TTDL-ZABTER-01-KA-016

Previous Text Back to Volume Page Next Text

Wylie title
Location	bdud 'joms gling pa zab gter Volume 1, Text 16, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	བླ་མ་རིག་འཛིན་འདུས་པ་ (bla ma rig 'dzin 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

[edit]

༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ རིག་འཛིན་བླ་མ་འདུས་པའི་ཚོགས་མཆོད་ནོར་བུའི་དོ་ཤལ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠བརྡ་ཡིག་༡༧༧༔ བླ་མ་སྒྲུབ་པའི་རྣལ་འབྱོར་གྱིས༔ ཉམས་ཆག་འགལ་འཁྲུལ་སྐོང་བའི་ཕྱིར༔ འབྱོར་ཚོགས་འདོད་ཡོན་བཤམས་ནས་སུ༔ ནམ་མཁའ་མཛོད་ཀྱི་དགོངས་རྒྱས་བཏབ༔ ཧཱུྃ༔ མ་རིག་ལས་ཉོན་གཟུང་འཛིན་གྱིས༔ བསླད་པའི་འབག་རྩོག་དྲི་མ་ཀུན༔ བདག་མེད་བརྟུལ་ཞུགས་ཆེན་པོས་སྦྱངས༔ གསང་གསུམ་ནུས་པས་བྱིན་གྱིས་བརླབས༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ ལན་གསུམ༔ དེ་ནས་སྤྱན་འདྲེན་པ་ནི༔ ཧཱུྃ༔ རང་སྣང་འོག་མིན་བདེ་ཆེན་ཞིང་༔ མི་འགྱུར་གསང་ཆེན་གཞལ་ཡས་ནས༔ རིག་འཛིན་བླ་མའི་དཀྱིལ་འཁོར་ལྷ༔ ཚོགས་ལ་སྤྱན་འདྲེན་གཤེགས་སུ་གསོལ༔ སརྦ་མ་ཧཱ་གུ་རུ་བཛྲ་ས་མ་ཡ་ཛཿཛཿདེ་ནས་ཚོགས་ཕུད་འབུལ་བ་ནི༔ ཧཱུྃ༔ དུས་གསུམ་སངས་རྒྱས་འདུས་པའི་སྐུ༔ རིག་འཛིན་བླ་མའི་དཀྱིལ་འཁོར་དུ༔ ཞལ་ཟས་ཚོགས་ཀྱི་མཆོད་པ་འབུལ༔ མཆོག་དང་ཐུན་མོང་དངོས་གྲུབ་སྩོལ༔ ན་མོ་མ་ཧཱ་གུ་རུ་སརྦ་གྷ་ཎ་ཙཀྲ་ལ་ཁཱ་ཧི༔ དེ་ནས་ཉམས་པ་བཤགས་པ་ནི༔ ན་མོ༔ རིག་འཛིན་བླ་མའི་སྤྱན་སྔ་རུ༔ དམ་ཚིག་ཉམས་འགལ་ཅི་མཆིས་པ༔ ཞལ་ཟས་ཚོགས་ཀྱིས་བསྐང་ཞིང་བཤགས༔ བཟོད་གསོལ་ཚངས་པའི་དངོས་གྲུབ་སྩོལ༔ ཨོཾ་གྷ་ཎ་ཙཀྲ་སཏྭ་ས་མ་ཡ༔ སོགས༔ དེ་ནས་བསྟན་དགྲ་བསྒྲལ་བ་ནི༔ ཧཱུྃ༔ བླ་མེད་གསང་ཆེན་དཀྱིལ་འཁོར་ནས༔ རིག་འཛིན་བླ་མ་སྐུར་བཞེངས་ཤིག༔ བསྟན་ལ་སྡང་བའི་ཞིང་བཅུ་འདི༔ མངོན་སྤྱོད་ཤུགས་ཀྱིས་རྡུལ་དུ་རློག༔ རཱུ་ཏྲ་ཨ་མུ་ཀ་མཱ་ར་ཡ་ཕཊ༔ དེ་ནས་ཞལ་དུ་བསྟབ་པ་ནི༔ ཧཱུྃ༔ ཞིང་བཅུ་བསྒྲལ་བའི་ཕུང་པོ་འདི༔ རིག་འཛིན་ལྷ་ཚོགས་ཞལ་དུ་བསྟབ༔ དགྱེས་པར་དགོངས་ལ་བཞེས་ཤིག་རོལ༔ རྣམ་ཤེས་དག་པའི་ས་ལ་སྤོར༔ མ་ཧཱ་མཱཾ་ས་རཀྟ་ཙིཏྟ་ལ་ཁཱ་ཧི༔ དེ་ནས་ལྷག་མ་འབུལ་བ་ནི༔ བྷྱོ༔ དཔལ་གྱི་བཀའ་སྡོད་ལྷག་སྐྱོང་ཚོགས༔ འདིར་གཤེགས་ལྷག་མའི་ལོངས་སྤྱོད་རོལ༔ བསྟན་དང་བསྟན་འཛིན་སྡེ་སྐྱོངས་ལ༔ བྱང་ཆུབ་སྒྲུབ་པའི་བར་ཆད་ཟློག༔ ཨོཾ་ཨུཙྪིཥྚ་བ་ལིངྟ་ཁཱ་ཧི༔ དེ་ནས་ཆད་མདོ་བཏང་བ་ནི༔ ཧཱུྃ་བྷྱོ༔ ཐོག་མཐའ་བར་གསུམ་རྩོད་ལྡན་ཡན༔ རིག་འཛིན་བརྒྱུད་པའི་སྤྱན་སྔ་རུ༔ ཁས་བླངས་དམ་བཅས་བསྟན་སྲུང་སྡེ༔ འདིར་གཤེགས་དམར་གྱི་གཏོར་མ་ལོངས༔ ཆོས་སྲིད་མངའ་ཐང་འཕེལ་རྒྱས་ཤིང་༔ བསམ་པ་སྒྲུབས་ལ་བར་ཆད་ཟློག༔ བཅོལ་བའི་ཕྲིན་ལས་འགྲུབ་པར་མཛོད༔ དམ་ལས་མ་འདའ་ས་མ་ཡ༔ དེ་ནས་བརྟན་མ་སྐྱོང་བ་ནི༔ ཧཱུྃ༔ རིག་འཛིན་རྡོ་རྗེ་ཐོད་ཕྲེང་གིས༔ དམ་བཏགས་དབང་བསྐུར་བཀའ་བསྒོས་པའི༔ མ་སྲིང་བརྟན་མ་དཔོན་གཡོག་རྣམས༔ འདིར་གཤེགས་བཤལ་ཆུའི་གཏོར་མ་ལོངས༔ སྒྲུབ་པའི་རྣལ་འབྱོར་མཆེད་ལྕམ་སྲུངས༔ མ་མ་ཧྲཱིཾ་ཧྲཱིཾ་ཨི་དཾ་བ་ལིངྟ་ཁཱ་ཧི༔ དེ་ནས་རྟ་བྲོ་བརྡུང་བ་ནི༔ ཧཱུྃ༔ བདག་རྟོག་འཁོར་བའི་རཱུ་ཏྲ་ལ༔ བདག་མེད་རོལ་པའི་རྟ་བྲོ་བརྡུང་༔ ཆོས་ཉིད་བརྡལ་ཁྱབ་དབྱིངས་སུ་བཅོམ༔ ནམ་ཡང་ལྡང་མེད་བྲོ་རྒྱས་གདབ༔ སྟྭཾ་བྷ་ཡ་ནན༔ མཱ་ར་ཡ་ནན༔ དེ་ནས་དངོས་གྲུབ་བླང་བ་ནི༔ ཧཱུྃ༔ རིག་འཛིན་བླ་མའི་གསང་ཆེན་བཅུད༔ སྨིན་གྲོལ་དབང་བྱིན་དངོས་གྲུབ་ཀུན༔ ད་ལྟ་ཉིད་དུ་བདག་ལ་སྩོལ༔ རྣམ་པར་གྲོལ་བའི་དབུགས་འབྱིན་མཛོད༔ ཀཱ་ཡ་སིདྡྷི་ཨོཾ༔ ཝཱཀ་སིདྡྷི་ཨཱཿཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱིཿདེ་ནས་བསྔོ་བ་སྨོན་ལམ་ནི༔ ཧཱུྃ༔ བདག་གི་དུས་གསུམ་དགེ་རྩ་ཀུན༔ ཟག་མེད་བདེ་བ་ཆེན་པོར་བསྔོ༔ འཁོར་འདས་དག་མཉམ་རོལ་པ་རུ༔ བྱང་ཆུབ་ཆེན་པོར་སངས་རྒྱས་ཤོག༔ དེ་ནས་བསྡུ་བའི་རིམ་པ་ནི༔ ཧཱུྃ༔ སྒྱུ་འཕྲུལ་བླ་མའི་དཀྱིལ་འཁོར་ལྷ༔ གདོད་མའི་ཡེ་གཞི་ཆེན་པོར་གཤེགས༔ གཉིས་མེད་ལྷན་སྐྱེས་ཡེ་ཤེས་ཉིད༔ མངོན་གྱུར་རང་གྲོལ་རང་ངོ་སྤྲོད༔ ཨ་ཨ་ཨ༔ དེ་ནས་བཀྲ་ཤིས་བྱ་བ་ནི༔ ཧཱུྃ༔ གདོད་ནས་མ་བཅོས་ཆོས་ཀྱི་སྐུ༔ ལྷུན་གྲུབ་རོལ་པ་ལོངས་སྤྱོད་རྫོགས༔ གང་འདུལ་ཐུགས་རྗེ་འགྲོ་བའི་མགོན༔ རིག་འཛིན་བླ་མའི་བཀྲ་ཤིས་ཤོག༔ དེ་ལྟར་དུས་གསུམ་སངས་རྒྱས་ཀུན༔ ཡོངས་འདུས་བདག་ཉིད་བླ་མ་ཡི༔ སྒྲུབ་པ་ལྷུར་ལེན་སྐལ་བཟང་ཀུན༔ ཚེ་འདིར་གྲོལ་འགྱུར་གདོན་མི་ཟ༔ གྲུབ་རྟགས་མངོན་དུ་མ་གྱུར་བར༔ སྒྲུབ་ལ་གཞོལ་མཛད་སྐལ་བཟང་རྣམས༔ ཡེ་ཤེས་མཁའ་འགྲོ་མཚོ་རྒྱལ་མ༔ བཀའ་འདི་བརྡ་ཡི་རིས་སུ་ཐོབས༔ རྡོ་རྗེ་བྲག་ལ་གཏེར་དུ་སྦོས༔ བཀའ་སྲུང་གནོད་སྦྱིན་ཤན་པས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདིའང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཡོངས་གྲུབ་རིག་པའི་རྡོ་རྗེའོ།།དགེའོ།།སརྦ་མངྒ་ལཾ།།།།