ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་དབང་ཕྱུག་ཆེན་པོའི་ལས་ཚོགས་ལས༔ དགྲ་བོ་བྲོས་ཤོར་གྱི་སྒོ་འདན་པ༔

Previous Text Back to Volume Page Next Text

Wylie title	zab gsang mkha' 'gro'i snying thig las: lha chen dbang phyug chen po'i las tshogs las: dgra bo bros shor gyi sgo 'dan pa:
Location	bdud 'joms gling pa zab gter Volume 8, Text 25, Pages 181-184 (Folios 1a1 to 2b1)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. zab gsang mkha' 'gro'i snying thig las lha chen dbang phyug chen po'i las tshogs las dgra bo bros shor gyi sgo 'dan pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 181-184. Thimphu, Bhutan: Lama Kuenzang Wangdue, 2004.
Side notes	Recto: dgra bros sgo 'dan Verso: bdud 'joms bka' srung lha chen
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Practices - las tshogs
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མཐར་མཁྱེན་རབ་རྒྱ་མཚོས་བསྐུལ་ངོར་གཏན་ལ་ཕབ་པའི་ཡི་གེ་རིས་བྱེད་ཀྱང་དེ་ཉིད་དོ། །དགེའོ། །སརྦ་མངྒ་ལཾ།།
Colophon	zhes pa 'di yang khrag 'thung bdud 'joms rdo rjes gter nas bton te mthar mkhyen rab rgya mtshos bskul ngor gtan la phab pa'i yi ge ris byed kyang de nyid do/_/dge'o/_/sarba mang+ga laM//

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་དབང་ཕྱུག་ཆེན་པོའི་ལས་ཚོགས་ལས༔ དགྲ་བོ་བྲོས་ཤོར་གྱི་སྒོ་འདན་པ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) རང་ཉིད་ཡི་དམ་ལྷར་གསལ་ངང་༔ བཀའ་སྲུང་གཉན་པོ་མདུན་དུ་བསྒོམ༔ དེ་ལ་ལས་བཅོལ་འདི་སྐད་བྱ༔ ཛཿལྷ་ཆེན་དབང་ཕྱུག་ཆེན་པོ་ཁྱོད༔ ཁམས་གསུམ་ཡོངས་ཀྱི་མངའ་བདག་ཡིན༔ ཆེ་བཙན་འཇིག་རྟེན་གསུམ་ན་འཕགས༔ ཁམས་གསུམ་ལེགས་ཉེས་ཁྱོད་ཀྱིས་དབང་༔ དཀོན་མཆོག་གསུམ་གྱི་སྲུང་མ་ལགས༔ ཁྱོད་ལ་བདག་གི་བློ་གཏད་སྒྲུབས༔ དོ་ནུབ་ལས་ཀྱི་ཕོ་ཉར་བསྐུལ༔ ཧཱུྃ༔ དབང་ཕྱུག་སྐུ་ཡི་དབྱིངས་བསྐུལ་ལོ༔ སྐུ་ཡི་སྤྲུལ་པའི་དུས་ལ་བབ༔ ལྷ་བདུད་དགའ་རབ་དབང་ཕྱུག་གིས༔ མུ་སྟེགས་ཡོངས་ལ་མངའ་དབང་མཛད༔ དོ་ནུབ་ང་ཡི་ཕོ་ཉར་བསྐུལ༔ དམ་ཉམས་དགྲ་བོ་ལས་ངན་འདི༔ མུ་སྟེགས་སྲུང་བཟློག་དང་ཕྲོལ་ལ༔ ཕྱི་པའི་དབང་དུ་མ་བཏང་ཞིག༔ ཧཱུྃ༔ དབང་ཕྱུག་གསུང་གི་སྤྲུལ་པ་ལས༔ ལྷ་ཆེན་སྟག་ལྷ་མེ་འབར་བ༔ གཡུང་དྲུང་བོན་ལ་མངའ་དབང་མཛད༔ དོ་ནུབ་ང་ཡི་ཕོ་ཉར་བསྐུལ༔ དམ་ཉམས་དགྲ་བོ་སྡིག་ཅན་འདི༔ བོན་གྱི་སྲུང་བཟློག་དང་ཕྲོལ་ལ༔ བོན་གྱི་དབང་དུ་མ་བཏང་ཞིག༔ དམ་ཚིག་གཉན་པོ་གཏའ་རུ་བཙུག༔ མ་འདའ་བཛྲ་ས་མ་ཡ༔ ཧཱུྃ༔ དབང་ཕྱུག་ཐུགས་ཀྱི་སྤྲུལ་པ་ལས༔ ལྷ་མགོན་མ་ཧཱ་ཀཱ་ལ་ཆེ༔ ནང་པའི་བསྟན་འགྲོར་མངའ་དབང་མཛད༔ དོ་ནུབ་ལས་ཀྱི་ཕོ་ཉར་བསྐུལ༔ དམ་ཉམས་དགྲ་བོ་སྡིག་ཅན་འདི༔ བན་སྔགས་སྲུང་བཟློག་དང་ཕྲོལ་ལ༔ ནང་པའི་དབང་དུ་མ་བཏང་ཞིག༔ གློ་བུར་ཧུར་ཐུམ་དྲག་པོར་སོད༔ དམ་ཚིག་གཉན་པོ་གཏའ་རུ་བཙུག༔ མ་འདའ་བཛྲ་ས་མ་ཡ༔ ཧཱུྃ༔ དབང་ཕྱུག་ཡོན་ཏན་སྤྲུལ་པ་ནི༔ ཚོགས་བདག་གླང་སྣ་དམར་པོ་སྟེ༔ འདོད་ལྷ་ཡོངས་ལ་མངའ་དབང་མཛད༔ དོ་ནུབ་ལས་ཀྱི་ཕོ་ཉར་བསྐུལ༔ དམ་ཉམས་དགྲ་བོ་སྡིག་ཅན་འདི༔ ལྷ་ཡི་སྲུང་མ་དང་ཕྲོལ་ལ༔ འདོད་ལྷའི་དབང་དུ་མ་བཏང་ཞིག༔ གློ་བུར་ཧུར་ཐུམ་དྲག་པོར་སོད༔ དམ་ཚིག་གཉན་པོ་གཏའ་རུ་བཙུག༔ མ་འདའ་བཛྲ་ས་མ་ཡ༔ ཧཱུྃ༔ ལྷ་ཆེན་ཕྲིན་ལས་སྤྲུལ་པ་ནི༔ བཀའ་ཡི་ལྷ་སྲིན་དྲེགས་པ་ཅན༔ སྐྱེ་འགྲོ་ཡོངས་ལ་མངའ་དབང་མཛད༔ དོ་ནུབ་ལས་ཀྱི་ཕོ་ཉར་བསྐུལ༔ དམ་ཉམས་དགྲ་བོ་སྡིག་ཅན་འདི༔ སྐྱེ་འགྲོའི་སྲུང་བཟློག་དང་ཕྲོལ་ལ༔ སེམས་ཅན་ཡོངས་ལ་མ་ཤོར་ཅིག༔ གློ་བུར་ཧུར་ཐུམ་དྲག་པོར་སོད༔ དམ་ཚིག་གཉན་པོ་གཏའ་རུ་བཙུག༔ མ་འདའ་བཛྲ་ས་མ་ཡ༔ དབང་ཕྱུག་སྤྲུལ་པ་ཡང་སྤྲུལ་གྱིས༔ སྲིད་པ་གསུམ་ལ་མངའ་དབང་བསྒྱུར༔ སྲིད་གསུམ་བདག་པོ་མངའ་དབང་མཛད༔ དོ་ནུབ་ང་ཡི་ཕོ་ཉར་བསྐུལ༔ དམ་ཉམས་དགྲ་བོ་སྡིག་ཅན་འདི༔ གཞི་བདག་སྲུང་མ་དང་ཕྲོལ་ལ༔ ཡུལ་ལྷའི་དབང་དུ་མ་བཏང་ཞིག༔ གློ་བུར་ཧུར་ཐུམ་དྲག་པོར་སོད༔ དམ་ཚིག་གཉན་པོ་གཏའ་རུ་བཙུག༔ མ་འདའ་བཛྲ་ས་མ་ཡ༔ ཡིད་ལ་བརྣག་པའི་དགྲ་བོ་འདི༔ འགོ་བར་བྱེད་པའི་ལྷ་དང་ཕྲོལ༔ སྐྱོབ་པར་བྱེད་པའི་ལྷ་དང་ཕྲོལ༔ ཚེ་རབས་ལས་ཀྱི་ལྷ་དང་ཕྲོལ༔ ད་ལྟ་བསྒྲུབ་མཆོད་ལྷ་དང་ཕྲོལ༔ སྟེང་གི་ལྷ་དང་སྲུང་མར་ཕྲོལ༔ བར་གྱི་གཉན་དང་ཡུལ་ལྷར་ཕྱེས༔ འོག་གི་ཀླུ་དང་སྲུང་མར་ཕྱེས༔ སྡང་བར་བྱེད་པའི་དགྲ་དང་སྤྲོད༔ གནོད་པར་བྱེད་པའི་བགེགས་དང་སྤྲོད༔ ཟ་བར་བྱེད་པའི་འདྲེ་དང་སྤྲོད༔ ཕུང་བར་བྱེད་པའི་སྲི་དང་སྤྲོད༔ ལོ་ཟླར་འགྱངས་སུ་མ་ཤོར་བར༔ ཞག་དང་ཟ་མར་མྱུར་དུ་སོད༔ ཨོཾ་བཛྲ་ས་མ་ཡ༔ ཨཱཿབཛྲ་ས་མ་ཡ༔ ཧཱུྃ་བཛྲ་ས་མ་ཡ༔ ཞེས་བརྗོད་གསེར་སྐྱེམས་གཏོར་མ་དོར༔ དེ་ཡིས་དགྲ་བོའི་བྲོས་ལམ་ཆོད༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མཐར་མཁྱེན་རབ་རྒྱ་མཚོས་བསྐུལ་ངོར་གཏན་ལ་ཕབ་པའི་ཡི་གེ་རིས་བྱེད་ཀྱང་དེ་ཉིད་དོ། །དགེའོ། །སརྦ་མངྒ་ལཾ།། །།