གཟུང་འཛིན་རང་གྲོལ་གྱི་གདམས་ངག་ཉི་ཟླའི་གྭའུ།

Previous Text Back to Volume Page Next Text

Wylie title	gzung 'dzin rang grol gyi gdams ngag nyi zla'i gwa'u
Location	bdud 'joms gling pa zab gter Volume 18, Text 82, Pages 303-315 (Folios 152a1 to 158a1)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Gzung 'dzin rang grol gyi gdams ngag nyi zla'i gwa'u. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 303-315. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams
Colophon	ཞེས་པ་འདི་སྤྲང་སྨྱོན་འཆོལ་པོ་སེམས་ཉིད་ཧད་པོས་རང་བྱུང་གི་ངོར་བྲིས་པ་ཡོངས་སུ་དགེ་བར་གྱུར་ཅིག །བཀྲིས་ཤོག།
Colophon	zhes pa 'di sprang smyon 'chol po sems nyid had pos rang byung gi ngor bris pa yongs su dge bar gyur cig_/bkris shog/

[edit]

༄༅། །གཟུང་འཛིན་རང་གྲོལ་གྱི་གདམས་ངག་ཉི་ཟླའི་གྭའུ་བཞུགས།དུས་གསུམ་རྒྱལ་བའི་སྤྱི་གཟུགས་མཆོག །ཁྱབ་བདག་འཁོར་ལོའི་མགོན་པོ་རྗེ། །མཚོ་སྐྱེས་རྗེ་དང་བི་མ་ལས། །བདག་དང་བརྒྱུད་འཛིན་རྗེས་སུ་ཟུངས། །ཨཻ།རྣལ་འབྱོར་ཁྱོད་ཀྱི་བཀའ་མི་ལྡོག །ངས་ནི་གདམས་ངག་འཆད་མི་ཤེས། །ཅིའི་ཕྱིར་དེ་དོན་བསྙད་པ་ན། །སྐྱེས་ནས་ད་ལྟ་ཡན་ཆད་དུ། །ལས་རླུང་དྲག་པོ་དབང་བཙན་པས། །དགེ་བའི་བཤེས་གཉེན་བསྟེན་མ་མྱོང་། །ཐོས་པའི་ཤེས་རབ་མེད་པས་བླུན། །བསྒོམ་པའི་ཡོན་ཏན་མེད་པས་རྨོངས། །བསླུ་ཆོས་རང་མགོ་འཁོར་བས་མྱོས། །འདི་ཕྱིའི་དོན་མ་འགྲུབ་པས་དབུལ། །སྡུག་བསྔལ་ཞགས་པས་འཁྱུད་དེ་ཕུང་། །དེ་ཕྱིར་གཞན་བཅོས་ལྟ་ཅི་སྨོས། །འོན་ཀྱང་ཁྱོད་གསུངས་དོན་ཡོད་ཕྱིར། །རང་གི་བླུན་བཟོས་སྒོམ་ལ་རྩི། །ཐུགས་མ་ཁྲེལ་དང་མདོ་ཙམ་བྲི། །ཕ་རྒན་མཚོ་སྐྱེས་རྡོ་རྗེ་ཡིས། །དགོངས་རྒྱུད་ཕ་ཕོག་ཚུལ་དུ་སྤར། །ཨ་མ་ཡེ་ཤེས་མཁའ་འགྲོ་མས། །སྙིང་ཐིག་ནུ་ཞོའི་ཚུལ་དུ་བླུད། །མཁའ་ལྡིང་རྒྱལ་པོའི་བུ་བརྒྱུད་བཞིན། །སྒོང་རྒྱའི་སྦུབས་ནས་ནར་སོན་ཐལ། །ཅུང་ཟད་སྨྲས་ཀྱང་འགལ་མེད་མོད། །དེ་ཕྱིར་མདོར་བསྡུས་དོན་འདུ་བྲི། །དང་པོ་ལུས་ངག་ཡིད་གསུམ་ནས། །སེམས་རྙེད་གཏན་ལ་དབབ་པ་དང་། །གནས་འགྱུ་རིག་གསུམ་ཡན་ཆད་ནས། །དྲན་པ་རྣམ་བཞི་མན་ཆད་དུ། །རང་བཞིན་ལམ་དུ་བྱེད་པ་ནི། །རིམ་གྱིས་ལམ་མཆོག་གཏན་ལ་དབབ། །འདི་ནི་དང་པོའི་ལས་ཅན་ལམ། །དེ་ནས་ཐེག་མཆོག་རྒྱལ་པོ་འདིའི། །རང་ལམ་ཚུལ་བཞིན་བསྟན་པ་ནི། །མཁའ་ལྡིང་མས་འབབ་ཅི་བཞིན་དུ། །ཡེ་གཞི་གཏན་ལ་དབབ་པར་བྱ། །ཡེ་གཞི་བདེ་གཤེགས་སྙིང་པོ་ནི། །སངས་རྒྱས་བཟང་པོས་ཕན་མ་བཏགས། །སེམས་ཅན་ངན་པས་གནོད་མ་བྱས། །སྤྲོས་པའི་མཐའ་བརྒྱད་ལས་འདས་ཤིང་། །རྣམ་ཐར་གསུམ་དང་ལྡན་པའི་ཆོས། །གདོད་ནས་ཁམས་གསུམ་སེམས་ཅན་རྣམས། །འདི་དང་སྐད་ཅིག་འབྲལ་མ་མྱོང་། །ཁྱབ་བྱེད་ཡེ་ཤེས་ཤེས་རབ་སྟེ། །ངང་གནས་ཡོངས་གྲུབ་མདངས་གསལ་ན། །དེ་ནི་རིག་པ་ཆོས་ཀྱི་སྐུ། །མ་རིག་མལ་དུ་དུབ་པ་ཡི། །འཁྲུལ་རྒྱུ་ཀུན་གཞིའི་མུན་ཁམས་བྱུང་། །ངོ་བོའི་སྟེང་ནས་མི་འགྱུར་ཏེ། །རང་བཞིན་སྟེང་དུ་འཁྲུལ་པར་འཕྱན། །སངས་རྒྱས་སེམས་ཅན་དེ་ལྟར་གྱིས། །དེ་ལྟར་ཀུན་གཞིའི་མིང་གྲགས་པ། །བདེ་སྡུག་ཀུན་དང་འཁོར་བ་ཀུན། །སྔོན་བྱུང་འཕྲལ་བྱུང་མ་རིག་པའི། །བག་ཆགས་ཀུན་འདུས་ཀུན་འདུ་བའི། །གཞི་ནི་འདི་སྟེ་དེ་ལྟར་གྲགས། །དཔེར་ན་མུན་འཐུག་གཉིད་འཐུག་དང་། །ཡང་ན་བརྒྱལ་བའི་གནས་སྐབས་ལྟར། །ཕན་གནོད་གང་གི་བྱེད་པོ་མེད། །གཞི་ཡི་ཞལ་རས་སྒྲིབ་པས་བསྒྲིབས། །ཉོན་མོངས་འཁྲུལ་པ་ཀུན་གྱི་ཁྱིམ། །དེ་ལས་ངར་འཛིན་རག་པ་ཤར། །ང་དང་ང་ཡི་ཡུལ་ཅན་གྲུབ། །ང་ལས་གཟུགས་ཕུང་གྲུབ་པ་ལ། །ང་ཡི་ཞར་ལ་གྲུབ་པ་ནི། །སྣང་བ་སྣོད་ཀྱི་འཇིག་རྟེན་དང་། །གཡོ་བ་བཅུད་ཀྱི་སེམས་ཅན་དང་། །འདོད་ཡོན་ལྔ་ཡི་རང་བཞིན་ཤར། །འདི་ནི་ཉི་མ་ཉི་འོད་བཞིན། །སྣང་བའི་ཆོས་དང་གཟུང་བ་ཡུལ། །རྣམ་རྟོག་སྔ་མས་བྱས་པ་ཡིན། །ང་ཡི་ལུས་ནས་ཡིད་ལངས་ཏེ། །སྒོ་ལྔའི་ཡུལ་དུ་རྣམ་པར་ཤེས། །རག་པ་ཧྲིལ་པོར་འཛིན་པ་ནི། །རྣམ་པར་ཤེས་པ་ལྔ་རུ་གྲགས། །ཕྲ་བ་སོ་སོར་དབྱེ་བ་ནི། །ཡིད་ཀྱི་རྣམ་པར་ཤེས་པར་བརྗོད། །མདོར་ན་ཡིད་ཀྱི་རྣམ་ཤེས་དེ། །སྔ་མའི་རྣམ་པར་རྟོག་པ་ལ། །མིང་བཏགས་དོན་བཟུང་དངོས་པོར་འཐས། །དབྱེ་བ་བདག་དང་ཕ་གིར་ལྟ། །བདེ་སྡུག་བཏང་སྙོམས་ཉེ་བར་ལེན། །འདི་ནི་རྣམ་རྟོག་ཕྱི་མ་སྟེ། །འཛིན་པ་སེམས་སུ་གྲགས་པ་ཡིན། །འདི་ལྟར་སྣང་དང་སྣང་བྱེད་གཉིས། །ཕྲ་བའི་སྟེང་ནས་འགྱུར་བ་ནི། །སྐད་ཅིག་ཙམ་ཡང་རྟག་ཏུ་མེད། །རག་པའི་སྟེང་ནས་འགྱུར་བ་ནི། །ཉིན་སྣང་མཚན་སྣང་འདི་ཕྱིའི་སྣང་། །སྣོད་བཅུད་སྣང་བའི་རྫུན་རིས་ལགས། །དཔེར་ན་ལོ་གཅིག་ནང་ཚན་དུ། །ཉིན་སྣང་སུམ་བརྒྱ་དྲུག་ཅུ་དང་། །མཚན་སྣང་སུམ་བརྒྱ་དྲུག་ཅུ་ལ། །བདེན་རྫུན་མེད་པར་མཉམ་ལ་ལྟོས། །དེ་བཞིན་འདས་པའི་དུས་རྣམས་སུ། །ཉིན་སྣང་མཚན་སྣང་མང་ཚན་ཐལ། །མཉམ་ལས་བདེན་རྫུན་མེད་ལ་ལྟོས། །སངས་རྒྱས་དང་ནི་སངས་རྒྱས་ཞིང་། །སྣོད་བཅུད་ངེས་པར་མ་ལྟ་ཞིག །འཁོར་བ་དང་ནི་ངན་སོང་དང་། །བདེན་གྲུབ་རང་མཚན་མ་ལྟ་ཞིག །སྐྱོབ་བྱེད་ལྷ་དང་ཕུང་བྱེད་འདྲེ། །མངོན་གྲུབ་ངེས་པར་མ་ལྟ་ཞིག །ཁམས་གསུམ་འཁྲུལ་པའི་སེམས་ཅན་རྣམས། །རང་རྒྱུད་བལྟས་པས་ལན་པ་ཡིན། །དེ་ཕྱིར་རང་རྒྱུད་མ་ལྟ་ཞིག །མིང་གི་གདགས་གཞི་རྫུན་ལ་ལྟོས། །དངོས་པོའི་གཏན་ཕུག་སྟོང་ལ་ལྟོས། །ལྷ་འདྲེས་ཕན་གནོད་མེད་ལུགས་ལྟོས། །འཁོར་འདས་རང་ཡུལ་མེད་ཚུལ་ལྟོས། །བདེ་སྡུག་འཁྲུལ་ཉམས་ངེས་པར་ལྟོས། །འདི་ནས་ཕྱི་མར་བགྲོད་པ་ཡིན། །ལུས་དང་ཡུལ་གཉིས་མ་ལྟ་ཞིག །སྣང་བ་གནས་འགྱུར་ཙམ་ལས་མིན། །དཔྱོད་ལྡན་ཡིན་ན་ཉིན་མཚན་གྱི། །སྣང་བ་འགྱུར་ལས་བགྲོད་མིན་པས། །ཚུལ་དེས་ཐམས་ཅད་དཔག་པར་གྱིས། །གནས་ལུགས་ཡིན་ལུགས་ཡོངས་གྲུབ་ཀྱི། །ཚུལ་མཐོང་ཆོས་ཉིད་བདེན་པ་ཡིན། །ཚུལ་བཞིན་ཡིན་ལུགས་མ་ཤེས་ན། །སྟོང་པ་ཉིད་ལས་རིང་དུ་ཐལ། །བློས་བཅོས་རྒྱས་འདེབས་བྱེད་པ་ནི། །ཡང་དག་དོན་ལས་རིང་དུ་དགོན། །དེ་ལྟར་སྣང་བ་ཀུན་རྫོབ་ཆོས། །དོན་དམ་དབྱིངས་སུ་མ་གྲོལ་ན། །བྱ་བྱེད་དཀར་ནག་འཁོར་བ་ལས། །མི་འཕགས་ངོ་མར་གདོན་མི་ཟ། །ཡེ་གཞིའི་ལྷུམས་མདངས་སྐུ་ལྔ་ནི། །འཁྲུལ་པའི་སྣང་ངོར་འབྱུང་ལྔར་འཐས། །ཡེ་ཤེས་ཏིང་གསལ་ལྷུམས་མདངས་ནི། །གདངས་ཐོག་ཤར་བ་ཁ་དོག་ལྔ། །དེ་ལྟར་སྣོད་བཅུད་ཐམས་ཅད་ཀྱི། །མིང་དང་དངོས་པོས་རང་བཞིན་སྣང་། །བརྟགས་ན་ངོ་བོ་སྟོང་པར་འཇིག །སྟོང་པ་ཉིད་ནི་ངོ་བོ་སྟེ། །ངོ་བོ་ཉིད་ལས་མི་གཞན་ངེས། །ངོ་བོ་བཟང་ངན་མེད་པའི་ངང་། །འཁོར་བ་དང་ནི་འདས་པའི་ཆོས། །འུབ་ཏུ་འདུས་ཤིང་ཡོངས་སུ་ཆུབ། །འདི་ལ་འུབ་ཆུབ་ཞེས་ཀྱང་བྱ། །ངོ་བོ་ཀ་དག་ཆེན་པོ་ནི། །སྐྱོན་དང་དྲི་མ་ཀུན་བྱང་ནས། །ཡེ་ཤེས་ཡོན་ཏན་ཀུན་ཆུབ་པས། །དོན་དམ་བྱང་ཆུབ་སེམས་ཞེས་བྱ། །དེ་ལྟར་ངོ་བོ་སྟོང་པའི་ངང་། །ལུང་མ་བསྟན་དུ་ནོར་ར་རེ། །ངང་བཞག་ཡེ་གནས་ཡིན་པའི་ཕྱིར། །ཡེ་བབ་ཤེས་རབ་ཡེ་ཤེས་མིག །ཡིད་དང་བློ་རུ་ནོར་ར་རེ། །ཆོས་ཉིད་ཀློང་ནས་བརྡོལ་བ་དང་། །གོ་བ་རྒྱུད་ལ་ཆགས་པ་གཉིས། །འདྲ་འོ་འདྲ་འོ་ནོར་ར་རེ། །ནོར་ན་སྤྱོད་པས་རྟགས་སྟོན་པས། །གཞན་གྱིས་རྩོད་པས་འཇོམས་པས་སོ། །རིག་པའི་རང་གདངས་ཐེབ་པ་དང་། །ཀུན་གཞིའི་རྣམ་ཤེས་སྟོང་གསལ་གཉིས། །འདྲ་འོ་འདྲ་འོ་ནོར་ར་རེ། །དྲན་པའི་རང་ཚུགས་ཟིན་པ་དང་། །རིག་པའི་ཆོས་ཉིད་མངོན་སུམ་གཉིས། །འདྲ་འོ་འདྲ་འོ་ནོར་ར་རེ། །དྲན་སྟོང་མལ་དུ་དུབ་པ་དང་། །ཆོས་ཉིད་གཏད་མེད་རྒྱ་ཡན་གཉིས། །འདྲ་འོ་འདྲ་འོ་ནོར་ར་རེ། །ཁ་ལྟ་སྟོང་སྐད་ཧད་པོ་དང་། །ཆོས་ཉིད་བདེན་པ་མཐོང་བ་གཉིས། །འདྲ་འོ་འདྲ་འོ་ནོར་ར་རེ། །དེ་ལྟར་འདྲ་ལ་མ་ནོར་བར། །རིག་པ་ཆོས་སྐུར་ཡེ་སངས་ལ། །འཁོར་གསུམ་ཅོག་བཞག་མེད་པར་ཞོག །རིག་པ་ཡེ་སྟོང་ཆེན་པོ་ལ། །ཡང་སྟོང་ཟོབ་ཀྱི་ལྷད་མ་བརྡལ། །རིག་པ་ཡེ་གྲོལ་ཆེན་པོ་ལ། །ཡང་གྲོལ་བཅོས་མའི་ཟོན་མ་གཅུད། །རིག་པ་ཡེ་གསལ་ཆེན་པོ་ལ། །ཡང་གསལ་ལྟ་བས་སྒྲོ་མ་བཏགས། །རིག་པ་རང་ཤེས་རང་རིག་ལ། །ཡོངས་གསལ་བློ་ཡིས་བཅོས་མ་བསྒྱུར། །རིག་པ་ངང་བརྡལ་རྒྱ་འབྱམས་ལ། །ཡིད་ཀྱིས་བཞག་བསྒྱུར་མ་བྱེད་ཅིག །འདི་ལྟར་གནས་ལུགས་གནད་ཤེས་ན། །འཁོར་འདས་རྫོགས་པ་ཆེན་པོ་ཡིན། །དེ་ལྟར་ཚུལ་བཞིན་མི་ཤེས་ཤིང་། །གཟུང་འཛིན་རང་རྒྱུད་གོལ་བའི་གཤིས། །གཉིས་འཛིན་འཆིང་བ་སོར་བཞག་པས། །བེམ་སྟོང་བསྒོམ་པས་ཅེར་ལོང་འགའ། །རྫོགས་ཆེན་ཡིན་དུ་མ་རློམས་ཤིག །དྲན་པའི་གཟེབ་ཀྱིས་བཅིང་པ་ཡི། །རང་བཞིན་ལམ་དུ་བྱེད་པ་ཚོས། །རིག་པ་ཡིན་དུ་མ་རེ་ཞིག །གོ་བ་གོ་ཡུལ་འཁྲུལ་པ་ཡིན། །ཉོན་མོངས་བྱུང་རྒྱལ་སྤྱོད་པ་ཚོས། །རྣལ་འབྱོར་ཡིན་དུ་མ་རེ་ཞིག །དྲན་པ་རང་སར་བོར་བའི་མཐར། །ཐ་མལ་བཞིན་དུ་གཏན་སྤངས་ལ། །ཐ་མལ་ཤེས་པ་མ་བཏགས་ཤིག །དེ་བཞིན་ལོག་ལམ་མ་ཡིན་པའི། །རིག་པ་སྐུ་གསུམ་ལྷུན་གྲུབ་ནི། །ཐ་མལ་ལྟ་བུར་འཁྲུལ་མིན་པས། །སྒོམ་སྒྲུབ་བཅོས་བསྒྱུར་སྤང་བླང་མེད། །ངང་གནས་རྒྱ་འབྱམས་ཧད་དེ་བ། །ཧད་དེ་བ་ལ་ཟང་ཐལ་ལེ། །ཟང་མ་ཐལ་བྱུང་ཅི་ཡང་མིན། །ཡོད་མིན་མེད་མིན་འགགས་པ་མེད། །སྐྱེ་བ་མེད་ལ་འོང་བ་མེད། །འགྲོ་བ་མེད་ལ་ཐ་དད་མེད། །གཅིག་ཏུ་ཁས་ལེན་མེད་པ་སྟེ། །སྤྲོས་པ་བྲལ་བའི་གནད་ཀྱིས་སུ། །རྣམ་ཐར་སྟོང་པ་ཉིད་ཀྱི་སྒོ། །ཚིག་དཔེ་དོན་གྱིས་མི་མཚོན་པས། །རྣམ་ཐར་མཚན་མ་མེད་པའི་སྒོ། །འདི་རུ་རང་སར་གདིང་ཐོབ་ལས། །འབྲས་བུ་ཡིད་སྨོན་མེད་པའི་ཕྱིར། །རྣམ་ཐར་སྨོན་པ་མེད་པའི་སྒོ། །མཚན་ཉིད་འདི་རྣམས་ཤེས་པ་གནད། །གནས་ལུགས་འདི་ཤེས་ཤེས་རབ་མིག །རྫོགས་ཆེན་ཡིན་ལུགས་ཤེས་པ་ལམ། །ཤེས་ནས་གྲོལ་བ་ཐོབ་པ་གལ། །སངས་རྒྱས་གཅིག་ཆར་མ་རྟོགས་པར། །ལུས་ངག་རིག་པ་སོར་བཞག་པས། །མཉམ་བཞག་གནད་དུ་མ་བསྣུན་ན། །ལྟ་བ་མཐོ་མཐོའི་ང་རྒྱལ་གྱིས། །འཆི་ཁ་ཐ་མལ་ལུས་ན་མཚང་། །འགྲོ་འདུག་ཟ་ཉལ་ལབ་མོའི་དུས། །རྗེས་ཐོབ་རིག་པའི་གདིང་དང་འགྲོགས། །མཉམ་རྗེས་ཁྱད་མེད་ཟེར་བ་ཡི། །སྟོང་སྐད་ཧད་པོ་འུག་སྐད་མཐོས། །རང་ཕུང་རང་མགོ་བསྐོར་ལ་ལྟོས། །བཅོམ་ལྡན་ཐུབ་པའི་དབང་པོས་ཀྱང་། །ནཻ་རཉྫ་ནར་དགོངས་པ་མཛད། །ཨོ་རྒྱན་ཆོས་ཀྱི་རྒྱལ་པོ་སོགས། །རྒྱ་བོད་པཎ་གྲུབ་དག་གིས་ཀྱང་། །ཚེ་གཅིག་མཉམ་བཞག་རྩལ་བཏོན་ན། །འུ་ཅག་ཨ་རེ་ལྟ་ཅི་སྨོས། །གསང་སྔགས་རྡོ་རྗེའི་ཐེག་པ་ནི། །མིང་བཞིན་དོན་མ་འཛོལ་བའི་ཕྱིར། །ལྟ་བ་ཁ་འབྱམས་མི་བྱེད་གནད། །རྫོགས་པ་ཆེན་པོའི་དོན་རྟོགས་པའི། །རྣལ་འབྱོར་ངེས་པ་འདྲ་མཆིས་ན། །ཨོ་རྒྱན་རྗེ་དང་འགྲན་ཐལ་བདེན། །རང་གི་རྒྱུད་ལ་བློས་གཞིག་ནས། །སྐྱོན་དང་ཡོན་ཏན་གཉིས་ཀར་བརྟགས། །ཤེས་རྒྱུད་སྔར་ལས་མི་འཕགས་ན། །གོ་ས་མཐོན་པོར་མི་རློམ་གལ། །འདི་ཕྱི་གཉིས་ཕུང་དཀོར་གྱིས་ནོར། །ཟ་ཚོད་རན་ཚོད་ཙམ་དེ་ལས། །གསོག་འཇོག་བློ་ཡིད་ཚིམ་དུས་མེད། །ཇེ་རྔམ་ཇེ་མཁོ་རྒྱུན་མི་འཆད། །འཆི་ཁ་བཤན་པའི་གྲལ་དུ་ཉམས། །བསགས་པ་གཞན་གྱིས་སྤྱོད་པའི་དུས། །དྲིན་ལན་ཅི་གཟོ་དྲན་སྲིད་དམ། །དེ་ཕྱིར་རང་མགོ་འདོན་པའི་ཐབས། །ཕོ་རབ་དག་གི་སྤྱོད་པ་སྐྱོངས། །བསགས་པ་ཨ་བྲའི་ལད་མོ་བཞིན། །གཏད་སོ་མེད་པའི་ཉུག་ཉུག་པོ། །ཆོག་ཤེས་ནམ་ཙམ་དུས་སུ་འོང་། །འཆི་བའི་དུས་ཚིགས་ནམ་ཞིག་ཡིན། །ཤེས་སམ་དཔྱོད་ལྡན་དག་གིས་དཔྱོད། །ཚོང་དང་ཁེ་སྤོག་གཡོ་སྒྱུའི་ལས། །སྲིན་བུའི་ཁ་ཆུ་ཅི་བཞིན་དུ། །བླ་བཙུན་འགའ་ཞིག་འདིས་རང་འཆིང་། །ཞེ་སྡང་ཁེ་དྲག་འགྲན་སེམས་དང་། །གཞན་གསོད་ཕྱིར་ན་རང་རྒྱལ་ཚོལ། །གཞན་ལས་འཕགས་ཕྱིར་སྐྱེས་འགྲན་དང་། །གཞན་ལ་རྒོལ་ཕྱིར་རང་ཕུང་བའི། །ལས་ཀ་འདི་དག་མཁས་པས་སྤོངས། །སྒོམ་ཆེན་སྐྱོན་ཡོན་སྤྱོད་པས་སྟོན། །རྟོགས་ལྡན་ཆོས་འཚོལ་རྫུན་གྱི་ཕུག །ཡུལ་ལ་མངོན་ཞེན་རློམ་པ་རྫོབ། །སྒོམ་ཆེན་རང་ཚད་རྨི་སྣང་འཆར། །རབ་ཀྱིས་རྨི་ལམ་དབྱིངས་སུ་ནུབ། །འོད་གསལ་ཁོར་ཡུག་འདྲེས་པ་ཡིན། །འབྲིང་གིས་རྨི་ལམ་ཉིད་དུ་ཤེས། །སྤྲུལ་བསྒྱུར་ལ་སོགས་དབང་འབྱོར་སྲིད། །ཐ་མས་ཕྱིར་ལྟས་མངོན་པའི་ཕྱིར། །བཟང་པོ་དག་ལས་རྨི་མི་སྲིད། །འདི་དག་ཚད་དུ་འབྱུང་སྟེ་གདའ། །ཅིའི་ཕྱིར་དེ་དག་བསྙད་ཅེ་ན། །སྒོམ་སྒྲུབ་བྱེད་ཚུལ་ཚད་བཅས་པ། །མདོར་འདུས་ཕྱིར་ན་དྲིལ་དུ་བསྙད། །ཆགས་དང་སྡང་བའི་སེམས་ཀྱིས་མིན། །སྐྱོན་ཡོན་རུ་ཤན་འབྱེད་དུ་ཡོད། །སེམས་རིག་དབྱེ་བའི་གནད་ཕྱིར་ཚུལ། །མ་ནོར་ཡང་དག་ཉིད་དུ་བསྟན། །གེགས་དང་གོལ་སྒྲིབ་རྨེན་བསལ་ནས། །གདམས་ངག་གཙང་མའི་ཚུལ་དུ་བསྟན། །མགོ་འཇུག་གོ་ལོག་བསྡེབ་ཏུ་མེད། །ལམ་གྱི་གེགས་སྐྱོན་ཞར་ལ་བྱུང་། །དེ་ཡིས་ཐོག་མཐའ་ཐམས་ཅད་རྫོགས། །རྣལ་འབྱོར་ལྟ་བའི་གདིང་ཐོབ་དག །བཟང་ངན་རྐྱེན་གྱིས་རྒྱུད་མི་བསླུ། །རེ་དོགས་བཟང་ངན་མེད་གདིང་རྙེད། །ཡུལ་ནས་ཡུལ་དུ་མ་ཡིན་ཏེ། །རིག་པ་རང་སར་གདིང་ཐོབ་གྲོལ། །ཀུན་རྫོབ་ཆོས་ཀུན་རིག་པར་སངས། །བདེན་གཉིས་གཅིག་ཆར་མཉམ་གྲོལ་ཏེ། །བླུན་པོས་སྤང་ལེན་མི་འདོམས་ཀྱང་། །རྐྱེན་ཕྱིར་རྒྱུ་རུ་འདུས་ཕྱིར་རོ། །འཁོར་འདས་གཉིས་བསྒྲུབ་རིག་མ་ཡིན། །སྣང་བ་ཚོགས་བརྒྱད་ཡུལ་སེམས་བཅས། །གདོད་མའི་ལྷུམས་སུ་རང་སད་མཉམ། །འཁོར་འདས་སོ་སོར་འགྲོ་སྡོད་མིན། །རྨི་ལམ་སད་པ་དཔེ་རུ་གདའ། །ཀུན་རྫོབ་འཁྲུལ་ངོར་རང་བདེན་ཏེ། །དོན་དམ་རང་ངོར་ཀ་དག་བདེན། །གཉིས་མེད་ངོ་བོ་ཉིད་དུ་མཉམ། །གཅིག་ལས་གཉིས་སུ་འཛིན་པ་འཁྲུལ། །གཟུང་འཛིན་མདུད་རྒྱ་ཁྲོལ་བའི་ཚེ། །ལྷུན་གྲུབ་སྣང་ཆ་དག་པ་དེ། །སྐུ་དང་ཞིང་ཁམས་དག་ཏུ་འདོད། །སྐུ་དང་ཞིང་ཁམས་བྱ་བ་ཡང་། །ཡུལ་དང་གཟུགས་སུ་བལྟ་བ་ནི། །དོན་དམ་པ་ཡིས་འཁྲུལ་པ་ཆེ། །ངན་སོང་འཁོར་བའི་གནས་ཡུལ་དུ་། །འགྲོ་བའི་གཅེར་བུ་མགོན་མེད་དེ། །རྒྱུ་རྐྱེན་གང་གིས་གཟུགས་སུ་བྱས། །གཟུགས་མེད་པས་ན་ཅིས་སྡུག་བསྔལ། །འདི་ནི་འཁྲུལ་སྣང་རང་ལ་བཟླ། །སྔར་མྱོང་བདེ་སྡུག་གང་དུ་ཐལ། །ཁྱོད་བདེན་པས་ན་ཉམས་ཟུང་ཟད། །དེ་ཕྱིར་འཁྲུལ་པ་ཞིག་པའི་ཤུལ། །རྒྱུ་འབྲས་དཀར་ནག་སུ་ཡིས་ལེན། །རྒྱུ་བསྒྲུབ་འབྲས་བུ་ཐོབ་ཏུ་མེད། །རང་སར་གདིང་ཐོབ་ཆེད་དུ་འོང་། །འཁྲུལ་རྒྱུའི་ས་བོན་ཞིག་པ་ན། །སངས་རྒྱས་སེམས་ཅན་མེད་པར་ཧར། །དགེ་དང་སྡིག་པ་མེད་པར་མཉམ། །བཟང་དང་ངན་པ་མེད་པར་སངས། །ང་དང་ཕ་ཀི་གཉིས་ཀ་ཟད། །ཕན་གནོད་བྱ་བའི་ཉེར་ལེན་ཞིག །ལུས་ནི་མི་རོ་རྟོག་མེད་བཞིན། །གཅེས་པར་འཛིན་པའི་རྟོག་པ་མེད། །ངག་ནི་བྲག་ཆ་དཔྱོད་མེད་ལྟར། །རང་བྱུང་ཉིད་དུ་རང་སྒྲ་སྒྲོགས། །སེམས་ནི་གདོད་མའི་ལྷུམས་ཞུགས་པས། །འདུས་བྱས་ཆོས་ཀུན་དབྱིངས་སུ་ཡལ། །དག་ན་ལུས་སེམས་དབྱེར་མེད་དུ། །གཞོན་ནུ་བུམ་སྐུར་ཡང་དག་རྫོགས། །ཞིག་ན་རྡུལ་ཕྲན་ངང་དུ་དེངས། །འཕོ་ན་ལྟོས་པ་ཆུང་དུ་ཞ། །དེ་ལྟར་གྲོལ་བའི་སངས་རྒྱས་ཀྱིས། །ཉིད་ཀྱིས་ངང་ལས་སྟོན་པ་མིན། །གདངས་རྩལ་ཉིད་ཀྱིས་གདུལ་བྱ་འདུལ། །སྐུ་གསུམ་ལྷུན་གྲུབ་ངང་རང་བྱུང་། །གསུམ་དུ་མ་ཡིན་ཐ་མི་དད། །དཔེར་ན་ཟླ་བ་ཆུ་ཟླ་མིན། །ཆུ་ཟླ་ཟླ་བ་ཆུ་ཡང་མིན། །ཟླ་བ་མེད་ན་ཡང་མེད་བཞིན། །དེ་བཞིན་ཆོས་སྐུ་སྟོན་པ་མིན། །སྟོན་པ་ཆོས་ཀྱི་སྐུ་ཡང་མིན། །ཆོས་སྐུ་མེད་ལས་བྱུང་ཡང་མིན། །གཅིག་དང་སོ་སོ་གཉིས་ལས་འདས། །དེ་ནི་གྲོལ་བའི་ཚུལ་མདོར་བསྡུས། །རྣལ་འབྱོར་རྣམས་ཀྱི་ཐུགས་སུ་ཆུབ། །ཐམས་ཅད་ཕྱམ་གཅིག་སངས་རྒྱས་ཤོག །ཨྠིྀ། ཞེས་པ་འདི་སྤྲང་སྨྱོན་འཆོལ་པོ་སེམས་ཉིད་ཧད་པོས་རང་བྱུང་གི་ངོར་བྲིས་པ་ཡོངས་སུ་དགེ་བར་གྱུར་ཅིག །བཀྲིས་ཤོག། །།