DUDJOM-THROMA-082

༄༅།།ན་མོ་གུ་རུ་ཛྙཱ་ན་ཌཱཀྐི་ནཱི་ཡེ།འདིར་ལུས་གདོན་མཁའ་འགྲོའི་ཞལ་བསྟབ་བམ་བསྟབ་པ་ཆ་བཅུར་གྲགས་པ་ཉིད་བྱ་བ་ལ།ནད་པའི་མདུན་དུ་འཕྱར་བ་ལྟ་བུའི་གཞི་གདན་བཏིང་བའི་དབུས་སུ་བམ་གཟུགས་ནད་པ་ཕོ་མོ་གང་ཡིན་གྱི་རྟགས་ཅན་ཆེ་བརྗིད་སྐྱེ་མཆེད་ཚང་བ་གན་རྐྱལ་དུ་བཞགདེའི་མཐའ་བསྐོར་གྱི་ཕྱོགས་བཞི་མཚམས་བཞི་དང་།སྟེང་དང་འོག་གཉིས་ཤར་ནུབ་ཀྱི་ཕྱི་ངོས་སུ་རྩིས་པར་དམར་གཏོར་གྲི་རིས་ཅན་མཛུབ་གང་བ་བཅུ་ཁ་ནང་བསྟན་དུ་འཇོག་ཅིང་།དེ་རེ་རེའི་རྒྱབ་ཏུ་ཆངས་བུ་རེ་དང་ཤ་དུམ་རེ་བཅས་བཀོད་ལ།ལྷ་འདྲེའི་ཚིག་ལོག་འདྲིལ་བ་ལྟར།ཕཊཊཊ༔ རང་ཉིད་སྐད་ཅིག་གིས་སོགས་གཡང་གཞི་བྲབ་པ་ལན་གསུམ་ནས།གྱིས་ཤིག༔ ཕཊཊཊ༔ དབང་སྡུད་ཟིལ་གནོན།ཕཊཊཊ༔ སྟོང་གསུམ་གྱི་སོགས།རྐང་གསུམ་ཌཱ་དྲིལ་འུར་ཆེམས་ཀྱིས།ཕཊ༔ མ་དབུས་ཕྱོགས་སོགས་མཐར་ཌཱ་བཅད་དེ།ཕཊ༔ ཡེ་གཞི་ཀ་དག་སོགས་ནས།དགོངས་པར་རོལ༔ ཅེས་ཌཱ་འུར་བཞག་ཐབས།བསྟབ་པ་གཞུང་གི་ཕཊ༔ རང་དང་བསྲུང་བྱའི་སོགས་ནས་འགུགས་གཞུག་ལ་རྐང་གསུམ་ཌཱ་འུར་ཉིས་བཅད།འགུགས་གཞུག་མང་ཉུང་དོ་གལ་དང་བསྟུན་ཅིང་ཉེར་གཅིག་གི་ཚེ་བདུན་རེའི་མཚམས་སུ་ཌཱ་རེ།འགུགས་པ་གྲུབ་ནས་བམ་རོ་བསིལ་ཏེ།མགོ་བོ་ཤར་གྱི་ཤར།ལག་གཡས་ཤར།ལག་གཡོན་ལྷོ།རྐང་གཡོན་ནུབ།རྐང་གཡས་བྱང་།ཁོག་སྟོད་ཕྱེད་བཤག་བཏང་བའི་རྩིབ་གཡས་ཤར་ལྷོ།ནུ་མའི་འོག་ནས་ལྟེ་བའི་བར་བཅད་པ་ནམ་མཚུངས་ལྷོ་ནུབ།རྩིབ་གཡོན་ནུབ་བྱང་།ལྟེ་བ་མན་གྱི་སྨད་སྡེབ་རྒྱབ་ཕྱོགས་ཚང་ར་བྱང་ཤར།དེའི་མདུན་ཕྱོགས་ཟུར་དུ་དབྱེ་བ་ནང་རོལ་ནུབ་ཏུ་བཀོད་ལ།རྐང་བཞི་ཌཱ་འུར་སྤྱན་འདྲེན་རྟས།ཕཊ༔ མ་དབུས་ཕྱོགས་སོགས།བར་ཆད་སོལ།ཕཊཊཊ༔ ཅེས་ཌཱ་འུར་བཞག་ཕྱེད།མཆོད་གཡོག་གིས་ཐེབ་རྩེར་མགོ་བོ་བཤམས་པ་བཏེགས་ལ།ཁྲོས་ཆུང་རྟས།བསྲུང་བྱའི་ལས་དང་སོགས།ཞལ་དུ་བསྟབ༔ ཕཊཊཊ༔ ཅེས་ཕྱི་རོལ་གྱི་སྟེང་ཕྱོགས་སུ་འབུལ།གཏོར་མ་བཏེགས་ལ།གཏི་མུག་ལས་བྱུང་སོགས་ཀྱིས་གོང་གི་ཕྱོགས་སུ་ཕུལ།ཆངས་བུ་ཤ་དུམ་ཐོགས་ལ།གཏི་མུག་ལས་བྱུང་སོགས་ཀྱིས་གོང་ཕྱོགས་སུ་འཐོར།ཚོགས་བསྲེའི་རྟས།ནད་རྣམས་ལྷ་འདྲེའི་སོགས།ཆེན་པོར་ཡན༔ ཕཊཊཊ༔ ཡང་རྐང་གསུམ་ཌཱ་འུར་བཅས།ཕཊ༔ ཤར་ཕྱོགས་དྲག་ཁྲོས་སོགས་ནས་འོག་ཕྱོགས་ཀྱི་བར་འདོན་ལུགས་གོང་དང་འདྲ་བས་ཕྱོགས་མཚམས་རྣམས་སོ་སོའི་ཐད་དང་འོག་གི་བསྟབ་པ་ནུབ་ཕྱོགས་སུ་འབུལ་ཚུལ་མ་ནོར་བར་བྱ།མཐར་ཌཱ་འུར་ཟིལ་གནོན་རྟས།ནད་པའི་བླ་ཚེ་སོགས་ནས།ཉིད་དུ་བཞག༔ ཕཊ་ཕཊ་ཕཊ༔ ཅེས་ཌཱ་བཅད།འདིར་སྤྲོ་ན།ཆོས་ཉིད་སྒྱུ་མ་ལྟ་བུ་སོགས་སྦྱོར་བའམ།གང་ལྟར་ཡང་།ན་མོ།ཆོས་རྣམས་ཐམས་ཅད་སོགས་ལུས་སྦྱིན་མཐའ་སྡུད་བསྔོ་སྨོན་གྱིས་བསྡུས་ལ་བཀྲ་ཤིས་ཇི་ལྟར་རིགས་པ་བརྗོད་པས་གྲུབ་བོ།།ཞེས་པའང་བློ་དམན་མགོ་མི་འཁོར་བའི་ཆ་རྐྱེན་དུ་ཛྙཱ་ནས་སོ།།དགེའོ།།།།