DUDJOM-THROMA-069

བརྡ་ཡིག་༠༠༠༠༠༠༣༠༣༔ དག་སྣང་ལས༔ གསང་བ་ཐབས་ཀྱི་གནད་ཐིག་བཞུགས་སོ༔ རང་གི་སྤྱི་བོར་པད་ཟླའི་སྟེང་༔ རྡོ་རྗེ་བླ་མ་པདྨ་འབྱུང་༔ དཀར་དམར་མདངས་ལྡན་མཚན་དཔེས་སྤྲས༔ བཅུ་དྲུག་གཞོན་ནུ་ཞི་མ་ཁྲོ༔ པད་ཞྭ་བེར་ཕྱམ་ཆོས་གོས་གསོལ༔ ཕྱག་གཡས་རྡོ་རྗེ་གཡོན་བྷནྡྷ༔ ཞབས་གཉིས་རྒྱལ་པོ་རོལ་སྟབས་བཞུགས༔ འོད་དང་འཇའ་ཚོན་ཀློང་དུ་གསལ༔ མེ་ལོང་ནང་གི་གཟུགས་བརྙན་བཞིན༔ དྭངས་གསལ་སྐུ་ཡི་ཆ་རྣམས་ལ༔ བརྒྱུད་གསུམ་རིག་འཛིན་བླ་མ་རྫོགས༔ ཧཱུྃ་ཧྲཱིཿསྐྱབས་གནས་ཀུན་འདུས་ངོ་བོ་ཨོ་རྒྱན་རྗེ༔ མཁྱེན་བརྩེ་ནུས་པའི་བདག་ཉིད་རིན་པོ་ཆེ༔ ལྔ་བརྒྱ་སྙིགས་མའི་འགྲོ་ལ་ཐུགས་རྗེས་གཟིགས༔ ལས་དང་ཉོན་མོངས་དྲག་པོས་གདུང་བ་ཡི༔ བདག་སོགས་ཁྱེད་ཀྱི་རྗེས་འཇུག་བརྒྱུད་འཛིན་རྣམས༔ ཐུགས་རྗེས་ཡལ་བར་དོར་ན་སུ་ལ་རེ༔ ཀྱེ་མ་ཀྱེ་ཧུད་སྐྱབས་མགོན་ཐུགས་རྗེ་ཅན༔ ཚེ་ལུས་འདི་ལ་རྗེས་སུ་མ་བཟུང་ན༔ སྐྱེ་གནས་གཞན་དུ་འཕོས་ཚེ་ཅི་ཞིག་བྱ༔ བདག་སོགས་བརྒྱུད་འཛིན་ཐུགས་རྗེས་དོར་བ་ན༔ རྫོགས་སངས་རྒྱས་པའི་དགོས་པ་ཅི་ཞིག་མཆིས༔ བདག་ཉིད་དད་གུས་མོས་པའི་གདུང་ཤུགས་ཀྱིས༔ གསོལ་འདེབས་འོ་དོད་འབོད་དོ་པདྨ་འབྱུང་༔ སྒོ་གསུམ་མི་ཕྱེད་དད་པས་ཁྱེད་ལ་འདུད༔ ཐུགས་རྗེས་ཟུངས་ཤིག་ཨོ་རྒྱན་རིན་པོ་ཆེ༔ བྱིན་གྱིས་རློབས་ཤིག་བླ་མ་སྤྲུལ་པའི་སྐུ༔ ལུས་ལ་བདེ་བ་སྤོར་ཅིག་མཁའ་འགྲོའི་ཚོགས༔ ངག་ལ་ནུས་པ་སྐྱེད་ཅིག་ཡི་དམ་ལྷ༔ སེམས་ལ་རྟོགས་པ་སྤོར་ཅིག་གུ་རུ་རྗེ༔ སྒྲུབ་པའི་རྣལ་འབྱོར་བདག་ལ་བྱིན་ཆེན་ཕོབ༔ ལུས་ལ་འགྱུར་མེད་སྐུ་ཡི་བྱིན་ཕོབ་ཅིག༔ ངག་ལ་ཚངས་དབྱངས་གསུང་གི་བྱིན་ཕོབ་ཅིག༔ སེམས་ལ་འཁྲུལ་མེད་ཐུགས་ཀྱི་བྱིན་ཕོབ་ཅིག༔ ཡོན་ཏན་འགྲན་ཟླ་བྲལ་བའི་བྱིན་ཕོབ་ཅིག༔ ཕྲིན་ལས་འགྲོ་འདུལ་རྣམ་བཞིའི་བྱིན་ཕོབ་ཅིག༔ མཆོག་དང་ཐུན་མོང་དངོས་གྲུབ་བྱིན་ཕོབ་ཅིག༔ ཡེ་ཤེས་སྒྱུ་མའི་སྐུ་རུ་བྱིན་གྱིས་རློབས༔ འཇའ་ལུས་འཕོ་བ་ཆེན་པོའི་ས་རུ་དྲོངས༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་ཛཿཀཱ་ཡ་ཛྙཱ་ན་མ་ཧཱ་ས་མ་ཏི་ཨ་ཝེ་ཤ་ཡ་ཨ་ཨ༔ དེ་དག་རྣམས་ཀྱི་དབང་བྱིན་རླབས༔ འཇའ་ཡི་སྤྲིན་ཕུང་འཐིབ་བཞིན་བྱུང་༔ རང་ལུས་ཕུང་ཁམས་སྐྱེ་མཆེད་དང་༔ སྣོད་བཅུད་སྣང་བ་ཐམས་ཅད་ཀུན༔ ཆོས་ཉིད་སྟོང་པའི་མཁའ་རུ་ཞིག༔ ༈སྟོང་ཉིད་ངང་ལས་སྐད་ཅིག་གིས༔ མཁའ་ལ་འཇའ་ཚོན་ཤར་བ་བཞིན༔ སྣང་བ་ཐམས་ཅད་མཁའ་སྤྱོད་ཞིང་༔ སྲིད་པ་དག་མཉམ་འོད་དུ་སྣང་༔ དེ་དབུས་སྣ་ཚོགས་པདྨ་དང་༔ ཉི་ཟླའི་གདན་སྟེང་འཇའ་འོད་ཀློང་༔ རང་ཉིད་ཡེ་ཤེས་མཁའ་འགྲོ་མ༔ ཁྲོས་མ་མཐིང་ནག་གྲི་ཐོད་ཅན༔ གཞོན་ཚུལ་མཚན་དཔེ་ལང་ཚོ་འབར༔ སྤྱན་གསུམ་ནམ་མཁའི་མཐོང་ལ་གཟིགས༔ སྐུ་དང་ཡེ་ཤེས་མངོན་དུ་བྱེད༔ ཞི་མ་ཁྲོ་འཛུམ་འོད་ཕུང་འབར༔ ནུ་མ་འབུར་ཞིང་པདྨོ་རྒྱས༔ ཁ་ཊྭཱྃ་དཀུར་བརྟེན་གར་སྟབས་བཞུགས༔ གཅེར་བུ་རུས་པའི་རྒྱན་གྱིས་སྤྲས༔ དབུ་སྐྲ་ལྗང་སྔོན་ལན་ཚར་ཅན༔ སྐུ་ཀློང་དྭངས་གསལ་ཆེན་པོའི་དབྱིངས༔ དུས་གསུམ་སངས་རྒྱས་ཡོངས་སུ་རྫོགས༔ སྐུ་ཡི་འོད་དང་འོད་ཟེར་གྱིས༔ ཁམས་གསུམ་འཁོར་བའི་སྣོད་བཅུད་ཀུན༔ སྐུ་དང་ཡེ་ཤེས་རོལ་པ་ཆེར༔ ཡེ་བབ་མངོན་བྱས་རྫོགས་སངས་རྒྱས༔ ཞེས་བརྗོད་པའི་ཚེ་བདག་དང་སྣང་བ་ཐམས་ཅད་འོད་གསལ་ཆོས་ཉིད་ཀྱི་རོལ་པར་ཞིག་ནས་སྐུ་དང་ཡེ་ཤེས་ཆེན་པོར་འབྱམས་ཀླས་པར་བཞག་སྟེ་དབྱིངས་རིག་མི་འགྱུར་བའི་ངང་དུ་ཆམ་བརྡལ་ཡན༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་རང་སློབ་དམ་པ་མི་བསྐྱོད་རྡོ་རྗེས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ།།།།