས་པའི་ང་རོའི་དབྱངས་ཀྱིས་བསྐུལ་ཏེ།） ཀྱེེ། གླིང་གི་གླིང་མཆོག་འཛམ་བུ་བྲྀཀྵའི་གླིང་། །གནས་ཀྱི་ཕུལ་བྱུང་ཐིམ་ཡལ་བདེ་ཆེན་ཕུག །ངོ་མཚར་བསྭེ་མཁར་དམར་པོའི་ནང་ཤེད་ནས། །ལྷ་ཡི་དགེ་བསྙེན་བོན་སྐྱོང་ཨ་བསྭེ་རྒྱལ། །མོན་པ་དམར་པོ་བསྟན་པའི་བཀའ་སྲུང་ཆེ། །བྱུ་རུའི་མདངས་འཛིན་ཁྲག་གི་རལ་པ་ཅན། །ལྷ་དང་གནོད་སྦྱིན་གཤིན་རྗེ་ཀླུ་བདུད་སོགས། །བསྡོང་ཟླ་རྣམ་རོལ་བཀོད་པ་དུ་མར་བཅས། །འབོད་དོ་གཡབ་（5ན）དར་དམར་པོས་སྤྱན་མ་བརྟུལ། །སྲིད་གསུམ་གང་བའི་བཀའ་འཁོར་འབུམ་ཕྲག་བཅས། །རྣལ་འབྱོར་གདུང་བས་སྙིང་ནས་སྤྱན་འདྲེན་ནོ། །མ་ཐོགས་རིངས་པའི་ཚུལ་གྱིས་གཤེགས་སུ་གསོལ། །（ཞེས་དང་།） ཀྱེེ། ཕྱོགས་ཕྱོགས་དེ་ནི་ཕ་གི་ན། །ཉི་མ་ལྷོ་ཕྱོགས་ཕ་གི་ན། །མོན་གྱི་ལྗོངས་ལ་བཙན་གྱི་ཡུལ། །ཐིམ་པའི་ཡུལ་ནི་བདེ་ཆེན་ཕུག །ས་གཞི་དམར་པོ་ཁྲག་གི་མདོག །ཟངས་བྲག་གནམ་དུ་ཟངས་སེ་ཟང་། །ལྗོན་ཤིང་མང་པོ་ཐིབས་སེ་ཐིབ། །སྟག་མོ་ངར་སྐད་འུ་རུ་རུ། །བསྭེ་ཡི་སྐུ་མཁར་ལྡེམས་སེ་ལྡེམས། །མི་མགོའི་ཁ་བད་ཏ་ལ་ལ། །རྒྱུ་མའི་དྲྭ་བ་ཁྲིགས་སེ་ཁྲིག །ཤ་རུལ་དྲི་མ་ཆི་ལི་ལི། །རྟ་དམར་འཚེར་སྐང་ལྷངས་སེ་ལྷང་། །གསེར་སྒ་འོད་དུ་འཚེ་རེ་རེ། །བསྭེ་ཁྲབ་ཁྲོབ་སྒྲ་ཁྲོ་ལོ་ལོ། །བསྭེ་རྨོག་དར་འཕྲུ་པུ་རུ་རུ། །མི་དམར་གཟི་མདངས་ཡ་ལ་ལ། །མདུང་དམར་གནམ་ལ་སྒྲེངས་སེ་སྒྲེང་། །བ་དན་དམར་པོ་ཁྱུགས་སེ་ཁྱུག །རོལ་པ་སྡོང་ཟླའི་ཚོགས་དང་བཅས། །ཚུར་བྱོན་ཚུར་བྱོན་གནས་འདིར་གཤེགས། །འདིར་བཞུགས་འདིར་བཞུགས་མོན་པ་དམར། །གསོལ་ལོ་གསོལ་ལོ་དགྲ་འདུལ་རྩལ། །མཆོད་དོ་མཆོད་དོ་ས་མཱ་ཛཿ ཙཿ ཁྱོད་ཀྱི་མདུན་ན་（5བ）བཙན་གྱི་དཔོན། །འགུགས་བྱེད་བཙན་རྒོད་དགྲ་འདུལ་རྩལ། །འདོ་བ་དམར་པོ་རྐྱང་གི་མདོག །བཙན་གྱི་རྒྱལ་པོ་བྱུ་རུའི་མདོག །ལྕགས་ཀྱུས་དགྲ་བོའི་སྙིང་ནས་འདྲེན། །ཞགས་དམར་དགྲ་བོའི་སྐེ་ནས་འཆིང་། །བཙན་དམག་འབུམ་གྱི་ཚོགས་དང་བཅས། །ཚུར་བྱོན་འདིར་བཞུགས་དམ་ལ་འདུས། །དུཿ ཁྱོད་ཀྱི་གཡས་ནས་བདུད་ཀྱི་དཔོན། །སྒྲོལ་བྱེད་ཀླུ་བདུད་མུན་པ་ནག །འདོ་བ་འོལ་པ་ཆར་སྤྲིན་མདོག །བདུད་ཀྱི་རྒྱལ་པོ་སོལ་བའི་གདོང་། །རལ་གྲི་ངར་མ་ཀླད་ན་འཕྱར། །ཞགས་ནག་དགྲ་བོའི་རྐེ་ལ་གཟིར། །བདུད་དམག་འབུམ་གྱི་ཚོགས་དང་བཅས། །ཚུར་བྱོན་འདིར་བཞུགས་དམ་ལ་འདུས། །ཡཿ ཁྱོད་ཀྱི་གཡོན་ནས་གཤིན་རྗེའི་དཔོན། །སྲོག་གཅོད་ཤན་པ་མྱུར་མགྱོགས་རྩལ། །འདོ་བ་བྲ་གནག་ཁྲག་རུལ་མདོག །གཤིན་རྗེའི་རྒྱལ་པོ་མཆིན་པའི་གདོང་། །དགྲ་སྙིང་དྲོན་མོ་ཞལ་དུ་འདྲེན། །ཟངས་གྲི་དམར་པོ་དགྲ་ལ་གཟིར། །གཤིན་རྗེ་འབུམ་གྱི་ཚོགས་དང་བཅས། །ཚུར་བྱོན་འདིར་བཞུགས་དམ་ལ་འདུས། །མཿ ཁྱོད་ཀྱི་རྒྱ་བན་ལྷ་སྨན་མ། །མཛེས་ལྡན་དཀར་མོ་ཀླུ་ཡི་རིགས། །འདོ་བ་གྲོ་དཀར་དུང་གི་མདོག །ཡིད་འོང་སྨན་མོ་ཟླ་བའི་མདོག །མདའ་དར་གཡབ་ཅིང་ཕྱྭ་གཡང་འགུགས། །ནོར་གཞོང་（6ན）འཛིན་ཅིང་དངོས་གྲུབ་སྟེར། །སྨན་མོ་འབུམ་གྱི་ཚོགས་དང་བཅས། །ཚུར་བྱོན་ཚུར་བྱོན་དམ་ལ་འདུས། །ཨ། ལྷ་ཡི་ཚོགས་རྣམས་དམ་ལ་འདུས། །ཡ། གཤིན་རྗེའི་ཚོགས་རྣམས་དམ་ལ་འདུས། །མ། མ་མོའི་ཚོགས་རྣམས་དམ་ལ་འདུས། །དུ། བདུད་ཀྱི་ཚོགས་རྣམས་དམ་ལ་འདུས། །རུ། དམུ་ཡི་ཚོགས་རྣམས་དམ་ལ་འདུས། །ཙ། བཙན་གྱི་ཚོགས་རྣམས་དམ་ལ་འདུས། །ཤ ། ཐེའུ་རང་ཚོགས་རྣམས་དམ་ལ་འདུས། །ན། ཀླུ་ཡི་ཚོགས་རྣམས་དམ་ལ་འདུས། །ཞ་ཡ་མ་རུ་ཙ་ཤ་ན་ཛ་ཛཿ （ཞེས་སྤྱན་དྲངས།） ཧཱུཾ། རབ་འཇིགས་དུར་ཁྲོད་བསྐལ་མེ་འཁྲུགས་པའི་དབུས། །ལོག་འདྲེན་དྲེགས་པ་བསྣོལ་བའི་གདན་ཁྲི་ལ། །གདུག་པ་སྙིང་འབྱིན་བཙན་རྒྱལ་འཁོར་དང་བཅས། །ཕྲིན་ལས་བསྒྲུབ་ཕྱིར་བརྟན་པར་བཞུགས་སུ་གསོལ། །ས་མ་ཡ་ཏིཥྛ་ལྷན། （ཞེས་བཞུགས་སུ་གསོལ། དམ་ལ་བཞག་པ་ནི། དམ་ཚིག་རྡོ་རྗེ་སྤྱི་བོར་བཞག །བདུད་རྩི་ལྗགས་ལ་བསྟིམ་པར་མོས་ཏེ།） ཨོཾ་བཛྲ་ས་མ་ཡ་ཧ་ན་ཧ་ན་ཧཱུཾ་ཕཊ། དགེ་བསྙེན་བཙན་རྒོད་ཆེན་པོ་ཇག་པ་མེ་ལེན་འཁོར་དང་བཅས་པ་རྣམས་ཀྱིས་དབང་ཆེན་རྟ་མཆོག་ཧེ་རུ་ཀ ། སློབ་དཔོན་པདྨ་ཐོད་ཕྲེང་། མཁན་ཆེན་བོ་ངྷི་སཏྭ། ཆོས་རྒྱལ་མེས་དབོན་རྣམ་གསུམ། གཏེར་ཆེན་ཆོས་ཀྱི་དབང་ཕྱུག །འཇམ་（6བ）དབྱངས་ཀུན་དགའ་སེངྒེ། རྗེ་བཙུན་ཆོས་ཀྱི་མགོན་པོ། ཡོངས་འཛིན་ངག་གི་དབང་པོ་སོགས་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། སྡང་བའི་དགྲ་ཐུལ། གནོད་པའི་བགེགས་ཆོམས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག །（ཞེས་དང་།） ཀྱེེ། ཁྱོད་སྔོན་ཡབ་ཆེན་ཨབ་བསྭེ་རྒྱལ་པོ་དང་། །གདུག་པ་ཀླུ་བདུད་དམར་མོ་ཟངས་མགྲིན་གཉིས། །གཅིག་སེམས་གཅིག་འཛིན་རབ་འཇིགས་བྲལ་དམར་གྱི། །མགུལ་དུ་བཤོས་ནས་ཟངས་སྒོང་རྡོལ་བ་ལས། །བྱུང་བའི་འཇིགས་རུང་བཙན་རྒོད་མི་བསྲུན་པ། །སྲིད་གསུམ་ཕུང་བར་ནུས་པའི་མཐུ་རྩལ་ཅན། །དང་པོ་པདྨ་དབང་ཆེན་རྟ་མགྲིན་དང་། །བར་དུ་ཡང་ལེ་ཤོད་ཀྱི་ཕུག་པ་རུ། །（7ན）པདྨས་དམ་བཞག་ཕྲིན་ལས་ཕུར་པ་ཡི། །ཕུར་སྲུང་བསྭེ་ཡི་སྐྱེས་བུའི་གྲལ་དུ་བཞག །སླར་ཡང་མོན་ཡུལ་མཐིལ་དུ་དགེ་བསྙེན་གྱི། །སྡོམ་པ་རབ་ཕོག་གསང་བའི་མཚན་ཡང་གསོལ། །གཞན་ཡང་མཆིམས་ཕུར་བཀའ་བརྒྱད་དཀྱིལ་འཁོར་དང་། །ཁྲ་འབྲུག་བཀའ་འདུས་རྒྱ་མཚོའི་དཀྱིལ་འཁོར་དུ། །ཟབ་མོ་གཏེར་གྱི་སྲུང་མར་མངའ་གསོལ་ཞིང་། །མཆོད་བསྟོད་དྲེགས་པའི་དཀྱིལ་འཁོར་ཆེན་པོར་བཅུག །ཐ་མ་འཇམ་དབྱངས་ཀུན་དགའ་སེང་གེ་དང་། །ཡོངས་འཛིན་ངག་གི་དབང་པོའི་སྤྱན་སྔ་རུ། །གཡར་དམ་བཅས་པའི་ཐ་ཚིག་མ་གཡེལ་ལ། །ད་ལྟ་བརྒྱུད་འཛིན་རྣལ་འབྱོར་བདག་ཅག་གིས། །བརྩེ་བའི་བུ་གཅིག་ཕ་མ་དྲན་འདྲ་བའི། །གདུང་བས་འབོད་ན་བཀའ་དང་དམ་ཚིག་ལས། །གཡེལ་བར་མ་མཛད་བཅོལ་བའི་ལས་ཀུན་སྒྲུབས། །དམ་ཚིག་ཆེན་པོའི་བདུད་རྩི་བཞེས་སུ་གསོལ། །བཛྲ་ས་མ་ཡ་ཨ་མྲྀ་ཏ་ཋ་ཋ་ཋ། （ཞེས་དམ་ལ་བཞག་པས་ཅི་བསྒོ་བའི་ལས་ཐམས་ཅད་ངོ་འཐོན་དུ་སྒྲུབ་པའི་བཀའ་ནོད་པར་བསམ། མཆོད་པ་འབུལ་བ་ནི།） ཧཱུྃ། རབ་འཇིགས་དུར་ཁྲོད་མཚན་ཉིད་ཀུན་ཚང་བའི། །བཙན་མཁར་དམར་པོ་ལྡེམ་པའི་ནང་ཤེད་ན། །སྲིད་གསུམ་སྲོག་བདག་དཀར་ཕྱོགས་སྐྱོང་བའི་གཉེན། །ལྷ་ཡི་ལྷ་མཆོག་འཁོར་（7བ）དང་བཅས་པ་ལ། །ལྕང་ལོར་བཅས་པའི་ཁྱོན་ཡངས་ཀ་པཱ་ལར། །ཉམས་པ་བསྒྲལ་བའི་སྙིང་ཁྲག་དྲོན་མོ་ཡི། །མཆོད་ཡོན་ཆེན་པོ་མཚོ་ལྟར་འཁྱིལ་བ་འདི། །དམ་ཅན་དགེ་བསྙེན་འཁོར་དང་བཅས་ལ་འབུལ། །ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་ཨརྒྷཾ་པྲ་ཏཱིཙྪ་སྭཱཧཱ། ཕྱོགས་བཅུའི་ཁམས་ན་བསྟན་ལ་འཁུ་བ་ཡི། །དགྲ་བགེགས་བསྒྲལ་བའི་དབང་པོ་རྣམ་པ་ལྔའི། །མེ་ཏོག་རབ་མཛེས་ཕྲེང་བས་ཕྱོགས་ཀུན་དཀྲིགས། །དམ་ཅན་དགེ་བསྙེན་འཁོར་དང་བཅས་ལ་འབུལ། །ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་པུཥྤེ་པྲ་ཏཱིཙྪ་སྭཱཧཱ། དུས་མཐའི་མེ་དཔུང་འབར་ཞིང་འཁྲུགས་པའི་ཁྲོད། །མ་རུངས་བདུད་སྡེའི་ཚོགས་ཀྱི་བམ་ཆེན་རོ། །བསྲེགས་པའི་དུད་སྤྲིན་ནམ་མཁའི་ཁམས་ཀུན་ཁྱབ། །དམ་ཅན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་དྷཱུ་པེ་པྲ་ཏཱིཙྪ་སྭཱཧཱ། ལྟ་ལོག་དགྲ་བགེགས་བསྒྲལ་བའི་ཚིལ་ཆེན་ཞུན། །རོ་རས་སྡོང་བུར་སྦྱར་ཏེ་སྤར་བ་ཡི། །སྒྲོན་མེ་ཉི་ཟླའི་འོད་ཀྱང་ཟིལ་གྱིས་གནོན། །དམ་ཅན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་ཨཱ་ལོ་ཀི་པྲ་ཏཱིཙྪ་སྭཱཧཱ། དུང་ཕོར་འཇིག་རྟེན་མཉམ་པའི་སྣོད་ནང་དུ། །དགྲ་དཔུང་བཅོམ་པའི་མཁྲིས་པ་ཆུ་སེར་དང་། །གཅིག་ཏུ་བསྐྱིལ་བའི་དྲི་ཆབ་རྦ་ཀློང་འཕྱོ། །དམ་ཅན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་གནྡྷེ་པྲ་ཏཱིཙྪ་སྭཱཧཱ། སྲིད་གསུམ་ཁྱོན་མཉམ་（8ན）ཞིང་ལྤགས་བཀྲམ་པའི་སྟེང་། །སྲོག་གཅོད་ཤན་པའི་བཤས་ར་ལྟ་བུ་ཡི། །ཤ་རུས་ཞལ་ཟས་ལྷུན་པོའི་གཏོས་ལྟར་སྤུངས། །དམ་ཅན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་ནཻ་ཝིདྱ་པྲ་ཏཱིཙྪ་སྭཱཧཱ། སྟོང་ཁམས་མ་ལུས་འུར་བའི་ཐོད་རྔའི་སྒྲ། །མི་སྡུག་རྐང་གི་གླིང་བུའི་ང་རོ་བཅས། །ས་གསུམ་འདར་བའི་སྒྲ་སྐད་རོལ་མོ་ལྡིར། །དམ་ཅན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་ཤཔྡ་པྲ་ཏཱིཙྪ་སྭཱཧཱ། （བདུད་རྩི་འབུལ་བ་ནི།） དམ་རྫས་རྩ་བ་བརྒྱད་ལ་ཡན་ལག་སྟོང་། །ཛ་གད་དཔའ་བོའི་ངར་ཆུ་དང་སྦྱར་བ། །འཆི་མེད་བདུད་རྩིའི་རྒྱ་མཚོ་ཆེན་པོ་འདི། །དམ་ཅན་དགེ་བསྙེན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་སརྦ་པཉྩ་ཨ་མྲྀ་ཏ་ཁཱ་ཧི། （རཀྟ་འབུལ་བ་ནི།） ཉམས་པའི་སྲོག་རྩ་བཅད་པའི་སྙིང་གི་ཁྲག །གཱིརྟིའི་མཁའ་རྒྱུན་བདེ་ཆེན་རཱ་གའི་རྡུལ། །དམར་ཆེན་ཆགས་པའི་རྦ་ཀློང་འཁྲུགས་པ་འདི། །དམ་ཅན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་མ་ཧཱ་རཀྟ་ཁཱ་ཧི། （གཏོར་མ་འབུལ་བ་ནི།） འཛིན་མའི་ཁྱོན་དང་མཉམ་པའི་གཏོར་སྣོད་དུ། །ཤ་ལྔ་བདུད་རྩི་ལྔ་ལྡན་གཏོར་ཆེན་པོ། །དགྲ་བོའི་ཤ་རུས་རང་བཞིན་ལྷུན་པོར་སྤུངས། །དམ་ཅན་དགེ་བསྙེན༴ ། ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་མ་ཧཱ་བ་ལིངྟ་ཁཱ་ཧི། （ཞེས་དང་།） དགེ་བསྙེན་འཁོར་བཅས་ཀྱི་ལྗགས་རྡོ་རྗེ་སྦུ་གུས་གཏོར་མའི་བཅུད་དྲངས་ཏེ་གསོལ་བར་（བསམ་ལ།） ཨོཾ་སརྦ་（8བ）སུ་ཏྲི་ར་ཏྲི་ནི་ཁ་རེ་བྷྲཱུཾ་ཨ་བྷི་ཤུ་ས་མ་ཡ་ཏྲི་ཤཾ་ཡ་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཨོཾ་ཧྲི་ཤུ་ཏྲི་གུར་ལང་ཨ་ར་བཛྲ་བྷྱོ་ས་པ་རི་ཝཱ་ར་ཨི་དཾ༴ ཨོཾ་ཧྲི་ཙ་དུ་མ་ཡ་ས་པ་རི་ཝཱ་ར་ཨི་དཾ༴ （ཞེས་ལན་བདུན་ནམ་གསུམ་གྱིས་ཕུལ་ལ།） དྲག་རྩལ་ཕྲིན་ལས་མྱུར་མགྱོགས་ཀྱི་བདག་པོ་དགེ་བསྙེན་བཙན་རྒོད་ཆེན་པོ་ཇག་པ་མེ་ལེན་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས་（སོགས་གོང་བཞིན་ཕྲིན་ལས་བཅོལ། བསྟོད་པ་ནི།） ཧཱུཾ། པདྨའི་གཏེར་སྲུང་སྒྲུབ་པ་པོ་ཡི་གྲོགས། །ཕྲིན་ལས་ཐོགས་མེད་བདག་འཛིན་རཱུ་ཏྲའི་གཤེད། །སྡེ་བརྒྱད་ཡོངས་ཀྱི་སྡེ་དཔོན་དྲག་ཤུལ་ཅན། །ལྷ་ཡི་དམག་དཔོན་ཆེན་པོར་ཕྱག་འཚལ་བསྟོད། །འདོད་དགུའི་ཆར་འབེབས་གནོད་སྦྱིན་ངལ་གསོས་བུ། །བཀའ་ཡི་ཕོ་ཉ་འཛམ་གླིང་གཏེར་གྱི་བདག །དགོས་འདོད་ཐོགས་མེད་ནོར་བདག་ཡོངས་ཀྱི་རྗེ། །དངོས་གྲུབ་འབྱུང་གནས་ཁྱོད་ལ་ཕྱག་འཚལ་བསྟོད། །ལྷོ་ཕྱོགས་གཤིན་ཐང་སྐྱ་མོར་གཤིན་གྱི་རྗེའི། །བཀའ་སྡོད་ཡོངས་ཀྱི་ཐུ་བོ་ཇག་པ་དམར། །མ་ལུས་སྲོག་ལ་དབང་བའི་མཐུ་རྩལ་ཅན། །ལས་མཁན་ཆེན་པོ་ཁྱོད་ལ་ཕྱག་འཚལ་བསྟོད། །མོན་ཡུལ་གནས་སུ་པདྨའི་བཀའ་ཡི་རྟགས། །སྤྱི་བོར་བླངས་ཏེ་ཐིམ་པའི་བདེ་ཆེན་ཕུག །གནས་ཡུལ་བཅས་ཏེ་དཔལ་ལྡན་ཞིང་གི་བདག །མོན་པ་（9ན）དམར་པོ་ཁྱོད་ལ་ཕྱག་འཚལ་བསྟོད། །བདུད་ཀྱི་ཡུལ་ལྗོངས་ཁ་རག་མགོ་དགུའི་སར། །ཁྲག་མཚོ་ཁོལ་མར་གནས་བཅས་ཀླུ་བཙན་ཆེ། །བོད་ཡུལ་སྐྱོང་བའི་གཞི་བདག་ཆེན་པོ་སྟེ། །དགེ་བསྙེན་ཆེན་པོ་ཁྱོད་ལ་ཕྱག་འཚལ་བསྟོད། །ཏི་སེའི་གནས་སུ་ལྷ་བཙན་དབང་གི་མདོག །གནས་ཡུལ་སྲུང་བའི་ཞིང་སྐྱོང་ཀུན་གྱི་རྗེ། །ཚུལ་བཞིན་སྒྲུབ་པ་པོ་ལ་སྟོང་གྲོགས་ཅན། །རྡོ་རྗེ་འབར་བ་ཁྱོད་ལ་ཕྱག་འཚལ་བསྟོད། །ངོ་བོ་གཅིག་ལ་རྣམ་འགྱུར་མཐའ་ཡས་པའི། །བཀོད་པ་ཉེར་སྟོན་གཉན་གྱི་སྡེ་དཔོན་ཆེ། །རཱ་ཛ་བསྭེ་ཡི་ཁྲབ་ཅན་ཞེས་ཀྱང་གྲགས། །ཆོས་འཁོར་སྐྱོང་བ་ཁྱོད་ལ་ཕྱག་འཚལ་བསྟོད། །ཁྱད་པར་སློབ་དཔོན་པདྨ་ཐོད་ཕྲེང་གིས། །མཆིམས་ཕུར་སྒྲུབ་པ་བཀའ་བརྒྱད་དཀྱིལ་འཁོར་དུ། །དབང་བསྐུར་དམ་བཞག་བཀའ་ཡི་གཉེར་ཁ་གཏད། །གཏེར་བདག་ཆེན་པོ་ཁྱོད་ལ་ཕྱག་འཚལ་བསྟོད། །བླ་མ་དགོངས་འདུས་དཀྱིལ་འཁོར་ཞལ་ཕྱེས་ཚེ། །ཟབ་གསང་གཏེར་གྱི་སྲུང་མ་དབང་བསྐུར་ཞིང་། །དམ་ཉམས་དགྲ་བོའི་ཤན་པར་མངའ་གསོལ་བ། །ཀླུ་བཙན་འབར་བ་ཁྱོད་ལ་ཕྱག་འཚལ་ལོ། །གཡོ་རུ་ཁྲ་འབྲུག་ཁྱམས་སྟོད་ད་ལ་རུ། །བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་དུ། །དམ་མནོས་བཀའ་ཡི་སྲུང་མར་ཞལ་བཞེས་པ། །རྫོང་བཙན་（9བ）དམར་པོ་ཁྱོད་ལ་ཕྱག་འཚལ་བསྟོད། །བོད་ཡུལ་ཆོས་འཁོར་དཔལ་གྱི་ལྷ་ལྡན་དུ། །དཔལ་གྱི་ལྷ་མོ་དུང་སྐྱོང་དཀར་མོ་དང་། །རྣམ་པར་རྩེ་བའི་སྲོག་བདག་མཐུ་རྩལ་ཅན། །རྡོ་རིང་གྲིབ་བཙན་ཆེན་པོ་ཁྱོད་ལ་བསྟོད། །མི་བསྲུན་ཁྱབ་འཇུག་ཆེན་པོ་རཱ་ཧུ་ལའི། །བསྡོང་ཟླ་སྣང་སྲིད་ཁམས་ལ་ཐོགས་མེད་རྒྱུ། །ལོག་འདྲེན་དགྲ་ལ་ལྟས་ངན་ཐོག་སེར་འབེབས། །གཟའ་རྒོད་མིག་དམར་ཁྱོད་ལ་ཕྱག་འཚལ་བསྟོད། །ཁྱད་པར་དཔལ་ལྡན་འབྲུག་པ་ཡབ་སྲས་ཀྱི། །བསྟན་དང་བསྟན་འཛིན་སྐྱོང་བར་མངའ་གསོལ་བ། །དྲག་རྩལ་ཕྲིན་ལས་མྱུར་མགྱོགས་རྫུ་འཕྲུལ་ཅན། །རྡོ་རྗེ་དགྲ་འདུལ་ཁྱོད་ལ་ཕྱག་འཚལ་བསྟོད། །ངོ་བོ་ཡེ་ཤེས་དབྱིངས་ལས་མ་གཡོས་ཀྱང་། །རྣམ་འགྱུར་འཇིག་རྟེན་དྲེགས་པའི་ཚུལ་འཛིན་པ། །སྲིད་གསུམ་ལྷ་འདྲེའི་སྟོང་སྲོག་བདག་པོ་ཆེ། །མེ་འོད་དམར་པོ་ཁྱོད་ལ་ཕྱག་འཚལ་བསྟོད། །བདེ་ཆེན་ཡེ་ཤེས་རོལ་པའི་མ་གཅིག་མ། །སྒྱུ་རྩལ་དྲུག་ཅུའི་ལང་ཚོ་ཉ་གང་བ། །འཇིགས་བྱེད་དགྱེས་པ་སྐྱེད་པའི་ལྷ་སྨན་ལྕམ། །ཀླུ་སྨན་འབུམ་ཕྲག་བཅས་ལ་ཕྱག་འཚལ་བསྟོད། །ཕྱོགས་བཅུའི་གནས་ནས་ཞིང་བཅུའི་དགྲ་བོ་ཀུན། །འགུགས་པའི་ལས་མཛད་བཙན་གྱི་སྡེ་དཔོན་རྗེ། །དུང་ལ་དཀར་པོར་གནས་པའི་མཐུ་བོ་ཆེ། །བཙན་དམག་འབུམ་ཕྲག་（10ན）བཅས་ལ་ཕྱག་འཚལ་བསྟོད། །དམ་ཉམས་བསྒྲལ་བར་རྔམས་པའི་དྲག་ཤུལ་ཅན། །བདུད་ཀྱི་སྡེ་དཔོན་སྒྲོལ་བྱེད་མ་རུངས་པ། །བདུད་ཡུལ་གནས་པའི་ཀླུ་བདུད་མཐུ་བོ་ཆེ། །བདུད་དམག་འབུམ་ཕྲག་བཅས་ལ་ཕྱག་འཚལ་བསྟོད། །རྟག་ཏུ་གསོད་ལ་རྔམས་པའི་ཤན་པ་ཅན། །གཤིན་རྗེའི་སྡེ་དཔོན་སྲོག་གཅོད་དབུགས་ལེན་བདག །རྒྱ་ལ་སེང་འདམ་གནས་པའི་མཐུ་བོ་ཆེ། །གཤིན་རྗེ་འབུམ་ཕྲག་བཅས་ལ་ཕྱག་འཚལ་བསྟོད། །གཞན་ཡང་བྲག་བཙན་དམུ་བཙན་ས་ཡི་བཙན། །ཆུ་བཙན་མེ་བཙན་རླུང་བཙན་ནམ་མཁའི་བཙན། །གཡས་བཙན་ལ་སོགས་སྣང་སྲིད་བཙན་དམག་གིས། །ཡོམ་ཡོམ་ཤིག་ཤིག་གང་ལ་ཕྱག་འཚལ་བསྟོད། །བདག་ཉིད་རྩེ་གཅིག་མོས་ཤིང་གདུང་བ་ཡིས། །ཁྱོད་བརྟེན་ཁྱོད་བསྒྲུབ་ཁྱོད་མཆོད་ཁྱོད་བསྟོད་ན། །དུས་ཀུན་ལུས་དང་གྲིབ་བཞིན་མི་འབྲལ་བར། །བསམ་དོན་མ་ལུས་འགྲུབ་པའི་ཕྲིན་ལས་མཛོད། །（ཅེས་བསྟོད། བཟླས་པ་བྱ་བ་ནི།） དགེ་བསྙེན་ཆེན་པོའི་ཐུགས་ཀར་ཉི་མ་ལ་གནས་པའི་སྲོག་གི་སྙིང་པོ་ཧྲཱིཿཡིག་བྱུ་རུའི་མདངས་ལྟར་འཚེར་བ་ལ་སྔགས་ཀྱི་ཕྲེང་བས་བསྐོར་བ། རང་ཉིད་ཡི་དམ་གྱི་ཐུགས་ཀ་ནས་འོད་ཟེར་འཕྲོས་པ་དགེ་བསྙེན་གྱི་ཐུགས་ཀར་ཕོག །སྔོན་གྱི་དམ་བཅའ་དྲན་ཏེ་ཅི་འདོད་པའི་ཕྲིན་ལས་རབ་（10བ）འབྱམས་ཐོགས་མེད་དུ་བསྒྲུབ་པར་（བསམ་ཞིང་། གོང་གནོན་ཡི་དམ་གྱི་བཟླས་པ་སྔོན་དུ་འགྲོ་བས།） ཨོཾ་ཧྲཱིཿཤུ་ཏྲི་གུར་ལང་ཨ་ར་བཛྲ་བྷྱོ་ཛ་ཛཿ ཨོཾ་ཨ་བྷི་ཤུ་ས་མ་ཡ་ཏྲི་ཤཾ་ཡ་ཧཱུཾ་ཕཊ༔ ཨོཾ་ཧྲི་ཙ་དུ་མ་ཡ་ས་མ་ཡ་ཛཿཧཱུྃ་ཕཊཿ （ཅེས་ཅི་ནུས་སུ་བཟླ་ཞིང་། རྦད་པ་ལ་སོགས་པའི་དྲག་སྔགས་ཁྱད་པར་བ་ནི་མན་ངག་ལས་ཤེས་ཤིང་སྤྱི་ཙམ་ལ་འདི་ཁོ་ནས་ཆོག་གོ ། བཟླས་པའི་མཐར།） ཨོཾ་མ་ཧཱ་ཡ་མ་རཱ་ཛ་ཤུ་ལ་ཏྲི་ས་པ་རི་ཝཱ་ར་པུཥྤེ་（སོགས་ནས་）ཤཔྡ་པྲ་ཏཱིཙྪ་སྭཱཧཱ། མ་ཧཱ་པཉྩ་ཨ་མྲྀ་ཏ་ཁཱ་ཧི། （ཞེས་མཆོད་ཅིང་།） པདྨའི་གཏེར（སྲུང་སོགས་ཤླཽ་ཀས་བསྟོད། ཚོགས་ཀྱི་མཆོད་པ་ནི། བདག་བསྐྱེད་གང་ལ་བརྟེན་པའི་གཞུང་བཞིན་བཏང་ལ། ཚོགས་བར་པ་དང་འབྲེལ་བར་སྐོང་བཤགས་བྱ་བ་ནི།） བསྐང་རྫས་རྣམས་ཨ་མྲྀ་ཏ（ས་བསང་།） སྭ་བྷཱ་ཝ（ས་སྦྱང་།） སྟོང་པའི་ངང་ལས་གནས་ཁང་དུར་ཁྲོད་དྲག་པོའི་ཞིང་ཁམས་བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་སྐོང་རྫས་ལ་སོགས་པ་སྲིད་ཞིའི་འདོད་ཡོན་གྱི་རྣམ་པ་མཁོ་རྒུ་ཚང་བ། བཟང་རྒུས་འབྱོར་བ། མཛེས་རྒུས་བརྒྱན་པ། ངོ་བོ་ཡེ་ཤེས་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་པར་འཆར་བས་ནམ་མཁའི་ཁམས་ཐམས་ཅད་གང་བར་（བསམ་ལ།） ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། （ལན་གསུམ།） བཛྲ་སྥ་ར་ཎ་ཁཾ་（ཞེས་རྒྱ་ཆེར་སྤེལ་ནས།） ཧྲཱིཿ སོར་རྟོག་ཡེ་ཤེས་（11ན）བདེ་ཆེན་རོལ་མོའི་སྤྲིན། །འགྲོ་ལ་རྗེས་ཆགས་ཐུགས་རྗེའི་བཀོད་པ་ལས། །བསྟན་པ་བསྲུང་ཕྱིར་མཆོད་བསྟོད་དྲེགས་པའི་ཚུལ། །དགེ་བསྙེན་ཆེན་པོ་འཁོར་བཅས་ད་ཚུར་བྱོན། །ཕ་མཐའ་བརྒལ་བའི་འཇིག་རྟེན་ཁྱོན་གང་བའི། །དངོས་བཤམས་ཡིད་སྤྲུལ་འདོད་ཡོན་འབྱོར་པའི་ཚོགས། །ངོ་མཚར་ཀུན་བཟང་མཆོད་པའི་སྤྲིན་ལྟ་བུར། །འབུལ་ལོ་བརྩེ་བས་དགོངས་ཏེ་བཞེས་སུ་གསོལ། །རཱ་གའི་མདངས་འཛིན་བཙན་མཁར་མཐོ་བརྗིད་ཅན། །མི་བཟད་དྲག་པོའི་བཀོད་པ་ཡོངས་སུ་རྫོགས། །ནང་ཁོངས་བླ་ཡི་ཁྲག་མཚོ་རྦ་ཀློང་འཁྲུགས། །བཞུགས་པའི་ཕོ་བྲང་རྟེན་གྱིས་ཐུགས་དམ་བསྐང་། །གདུག་ཅན་དགྲ་དང་བགེགས་རྣམས་བསྒྲལ་བ་ཡི། །གཟུགས་ཕུང་ལས་གྲུབ་དམར་གྱི་ཨརྒྷཾ་དང་། །དྲག་པོའི་ཉེར་སྤྱོད་སྙན་བརྗིད་རོལ་མོའི་སྒྲ། །ཤ་ལྔ་བདུད་རྩི་སྣ་ལྔས་ཐུགས་དམ་བསྐང་། །གཟུགས་མཛེས་སྒྲ་སྙན་དྲི་ཞིམ་རོ་བདའ་དང་། །རེག་བདེ་རྒྱལ་སྲིད་བདུན་དང་བཀྲ་ཤིས་པའི། །རྟགས་རྫས་ལྷ་མིའི་འདོད་ཡོན་འབྱོར་པའི་ཚོགས། །མི་ཟད་ནམ་མཁའ་མཛོད་ཀྱིས་ཐུགས་དམ་བསྐང་། །འཆི་མེད་བདུད་རྩི་ཛ་གད་མ་ད་ན། །དགྲ་བགེགས་སྙིང་ཁྲག་ལྦུ་ཕྲེང་འཁྲུགས་པའི་མཚོ། །（11བ）ལྷུན་པོ་ལྟར་བརྗིད་འདོད་དགུའི་བ་ལིཾ་ཏ། །མཉམ་སྦྱོར་དགའ་བཞིའི་རོལ་པས་ཐུགས༴ ། མྱུར་འགྲོའི་ཅང་ཤེས་བརྗིད་ལྡན་གླང་རྒོད་དང་། །མཛེས་པའི་ར་ལུག་བྱ་འུག་འཕུར་ལྡིང་གཡོ། །དཔའ་གཏུམ་ཁྱི་སོགས་ཀུན་ཀྱང་བྱེ་རུའི་མདོག །སྣ་ཚོགས་རྒྱན་གྱིས་སྤྲས་པས་ཐུགས༴ ། དར་དམར་གཡབ་དར་འདོད་ཡོན་དུར་ཁྲོད་ཆས། །བསྭེ་ཡི་ཁྲབ་རྨོག་རལ་གྲི་མདའ་དང་གཞུ། །མདུང་ཐུང་གྲི་གུག་བྷནྡ་དགྲ་སྟྭ་སོགས། །མཐུན་པའི་དམ་རྫས་ཚོགས་ཀྱིས་ཐུགས༴ ། སྐུ་གཟུགས་སྔགས་བྱང་ར་ཐོད་སྙིང་ནང་དུ། །སྲོག་འཁོར་བླ་རྡོའི་ཆས་བཅུག་སྨྱུག་རྒོད་མདའ། །སྟག་གཟིག་རས་མ་དར་སྣས་དཔྱངས་པ་སོགས། །མི་འབྲལ་གསང་བའི་རྟེན་གྱིས་ཐུགས༴ ། རྣམ་བཀྲའི་སྤྱན་གཟིགས་ཁོར་ཡུག་ཀུན་ཏུ་འབྲེལ། །གར་འཆམ་ཕྱག་རྒྱའི་རོལ་མོ་བརྗིད་བག་གཡོ། །ཡས་ཐག་མདོས་ཀྱིས་སྣང་སྲི་དམ་འདྲེས་འཆར། །བརྟན་གཡོའི་དངོས་ཀུན་ཚོགས་པས་ཐུགས༴ ། ཕུང་ཁམས་སྦྱངས་གཞི་བསྐྱེད་རྫོགས་ལམ་གྱིས་སྦྱངས། །བསྙེན་སྒྲུབ་ལས་ཀྱི་སྦྱོར་བ་རྩེ་མོར་སོན། །ཆོས་ཀུན་ཀ་ནས་དག་པའི་བདེ་ཆེན་གདངས། །སྒྱུ་མའི་རོལ་པ་ཤར་བས་ཐུགས་དམ་བསྐང་། །ཆོས་སྐྱོང་འཁོར་བཅས་ཐུགས་དམ་དགྱེས་བསྐང་ནས། །（12ན）རྣལ་འབྱོར་བདག་ཅག་དཔོན་སློབ་འཁོར་བཅས་ལ། །མི་འབྲལ་ལུས་དང་གྲིབ་བཞིན་འགྲོགས་ནས་ཀྱང་། །བཅོལ་བའི་ཕྲིན་ལས་མྱུར་དུ་འགྲུབ་བར་མཛོད། །（ཅེས་བསྐང་། བཤགས་པ་བྱ་བ་ནི།） ཧོཿ སངས་རྒྱས་བསྟན་སྲུང་དམ་ཉམས་དགྲ་བོའི་གཤེད། །ཕྲིན་ལས་ཐོགས་མེད་བཀའ་ཡི་ཕོ་ཉ་བ། །དགེ་བསྙེན་བཙན་རྒོད་མེ་ཡི་འཁོར་ལོ་ཅན། །འཁོར་བཅས་བདག་ལ་གསན་ཅིང་དགོངས་སུ་གསོལ། །བདག་ནི་རྡོ་རྗེ་ཐེག་པའི་སྒོར་ཞུགས་ཏེ། །དམ་ཚིག་ཚུལ་བཞིན་བསྲུང་བར་དམ་མནོས་ཀྱང་། །རྨོངས་དང་མ་རིག་བག་མེད་དབང་གྱུར་ནས། །སྤྱི་དང་ཁྱད་པར་ལྷག་པའི་དམ་ཚིག་དང་། །དམ་ཅན་སྒྲུབ་པའི་ཏིང་འཛིན་མ་གསལ་ཞིང་། །བཟླས་པའི་བསྙེན་སྒྲུབ་གཡེལ་ཞིང་ལས་སྦྱོར་ལོག །དམ་རྫས་རྟེན་རྫས་མ་ཚང་རས་སུ་བོར། མཆོད་པའི་རྒྱུ་ཆུད་ཕུད་ཉམས་འབགས་བཙོག་ཤོར། །དུས་ཀྱི་མཆོད་གཏོར་འགྱང་ཞིང་ཆག་པ་སོགས། །ཚོར་དང་མ་ཚོར་ཉེས་བྱས་དྲི་མའི་ཚོགས། །སྙིང་ནས་གནོང་འགྱོད་དྲག་པོས་མཐོལ་བཤགས་ན། །བཟོད་པར་བཞེས་ལ་ཚངས་པའི་དངོས་གྲུབ་སྩོལ། །（ཞེས་དང་ཡི་གེ་བརྒྱ་པ་བཟླའོ། །དེ་ནས་མངའ་གསོལ་འབུལ་ཞིང་ཕྲིན་ལས་བཅོལ་བ་ནི།） ཧཱུྃ། རྒྱལ་བའི་བསྟན་སྲུང་འཛམ་གླིང་གཏེར་（12བ）གྱི་བདག །ཅི་བསམ་ལྷུན་གྲུབ་འབད་མེད་ཕྲིན་ལས་ཅན། །ལྷ་ཡི་ལྷ་མཆོག་དགེ་བསྙེན་མོན་པ་དམར། །དབུ་འཕང་མངའ་གསོལ་འབུལ་ལོ་མཐུ་དཔུང་བསྐྱེད། །དབུ་འཕང་བསྟོད་ཅིང་མངའ་གསོལ་མི་འབུལ་རྒྱུ། །སྔར་བཅོལ་ཕྲིན་ལས་མ་ལུས་མཛད་པའི་ཕྱིར། །བཅོལ་བའི་ཕྲིན་ལས་ཁྱོད་ཀྱིས་མི་མཛད་ན། །ཞལ་བཞེས་དམ་བཅའ་མཛད་ལས་མི་གཡེལ་ལམ། །འོག་མིན་ཞིང་དང་ཆོས་དབྱིངས་རབ་འབྱམས་ཀློང་། །སྲིད་ཞིའི་དཔལ་ཡོན་མ་ལུས་མཐའ་དག་ཀུན། །གཅིག་ཏུ་སྤུངས་པའི་དགེ་མཚན་འབུམ་ཕྲག་གིས། །དགེ་བསྙེན་ཆེན་པོ་དབུ་འཕང་དབྱིངས་སུ་བསྟོད། །རྣམ་མཛེས་གདུགས་དང་གསེར་ཉ་རྒྱལ་མཚན་ཆེ། །འདབ་སྟོང་པདྨ་གཏེར་འབུམ་དཔལ་བེའུ། །སྙན་གྲགས་དུང་དང་རྩིབ་སྟོང་འཁོར་ལོ་ཡིས། །ཕྱོགས་དུས་བཀྲ་ཤིས་དགེ་བས་མངའ་གསོལ་ལོ། །མེ་ལོང་ཞོ་དང་དུརྦ་གི་ཝཾ་སྨན། །འབྲས་བཟང་བིལྤ་དབང་རྫས་ལི་ཁྲི་དམར། །སྐྱེ་བ་ལྔ་པ་ཡུངས་ཀར་རྒྱལ་པོ་སོགས། །ཕུན་ཚོགས་རྫས་མཆོག་བརྒྱད་ཀྱིས་མངའ་གསོལ་ལོ། །རྩིབས་སྟོང་འཁོར་ལོ་འདོད་འབྱུང་ཡིད་བཞིན་དབང་། །བདེ་སྟེར་བཙུན་མོ་བློ་ལྡན་བློན་པོ་ཆེ། །ས་སྲུང་ཁྱུ་མཆོག་དམག་དཔོན་རིན་ཆེན་ཏེ། །（13ན）རྒྱལ་སྲིད་རིན་ཆེན་བདུན་གྱིས་མངའ་གསོལ་ལོ། །འཛུམ་དྲུག་སྟག་དང་རྩལ་ལྡན་གདོང་ལྔ་པ། །མཁའ་ལྡིང་རྒྱལ་པོ་གཡུ་འབྲུག་སྡེར་ལྔ་པ། །ཀླུང་རྟ་དར་བའི་ལྷ་བཞིར་ཡོངས་གྲགས་པས། །ཕྱོགས་ལས་རྣམ་པར་རྒྱལ་བར་མངའ་གསོལ་ལོ། །སྦྱིན་པའི་དབུ་རྨོག་ཚུལ་ཁྲིམས་གཙང་མའི་གོས། །བཟོད་པའི་གོ་ཁྲབ་བརྩོན་འགྲུས་རྟ་ཡི་རྒྱལ། །བསམ་གཏན་མདའ་གཞུ་ཤེས་རབ་རལ་གྲི་སྟེ། །ཕ་རོལ་ཕྱིན་པ་དྲུག་ལྡན་མངའ་གསོལ་ལོ། །མངའ་གསོལ་འབུལ་ལོ་ཕྲིན་ལས་མཐུ་མ་ཆུང་། །དགྱེས་པ་བསྐྱེད་དོ་བརྩེ་བའི་ཞལ་རས་སྟོན། །སྲིད་གསུམ་ལྷ་སྲིན་ཡོངས་ཀྱི་སྡེ་དཔོན་ཆེའི། །རྣམ་དག་ཐུགས་ཀྱི་རེ་བ་ཡོངས་གང་ནས། །གསང་སྔགས་བསྟན་པ་དར་ཞིང་རྒྱས་པ་དང་། །དཀོན་མཆོག་གསུམ་གྱི་དབུ་འཕང་དགུང་དུ་བསྟོད། །ས་གསུམ་འགྲོ་ཀུན་བདེ་སྐྱིད་རབ་ཏུ་ལྡན། །ཁྱད་པར་དམ་ལྡན་རྣལ་འབྱོར་བདག་ཅག་གི ། བར་ཆད་ཀུན་ཞི་ཚེ་དཔལ་འབྱོར་པ་རྒྱས། །ཁམས་གསུམ་དབང་འདུས་དགྲ་བགེགས་རྡུལ་དུ་རློག །མདོར་ན་བསམ་པའི་དོན་ལ་གཉེར་གཏད་པའི། །བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད། །（ཅེས་གསོལ་ནས་གཏོར་མ་གཙང་སར་ཕུལ་ལོ། །ཡང་སྐབས་འགའ་ཞིག་ཏུ་དྲག་པོའི་（13བ）ལས་ལ་བསྐུལ་བར་འདོད་ན། ཐུན་གྱི་གཏོར་མ་ལ་རཀྟ་བྲན་ནས་བདེན་པའི་སྟོབས་བརྗོད་དེ་དམིགས་བྱ་བཀུག །སྨན་ཕུད་བྲན་ནས་ཤ་ཁྲག་བདུད་རྩིར་སྤེལ་ལ་ལྷ་སྔགས་ལ་གཏོར་སྔགས་བཏགས་ཏེ་ཕུལ་བས་ཧབ་དིར་གྱིས་གསོལ་བར་བསམ་ལ།） ཧཱུྃ། སྲིད་གསུམ་འཇོམས་པའི་དམག་དཔོན་ནི། །ཞེ་སྡང་མེ་ལྟར་འབར་བ་རྣམས། །དགྲ་བོའི་སྲོག་རྩ་ལེན་ལ་སོང་། །སྲོག་དང་དབུགས་ལ་རྔམ་ཟས་གྱིས། །ཆོ་ཆོ་དེ་ནི་དགྲ་ལ་ཆོ། །ཤན་པ་དམར་པོ་དགྲ་ལ་བསྐུལ། །འགུགས་བྱེད་བཙན་གྱི་ཤན་པ་དང་། །སྒྲོལ་བྱེད་བདུད་ཀྱི་ཤན་པ་དང་། །སྲོག་གཅོད་གཤིན་རྗེའི་ཤན་པ་དང་། །གཡོག་དང་འཁོར་དུ་བཅས་པ་རྣམས། །གོ་གྱོན་མཚོན་ཐོགས་རྟ་དམར་ཞོན། །དམ་རྫས་བདུད་རྩི་འདི་བཞེས་ལ། །ཅ་ཅོའི་བསྭ་སྒྲ་ད་རྒྱོབ་ཅིག །ལ་ལ་ནམ་མཁའི་ཐོག་སེར་བཞིན། །སིལ་སིལ་ཆོམ་ཆོམ་དགྲ་ལ་རྒྱུག །ལ་ལ་ས་ཡི་དྲེག་པ་བཞིན། །ཉིལ་ཉིལ་ཁྲིག་ཁྲིག་དགྲ་ལ་རྒྱུག །ལ་ལ་བར་སྣང་གློག་བཞིན་དུ། །འུར་འུར་ཆེམ་ཆེམ་དགྲ་ལ་རྒྱུག །ཕྱག་གཡོན་ཞགས་པ་དམར་པོ་ཡིས། །གནོད་བྱེད་དམ་ཉམས་དགྲ་བོ་དེ། །ས་སྟེང་གནམ་འོག་གར་འདུག་ཀྱང་། །མྱུར་བ་ཉིད་དུ་འདིར་ཁུག་ལ། །གཡས་པས་མདུང་དམར་སྙིང་ལ་བསྣུན། །ལུས་ཕུག་དོན་སྙིང་ཚལ་པར་ཁོས། །ཤམ་ཤམ་སྙིང་（14ན）ཁྲག་ཐང་ལ་ཕོས། །ལུས་སེམས་གཉིས་པོ་ད་ཕྲོལ་ལ། །ལ་ལས་ཡན་ལག་ལྷུ་དུམ་ཕྲོལ། །ལ་ལས་ནང་ཁྲོལ་ཐོབ་ཤ་བྱོས། །ལ་ལས་ཤ་ཟའི་ཅག་སྒྲ་འདོན། །ལ་ལས་ཁྲག་འཐུང་ཧུབ་སྒྲ་འབྱིན། །ལ་ལས་རུས་པ་ཆེམ་ཆེམ་ཟོ། །ཟོ་ཞིག་འཐུང་ཞིག་དམག་ཚོགས་རྣམས། །དམ་ཉམས་དགྲ་བོ་འཁོར་བཅས་འདི། །ལྷག་མ་མིང་ཡང་མེད་པར་གྱིས། །མི་རབས་རྩད་ནས་ད་ཆོད་ཅིག །དུས་ལ་བབ་པོ་ས་མ་ཡ། །（ཞེས་གཏོར་མ་དགྲ་ཕྱོགས་སུ་འཕངས་པས་བཙན་རྒོད་འཁོར་བཅས་ཀྱིས་དགྲ་བོ་ལྷག་མེད་དུ་གསོལ་ཞིང་ཚར་བཅད་པར་བསམ་མོ། །）

（གསུམ་པ་རྗེས་ནི། སླར་ཡང་མཆོད་པ་ཁ་གསོལ་ལ་མཆོད་ཅིང་བསྟོད་ནས།） མ་རྙེད་ཡོངས་སུ་མ་ཚང་དང་། །（ཞེས་སོགས་ཀྱིས་ནོངས་པ་བཤགས།） རྒྱལ་བའི་བསྟན་སྲུང་གཤིན་རྗེའི་ལས་མཁན་ཆེ། །མེ་ཡི་འཁོར་ལོ་ཇག་དཔོན་མོན་པ་དམར། །འཁོར་དང་བཅས་པ་མ་ལུས་ཐམས་ཅད་རྣམས། །འདི་ན་རྟེན་པའི་གནས་དང་བཞུགས་པའི་མཁར། །སྲོག་གི་བླ་རྡོ་དམ་ཚིག་རྟེན་རྣམས་ལ། །གངས་ལས་སེངྒེ་ནགས་ལ་རྒྱ་སྟག་དང་། །བྲག་ལ་ཁྱུང་ཆེན་སྤྲིན་ལ་གཡུ་འབྲུག་ལྟར། །རྟག་ཏུ་མི་འབྲལ་བརྟན་པར་བཞུགས་སུ་གསོལ། །བདག་གིར་བཟུང་བའི་དཀོར་ཆ་ལོངས་སྤྱོད་ཀུན། །（14བ）བླ་རྡོར་བཟུང་ལ་མེལ་ཚེ་མི་གཡེལ་བར། །དངོས་སུ་འཁོར་བའི་ཆོ་འཕྲུལ་གསལ་པོར་སྟོན། །དམ་ཡེ་དབྱེར་མེད་གྱུར་ཅིག་ཏིཥྛ་ལྷན། （ཞེས་མེ་ཏོག་འཐོར་ཞིང་ཡེ་ཤེས་པ་རྟེན་ལ་བརྟན་བཞུགས་བྱ། དམ་ཚིག་པ་བདག་ལ་ཐིམ་པའི་གནས་གསུམ་འབྲུ་གསུམ་གྱིས་བསྲུང་། འཇིག་རྟེན་པའི་འཁོར་རྣམས་）གཙྪ་གཙྪ་སྭ་བྷཱ་ཝཱ་ནཾ། （ཞེས་པས་རང་གནས་སུ་བཏང་ལ་དགེ་བ་བསྔོ། །ཤིས་པ་བརྗོད་པ་ནི།） པདྨ་རཱ་གའི་ལྷུན་པོ་བརྗིད་ཆགས་ལ། །ཉི་འོད་འབུམ་ཕྲག་འཁྱུད་པའི་གཟི་བྱིན་ཅན། །སངས་རྒྱས་པདྨའི་བཀའ་སྲུང་གཏེར་གྱི་བདག །དགེ་བསྙེན་མོན་པ་དམར་པོའི་བཀྲ་ཤིས་ཤོག །བདེ་སྟོང་དབྱེར་མེད་སྦྱོར་བའི་ལྷ་སྨན་མ། །སྐུ་གསུང་ཐུགས་སྤྲུལ་དྲག་ཤུལ་འབར་བ་གསུམ། །བཀའ་སྡོད་དམ་ཅན་རྒྱ་མཚོའི་ཚོགས་བཅས་ཀྱིས། །ཐོགས་མེད་ཕྲིན་ལས་མྱུར་སྒྲུབ་བཀྲ་ཤིས་ཤོག །དགྲ་སྡེ་བརླག་པའི་འོ་དོད་ལྷང་ལྷང་ཙེར། །རང་ཕྱོགས་རྒྱལ་བའི་ཀི་བསྭའི་བཞད་སྒྲ་ལྡིར། །སྐྱིད་ལ་ཆོས་འཕེལ་བསམ་པ་ལྷུན་གྱིས་གྲུབ། །ཕྱོགས་ལས་རྣམ་པར་རྒྱལ་བའི་བཀྲ་ཤིས་ཤོག །（ཅེས་མེ་ཏོག་སིལ་མར་འཐོར་བས་དགེ་ལེགས་སུ་བྱའོ། །）རྒྱལ་བའི་བཀའ་སྡོད་ཕོ་ཉ་དྲག་རྩལ་ཅན། །གང་གི་ཕྲིན་ལས་ཁྲིགས་སུ་བསྡེབས་འདི་ལས། །ཐོབ་པའི་བསོད་ནམས་དེས་ཀྱང་སྙིང་པོའི་བསྟན། །མི་ནུབ་ཕྱོགས་ལས་རྣམ་རྒྱལ་དཔལ་གྱུར་ཅིག །（ཅེས་དགེ་བསྙེན་（15ན）བཙན་རྒོད་ཇག་པ་མེ་ལེན་གྱི་ལས་བྱང་ཁྲག་འཐུང་དགྱེས་པའི་གད་རྒྱངས་ཞེས་བྱ་བ་འདི་ནི། སྔ་འགྱུར་བསྟན་པའི་གསལ་བྱེད་སོག་རྩེ་སྤྲུལ་སྐུ་ཀུན་བཟང་བསྟན་འཛིན་རྒྱལ་མཚན་ནས་ལྷ་རྫས་རིན་པོ་ཆེའི་སྐྱེས་དང་བཅས་ཏེ་ནན་ཏན་ཆེན་པོའི་གསུང་གིས་ཡང་དང་ཡང་དུ་བསྐུལ་བ་བཞིན། རྩ་བའི་གཞུང་རྙིང་དང་ཡོངས་འཛིན་ངག་གི་དབང་པོའི་གསུང་གཞིར་བཞག་ལ་སྐབས་སུ་བབས་པའི་བསྣོན་འཕྲི་ཁ་སྐོང་ཅི་རིགས་པས་འཇུག་པ་བདེ་ཞིང་གསལ་བར་བྱས་ཏེ། དུས་མཐའི་རིག་པ་འཛིན་བྲལ་ཡེ་ཤེས་རྡོ་རྗེས་མཁའ་ལྡིང་གི་ལོ་ཁྲུམས་སྟོད་ཟླ་བའི་ཤར་ཕྱོགས་ཀྱི་རྫོགས་པ་དང་པོ་གཟའ་ཆེན་དམག་དཔོན་གཡུལ་དུ་ཆས་པའི་ཉིན་མོར་གྲུབ་པར་བགྱིས་པ་ལས། ཐོག་མའི་ཡི་གེ་པ་ནི་རིགས་བྱེད་པ་མགོན་པོ་བསྟན་འཛིན་གྱིས་བགྱིས་པ་ཛ་ཡནྟུ།། །།）