TTDL-ZABTER-08-NYA-016

Previous Text Back to Volume Page Next Text

Wylie title
Location	bdud 'joms gling pa zab gter Volume 8, Text 16, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms srung ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

[edit]

བརྡ་ཡིག་༠༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་དབང་ཕྱུག་ཆེན་པོའི་མངའ་གསོལ་དབང་སྡུད་ལྕགས་ཀྱུ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ བརྡ་ཡིག་༠༠༠༠༠༠༠༡༡༡༔ དབང་ཕྱུག་མ་ཧཱ་དཱེ་ཝ་ཉིད༔ གསལ་ནས་མངའ་གསོལ་འདི་བརྗོད་བྱ༔ ཧྲཱིཿལྷ་ཆེན་དབང་ཕྱུག་ཆེན་པོ་ཁྱོད༔ ང་ཡི་མདུན་དུ་མཆིས་པར་མཛོད༔ ང་ཡི་གྲོགས་སུ་བསྟེན་འཚལ་ལོ༔ ང་ཡི་འདོད་དོན་ཡིད་བཞིན་སྒྲུབས༔ ཧྲཱིཿལྷ་ཆེན་དབང་ཕྱུག་ཆེན་པོ་ལ༔ དཀོན་མཆོག་གསུམ་གྱིས་མངའ་གསོལ་རྟགས༔ ཡིད་བཞིན་ནོར་བུ་གཙུག་ཏུ་བཅིངས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ བླ་མ་རྣམས་ཀྱིས་མངའ་གསོལ་རྟགས༔ ལྷའི་བུ་ཟླ་བ་ཐོད་དུ་བཅིངས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ ཡི་དམ་རྣམས་ཀྱིས་མངའ་གསོལ་རྟགས༔ ལྗང་སྔོན་རལ་པ་རྟིང་རྩེར་སླེབ༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ མཁའ་འགྲོ་རྣམས་ཀྱིས་མངའ་གསོལ་རྟགས༔ ཟེར་ལྡན་ཉི་མ་ལྟེ་བར་ངོམས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ ལྷ་རྣམས་ཀུན་གྱིས་མངའ་གསོལ་རྟགས༔ ཞལ་འཛུམ་མཛེས་པའི་ལང་ཚོ་རྒྱས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ ལྷ་མིན་རྣམས་ཀྱིས་མངའ་གསོལ་རྟགས༔ སྤྱན་མདངས་ཁྲོས་པའི་ཉམས་དང་ལྡན༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ མི་རྣམས་ཀུན་གྱིས་མངའ་གསོལ་རྟགས༔ ཅུང་ཟད་ཆགས་པའི་ཟུར་མིག་བལྟས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ བྱོལ་སོང་རྣམས་ཀྱིས་མངའ་གསོལ་རྟགས༔ རིན་ཆེན་ཕྲེང་བའི་དོ་ཤལ་དཔྱངས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ ཡི་དྭགས་རྣམས་ཀྱིས་མངའ་གསོལ་རྟགས༔ ཕྱག་ཞབས་སེན་མོ་སྔོ་ལ་དྭངས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ དམྱལ་བ་རྣམས་ཀྱིས་མངའ་གསོལ་རྟགས༔ སྐུ་ལ་འོད་དམར་རབ་ཏུ་འཁྲིགས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ མ་མོ་རྣམས་ཀྱིས་མངའ་གསོལ་རྟགས༔ ཕྱག་གཡས་ལྕགས་ཀྱུས་ཁམས་གསུམ་འགུགས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ བཀའ་སྲུང་ཡོངས་ཀྱིས་མངའ་གསོལ་རྟགས༔ གཡོན་པས་ཉི་ཟེར་ཞགས་པ་བསྣམས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ སྲིད་ཞི་གཉིས་ཀྱིས་མངའ་གསོལ་རྟགས༔ ཞབས་གཉིས་འདོར་སྟབས་ཚུལ་དུ་འགྱིང་༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ འདོད་ཁམས་ཡོངས་ཀྱིས་མངའ་གསོལ་རྟགས༔ གསང་བའི་རྡོ་རྗེ་གྱེན་དུ་བསྒྲེངས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ གཟུགས་ཁམས་ཡོངས་ཀྱིས་མངའ་གསོལ་རྟགས༔ སྐུ་མདོག་དམར་གསལ་མཛེས་པར་ངོམས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ གཟུགས་མེད་ཁམས་ཀྱིས་མངའ་གསོལ་རྟགས༔ སྣང་ལ་རང་བཞིན་མེད་པའི་སྐུ༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ སྡེ་བརྒྱད་ཡོངས་ཀྱིས་མངའ་གསོལ་རྟགས༔ འོད་ལྡན་ཟླ་ཕྱེད་གདན་ལ་བརྫིས༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ སྣང་སྲིད་ལྷ་འདྲེས་མངའ་གསོལ་རྟགས༔ འདོད་ཡོན་སྣ་ཚོགས་འོད་ཀྱི་སྤྲིན༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ལ༔ འཇིག་རྟེན་ཁམས་ཀྱིས་མངའ་གསོལ་རྟགས༔ རབ་མཐོ་རིན་ཆེན་ཁྲི་ལ་འགྱིང་༔ དེ་བཞིན་བདག་གིས་མངའ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ཁྱོད༔ བདག་གི་སྲུང་མར་མངའ་གསོལ་ལོ༔ ཆོས་སྐྱོང་ཆེན་པོར་མངའ་གསོལ་ལོ༔ དཀོར་གྱི་སྲུང་མར་མངའ་གསོལ་ལོ༔ ནོར་གྱི་ལྷ་རུ་མངའ་གསོལ་ལོ༔ ཕྱུགས་ཀྱི་གཡང་དུ་མངའ་གསོལ་ལོ༔ དབང་སྡུད་རྒྱལ་པོར་མངའ་གསོལ་ལོ༔ མི་ཡི་དགྲ་བླར་མངའ་གསོལ་ལོ༔ བྱིས་པའི་ཚེ་ལྷར་མངའ་གསོལ་ལོ༔ དཔག་བསམ་ལྟ་བུར་མངའ་གསོལ་ལོ༔ ཡིད་བཞིན་ནོར་ལྟར་མངའ་གསོལ་ལོ༔ འདོད་འཇོའི་གཏེར་དུ་མངའ་གསོལ་ལོ༔ དགྲ་ཡི་གཤེད་དུ་མངའ་གསོལ་ལོ༔ བགེགས་ཀྱི་གཉེན་པོར་མངའ་གསོལ་ལོ༔ དེ་ལྟར་མངའ་གསོལ་བྱས་པའི་མཐུས༔ བདག་ཅག་སྒྲུབ་མཆོག་འཁོར་བཅས་ཀྱི༔ བསམ་པ་སྒྲུབ་ལ་རེ་བ་སྐོངས༔ དཔལ་དང་ཡོན་ཏན་བཀྲ་ཤིས་དགེ༔ ཕྲིན་ལས་རབ་འབྱམས་ཡོངས་འགྲུབ་མཛོད༔ དམ་ལས་མ་འདའ་ས་མ་ཡ༔ བསྒྲུབ་དུས་ལྷ་ཡི་རྒྱན་ཆའི་ཚོགས༔ རིམ་པར་དྲན་ནས་མངའ་གསོལ་ན༔ མི་དེའི་སྲུང་མར་ངེས་པར་འགྱུར༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་མ་བཏང་ཞིག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་རང་སློབ་དམ་པ་འཇིགས་མེད་བློ་གྲོས་དང་བསོད་ནམས་བཀྲ་ཤིས་བློ་རྡོར་རྣམས་ཀྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་གཏན་ལ་ཕབ་པའོ།།དགེའོ།།དགེའོ།།དགེའོ།།།།