ཨོ་རྒྱན་མཚོ་སྐྱེས་རྡོ་རྗེས་སོགས་སྟོང་གསལ་ལ་གདམས་པ།

Previous Text Back to Volume Page Next Text

Wylie title	o rgyan mtsho skyes rdo rjes sogs stong gsal la gdams pa
Location	bdud 'joms gling pa zab gter Volume 18, Text 100, Pages 383-384 (Folios 192a1 to 192b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. O rgyan mtsho skyes rdo rjes sogs stong gsal la gdams pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 383-384. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams
Colophon	དད་ལྡན་སྟོང་གསལ་གྱི་ངོར་བདུད་འཇོམས་རྡོ་རྗེས་སྨྲས་པ་དགེའོ།།
Colophon	dad ldan stong gsal gyi ngor bdud 'joms rdo rjes smras pa dge'o//

[edit]

༄༅། །ཨོ་རྒྱན་མཚོ་སྐྱེས་རྡོ་རྗེས་སྐྱོངས། །སངས་རྒྱས་དང་ནི་སངས་རྒྱས་ཞིང་། །ཡེ་ཤེས་སྒྱུ་འཕྲུལ་རོལ་པའི་ལྷ། །བདེ་གཤེགས་སྙིང་པོའི་ལྷུན་གྲུབ་རྩལ། །ཡེ་ཤེས་ཉི་མ་གསལ་བའི་གདངས། །མ་རིག་སྤྲིན་གྱིས་བསྒྲིབ་པ་ལས། །གཟུང་འཛིན་རྣམ་རྟོག་བག་ཆགས་འཐས། །འདི་སྣང་སྤྱི་སྣང་རྨི་ལམ་སྣང་། །སྣོད་བཅུད་འདོད་ཡོན་སྣང་བ་ཀུན། །རྟེན་འབྲེལ་སྒྱུ་མ་ལྟ་བུར་སྣང་། །རྒྱུ་རྐྱེན་འཕྲད་པའི་ཆོ་འཕྲུལ་ཤར་། །གཏིང་དཔག་ཚུལ་བཞིན་ཤེས་པ་ནི། །ལྟ་བའི་རྒྱལ་པོ་ལྷུན་གྱིས་གྲུབ། །ཐམས་ཅད་སྟོང་ཉིད་ཆེན་པོ་རུ། །འུབ་ཆུབ་རོལ་པ་ནམ་མཁའི་ངང་། །སྤྲོས་བྲལ་ནམ་མཁའ་རྣམ་དག་གི། །དབྱིངས་ཉིད་མངོན་བྱེད་སྒོམ་པ་སྟེ། །སྒོམ་པ་མ་བཅོས་ཅོག་བཞག་ཡིན། །ཆོས་ཉིད་ཟད་སར་མ་འཁྱོལ་བར། །སྤྱོད་ཕྱོགས་ལྟ་བ་མི་འཆོར་ཞིང་། །ལྟ་ཕྱོགས་སྤྱོད་པ་མི་འཆོལ་བ། །ལྟ་བའི་སྟངས་མ་ཤོར་བ་སྟེ། །སྒོམ་པའི་གདིང་མ་འཆུག་པ་དང་། །སྤྱོད་པ་བག་མེད་དབང་མ་ཤོར། །ཉམས་ལེན་གནད་དུ་བསྣུན་པ་ནི། །སྤྱོད་པའི་རྒྱལ་པོར་ལྷུན་གྱིས་གྲུབ། །དེ་ལྟར་ཁྲེགས་ཆོད་རྣལ་དབབ་ནས། །མྱུར་ལམ་སྒྲོན་དྲུག་ལ་བརྟེན་ཏེ། །སྣང་བཞི་མཐར་ཕྱིན་ས་རུ་སྐྱོལ། །དེ་ལྟར་རྣལ་འབྱོར་དམ་པའི་ལ། །ཚུལ་བཞིན་ཉམས་སུ་ལེན་པའི་མི། །མངོན་སངས་རྒྱས་པར་གདོན་མི་ཟ། །གདམས་ངག་མཆོག་ནི་དེ་ལས་མེད། །དད་ལྡན་སྟོང་གསལ་གྱི་ངོར་བདུད་འཇོམས་རྡོ་རྗེས་སྨྲས་པ་དགེའོ།། །།