TTDL-ZABTER-01-KA-051

Previous Text Back to Volume Page Next Text

Wylie title
Location	bdud 'joms gling pa zab gter Volume 1, Text 51, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms gro lod
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཆེ་མཆོག་རཀྴ་ཐོད་ཕྲེང་བདུད་འཇོམས་རྡོ་རྗེ་གྲོ་ལོད་ (che mchog rak+sha thod phreng bdud 'joms rdo rje gro lod)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

[edit]

༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ ཆེ་མཆོག་རྡོ་རྗེ་གྲོ་ལོད་ཀྱི༔ རྩ་སྒྲུབ་ཡང་སྙིང་འདུས་པ་བཞུགས་སོ༔ ༠༠༠༠༠བརྡ་ཡིག༤༨༦༔ དུས་གསུམ་སངས་རྒྱས་འདུས་པའི་ཞལ༔ པདྨ་འབྱུང་གནས་སྐུ་བཞིའི་བདག༔ ཡུལ་མིན་ངོ་བོ་ཉིད་ཀྱི་ངང་༔ རིག་པའི་དགའ་བདེ་རང་གིས་མཆོད༔ རྣམ་པར་འཁྱམས་པའི་སྲིད་པ་ཡོངས༔ ཀློང་སྡུད་མཉམ་ཉིད་ཆེན་པོར་རོལ༔ སྤྲོས་བྲལ་ཆོས་སྐུའི་སྟོན་པ་མཆོག༔ གདུལ་བྱ་རང་སྣང་རང་སྟོན་ཤར༔ ཡུལ་མེད་ཕྱོགས་མཐར་མི་འཛིན་པའི༔ ཀ་དག་རིག་སྟོང་པད་འབྱུང་ངས༔ གཞི་ཀློང་གདངས་ལས་རྣམ་པ་རུ༔ ཞེན་འཛིན་རྟག་བརྟན་ཐེར་ཟུག་པའི༔ སེམས་ཅན་ཀློང་དུ་གཞིག་པའི་ཕྱིར༔ ཐབས་ཀྱི་ལམ་འདི་བསྟན་པ་ཡིན༔ ཆེ་མཆོག་ཡོངས་འདུས་རྒྱལ་པོ་ཉིད༔ ཉམས་སུ་ལེན་པའི་སྐལ་ལྡན་རྣམས༔ ཚེ་འདིར་མངོན་འཚང་རྒྱ་བར་འགྱུར༔ ལག་ལེན་རིམ་པ་གནས་དབེན་པར༔ དཀྱིལ་འཁོར་རིམ་པ་བཀོད་ལེགས་ནི༔ མཚན་ཉིད་རྫོགས་པའི་ལྟེ་བ་རུ༔ བུམ་པ་གཙོ་ཕུར་སྐྱོན་མེད་བཞག༔ རིལ་བུ་བླ་རྡོ་རྟེན་སོགས་བཀོད༔ མཆོད་རྫས་ཉེར་སྤྱོད་འདོད་ཡོན་སོགས༔ འབྱོར་ཚོགས་ཐམས་ཅད་ལེགས་པར་བཀོད༔ སྔོན་འགྲོ་སྟ་གོན་རིམ་རྫོགས་ནས༔ སླར་ཡང་སྒྲུབ་ལ་འཇུག་པ་ནི༔ དང་པོ་སྐྱབས་སུ་འགྲོ་བ་ལ༔ ན་མོ༔ སྐུ་གསུམ་རྒྱལ་བ་ཡོངས་འདུས་དཔལ༔ ཆེ་མཆོག་པདྨ་ཐོད་ཕྲེང་རྩལ༔ ཡང་ཁྲོས་རྡོ་རྗེ་གྲོ་བོ་ལོད༔ འཁོར་དང་བཅས་ལ་སྐྱབས་སུ་མཆི༔ དེ་ནས་སེམས་བསྐྱེད་པ་ནི༔ ཧཱུྃ༔ འགྲོ་ཀུན་ཐར་ལམ་ལ་གཟུད་ཕྱིར༔ བདག་གིས་ཡང་གསང་སྒོར་ཞུགས་ནས༔ གང་ལ་གང་འདུལ་ཕྲིན་ལས་ཀྱིས༔ འཁོར་བ་དོང་སྤྲུགས་འགྲོ་དོན་བྱ༔ ལན་གསུམ༔ དེ་ནས་བཀའ་བསྒོ་ནི༔ ཧཱུྃ་ཧཱུྃ་ཧཱུྃ༔ ང་ནི་ཆེ་མཆོག་དཔལ་ཆེན་འདུས་པའི་སྐུ༔ ཉོན་ཅིག་ལོག་འདྲེན་བདག་ལྟའི་རཱུ་ཏྲ་རྣམས༔ སོ་སོ་རང་རང་གནས་སུ་ཕྱིར་དེངས་ཤིག༔ བཀའ་ལས་འདས་ན་རྡུལ་ཕྲན་བཞིན་དུ་བརླག༔ རྩ་སྔགས་ཧཱུྃ་བཞིའི་སྔགས་བརྗོད་མཐར༔ མཚམས་གཅོད་པ་ནི༔ ཧཱུྃ་ཧཱུྃ་ཧཱུྃ༔ བདག་ཉིད་ཡང་ཁྲོས་རྡོ་རྗེ་གྲོ་བོ་ལོད༔ གདོད་ནས་རང་བྱུང་རྣམ་པར་དག་པའི་ལྷ༔ སྣང་སྲིད་ཆོས་དབྱིངས་མཁའ་ཀློང་ཆེན་པོར་སངས༔ སྲུང་དང་བསྲུང་བར་བྱ་བའི་ཡུལ་ལས་འདས༔ ཨོཾ་བཛྲ་ས་མ་ཏི་ཛྙཱ་ན་པཉྩ་རཀྵ་རཀྵ་སྭཱ་ཧཱ༔ དེ་ནས་བྱིན་ཆེན་དབབ་པ་ནི༔ ཧཱུྃ་ཛཿསྐྱེ་མེད་རྣམ་པར་དག་པའི་གཞལ་ཡས་ནས༔ ཧཱུྃ༔ དབང་དྲག་ཡང་ཁྲོས་རྡོ་རྗེ་གྲོ་བོ་ལོད༔ བཾ༔ སྤྲུལ་འཁོར་ཡོངས་རྫོགས་སྲུང་མར་བཅས་པ་རྣམས༔ ཧོཿབདག་ལ་དབང་བསྐུར་བྱིན་ཆེན་དབབ་ཏུ་གསོལ༔ ཨོཾ་བཛྲ་གུ་རུ་གྲོ་བོ་ལོད་མ་ཧ་རི་ནི་ས་ཧྲཱིཾ་ཧྲཱིཾ་ཛ་ཛཿཨ་བེ་ཤ་ཡ་ཨ་ཨ༔ མཆོད་རྫས་བྱིན་བརླབ་ནི༔ ཧཱུྃ་ཧཱུྃ་ཧཱུྃ༔ རང་བྱུང་སྣོད་བཅུད་སྣང་བ་ཆེན་པོའི་ཀློང་༔ སྐུ་དང་ཡེ་ཤེས་གཟི་བྱིན་གྱིས་བརླབས་པས༔ ཀུན་བཟང་མཆོད་སྤྲིན་མི་ཟད་རྒྱན་འཁོར་དུ༔ ཞིག་ནས་འགྲོ་བའི་ཚོགས་རྫོགས་ནུས་ལྡན་གྱུར༔ ཨོཾ་ཨཱཿཧཱུྃ་སྭཱ་ཧཱ༔ དེ་ནས་དཀྱིལ་འཁོར་ལྷ་བསྐྱེད་ནི༔ ཧཱུྃ་ཧཱུྃ་ཧཱུྃ༔ ཡེ་ཤེས་ལྔ་ལྡན་འོད་ལྔའི་ཀློང་དཀྱིལ་དུ༔ གྲུ་གསུམ་དམར་ནག་ཆོས་ཀྱི་འབྱུང་གནས་དབུས༔ པདྨ་ཉི་མ་རྒྱལ་བསེན་བསྣོལ་བའི་གདན༔ དེ་སྟེང་རྔམས་བརྗིད་སྟག་མོ་གྲུས་མའི་སྟེང་༔ ཧཱུྃ་ལས་རང་ཉིད་རྡོ་རྗེ་གྲོ་བོ་ལོད༔ དམར་ནག་ཞལ་གཅིག་ཕྱག་གཉིས་སྤྱན་གསུམ་པ༔ ཁྲོ་གཉེར་རབ་འཁྲུག་ཨམ་གཙིགས་མཆེ་བ་གཙིགས༔ སྨ་ར་སྨིན་མར་མེ་ཡི་ཚྭ་ཚྭ་འཕྲོ༔ དབུ་སྐྲ་གཡས་འཁྱིལ་དུང་གི་སྙན་ཆ་མཛེས༔ ཕྱག་གཡས་གནམ་ལྕགས་རྡོ་རྗེ་མཁའ་ལ་གསོར༔ གཡོན་པས་ལྕགས་ཕུར་རྒྱལ་བསེན་སྙིང་ལ་གཟིར༔ སྡིགས་མཛུབ་རྩེ་ནས་ལྕགས་སྡིག་བྱ་ཁྱུང་འགྱེད༔ དྲི་ངན་རབ་འཐུལ་འབྱུང་པོའི་གདོན་ཚོགས་བརྒྱལ༔ སྐུ་སྟོད་ཟ་བེར་མཐིང་སྨུག་ལྷུབ་ཆེན་དང་༔ སྐུ་སྨད་ཐང་ཤམ་དམར་སྨུག་མཛེས་ལྡན་གསོལ༔ ཁྲག་འཛག་མི་མགོའི་ཕྲེང་བའི་དོ་ཤལ་དང་༔ ཆོས་གོས་དམར་པོ་གསེར་གྱི་ཧ་རིས་གསོལ༔ ཞབས་གཉིས་འདོར་སྟབས་སག་ལྷྭམ་ལྗང་བཀྲ་མནབ༔ ཡེ་ཤེས་མེ་དཔུང་འབར་བའི་ཀློང་ན་འགྱིང་༔ སྤྱི་བོར་པད་འབྱུང་རཀྴ་ཐོད་ཕྲེང་རྩལ༔ དམར་ནག་ཁྲོ་འཛུམ་རོལ་པའི་སྟབས་སུ་བཞུགས༔ ཕྱག་གཡས་རྡོ་རྗེ་གཡོན་པས་ལྕགས་ཀྱུ་བསྣམས༔ དུར་ཁྲོད་ཆས་རྫོགས་ཁམས་གསུམ་དབང་དུ་སྡུད༔ ཡུམ་མཆོག་རྡོ་རྗེ་ཕག་མོ་དམར་གསལ་མཛེས༔ གཅེར་བུ་རུས་རྒྱན་གྲི་ཐོད་འཁྱུད་ཅིང་སྟོབ༔ སྤྱི་བོར་ཕག་ཞལ་ངུར་སྒྲས་ཁམས་གསུམ་འགུག༔ ཕྱོགས་བཞིར་མཁའ་འགྲོ་སྡེ་བཞི་དམར་གསལ་མཛེས༔ གཡས་གཡོན་གྲི་གུག་ཐོད་ཁྲག་ཁ་ཊྭཱྃ་ཀ༔ གཅེར་བུ་རུས་རྒྱན་སྤྱི་བོར་ཕག་ཞལ་ངུར༔ གར་སྟབས་མཛད་ཅིང་ཁམས་གསུམ་དབང་སྡུད་བསམ༔ མཚམས་བཞིར་དཔའ་བོ་གིང་ཆེན་དམར་གསལ་མཛེས༔ ཞབས་གཉིས་དོར་སྟབས་དར་ཐོད་ཤམ་ཐབས་གསོལ༔ ཕྱག་གཉིས་གྲི་ཐོད་རིན་ཆེན་རུས་རྒྱན་སྤྲས༔ དྲེགས་པའི་ལྷ་འདྲེ་མ་ལུས་དབང་སྡུད་བསམ༔ ཤར་དུ་དབང་ཕྱུག་དམར་ནག་ལྕགས་ཀྱུ་འཛིན༔ ལྷོ་རུ་ལེགས་ལྡན་ནག་པོས་བིང་དབྱུག་བསྣམས༔ ནུབ་ཏུ་ཨེ་ཀ་ཛ་ཊཱིས་ཞིང་དབྱུག་འཛིན༔ བྱང་དུ་རང་བྱུང་རྒྱལ་མོས་འཁོར་ལོ་བསྣམས༔ གཡོན་རྣམས་ཁམས་གསུམ་དབང་བསྒྱུར་སྙིང་ཞགས་འཛིན༔ སྒོ་བཞིར་རྒྱལ་ཆེན་སྡེ་བཞི་དམར་ནག་བརྗིད༔ རང་རྟགས་ཕྱག་མཚན་རྒྱན་རྫོགས་རོལ་སྟབས་བཞུགས༔ ཁམས་གསུམ་དབང་སྡུད་སྲིད་གསུམ་ཟིལ་གནོན་ཅིང་༔ ཡེ་ཤེས་མེ་དཔུང་རབ་འབར་ཀློང་དུ་བསྐྱེད༔ སྐུ་ཡི་སྟོད་ཆར་བཀའ་བརྒྱུད་བླ་མ་དང་༔ སྐེད་པའི་ཆ་ལ་ཡི་དམ་ཡོངས་རྫོགས་ལྷ༔ སྨད་ཆར་མ་དང་མཁའ་འགྲོའི་དཀྱིལ་འཁོར་རྫོགས༔ གནས་གསུམ་ཡིག་འབྲུ་གསུམ་གྱི་འོད་ཟེར་གྱིས༔ ཡེ་ཤེས་ལྷ་ཚོགས་སྤྱན་དྲངས་གཉིས་མེད་བསྟིམ༔ དེ་ནས་སྤྱན་འདྲེན་པ་ནི༔ ཧཱུྃ་ཧཱུྃ་ཧཱུྃ༔ འོག་མིན་པདྨ་འོད་ཀྱི་གཞལ་ཡས་ནས༔ ཨོ་རྒྱན་པདྨ་འབྱུང་གནས་གཤེགས་སུ་གསོལ༔ རབ་འཇིགས་ཐོད་པའི་སྐུ་མཁར་ཆེན་པོ་ནས༔ སྲིན་རྒྱལ་རཀྴ་ཐོད་ཕྲེང་གཤེགས་སུ་གསོལ༔ བདེ་ཆེན་དབང་དྲག་རོལ་པའི་དཀྱིལ་འཁོར་ནས༔ ཆེ་མཆོག་གུ་རུ་དྲག་པོ་གཤེགས་སུ་གསོལ༔ ཆོས་ཉིད་སྒྱུ་མར་རོལ་པའི་དུར་ཁྲོད་ནས༔ ཡང་ཁྲོས་རྡོ་རྗེ་གྲོ་ལོད་གཤེགས་སུ་གསོལ༔ སྐུ་ལྔ་ཡེ་ཤེས་ལྔ་རྫོགས་གཞལ་ཡས་ནས༔ གིང་ཆེན་དཔའ་བོ་མཁའ་འགྲོ་གཤེགས་སུ་གསོལ༔ ཁམས་གསུམ་མ་ལུས་དབང་བསྒྱུར་གཞལ་ཡས་ནས༔ ལས་གིང་རྒྱལ་ཆེན་སྡེ་བཞི་གཤེགས་སུ་གསོལ༔ ཨོཾ་བཛྲ་གུ་རུ་གྲོ་བོ་ལོད་མ་ཧ་རི་ནི་ས་བཛྲ་ས་མ་ཡ་ཛ་ཛཿཕེཾ་ཕེཾ༔ ལན་གསུམ་མཐར༔ བཞུགས་སུ་གསོལ་བ་ནི༔ ཧཱུྃ་ཧཱུྃ་ཧཱུྃ༔ དམ་ཚིག་ཐབས་ཀྱིས་བསྐྱེད་པའི་དཀྱིལ་འཁོར་ལ༔ ཡེ་ཤེས་དབྱིངས་ནས་དྲངས་པའི་རང་བྱུང་ལྷ༔ གཉིས་མེད་ཟུང་འཇུག་དབྱེར་མེད་ཆེན་པོར་རོལ༔ དུས་རྣམས་རྟག་ཏུ་མི་ཕྱེད་བཟུང་བར་བྱ༔ བཛྲ་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ན་མོ༔ ཀ་དག་སྐྱེ་མེད་ཆོས་ཀྱི་སྐུ༔ མ་འགགས་བདེ་ཆེན་ལོངས་སྤྱོད་རྫོགས༔ ཀུན་ཁྱབ་ཐུགས་རྗེ་སྤྲུལ་པའི་སྐུ༔ ཡོངས་རྫོགས་དཔལ་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོཿདེ་ནས་མཆོད་པ་འབུལ་བ་ནི༔ ཧཱུྃ༔ སྣང་སྲིད་དཔལ་ཡོན་རྫོགས་པའི་ཆོས༔ འབྱོར་ཚོགས་བཤམས་པའི་མཆོད་རྫས་བཅས༔ ཕྱི་ནང་གསང་མཆོད་སྤྲིན་དུ་སྤེལ༔ ཡི་དམ་ལྷ་ཚོགས་དགྱེས་ཕྱིར་འབུལ༔ བཞེས་ནས་འགྲོ་ཀུན་ཚོགས་རྫོགས་ཏེ༔ བདག་ཉིད་དྲག་པོའི་སར་འཁོད་ཤོག༔ མ་ཧཱ་སརྦ་པཉྩ་པཱུ་ཛ་གྷ་ཎ་ཙཀྲ་སརྦ་པཱུ་ཛ་ཧོཿདེ་ནས་བསྟོད་པ་བྱ་བ་ནི༔ ཧཱུྃ་ཧཱུྃ་ཧཱུྃ༔ རང་སྣང་ལྷུན་གྲུབ་དབང་དྲག་རོལ་པ་ནས༔ རང་རིག་དོན་གྱི་དཔལ་ཆེན་ཧེ་རུ་ཀ༔ སྐུ་གསུམ་ཡོངས་འདུས་རྡོ་རྗེ་གྲོ་བོ་ལོད༔ སྒྱུ་འཕྲུལ་རོལ་པའི་དཔལ་ལ་ཕྱག་འཚལ་བསྟོད༔ དགོངས་རྒྱུད་ཀློང་ཆེན་ཡངས་པ་ནམ་མཁའི་མཛོད༔ ཀ་དག་ཕྱོགས་ཡན་ངང་དུ་བདག་གྲོལ་ཤོག༔ ས་མ་ཡ༔ དེ་ནས་ཛབ྄་དགོངས་ཟབ་མོ་ནི༔ བདག་ཉིད་ཡི་དམ་ལྷར་གསལ་བའི༔ སྙིང་གར་ཡེ་ཤེས་སེམས་དཔའ་དམར༔ ཕྱག་གཉིས་རྡོ་རྗེ་ཕུར་པ་གདེངས༔ ཞབས་གཉིས་གྱད་ཀྱི་འདོར་སྟབས་བགྲད༔ དེ་ཡི་ཐུགས་ཀར་ཉི་གདན་ལ༔ གསེར་གྱི་རྡོ་རྗེ་རྩེ་ལྔ་པའི༔ ལྟེ་བར་ཉི་ཟླའི་གྭའུའི་ནང་༔ དྭངས་མའི་ཐིག་ལེ་མདངས་ལྡན་ཀློང་༔ ཧཱུྃ་དམར་གསལ་འཚེར་སྤུ་ཙམ་གྱི༔ མཐའ་མར་སྔགས་ཀྱི་ཕྲེང་བས་བསྐོར༔ འོད་ཀྱིས་ཕྲིན་ལས་རབ་འབྱམས་བསྒྲུབ༔ ཚུར་འདུས་དབང་བྱིན་དངོས་གྲུབ་ཐོབ༔ ཧཱུྃ་དང་ཤེས་རིག་དབྱེར་མེད་ངང་༔ འཁོར་གསུམ་དག་པས་སྔགས་སྒྲ་སྒྲོགས༔ ཨོཾ་བཛྲ་གུ་རུ་གྲོ་བོ་ལོད་ལོ་ཀ་སརྦ་སིདྡྷི་ཧཱུྃ་ཧཱུྃ༔ བསྙེན་ཅིང་སྒྲུབ་པ་བྱེད་པ་ལ༔ ཨོཾ་ཨཱཿཧཱུྃ་བཛྲ་གུ་རུ་གྲོ་བོ་ལོད་མ་ཧ་རི་ནི་ས་ལོ་ཀ་སརྦ་སིདྡྷི་ཕ་ལ་ཧཱུྃ་ཨཱཿབསྒྲུབ་ནས་ལས་ལ་སྦྱོར་བ་ནི༔ རྩ་སྔགས་མགོར་འདྲེན༔ ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ བསྙེན་པ་བྱེ་བ་སྒྲུབ་འབུམ་ལྔ༔ ལས་སྔགས་གསུམ་གྱིས་འགྲུབ་པའོ༔ གསང་སྔགས་ཟབ་མོ་ཉམས་ལེན་པའི༔ རྣལ་འབྱོར་ཉམས་ཆག་བསྐང་བའི་ཕྱིར༔ བསྐང་བཤགས་ཚོགས་འཁོར་བསྐོར་བ་ཡི༔ ཐབས་མཆོག་ཟབ་མོར་བརྩོན་པ་ལ༔ འབྱོར་ཚོགས་ཤ་ཆང་བཟང་བཏུང་རིགས༔ བཤམས་ཏེ་བྱིན་གྱིས་བརླབ་པ་ནི༔ རྃ་ཡྃ་ཁྃ༔ མ་དག་འཁོར་བའི་བག་ཆགས་སྦྱངས༔ དག་བྱེད་ཡི་གེ་འབྲུ་གསུམ་གྱིས༔ བྱིན་རླབས་ཡེ་ཤེས་བདུད་རྩིིའི་རྒྱུན༔ འཁོར་འདས་མ་ལུས་ཡོངས་ཁྱབ་གྱུར༔ ཨོཾ་ཨཱཿཧཱུྃ༔ ལན་གསུམ་བརྗོད་ཅིང་སྤྱན་འདྲེན་ནི༔ ཧཱུྃ༔ གླིང་གི་གླིང་མཆོག་རྔ་ཡབ་གླིང་༔ ཞིང་གི་མཆོག་གྱུར་པདྨ་བཀོད༔ བདེ་ཆེན་དག་པའི་གཞལ་ཡས་ནས༔ རྗེ་བཙུན་པདྨ་ཐོད་ཕྲེང་རྩལ༔ དཔའ་བོ་དཔའ་མོ་གིང་མཁའ་འགྲོ༔ རིག་འཛིན་རྒྱལ་བ་རྒྱ་མཚོར་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ རྣལ་འབྱོར་ཉམས་ཆག་བསྐང་བ་དང་༔ འགྲོ་ཀུན་ཚོགས་གཉིས་རབ་རྫོགས་ཕྱིར༔ སྒྲུབ་པའི་གནས་མཆོག་དམ་པ་འདིར༔ ཚོགས་ལ་སྤྱན་འདྲེན་གཤེགས་སུ་གསོལ༔ མཆོག་གི་དངོས་གྲུབ་མྱུར་དུ་སྩོལ༔ བཛྲ་ས་མ་ཡ་ཛ་ཛཿདེ་ནས་འབུལ་བཤགས་བསྟབ་པ་ནི༔ ཧཱུྃ༔ གུ་རུ་རྩ་གསུམ་ལྷ་ཚོགས་ལ༔ འདོད་ཡོན་ལོངས་སྤྱོད་ཚོགས་མཆོད་འབུལ༔ དམ་ཚིག་ཉམས་ཆག་ཐམས་ཅད་བཤགས༔ ཉོན་མོངས་དགྲ་བགེགས་ཞལ་དུ་བསྟབ༔ གུ་རུ་དྷེ་ཝ་ཌཱ་ཀི་ནཱི་སརྦ་གྷ་ཎ་ཙཀྲ་ལ་ཁཱ་ཧི༔ པཉྩ་ཨ་མྲྀ་ཏ་ཁཱ་ཧི༔ དེ་ནས་ལྷག་མ་འབུལ་བ་ནི༔ ཨོཾ་ཨཱཿཧཱུྃ༔ ལྷག་ལ་དབང་བའི་ལྷག་སྐྱོང་ཚོགས༔ དམ་ཚིག་གཉན་གྱིས་འདིར་གཤེགས་ཤིག༔ འདོད་ཡོན་ལྷག་མ་འདི་བཞེས་ལ༔ ཕྲིན་ལས་རབ་འབྱམས་ལྷུན་གྲུབ་མཛོད༔ མ་མ་བྷྱོ་ཧྲཱིཾ་ཨུཙྪིཥྚ་བ་ལིཾ་ཏ་ཁཱ་ཧི༔ དེ་ནས་བསྐུལ་བ་བྱ་བ་ནི༔ ཧཱུྃ་ཧཱུྃ་ཧཱུྃ༔ ལྷོ་ནུབ་རྔ་ཡབ་སྲིན་པོའི་ཡུལ༔ ཐོད་པའི་སྐུ་མཁར་གཞལ་ཡས་ནས༔ རྗེ་བཙུན་པདྨ་ཐོད་ཕྲེང་རྩལ༔ དཔའ་བོ་མཁའ་འགྲོ་སྲུང་མའི་ཚོགས༔ མ་ཐོགས་མྱུར་དུ་ཐུགས་དམ་བསྐུལ༔ བཞེངས་ཤིག་ཆོས་ཀྱི་དབྱིངས་ནས་བཞེངས༔ ཕྲིན་ལས་གཉན་པོའི་དུས་ལ་བབ༔ ཕྱི་ནང་བར་ཆད་དབྱིངས་སུ་སོལ༔ དམ་སྲི་རྒྱལ་བསེན་སྡེ་བརྒྱད་བདུད༔ མཐའ་དམག་དུས་འཁྲུགས་ནད་གདོན་བགེགས༔ བསྟན་འགྲོ་ཡོངས་ལ་འཚེ་བའི་དགྲ༔ མ་ལུས་ཐལ་བའི་རྡུལ་དུ་རློག༔ རྣལ་འབྱོར་བསམ་དོན་ལྷུན་གྲུབ་མཛོད༔ ཧཱུྃ་ཛཿབཛྲ་ས་མ་ཡ༔ དེ་ནས་ཆད་མདོ་བཏང་བ་ནི༔ དཀོན་མཆོག་གསུམ་གྱི་བདེན་པ་དང་༔ ཏིང་འཛིན་སྔགས་ཀྱི་ནུས་སྟོབས་ཀྱིས༔ བསྟན་ལ་སྡང་བའི་དགྲ་བགེགས་རྣམས༔ དམར་གྱི་གཏོར་མ་འདི་ལ་ཁུག༔ འཁོར་ལོ་འབར་བའི་དབལ་ལ་བསྐྱོན༔ རྣམ་ཤེས་གསང་བའི་ལམ་ནས་སྤར༔ ཚེ་བསོད་དཔལ་ཡོན་བདག་ལ་བསྟིམས༔ ཤ་ཁྲག་རུས་པའི་རི་མཚོར་བརྡལ༔ སྣང་སྲིད་ཐམས་ཅད་ཁྱབ་པར་གྱུར༔ ཛཿབྷྱོ༔ ཐོག་མཐའ་བར་གསུམ་རྩོད་ལྡན་སྙིགས་མའི་དུས༔ ཀུན་བཟང་རྡོར་འཆང་པད་འབྱུང་རྗེ་འབངས་དང་༔ རིག་འཛིན་གྲུབ་བརྙེས་རྣལ་འབྱོར་ཕོ་མོ་ཡིས༔ བཀའ་དང་དམ་ལ་བཞག་པའི་ལྷ་འདྲེ་ནི༔ གཉུག་མར་གནས་དང་གློ་བུར་ལྷགས་པའི་རིགས༔ མ་ལུས་འདིར་གཤེགས་བཀའ་ཡི་གཏོར་མ་ལོངས༔ ཟབ་གསང་བསྟན་དང་བསྟན་འཛིན་སྡེ་སྐྱོངས་ལ༔ སྦྱིན་བདག་གདུལ་བྱའི་མངའ་ཐང་ལོངས་སྤྱོད་སྤེལ༔ གཟུགས་ཅན་གཟུགས་མེད་དགྲ་འདྲེ་རྡུལ་དུ་རློག༔ མཐའ་དམག་དུས་འཁྲུགས་ནད་མཚོན་ལྟ་ལོག་སྒྲོལ༔ རྣལ་འབྱོར་འདོད་དོན་བཅོལ་བའི་ཕྲིན་ལས་སྒྲུབས༔ བཀའ་དང་ཐ་ཚིག་གཉན་པོ་དཔང་དུ་བཙུག༔ མ་གཡེལ་མ་འདའ་བཛྲ་ས་མ་ཡ༔ དེ་ནས་བརྟན་མ་སྐྱོང་བ་ནི༔ ཧཱུྃ་མ་བྷྱོ༔ སྔོན་ཚེ་འདས་པའི་དུས༔ བདུད་དང་འདྲེ་ཡི་ཡུལ༔ དེ་ནས་སྲིན་ཆེན་མོ༔ དགེ་བསྙེན་སྤྲེའུ་བསྡེབས༔ ནག་པོ་ལག་རིང་གི༔ བུ་དྲུག་རུས་སུ་ཆགས༔ འོད་གསལ་ལྷ་ལས་ནི༔ རྒྱལ་པོ་ཐོ་ཐོ་བབས༔ དམ་ཆོས་དབུ་ཡང་བརྙེས༔ རྒྱལ་བརྒྱུད་དེ་ནས་བཟུང་༔ རིམ་བཞིན་མདོ་སྔགས་བསྟན་པ་བྱུང་༔ སྤུ་རྒྱལ་བཙན་པོ་ཡིས༔ རྒྱ་གར་པཎ་ཆེན་བོད་དུ་དྲངས༔ ལྷ་འདྲེ་དམ་ལ་བཏགས༔ བསྟན་པའི་སྲོག་ཤིང་བཙུགས༔ བསྟན་པའི་ཞིང་དང་མ་ལྟ་བུར༔ ལྷ་མོ་ཚེ་རིང་མཆེད་སྡེ་ལྔ༔ བསྟན་པའི་སྲུང་མར་བཞག༔ དེ་འཁོར་མ་མོ་ཆེན་མོ་ནི༔ བརྟན་མ་བཅུ་གཉིས་དེ༔ དམ་བཏགས་དབང་ཡང་བསྐུར༔ གཉེར་གཏད་མ་འོངས་སངས་རྒྱས་ལུང་ཡང་གཏད༔ མནའ་བོར་མནའ་ཆུ་བླུད༔ ཁས་བླངས་དམ་བཅས་ཇི་བཞིན་དུ༔ ང་ནི་རིག་འཛིན་དེའི་རྗེས་འཇུག༔ ཁྱེད་དང་འཁོར་གཡོག་སླར་འབྱུང་བ༔ བཀའ་དམ་ཁྲིམས་ལུང་བཞིན༔ ཤ་ཁྲག་དམར་གྱི་གཏོར་མ་ལོངས༔ བསྟན་དང་བསྟན་འཛིན་སྐྱོངས༔ དགྲ་བགེགས་ཆོམ་ལ་ཕོབ༔ ཆེ་མཆོག་རྡོ་རྗེ་གྲོ་ལོད་ཀྱི༔ འཆོལ་བའི་གླུ་ནི་འདི་མིན་ནམ༔ བདེན་ཚིག་དཔང་དུ་ཁུར༔ དམ་ཚིག་ཁྲིམས་ལུགས་སོ༔ མ་འདའ་བཛྲ་ས་མ་ཡ༔ དེ་ནས་རྟ་བྲོ་བརྡུང་བ་ནི༔ ཧཱུྃ༔ བླ་མ་རྣམས་ཀྱི་ཐུགས་རྗེ་དང་༔ ཡི་དམ་ལྷ་ཡི་བདེན་པ་དང་༔ མ་དང་མཁའ་འགྲོའི་ནུས་མཐུ་དང་༔ ཆོས་སྐྱོང་སྲུང་མའི་མཐུ་སྟོབས་ཀྱིས༔ སྒྲུབ་ལ་བར་དུ་གཅོད་བྱེད་པའི༔ གནོད་བྱེད་དམ་སྲི་རྒབ་འདྲེ་རྣམས༔ རིམ་དགུ་ས་ཡི་འོག་ཏུ་མནན༔ ལས་ཀྱི་གཤིན་རྗེའི་ཁ་རུ་བསྟབ༔ ཀླུ་བདུད་ནག་པོའི་ལྟོ་བར་གཏད༔ མ་ཤོར་སྐུ་གསུང་ཐུགས་ཀྱི་རྒྱ༔ འུར་འུར་ཆེམ་ཆེམ་སྟྭཾ་བྷ་ཡ་ནན༔ དེ་ནས་བསྔོ་བ་སྨོན་ལམ་ནི༔ ཧཱུྃ༔ འདི་དང་དུས་གསུམ་དགེ་ཚོགས་ཀུན༔ མཁའ་མཉམ་འགྲོ་བ་ཡོངས་ལ་བསྔོ༔ བདག་སོགས་བརྒྱུད་པར་བཅས་པ་རྣམས༔ ཚོམ་བུ་གཅིག་ཏུ་སངས་རྒྱས་ཤོག༔ དེ་ནས་ཕྱག་རྒྱ་སྒོ་བཅད་ནི༔ ཧཱུྃ༔ གདོད་ནས་ཡོངས་གྲུབ་དཀྱིལ་འཁོར་ལྷ༔ གཉིས་མེད་དབྱེར་མེད་ཆེན་པོའི་ངང་༔ སྒོམ་མེད་རྫོགས་པ་ཆེན་པོར་ལྷུག༔ གཏན་དུ་མི་འབྲལ་དེ་ཁོ་ན༔ དེ་ནས་བཀྲ་ཤིས་བྱ་བ་ནི༔ ན་མོ༔ མཆོག་གསུམ་བདེན་པའི་བྱིན་རླབས་ཀྱིས༔ ནད་གདོན་ཞི་བའི་བཀྲ་ཤིས་ཤོག༔ ཚེ་བསོད་རྒྱས་པའི་བཀྲ་ཤིས་ཤོག༔ འཁོར་འདས་དབང་སྡུད་བཀྲ་ཤིས་ཤོག༔ དགྲ་བགེགས་ཚར་གཅོད་བཀྲ་ཤིས་ཤོག༔ བསྙེན་བསྒྲུབ་མཐར་ཕྱིན་བཀྲ་ཤིས་ཤོག༔ དངོས་གྲུབ་ཀུན་ཐོབ་བཀྲ་ཤིས་ཤོག༔ བདག་ཅག་སྒྲུབ་མཆོག་འཁོར་བཅས་རྣམས༔ ཡང་གསང་དཀྱིལ་འཁོར་འདི་ཉིད་དུ༔ མངོན་འཚང་རྒྱ་བའི་བཀྲ་ཤིས་ཤོག༔ ས་མ་ཡ༔ འདི་ནི་པདྨའི་སྙིང་ཁྲག་དངོས༔ ཉམས་སུ་ལེན་པའི་སྐལ་ལྡན་གྱིས༔ སྣང་སྲིད་མ་ལུས་དབང་དུ་སྡུད༔ ལྷ་སྲིན་དྲེགས་པ་བྲན་དུ་འཁོལ༔ དོན་གཉིས་ལྷུན་གྲུབ་གདིང་ཐོབ་འགྱུར༔ འདི་བསྒྲུབ་ལས་ཅན་སྐྱེས་བུ་ནི༔ པདྨ་འབྱུང་གནས་ང་ཉིད་དངོས༔ ཚེ་འདིར་རིག་འཛིན་ས་ཐོབ་འགྱུར༔ བསླུ་བ་མེད་དོ་པདྨའི་བཀའ༔ མ་འོངས་དུས་ཀྱི་སྙིགས་མ་རུ༔ རིག་འཛིན་རྒྱལ་པོ་ཆེན་པོ་ལ༔ གྲུབ་བརྙེས་བཅུ་ཕྲག་བདུན་གྱིས་བསྐོར༔ སྐྱེས་བུ་དེ་དང་འཕྲད་པར་ཤོག༔ མཁའ་འགྲོ་ཡེ་ཤེས་མཚོ་རྒྱལ་ཁྱོད༔ ཟབ་ཆོས་ཡི་གེའི་རིས་སུ་ཐོབ༔ ༠༠༠༠༠བརྡ་ཡིག༤༩༩༔ བཀའ་འདི་དབང་ཕྱུག་ཆེན་པོ་དང་༔ གཟའ་བདུད་དུག་གི་སྤུ་གྲིས་སྲུངས༔ དམ་ཉམས་བྱུང་ན་སྙིང་ཁྲག་རོལ༔ སྒྲུབ་པའི་སྐྱེས་བུ་བུ་ལྟར་སྐྱོངས༔ བཀའ་དང་ཐ་ཚིག་གཉན་གྱི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གཉན་རྒྱ༔ བརྡ་ཐིམ༔ ཞེས་པ་འདི་ཡང་འོད་གསལ་རྫོགས་པ་ཆེན་པོའི་རྣལ་འབྱོར་པ་བདུད་འཇོམས་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་མི་ལོ་བཅོ་ལྔའི་བར་དུ་བཀའ་རྒྱས་བཏབ་མཐར་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་ཅོག་རོ་ཀླུ་ཡི་རྒྱལ་མཚན་གྱི་སྐྱེ་མཐའ་ཆོས་ཀྱི་བདག་པོར་གྱུར་པ་པདྨ་བཀྲ་ཤིས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།