ཨོ་རྒྱན་མཚོ་སྐྱེས་རྡོ་རྗེས་སོགས་དཔལ་ལོར་གདམས་པ།

Previous Text Back to Volume PageNext Text

Wylie title	o rgyan mtsho skyes rdo rjes sogs dpal lor gdams pa
Location	bdud 'joms gling pa zab gter Volume 18, Text 66, Pages 241-244 (Folios 121a1 to 122b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. O rgyan mtsho skyes rdo rjes sogs dpal lor gdams pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 241-244. Thimphu, Bhutan: Lama Kuenzang Wangdue, 2004.
Side notes	Recto: zhal gdams   Verso: bdud 'joms gsung mgur skor
More details More details
Genre	Advice - zhal gdams
Colophon	ཞེས་པ་འདི་ཡང་སློབ་བུ་དཔལ་ལོས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་སྨྲས་པ་ཡོངས་སུ་དགེ་བར་གྱུར་ཅིག།
	zhes pa 'di yang slob bu dpal los bskul ngor khrag 'thung bdud 'joms rdo rjes smras pa yongs su dge bar gyur cig/

Tibetan Text

[edit]

༄༅། །ཨོ་རྒྱན་མཚོ་སྐྱེས་རྡོ་རྗེས་བདག་སྐྱོངས་ཤིག །ཉོན་ཅིག་སྐལ་པ་བཟང་པོའི་སྐྱེས་བུ་ཁྱོད། །དལ་འབྱོར་མི་ལུས་རིན་ཆེན་ཐོབ་དུས་འདིར། །ཐར་པ་དོན་དུ་གཉེར་མཛོད་སྐལ་ལྡན་བུ། །མི་རྟག་འཆི་བ་ནམ་འོང་ཆ་མེད་པས། །རྟག་འཛིན་ཞེན་པ་ཆོད་ཅིག་སྐལ་ལྡན་བུ། །དཀར་ནག་ལས་འབྲས་བདེ་སྡུག་ཀུན་གྱི་གཞི། །རྒྱུ་འབྲས་སྤང་བླང་མ་ནོར་སྐལ་ལྡན་བུ། །ཁམས་གསུམ་འཁོར་བ་སྡུག་བསྔལ་རང་བཞིན་ལ། །ངེས་འབྱུང་གཏིང་ནས་སྐྱེས་མཛོད་སྐལ་ལྡན་བུ། །བྱིན་རླབས་དབང་གི་རྩ་བ་བླ་མ་ཡིན། །འབྲལ་མེད་མོས་གུས་གྱིས་ཤིག་སྐལ་ལྡན་བུ། །དངོས་གྲུབ་ཀུན་གྱི་རྩ་བ་ཡི་དམ་ཡིན། །བསྙེན་སྒྲུབ་སྒོམ་བཟླས་མ་དོར་སྐལ་ལྡན་བུ། །ཕྲིན་ལས་རྩ་བ་མཁའ་འགྲོ་ཆོས་སྐྱོང་ཡིན། །ཚོགས་མཆོད་གསོལ་མཆོད་མ་དོར་སྐལ་ལྡན་བུ། །ཆོས་རྣམས་ཀུན་གྱི་རྩ་བ་བྱང་ཆུབ་སེམས། །འགྲོ་དོན་བར་མེད་གྱིས་ཤིག་སྐལ་ལྡན་བུ། །འཁོར་འདས་གཉིས་ཀྱི་རྩ་བ་རང་སེམས་ཡིན། །རིག་པའི་ཡེ་ཤེས་མ་དོར་སྐལ་ལྡན་བུ། །ཐམས་ཅད་དག་མཉམ་སྟོང་ཆེན་ཡུམ་གྱི་མཁའ། །གནས་ལུགས་མངོན་དུ་གྱུར་མཛོད་སྐལ་ལྡན་བུ། །ཆོས་རྣམས་ཀུན་གྱི་ཆིངས་ཆེན་ཆོས་ཉིད་དབྱིངས། །ཆོས་སྐུ་མངོན་གྱུར་མཛོད་ཅིག་སྐལ་ལྡན་བུ། །ཁམས་གསུམ་མ་ལུས་སྐུ་གསུམ་ཆེན་པོར་རོལ། །ཡེ་གཞི་མངོན་དུ་གྱུར་མཛོད་སྐལ་ལྡན་བུ། །ངོ་བོ་སྟོང་ཉིད་བརྡལ་ཁྱབ་སྤྲོས་མཐའ་བྲལ། །ཡིན་ལུགས་མངོན་དུ་གྱུར་མཛོད་སྐལ་ལྡན་བུ། །རིག་པའི་ཀློང་ན་སྐུ་གསུམ་འདུ་འབྲལ་མེད། །སངས་རྒྱས་གཞན་ན་མེད་དོ་སྐལ་ལྡན་བུ། །རིག་པ་རང་ལ་སྐུ་དང་ཞིང་ཁམས་རྫོགས། །དེ་ལ་བགྲོད་སླེབས་མེད་དོ་སྐལ་ལྡན་བུ། །རིག་པའི་ངང་དུ་འཁོར་འདས་ཐམས་ཅད་རྫོགས། །དེ་ལ་བཟང་ངན་མེད་དོ་སྐལ་ལྡན་བུ། །རིག་པ་ཉིད་ལ་ཐེག་ཀུན་ས་ལམ་རྫོགས། །དེ་ལ་སྦྱང་བགྲོད་མེད་དོ་སྐལ་ལྡན་བུ། །རིག་པའི་ངང་དུ་ཡེ་ཤེས་ཡོན་ཏན་རྫོགས། །དེ་ལ་རྩོལ་སྒྲུབ་མེད་དོ་སྐལ་ལྡན་བུ། །རིག་པའི་དབྱིངས་ལ་མ་རིག་དྲི་མ་མེད། །དེ་ལ་དབྱེ་བསལ་མེད་དོ་སྐལ་ལྡན་བུ། །རིག་པའི་དབྱིངས་ལ་ཐབས་ཤེས་འདུ་འབྲལ་མེད། །དེ་ལ་སྤོང་ལེན་མེད་དོ་སྐལ་ལྡན་བུ།རིག་པའི་ངང་ལ་བདེན་གཉིས་འདུ་འབྲལ་མེད། །དེ་ལ་སྐྱེ་འགགས་མེད་དོ་སྐལ་ལྡན་བུ། །རིག་པ་ཁྱབ་བརྡལ་ནམ་མཁའི་ཁོར་ཡུག་དེ། །དེ་ལ་འདི་བསྒོམ་མེད་དོ་སྐལ་ལྡན་བུ། །རིག་པ་ཡུལ་མེད་ཟང་ཐལ་ཆེན་པོ་སྟེ། །དེ་ལ་ཕན་གནོད་མེད་དོ་སྐལ་ལྡན་བུ། །རིག་པ་གཏད་མེད་རྒྱ་ཡན་ཆེན་པོ་སྟེ། །དེ་ལ་དམིགས་གཏད་མེད་དོ་སྐལ་ལྡན་བུ། །རིག་པ་ཡེ་གྲོལ་ཀ་དག་མཉམ་པ་ཉིད། །དེ་ལ་མྱོང་ཞེན་མེད་དོ་སྐལ་ལྡན་བུ། །རིག་པ་ཡེ་ཡིན་མ་བཅོས་ཅོག་བཞག་ལ། །འཛིན་སྟངས་རྟོག་དཔྱོད་མེད་དོ་སྐལ་ལྡན་བུ། །རིག་པ་རང་ཐོག་རང་གྲོལ་ཆེན་པོ་ལ། །འབྲས་བུ་ཐོབ་ལེན་མེད་དོ་སྐལ་ལྡན་བུ། །མེད་པའི་བྱར་མེད་ཆོས་སྐུ་མངོན་གྱུར་ནས། །ཐོད་རྒལ་མྱུར་ལམ་བསྟེན་མཛོད་སྐལ་ལྡན་བུ། །རྣམ་མཁྱེན་སངས་རྒྱས་མངོན་དུ་མ་གྱུར་བར། །ཉམས་ལེན་གནད་མ་དོར་ཤིག་སྐལ་ལྡན་བུ། །རང་ལས་ཕན་པའི་ཐབས་ལམ་སློབ་མི་མེད། །སུ་ཡི་ཁ་ལ་མ་ཉན་སྐལ་ལྡན་བུ། །ཕན་ཐོགས་བདེ་བ་སྟེར་བའི་གྲོགས་མི་འབྱུང་། །རང་མགོ་ཐོན་ཐབས་གྱིས་ཤིག་སྐལ་ལྡན་བུ། །ཕྱི་མར་ཕན་པའི་ཁ་ད་བྱེད་མཁན་མེད། །རང་ཚོད་རང་གིས་ཟུངས་ཤིག་སྐལ་ལྡན་བུ། །གཏན་གྱི་ལོངས་སྤྱོད་ཟང་ཟིང་ནོར་ལ་མེད། །སྒྲུབ་རྒྱག་སློང་མོ་ཙམ་གྱིས་ཆོག་ཤེས་བསྟེན། །མི་ཚེ་ཕྱེད་ཆ་ཟད་པ་ཤེས་མཛོད་ལ། །ལྷག་མ་ཆོས་ལ་དྲིལ་མཛོད་སྐལ་ལྡན་བུ། །སང་བྱེད་གནང་བྱེད་བློ་རིང་སྣ་བསྟུང་ལ། །ནམ་འཆི་ཆ་མེད་སྒོམས་ཤིག་སྐལ་ལྡན་བུ། །རྒན་གཞོན་ཚེ་ཚད་ཚོད་ཀྱིས་མི་ཐེབས་པས། །འཆི་བ་སྙིང་ནས་དྲན་མཛོད་སྐལ་ལྡན་བུ། །ལས་ཟིན་དུས་ལ་བབ་པ་མི་འོང་བས། །དྲན་ཙམ་ཉིད་ནས་རྒྱུག་ཅིག་སྐལ་ལྡན་བུ། །དེ་ལྟར་གནད་དང་ལྡན་ན་ཁྱོད་འཚང་རྒྱ། །ཡིད་གཉིས་ཐེ་ཚོམ་མེད་དོ་སྐལ་ལྡན་བུ། །ཞེས་པ་འདི་ཡང་སློབ་བུ་དཔལ་ལོས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་སྨྲས་པ་ཡོངས་སུ་དགེ་བར་གྱུར་ཅིག། །།