DUDJOM-THROMA-086

༄༅།།ཁྲོས་མའི་གཏོར་མའི་ཟིན་བྲིས་ལ།རྩ་གཏོར་ནི།པད་སྣོད་དུ་གདན་ཆོས་འབྱུང་བསྣོལ་མའི་ཁར་དམར་གཏོར་གྲུ་གསུམ་རྩེ་ཟླུམ་ལྟོ་བའི་རི་མོར་ཐོད་སྐམ་གྱི་ཕྲེང་བ་དང་རྩེ་རྒྱན་མེ་རིའི་ལྟེ་བར་པད་ཚོམ་ཕག་ཞལ་གྱིས་མཚན་པ།མཐའ་སྐོར་ཕྱོགས་མཚམས་བརྒྱད་ལ་དམར་གཏོར་གཙོ་མོའི་ཕྱེད་ཆར་སླེབས་པ་བརྒྱད།དེ་མཐར་ཕྱོགས་བཞིར་དེས་ཀྱང་ཕྱེད་ཆས་དམན་པ་བཞི།དེ་མཐར་མདུན་དུ་དཀར་གཏོར་རིལ་བུ་བཞི་སྒྲོམ་ཅན།གཡས་སུ་དམར་གཏོར་རྩེ་ཟླུམ།རྒྱབ་ཏུ་གྲུ་གསུམ་གཡོན་གཅུས།གཡོན་དུ་དམར་གཏོར་རྩེ་བཅད།བར་མཚམས་རྣམས་སུ་མཐེབ་ཀྱུ་བརྒྱ་རྩ་སོགས་གང་མང་གིས་གཏམས་པར་དར་གདུགས་མཐིང་ནག་འཕུར་ལྡིང་གཡོ་བས་མཛེས་པར་བྱ།འདི་ཉིད་སྒྲུབ་གཏོར་རྒྱས་པའི་ཕྱོགས་ཡིན་ལ།རྒྱུན་གྱི་ཚོགས་མཆོད་སོགས་ལ་གཙོ་འཁོར་ལྔ་པ་ཁོ་ནས་འཐུས།སྲོག་བདག་རྣམ་བཞིའི་འབུལ་གཏོར་གོང་དང་འདྲ་ཞིང་།གཟའ་གཏོར་ནི།ལྕགས་འཁོར་རྩིབས་བརྒྱད་སྟེང་དམར་གཏོར་གཡས་གཅུས་ཀྱི་ལྟོ་བར་ཞལ་དང་སྤྱན་གྱིས་མཚན་ཅིང་སྟོད་ཆར་ཧཱུྃ་སྔོན་དང་རྩེ་མོར་མེ་རི་འབར་བས་བརྒྱན་པ།མདུན་དང་ཟུར་གསུམ་ལ་མཐེབ་ཀྱུ་རེ།རྩིབས་བརྒྱད་སྟེང་འཁོར་རང་འདྲ་ཕྱེད་ཆར་སླེབས་པ་བརྒྱད།རྩིབས་མཆན་བརྒྱད་ལ་གཏོར་ཆུང་བརྒྱད།མཐའ་སྐོར་མཐེབ་ཀྱུ་ཉེར་བརྒྱད་ཀྱིས་བསྐོར་ལ་དར་གདུགས་དམར་པོ་དབུབ།བསྐུལ་གཏོར་དམར་གཏོར་མཐེབ་ཀྱུ་ཅན༔ ཆད་མདོའི་གཏོར་མ་བྲ་གཟུགས་ལོགས་གསུམ་ལ་མཐེབ་ཀྱུ་རེ།བརྟན་གཏོར་དམར་གཏོར་དཔུང་རང་ལོགས་རེར་མཐེབ་ཀྱུ་བཞི་རེ་བརྩེགས་པ།༈སྨད་ལས་འདུལ་གྱི་ཟོར་གཏོར་ནི།ལྕགས་སྣོད་སོགས་སུ་གཙོ་མོའི་ཟོར་གཏོར་ཁྲུ་གང་བ།མཐའ་བསྐོར་ཕྱོགས་མཚམས་བརྒྱད་དང་ཕྱིའི་ཕྱོགས་བཞི་བཅས་སུ་འཁོར་བཅུ་གཉིས་པོ་མཐོ་ཚད་རེ།དབང་མོ་ཉེར་བརྒྱད་ཐུན་མོང་དུ་གཅིག་དང་།ཆོས་སྐྱོང་སྤྱིའི་གཏོར་ཟོར་གཅིག་བཅས།ཐམས་ཅད་ཀྱང་དམར་གཏོར་ཐོག་མདེལ་གྱི་དབྱིབས་ཅན་སོ་སོར་རྩང་དམར་རྒྱུ་རློན་མཚེ་ཡུངས་མེ་རི་སོགས་དྲག་རྒྱན་རྔམས་བརྗིད་ཅན་བྱ།ཟོར་ཀོང་གྲུ་གསུམ་དགུའི་ནང་དུ་ཕུར་པ།ཡུངས་དཀར།ཁྲག།མཚེ།དུགགྲི།མདའ།རྡོ།དམར་གཏོར་བཅས་བླུགས་ལ་འགོད་དོ།།