གསེར་པ་རབ་འབྱོར་ལ་གདམས་པའི་གླུ་དབྱངས་ཐོད་པའི་ཕྲེང་བ།

Previous Text Back to Volume Page Next Text

Wylie title	gser pa rab 'byor la gdams pa'i glu dbyangs thod pa'i phreng ba
Location	bdud 'joms gling pa zab gter Volume 18, Text 14, Pages 63-64 (Folios 32a1 to 32b6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Gser pa rab 'byor la gdams pa'i glu dbyangs thod pa'i phreng ba. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 63-64. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams
Colophon	མི་རྒན་བདུད་འཇོམས་རྡོ་རྗེས་སྨྲས།།
Colophon	mi rgan bdud 'joms rdo rjes smras//

[edit]

༄༅། །གསེར་པ་རབ་འབྱོར་ལ་གདམས་པའི་གླུ་དབྱངས་ཐོད་པའི་ཕྲེང་བ་བཞུགས།བདེ་གཤེགས་སྙིང་པོ་སངས་རྒྱས་ཀྱི། །ཡོན་ཏན་གཏེར་ལ་མི་ཕྱེད་འདུད། །སྐལ་པ་བཟང་པོའི་བན་ཆུང་ཁྱོད། །བླ་མ་བཟང་པོའི་བུ་བརྒྱུད་ལགས། །དམ་ཆོས་བཟང་པོའི་སྙིང་བཅུད་ལེན། །དད་བརྩོན་བཟང་པོ་མ་དོར་རེམ། །སྣང་སྲིད་འཁོར་འདས་འདོད་ཡོན་སྣང་། །ཐམས་ཅད་ཆོས་ཉིད་ཆེན་པོ་རུ། །མཉམ་པ་ཉིད་དུ་རོ་གཅིག་པའི། །ལྟ་བའི་རྒྱལ་པོ་བབ་ཀྱིས་རྫོགས། །བློ་ཡིད་གཉིས་ཀས་མ་བཅོས་པའི། །ཡེ་གནས་ཡེ་ཤེས་གོ་མ་འགགས། །བརྗོད་མེད་རིག་པ་ཟང་མ་ཐལ། །སྒོམ་པའི་རྒྱལ་པོར་ལྷུན་གྱིས་གྲུབ། །ཆོས་ཉིད་ཅི་ཡང་མ་ཡིན་པའི། །ངང་བཞག་རང་ཁར་འདུག་པ་ལས། །བྱར་མེད་ཡུལ་ལ་བྱ་བྱེད་པའི། །བྱ་བ་བཏང་བ་སྤྱོད་པའི་བབ། །གཞི་དབྱིངས་ཡེ་གྲོལ་ཆོས་ཀྱི་སྐུ། །ས་ལམ་ཡོན་ཏན་ཡེ་རྫོགས་པའི། །ངང་མཐོང་གདོད་མའི་མགོན་པོ་ཉིད། །རང་བྱུང་རང་ཤར་སངས་རྒྱས་ལགས། །ལམ་ནི་སྦྱང་བགྲོད་ཕྱིན་པ་མེད། །རང་ཐོག་རང་ངོ་ཤེས་པ་ཡི། །ངང་གནས་ཡེ་བབ་མངོན་གྱུར་དབྱིངས། །ཡེ་རིག་ལམ་གྱི་དམ་པ་ཡིན། །འབྲས་བུ་སླད་ནས་འབྱུང་བ་མེད། །ཐོབ་ལེན་མེད་པའི་དང་པོའི་གཞིར། །ཡེ་སངས་རྒྱས་པ་ཡང་མངོན་གྱུར། །སྤང་བླང་མེད་པར་རང་སར་གྲོལ། །དེ་ལྟར་བྱང་ཆུབ་སེམས་ཉིད་འདི། །གང་ལས་མ་བྱུང་གང་མ་སྐྱེས། །གང་དུ་མ་འགྱུར་གར་མི་བགྲོད། །གང་ཡང་མ་ཐོབ་གང་མ་གྲོལ། །ཁྱབ་བརྡལ་ནམ་མཁའི་འཁོར་ཡུག་ལ། །ནམ་མཁས་ནམ་མཁར་བསྒོམ་བསྒྲུབ་མེད། །སྒོམ་དང་བསྒོམ་མཁན་སྒོམ་རྒྱུའི་ཆོས། །ཡུལ་མེད་ཟང་ཐལ་ཆེན་པོར་སྟོར། །ཤེས་པ་དང་པོའི་སྣང་བ་ལ། །རྣམ་པར་རྟོག་པས་ཉེར་ལེན་པའི། །འཁྲུལ་པ་ཞེས་བྱ་འཁྲུལ་མོ་ཆེ། །གཞི་མེད་རྩ་བ་བྲལ་ལ་ལྟོས། །དེ་ལས་འཁོར་བའི་འཁོར་ལོ་ཉིད། །ལྷུན་གྲུབ་འོད་གསལ་ཆེན་པོ་རུ། །བཙན་ཐབས་ཉིད་དུ་གོ་འཕོ་བའི། །འཕོ་བ་ཆེན་པོར་ཉམས་སུ་ལོངས། །སྣང་བ་འོད་གསལ་ཉིད་དུ་མཆེད། །རིག་པ་བཅུད་དུ་སྨིན་ཅིང་དག །ཆོས་ཅན་ཆོས་ཉིད་ཆེན་པོར་ཟད། །གཞོན་ནུ་བུམ་སྐུར་དེ་བཞིན་གཤེགས། །མི་རྒན་འཆོལ་བའི་ལབ་མོ་དེ། །སེང་གེ་དཀར་མོའི་འོ་མ་བཞིན། །སྣོད་ལྡན་དག་གི་འཚོ་སྨན་མཆོག །སྣོད་མེད་རྣམས་ཀྱིས་ཆུ་རུ་འབོར། །མི་རྒན་བདུད་འཇོམས་རྡོ་རྗེས་སྨྲས།། །།