TTDL-ZABTER-19-DZA-003

Previous Text Back to Volume Page Next Text

Wylie title
Location	bdud 'joms gling pa zab gter Volume 19, Text 3, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 19: . Thimphu, Bhutan: Lama Kuenzang Wangdue, 2004.*
Side notes
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)

[edit]

༁ྃ༔ གསང་བའི་རྣམ་ཐར་ཅུང་ཟད་བཤད་པ་ཡེ་ཤེས་ཌཱཀྐིའི་དྲིས་ལན་བཞུགས་སོ༔ ༁ྃ༔ ཨ་ཧོཿང་ངོ་ཁྱོད་ཀྱིས་ཨེ་མ་ཤེས༔ ང་ངོ་ཁྱོད་ཀྱིས་མ་ཤེས་ན༔ གནས་ཡུལ་དུར་ཁྲོད་ཀུན་རྒྱུ་མོ༔ ཅིར་སྣང་ཅང་བྱེད་སྒྱུ་མ་མཁན༔ ཚུལ་མ་ངེས་ཤིང་མིང་ཡང་སྟོང་༔ འཁོར་བ་ང་ཡིན་སངས་རྒྱས་ང་༔ གཉིས་སུ་མེད་པའི་དབྱིངས་ཆེན་མོ༔ གཙོ་མོ་ཨེ་ཀ་ཛ་ཊཱི་ཡིན༔ རབ་ཞི་གདོད་མའི་སངས་རྒྱས་སྟོན༔ ཁྲོས་ན་སྲིད་པ་ལེགས་ཉེས་ངོམས༔ ཟོས་ན་འཁོར་འདས་ལྟོ་རུ་བྲུབ༔ བཀྲེས་ཚེ་ཐམས་ཅད་སྟོང་པར་བཤིགས༔ སྐོམ་དུས་ཅི་མིན་མཉམ་པ་ཉིད༔ སུས་ཀྱང་འདི་ཡི་ལ་མ་ཟློས༔ ལ་བཟླ་བ་དག་འཁྲུལ་པར་འཕྱན༔ རང་ལས་གཞན་མིན་འཇུག་པའི་སྒོ༔ སོ་སོར་སྣང་བ་མང་པོ་དག༔ གང་ནས་བགྲོད་ཀྱང་ང་ཡི་ཀློང་༔ དེ་ལྟར་ཁྱབ་བདག་ཆེན་མོ་ང་༔ མཚན་མ་བྲལ་བའི་ཀློང་ཡངས་ལས༔ ཐབས་ཀྱིས་གཟུགས་སུ་བརྫུ་བའི་ཆེད༔ ཁྱོད་ཀྱི་རང་ཆེ་ཇི་ལྟ་བུ༔ གླུ་དབྱངས་སྙན་པས་བསྐུལ་གྱིས་སྩོལ༔ ཅེས་གསུངས་ལན་དུ་གླུ་འདི་བླངས༔ ཀྱཻ་ཧོ་འཁོར་འདས་སྤྱི་རྗེ་མོ༔ ང་ནི་གདོད་ནས་ཡེ་སངས་རྒྱས༔ འཁོར་འདས་དག་མཉམ་ཆེན་པོའི་དབྱིངས༔ སྐྱོན་ཡོན་གཞན་གྱིས་བསྒྱུར་དུ་མེད༔ ཁྱབ་བདག་ཀུན་ཏུ་བཟང་པོ་ཡིན༔ ཆོས་དབྱིངས་གཡོ་མི་ཤེས་པ་དང་༔ མཚན་མ་རིས་ཆད་མ་གྲུབ་པའི༔ སྐུ་དང་ཡེ་ཤེས་རང་བྱུང་བ༔ ང་ནི་རྣམ་པར་སྣང་མཛད་ཡིན༔ ལྷུན་གྲུབ་བདེ་ཆེན་རོལ་པའི་རྩལ༔ གང་གིས་མ་བཅོས་རང་གྲོལ་གྱི༔ ཡེ་ཤེས་རྡོ་རྗེས་སྒྲིབ་གཉིས་བཅོམ༔ ང་ནི་ཕྱག་ན་རྡོ་རྗེ་ཡིན༔ ཆོས་ཉིད་སྤྲོས་མཐའ་བྲལ་བའི་གདངས༔ གདུལ་བྱའི་མོས་ངོར་ཆུ་ཟླའི་གར༔ ཡེ་ཤེས་སྒྱུ་མའི་སྐུར་སྣང་བ༔ ང་ནི་པདྨ་འབྱུང་གནས་ཡིན༔ མི་ཤིགས་རྡོ་རྗེའི་གདངས་ཆེན་གྱིས༔ ཀུན་རྟོག་བདུད་ཀྱི་དཔུང་ཚོགས་བཅོམ༔ ཡེ་ཤེས་རྔམས་པའི་དབྱིངས་ལས་ཁྲོས༔ ང་ནི་ཞེ་སྡང་རྡོ་རྗེ་ཡིན༔ དོན་གྱི་ཡིན་ལུགས་དེ་ལྟར་ལགས༔ ཡང་ཅིག་གསོན་དང་ཌཱཀྐི་མ༔ རེ་ཞིག་སྒྱུ་མའི་སྣང་ཆ་ལ༔ རང་ལོ་བརྒྱད་ཀྱི་གོང་ཐོག་ནས༔ ཆོས་ཉིད་བདེན་པ་མཐོང་བའི་ལྟས༔ སྲིད་པ་རཀྟའི་རྦ་ཀློང་དུ༔ མཐོང་ནས་གཏིང་མཐའ་དཔག་མ་ནུས༔ འཇིགས་སྐྲག་བཟོད་མེད་ཡུན་རིང་ཤར༔ དེ་མཐར་དེ་ཡིས་རྐྱེན་བྱས་ནས༔ སྣང་སྲིད་རང་སྣང་ཉིད་དུ་གོ༔ རང་ལོ་བཅུ་ཡི་གོང་ཐོག་ཏུ༔ ཨོ་རྒྱན་མཚོ་སྐྱེས་རྡོ་རྗེ་དང་༔ མཇལ་ནས་འཁོར་བ་ཡོངས་གྲོལ་གྱི༔ དབང་བསྐུར་བྱིན་རླབས་གནང་བ་ཐོབ༔ ཆེ་མཆོག་རྡོ་རྗེ་ཁྲོ་ལོད་ཀྱི༔ མཆོག་གི་སྤྲུལ་པར་ལུང་དུ་བསྟན༔ དེ་འོག་རང་སྣང་དག་པའི་ངོར༔ ཡང་ཡང་པད་འབྱུང་རྗེ་དང་མཇལ༔ སྨིན་གྲོལ་ཟབ་རྒྱས་དབུགས་ཕྱུངས་ནས༔ སྐད་ཅིག་མི་འབྲལ་ཞལ་གྱིས་བཞེས༔ དེ་འོག་ཡེ་ཤེས་མཁའ་འགྲོ་མས༔ མཐིང་གི་མེ་ལོང་གཡའ་བྲལ་དུ༔ ཡུངས་འབྲུ་བཅུ་གསུམ་བླུགས་ནས་སུ༔ སྐྱེ་མཆོག་རྡོ་རྗེ་ཁྲོ་ལོད་ཁྱོད༔ ཡེ་ཤེས་ཐུགས་ཀྱི་མེ་ལོང་འདི༔ སྙིང་ལ་འཆོངས་ཤིག་ཤེར་དབང་ཡིན༔ ཡུངས་འབྲུ་དཔའ་བོ་བཅུ་གསུམ་འདི༔ མི་ཚེ་འདི་ཡི་སྨད་ཞིག་ན༔ ཚེ་འདིར་རྡོ་རྗེ་འཆང་དངོས་ཀྱི༔ གོ་འཕང་མངོན་གྱུར་བུ་སློབ་འབྱུང་༔ དེ་འོག་བར་སྐབས་རྨི་ཉམས་ངོར༔ རྒྱལ་དང་རྒྱལ་སྲས་དུ་མར་མཇལ༔ ཁྱད་པར་འཇམ་དཔལ་དབྱངས་དང་མཇལ༔ མདོ་རྒྱུད་ཟབ་མོའི་བཀའ་གཏད་ཐོབ༔ རང་སྣང་དོན་གྱི་འོག་མིན་དུ༔ ཆེ་མཆོག་རྡོ་རྗེ་ཁྲོ་ལོད་ཀྱིས༔ གཉིས་སུ་མེད་པར་བྱིན་གྱིས་བརླབས༔ རང་སྣང་དག་པ་མཁའ་སྤྱོད་དུ༔ མཆོག་གི་རིག་འཛིན་བརྒྱད་དང་མཇལ༔ སྒྲུབ་སྡེ་བརྒྱད་ཀྱི་བཀའ་དབང་ཐོབ༔ རང་སྣང་ཟངས་མདོག་དཔལ་རི་ནས༔ གྲུབ་ཆེན་བརྒྱད་དང་ཁྱད་པར་དུ༔ རིག་འཛིན་ཧཱུྃ་ཆེན་ཀཱ་ར་ཡིས༔ གསང་སྔགས་རྒྱུད་སྡེའི་དཀྱིལ་འཁོར་དུ༔ དབང་བསྐུལ་བཀའ་ཡི་གཏད་རྒྱ་ཐོབ༔ རང་སྣང་པདྨ་འོད་ཀྱི་ཀློང་༔ དྲི་མེད་འོད་ཟེར་འཇིགས་མེད་གླིང་༔ གྲུབ་དབང་ཀུན་བཟང་གཞན་ཕན་པ༔ ཡེ་ཤེས་སྒྱུ་མའི་སྐུ་དང་མཇལ༔ སྙིང་ཐིག་ཟབ་མོའི་གཏད་རྒྱ་ཐོབ༔ འོད་གསལ་སྒྱུ་འཕྲུལ་དྲྭ་བའི་ཀློང་༔ གསང་བདག་ཕྱག་ན་རྡོ་རྗེ་ཡིས༔ གསང་ཆེན་རྒྱུད་སྡེའི་ཡང་བཅུད་གདམས༔ སྐྱེས་མཆོག་ཁྱོད་ངང་གསང་བདག་ང་༔ གཉིས་སུ་མེད་དོ་རྡོ་རྗེའི་ཚིག༔ བརྒྱུད་པ་ཚིག་གསུམ་ཚུན་ཆད་དུ༔ གདམས་པའི་ཟམ་རྒྱ་མ་ཆད་ན༔ འཇའ་ལུས་རིག་འཛིན་བརྒྱ་ཕྲག་འབྱུང་༔ ཞེས་གསུངས་གཟུང་འཛིན་རང་གྲོལ་གྱི༔ གདམས་ངག་ཟབ་མོའི་བཀའ་དབང་བསྐུར༔ སླར་ཡང་རང་སྣང་བདེ་ཆེན་ཞིང་༔ འོད་གསལ་སྤྲུལ་པའི་ཕོ་བྲང་ནས༔ གྲུབ་མཆོག་དགའ་རབ་རྗེ་དང་མཇལ༔ སངས་རྒྱས་དེ་ཡི་ཞལ་སྔ་ནས༔ ཉོན་ཅིག་བདུད་འཇོམས་ཁྲོ་ལོད་རྩལ༔ གསང་ཆེན་མངའ་བདག་རྒྱལ་པོ་ཛ༔ ཁྱོད་ཀྱི་བུར་སྤྲུལ་བསྟན་འགྲོ་གསོ༔ སྙན་དང་གྲགས་པས་ས་གསུམ་འགེང་༔ བདུད་ཡུལ་མུན་པའི་གླིང་དགུ་འཇོམས༔ ང་ཉིད་ཁྱོད་ཀྱི་བུ་རུ་སྤྲུལ༔ སྡེ་བརྒྱད་དྲེགས་པའི་སྲོག་འཕྲོག་ནས༔ དངོས་མེད་ལྷ་འདྲེའི་འགྲོ་དོན་བྱེད༔ གསང་སྔགས་བསྟན་པའི་ཉི་གཞོན་བྱེད༔ ཤྲཱི་སེང་ཁྱོད་ཀྱི་བུ་རུ་སྤྲུལ༔ འོད་གསལ་བསྟན་པའི་བ་དན་སྒྲེངས༔ འཁོར་ཚོགས་བཅུ་ཕྲག་ལྔ་བརྒྱ་འདྲེན༔ སྙིང་ཐིག་བསྟན་པའི་སྡོང་པོ་འཛུག༔ གཡུ་སྒྲ་ཁྱོད་ཀྱི་ཚ་བོར་སྤྲུལ༔ ཟབ་གཏེར་མཛོད་ཀྱི་ལྡེ་མིག་བྱེད༔ ཁྱོད་ཀྱི་གདུང་བརྒྱུད་མ་སྟོང་བར༔ རིག་འཛིན་དམ་པའི་རྒྱུན་མི་འཆད༔ ཅེས་གསུངས་ལུང་བསྟན་དབང་ཡང་བསྐུར༔ གཞན་ཡང་རང་སྣང་དག་པའི་ངོར༔ ཡེ་ཤེས་སྒྱུ་མའི་སྣང་ཆ་རུ༔ སངས་རྒྱས་བྱང་སེམས་མཁའ་འགྲོའི་ཚོགས༔ དཔག་ཏུ་མེད་པའི་ཞལ་མཐོང་ནས༔ དབང་བསྐུར་ལུང་བསྟན་བསམ་མི་ཁྱབ༔ ཁྱད་པར་ཨོ་རྒྱན་ཆེན་པོ་ཡིས༔ སྐད་ཅིག་མི་འབྲལ་རྗེས་སུ་བཟུང་༔ དེ་ལྟར་དབང་བསྐུར་ལུང་བསྟན་ཞིང་༔ བྱིན་རླབས་དགོངས་བརྒྱུད་འཕོས་པ་ཡི༔ ཁྱད་ཆོས་བདོག་པས་ཆེ་བ་ཡིན༔ ཡང་ཅིག་གསོན་དང་མཛའ་ན་མོ༔ མི་ཚེ་འདི་ཡི་ཐོག་མཐའ་རུ༔ མི་ཡི་བླ་མ་མ་བསྟེན་ཀྱང་༔ སྔོན་སྦྱངས་ལས་འཕྲོ་སད་པ་ཡིས༔ རིག་འཛིན་ས་རུ་རྩོལ་མེད་སླེབས༔ དཔེ་དང་ཚིག་ལ་མ་ལྟོས་ཀྱང་༔ ཆོས་ཉིད་ནམ་མཁའི་ཀློང་མཛོད་བརྡོལ༔ སྣང་བ་བརྡ་དང་དཔེ་རུ་ཤར༔ འཁོར་འདས་དག་མཉམ་ཆེན་པོར་རིག༔ ཆོས་ཀུན་རིག་པ་རྗེན་པར་སངས༔ རྫོགས་པ་ཆེན་པོར་མངའ་དབང་བསྒྱུར༔ ཤེས་རབ་ཡེ་ཤེས་མིག་ཡངས་པས༔ ཆོས་ཉིད་བདེན་པ་མཐོང་བའི་མཐུས༔ ཡུལ་ལ་ལྟད་མོ་བལྟ་མ་དགོས༔ རང་དབང་རྒྱལ་པོའི་སྟོབས་ཤུགས་ཀྱིས༔ རང་ཐོག་བཙན་ས་ཟིན་པའི་མཐུས༔ གཞན་གྱི་ཁ་ཚོད་བརྟག་མ་དགོས༔ ཀུན་ཏུ་བཟང་པོའི་ཆེ་བ་ཀུན༔ གུད་ན་མེད་པའི་ངང་ཐོག་ཕེབས༔ ཁ་བཤད་ལབ་མོར་ལྟོས་མ་དགོས༔ འཁོར་འདས་རང་ལས་མི་གཞན་པའི༔ མཉམ་ཉིད་ངོ་བོ་མཐོང་བའི་མཐུས༔ རྣམ་གྲངས་རྩིས་གདབ་བྱེད་མ་དགོས༔ ས་ལམ་གཅིག་རྫོགས་ཆེན་པོ་དེ༔ རང་ས་ཉིད་དུ་ཐོབ་པའི་མཐུས༔ འཛིན་འཆིང་དམ་དཀྲིས་བསྒོམ་མ་དགོས༔ མདོ་སྔགས་རྒྱུད་སྡེ་རྒྱ་མཚོ་ཡི༔ ཡང་བཅུད་ཟབ་མོ་གཅིག་དྲིལ་ཐོབ༔ ཡུལ་ལ་སློང་མོ་བྱེད་མ་དགོས༔ དེ་ལྟར་སྐུ་དང་ཡེ་ཤེས་ཀྱི༔ ཀློང་མཛོད་ཆེན་པོར་དབང་བསྒྱུར་མཐུས༔ སྨོན་ལམ་ལས་ཀྱིས་འབྲེལ་བ་ཡི༔ བུ་སློབ་སྐལ་ལྡན་ཕོ་མོ་དག༔ དགོངས་བརྒྱུད་ཕ་ཕོག་ཐོབ་པའི་མཐུས༔ རིག་པ་འཛིན་པ་ཁོ་ན་རུ༔ གདོན་མི་ཟ་བ་པདྨའི་བཀའ༔ གཞན་ལས་འཕགས་པའི་ཆེ་བ་ཡིན༔ ཅེས་སྨྲས་ཡེ་ཤེས་མཁའ་འགྲོ་མས༔ འོ་ན་ཆེ་བའི་ཡོན་ཏན་གྱི༔ གླུ་འདི་མ་འོངས་དུས་ཤིག་ན༔ དགོས་པ་ཆེ་ཕྱིར་ཡི་གེར་ཐོབ༔ ཅེས་གསུངས་ཆོས་ཉིད་སྒྱུ་མར་ཡལ༔