TTDL-ZABTER-18-TSHA-088

Previous Text Back to Volume Page Next Text

Wylie title
Location	bdud 'joms gling pa zab gter Volume 18, Text 88, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: . Thimphu, Bhutan: Lama Kuenzang Wangdue, 2004.*
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams

[edit]

དཔལ་ཨོ་རྒྱན་པདྨ་ཀ་རས་སྐྱོངས། །ཁྱོད་ངེས་པར་ཆོས་ཤིག་བསྒྲུབ་འདོད་ན། །ལུས་དལ་འབྱོར་ལྡན་པ་ཐོབ་དཀའ་སྟེ། །འདི་ད་རེས་དོན་ལྡན་ཞིག་ལ་རེམ། །ཚེ་མི་རྟག་དབྱར་ཁའི་མེ་ཏོག་འདྲ། །ད་མྱུར་དུ་ཐར་པ་དོན་གཉེར་མཛོད། །ལས་རྒྱུ་འབྲས་བདེ་སྡུག་འཁོར་བའི་གཞི། །དོན་འཕྱུགས་མེད་གདམས་ངག་ཉམས་སུ་ལོངས། །ཡུལ་འཁོར་བ་སྡུག་བསྔལ་རྒྱ་མཚོའི་ངང་། །ཚུལ་དྲན་ནས་ཐར་པའི་ལམ་དུ་སྙོགས། །གཞི་སྟོང་ཉིད་ནམ་མཁའི་རང་བཞིན་ལ། །ཆོས་ཐམས་ཅད་མ་བཅོས་ངང་གི་ཆོས། །སྐྱབས་གཞན་ན་མེད་དོ་བྱང་ཆུབ་སེམས། །ཡུལ་གཞན་ན་མེད་དོ་དམ་ཆོས་རང་། །སྒོམ་གཞན་ན་མེད་དོ་ངང་མངོན་གྱུར། །སངས་རང་ས་ཉིད་ནས་རྒྱས་པ་ལས། །གནས་གཞན་ལ་འཕོས་ཤིང་བགྲོད་སླེབས་མེད། །ས་ལམ་གྱི་རིམ་པར་མི་ལྟོས་ཤིང་། །ཐོད་གཅིག་ཆར་དུ་རྒལ་བ་ཐོད་རྒལ་ལམ། །ཕྱི་འབྱུང་དང་ནང་འབྱུང་དྭངས་མའི་དབྱིངས། །བཟང་ངན་གྱི་སྣང་བ་གང་ཤར་ལ། །རེ་དོགས་དང་ཡིན་མིན་ཡིད་དཔྱོད་སོགས། །ཆམ་བཞག་གི་ངང་དུ་ཡིད་ཆེས་མཛོད། །རྣམ་མཁྱེན་གྱི་ལམ་བཟང་མདོར་བསྡུས་འདི། །ཁྱོད་སྙིང་ལ་འཆོངས་ཤིག་དར་ལོ་པ། །ཞེས་པ་འདི་སློབ་བུ་དར་ལོ་ཞེས་བྱ་བས་ནན་དུ་བསྐུལ་ངོར་བདུད་འཇོམས་པས་སྨྲས་པ་ཡོངས་སུ་དགེ་བར་གྱུར་ཅིག།དགེའོ། །ལེགས་སོ། །། །