དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་སྨད་ཀྱི་ཕྲིན་ལས་ལ་ཉེ་བར་མཁོ་བ་བཅས་ཀྱི་རྣམ་བཞག་རྨོངས་པའི་མིག་འབྱེད་གནད་ཀྱི་གསེར་ཐུར།

Previous Text Back to Volume Page Next Text

Wylie title	dpal rdo rje phur bu bdud 'joms gnam lcags spu gri'i stod smad kyi phrin las la nye bar mkho ba bcas kyi rnam bzhag rmongs pa'i mig 'byed gnad kyi gser thur
Location	bdud 'joms rin po che bka' 'bum Volume 11, Text 3, Pages 19-69 (Folios 1a1 to 26a3)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Dpal rdo rje phur bu bdud 'joms gnam lcags spu gri'i stod smad kyi phrin las la nye bar mkho ba bcas kyi rnam bzhag rmongs pa'i mig 'byed gnad kyi gser thur. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 11: 19-69. Kalimpong: Dupjung Lama, 1979-1985.
Side notes	Recto: bcas shom Verso: gnam lcags spu gri
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Detailed Classification - rnam bzhag
Cycle	དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲི་ (dpal rdo rje phur bu bdud 'joms gnam lcags spu gri)
Parent Cycle	ཐུགས་སྒྲུབ་གསང་བ་རྒྱ་ཅན་ (thugs sgrub gsang ba rgya can)
Deity	rdo rje phur pa
Colophon	།དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་སྨད་ཀྱི་ཕྲིན་ལས་ལ་ཉེ་བར་མཁོ་བ་བཅས་ཀྱི་རྣམ་བཞག་རྨོངས་པའི་མིག་འབྱེད་གནད་ཀྱི་གསེར་ཐུར་ཞེས་བྱ་བ་འདི་ནི། རྗེས་སུ་འཇུག་པའི་སྔགས་པ་གསར་བུ་རྣམས་ལ་ཉེ་བར་མཁོ་བའི་ཕྱིར། སྔགས་ཀྱི་བནྡྷེ་རལ་པ་ཅན་འཇིགས་བྲལ་ཡེ་ཤེས་རྡོ་རྗེས་རང་ལོ་སོ་གསུམ་པའི་ཐོག་ཏུ་སོན་པ་འཛིན་བྱེད་ཀྱི་ལོ་སྣྲོན་ཉ་བའི་ཡར་ངོ་རྒྱལ་བ་གཉིས་པར་གྲུབ་པའི་བསྟི་གནས་འཆི་མེད་དགའ་ཚལ་གྱི་སྨན་ལྗོངས་སུ་སྦྱར་བ་སྟེ། འདིས་ཀྱང་ལས་དང་དངོས་གྲུབ་རྒྱ་མཚོ་ཡིད་བཞིན་དུ་འགྲུབ་པའི་རྒྱུར་གྱུར་ཅིག །སརྦ་དཱ་མངྒ་ལཾ།།
Colophon	de ltar dpal rdo rje phur bu bdud 'joms gnam lcags spu gri'i stod smad kyi phrin las la nye bar mkho ba bcas kyi rnam bzhag rmongs pa'i mig 'byed gnad kyi gser thur zhes bya ba 'di ni/___rjes su 'jug pa'i sngags pa gsar bu rnams la nye bar mkho ba'i phyir/___sngags kyi ban+d+he ral pa can 'jigs bral ye shes rdo rjes rang lo so gsum pa'i thog tu son pa 'dzin byed kyi lo snron nya ba'i yar ngo rgyal ba gnyis par grub pa'i bsti gnas 'chi med dga' tshal gyi sman ljongs su sbyar ba ste/___'dis kyang las dang dngos grub rgya mtsho yid bzhin du 'grub pa'i rgyur gyur cig____/sarba dA mang+ga laM//

[edit]

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་སྨད་ཀྱི་ཕྲིན་ལས་ལ་ཉེ་བར་མཁོ་བ་བཅས་ཀྱི་རྣམ་བཞག་རྨོངས་པའི་མིག་འབྱེད་གནད་ཀྱི་གསེར་ཐུར་ཞེས་བྱ་བ་བཞུགས་སོ། །

༄༅། དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་སྨད་ཀྱི་ཕྲིན་ལས་ལ་ཉེ་བར་མཁོ་བ་བཅས་ཀྱི་རྣམ་བཞག་རྨོངས་པའི་མིག་འབྱེད་གནད་ཀྱི་གསེར་ཐུར་ཞེས་བྱ་བ། ཁྱབ་བདག་བླ་མ་བདུད་འདུལ་ཧེ་རུ་ཀའི་ངོ་བོར་བཞུགས་པའི་ཞབས་ལ་ཕྱག་འཚལ་ལོ། །ཤིན་ཏུ་མི་བཟད་གར་དགུའི་ཉམས་ཀྱིས་རྣམ་པར་རོལ་པ་དཔའ་བོའི་སྐུ། །གནག་སྣུམ་རབ་བརྗིད་ཨིནྡྲ་ནཱི་ལའི་རྡུལ་གྱི་ཕུང་པོ་ཡོངས་བརྩེགས་པར། །འབར་བའི་ལང་ཚོ་ཉིན་མོར་བྱེད་པ་བྱེ་བས་འཁྱུད་ལྟའི་གཟི་བྱིན་ཅན། །བདུད་འདུལ་ལྷག་པའི་ལྷ་མཆོག་དེ་ཡིས་ཕྲིན་ལས་ནུས་མཐུ་མཐར་འབྱིན་མཛོད། །བསྙེན་སྒྲུབ་ཕྲིན་ལས་རབ་འབྱམས་སྒྲུབ་པའི་སྒོ། ། [2a] མཚན་མའི་བཅས་ཀྱི་རྣམ་པར་བཞག་པ་ནི། །དང་པོའི་ལས་ཅན་རྨོངས་པའི་མིག་འབྱེད་ཕྱིར། །ལག་ལེན་མན་ངག་གནད་ཀྱི་གསེར་ཐུར་སྤྲོ། །དེའང་དཔལ་ཆེན་པོའི་རྣལ་འབྱོར་ཟབ་མོའི་ལམ་ལ་འཇུག་པའི་ཆ་རྐྱེན་ཡོ་བྱད་ཕུན་སུམ་ཚོགས་པའི་ལས་ཀྱི་རིམ་པ་ཇི་སྙེད་ཅིག་རྩ་བའི་རྒྱུད་དང་སྒྲུབ་ཐབས་ཀྱི་གཞུང་རྣམས་སུ་གསུངས་པ་ལས། སྐབས་དོན་ཉེ་བར་མཁོ་བའི་མན་ངག་འགའ་ཞིག་དཀྱུས་གཅིག་ཏུ་འགོད་པ་ལ། ཕུར་པའི་སྤྱི་སྡོམ་ཇོ་མོའི་ཞུས་ལན་ལས། གནད་ཀྱི་རྫས་མེད་དུ་མི་རུང་བ་ནི༔ དཀྱིལ་འཁོར༔ ལྷ་ཕུར༔ གཏོར་ཚོགས༔ བྱུག་བདུག་བརྡེག་གསུམ་༔ རྔ་དང་དུར་ཁྲོད་ཀྱི་རྫས༔ [2b] ལིང་ག་དང་འབྲུབ་ཁུང་རྣམས་མེད་དུ་མི་རུང་བས་ཚང་བར་གཅེས་སོ༔ ཞེས་དོན་ཚན་དྲུག་ཏུ་གསུངས་པ་ལས། དང་པོ་དཀྱིལ་འཁོར་ནི། འདིར་བསྟན་ལྷག་པ་གཟུགས་བརྙན་གྱི་དཀྱིལ་འཁོར་སྟེ། དེ་ལ་འབུར་དུ་གཏོད་པ། ལུགས་སུ་བླུགས་པ། རི་མོར་བྲིས་པ་རྣམས་ལ་བཤད་པས། རབ་གནས་གཟུངས་གཞུག་དང་ལྡན་པའི་དཔལ་ཆེན་གཙོ་འཁོར་གྱི་སྣང་བརྙན། བློས་སློང་གི་དཀྱིལ་འཁོར་སོགས་འཛོམ་ན་མཆོག་དང༌། མ་འཛོམ་ན་དམ་ཚིག་གི་བྲིས་སྐུ་མཚན་ཉིད་དང་ལྡན་པ་དང༌། རྡུལ་ཚོན། རས་བྲིས། ཚོམ་བུ་སྟེ། འབྱོར་པ་དང་དབང་པོའི་རིམ་པར་བསྟུན་པའི་བསྙེན་སྒྲུབ་ལས་སྦྱོར་གྱི་དཀྱིལ་འཁོར་དུ་ངེས་པར་བྱ་ཞིང༌། དེ་ཡང་རྡུལ་ཚོན་རུས་པའི་ཚོན་ལ་བྲི་བར་བཤད་ཀྱང་མི་འབྱོར་ན་ཚོན་གྱི་ནང་དུ་རུས་ཆེན་གྱི་ཕྱེ་མ་བསྲེ་བ་དང༌། རས་བྲིས་ལའང་རུས་ཕྱེ་དང་ཁྲག་ཆེན་བསྲེས་ན་དུར་ཁྲོད་ཀྱི་ཚོན་ཐོབ་ཏུ་འགྱུར། ཇི་ལྟར་འབྲི་བའི་ཚུལ་ནི་སྒྲུབ་ཆེན་ཁོག་དབུབ་ཏུ་སྨོས་པ་ལས་ཤེས་ཤིང༌། ཚོམ་བུ་དགོད་པའི་ཚེ་མཆོག་སྒྲུབ་ལ་འབྲུ་དཀར་དྲི་བཟང་གིས་སྦགས་པ་དང༌། མངོན་སྤྱོད་ལ་འབྲུ་ནག་དུག་ཁྲག་གིས་གཤེར་བས་ལྷ་གྲངས་དང་མཉམ་པར་འགོད། དཀྱིལ་འཁོར་གྱི་སྟེགས་བུའི་འོག་ཏུ་གྲུ་གསུམ་བརྐོས་པར་རམ་རང་བཞིན་ [3a] དུ་སྦས་ཀྱང་རུང་སྟེ། མི་རྟ་ཁྱི་བྱ་བ་ལང་གི་རུས་པ་ལྔ་གཞུག་པའམ། ཐོད་ཚལ་ལ་འཁོར་ལོ་རྩིབས་བརྒྱད་པ་བྲིས་ཏེ་བཞག་པས་སའི་རོ་ལྔ་ལ་སོགས་པའི་ཉེས་པས་མི་གོས་ཤིང་མ་མོ་དང་མཁའ་འགྲོ་རྣམས་ཀྱིས་དུར་ཁྲོད་ཀྱི་གཞལ་ཡས་ཁང་དུ་མཐོང་བར་འགྱུར་ལ། བྷནྡྷ་མཚན་ལྡན་ནང་དུ་རིན་ཆེན་ལྔ། འབྲུ་ལྔ། སྔན་ལྔ། དྲི་ལྔ་རྣམས་བཅུག་པ་བཞག་པས་ཕྱི་རིན་པོ་ཆེ་ལ་ནང་བྷནྡྷ་འབར་བའི་གཞལ་ཡས་ཁང་དུ་མཐོང་ཞིང་ནད་མི་འབྱུང༌། ལོངས་སྤྱོད་ཆེ། གྲགས་པ་ཐོབ་པ་ལ་སོགས་པའི་རྟེན་འབྲེལ་ཡོད་པར་བཤད་དོ། །གཉིས་པ་ལྷ་ཕུར་ནི། མཚན་མ་རྫས་ཀྱི་དཀྱིལ་འཁོར་གྱི་གཙོ་བོ་མེད་དུ་མི་རུང་བ་ཉིད་དེ། འདི་ལ་རྒྱུ། རྣམ་གྲངས། ཚད། དབྱིབས། ཇི་ལྟར་འདུ་བྱ་བ། བྱིན་གྱིས་བརླབ་པ། མཚོན་དོན། བྱེད་ལས། གང་དུ་གདབ་པ། དགོས་པ་བཅས་དོན་བཅུ་ལས། དང་པོ་རྒྱུ་ནི། གསང་རྒྱུད་ལས། དངུལ་ལམ་དཀར་པོའི་ཤིང་རྣམས་ནི། །ཞི་བ་ལས་ཀྱི་ཕུར་པའི་རྒྱུ། །གསེར་རམ་སེར་པོའི་ཤིང་རྣམས་ནི། །ཡོན་ཏན་རྒྱས་པའི་ཕུར་པའི་རྒྱུ། །ཟངས་སམ་དམར་པོའི་ཤིང་རྣམས་ནི། །གསུང་མཆོག་དབང་གི་ཕུར་པའི་རྒྱུ། །ལྕགས་སམ་ནག་པོའི་ཤིང་རྣམས་ནི། །དྲག་པོ་ [3b] ལས་ཀྱི་ཕུར་པའི་རྒྱུ། །ཞེས་སྤྱིར་ལས་སོ་སོ་ལ་རྒྱུ་སོ་སོར་དགོས་པར་བཤད་ཅིང༌། བྱེ་བྲག་ཏུ་ཨོ་རྒྱན་ཆེན་པོས། སྒྲུབ་ཕུར་རྣམས་ལྕགས་སྣ་ལྔའམ་སེང་ལྡེང་ལྟ་བུ་ལའོ། །ཞེས་གསུངས་པའི་ལྕགས་སྣ་ལྔ་ནི། མྱང་འདས་ལས། གནམ་ལྕགས་ས་ལྕགས་ཁྲོ་ཆུ་གསུམ། །མི་རྟ་བསད་པའི་མཚོན་ཆ་བཞི། །ཕལ་པའི་ལྕགས་དང་ལྔ་ལ་བྱ། །ཞེས་པས་གནམ་ལྕགས་ནི་ཐོག་ལྕགས། ས་ལྕགས་ནི་རྨོས་ལྕགས་བྱང་མ། ཁྲོ་ལྕགས་ནི་དངོས། གྲི་མདུང་སོགས་མི་རྟ་བསད་པའི་ལྕགས། ཕལ་པའི་ལྕགས་ལྷ་ཁང་རྙིང་པའི་སྒོ་གཟེར་བཅས་ལྔ་ལ་བསྡུ་བར་བཞེད་ཅིང༌། ལྕགས་དེ་དག་འཚོལ་མཁན་ནི། ཐུགས་རྗེ་ཁྲོས་པ་རྩ་རྒྱུད་ལས། དགེ་སློང་ཤན་པ་དགེ་བསྙེན་དང༌། །རྣལ་འབྱོར་རིག་སྔགས་འཆང་དང་ནི། །ལྷ་བཟོས་བླངས་པ་མཆོག་ཡིན་ནོ། །ཞེས་དང༌། བརྡུང་མཁན་ཀྱང༌། ཞེ་གནག་ཁྲིམས་གཙང་སྡོམ་ལྡན་པ། །དབང་ཐོབ་དད་པ་ལྡན་པས་བརྡུང༌། །ཞེས་འབྱུང་ངོ༌། །སྒྲུབ་ཕུར་ཤིང་ལ་བྱེད་ན། རྡོ་རྗེའི་རིགས་ཀྱི་མཚན་མ་དང་ལྡན་པའི་ཆུ་འགྲམ་དང་བྲག་རི་སོགས་ལས་སྐྱེས་པའི་ཚེར་མ་ཅན་གྱི་ཤིང་བཙལ་ལ། ཡུལ་བདག་ལ་གཏོར་མ་བྱིན་ནས་ཤིང་སློང་ཞིང་བར་ཆད་མི་བྱེད་པར་བཀའ་བསྒོ། ཨོཾ་སྭ་བྷཱ་ཝ་ [4a] ཤུདྡྷ༔ ཨ་དྷེ་བ་ཤཱིནྟཾ་ཀུ་རུ་སྭཱ་ཧཱ། ཞེས་བཟླ། རང་ཉིད་དཔལ་རྟ་མགྲིན་དུ་གསལ་ནས། ཨོཾ་བཛྲ་ཀྲོ་དྷ་ཧྱ་གྲཱི་ཝ་བཛྲ་ཤཀྟི་མཱུ་ལ་ཚིནྡྷ་ཀཱི་ལ་ཡ་ཕཊ། ཅེས་བརྗོད་ཅིང་ཤར་ནས་བརྩམས་ཏེ་བཅད་ལ་རིན་པོ་ཆེའི་སྣོད་དུ་བཞག །ཡི་གེ་བརྒྱ་པ་བརྗོད་ཅིང་དྲི་ཆབ་ཀྱིས་བསང་གཏོར་བྱ། དངོས་པོའི་ངོ་བོ་སྟོང་པ་ཉིད་ཀྱི་ངང་ལས་ཧཱུྃ་ཡིག་ལས་བྱུང་བའི་དངོས་གྲུབ་ཐམས་ཅད་འབྱུང་བའི་ཤིང་དུ་མོས་ལ་དུམ་བུར་བསིལ་ཏེ། དབུས་ཀྱི་ཆ་ལས་གཙོ་བོ། རྩེ་མོ་དང་རྩ་བ་སྟེང་འོག་གི་ཁྲོ་བོ་སོགས་རིག་པས་བཏགས་ནས་གཞོག་གོ །གཞན་ཡང་ལས་ཕུར་གྱི་བྱེ་བྲག །སྦས་གསང་མདུང་རྩེའི་རྒྱུད་ལས། དགྲ་བགེགས་དབང་དུ་བསྡུ་བའི་ཕྱིར། །ནག་པོའི་རིགས་ཀྱིས་བྱ་བར་ཤིས། །མནན་པའི་ཕུར་པ་སྐྱེར་ཕུར་བསྔགས། །འདྲེན་ཅིང་འགུགས་པར་མཆོག་ཕུར་བསྔགས། །གདབ་པའི་ཕུར་པ་ལྕགས་ཕུར་ཏེ། །དཔུང་དང་ཕྲལ་བར་བྱ་ཕུར་བསྔགས། །ཞེས་གསུངས་པས། དྲག་པོའི་རིགས་ཀྱི་ཤིང་སྐྱེར་པའི་རྩ་བ་ས་འོག་ནས་བརྐོས་པ། སྐྱེས་དར་མའི་རྗེ་ངར་སྦོམ་པོ་མ་ཡིན་པ་ཐུར་མ་ཙམ། ལྕགས་སྣ་ལྔ། བྱ་རྒོད་ཀྱི་གཤོག་པའི་དང་རུ་རྣམས་ལ་བྱ་དགོས་ཤིང༌། འབུམ་ནག་ཏུ་ངན་སྔགས་དྲུག་ལ་ཕུར་པའི་དབྱེ་བ་དྲུག་སོགས། [4b] ཀྱང་བཤད་དོ། །གཉིས་པ་རྣམ་གྲངས་ནི། ཕྲིན་ལས་འཁོར་ལོའི་རྒྱུད་ལས། ཡོན་ཏན་གྱི་ཕུར་བུ་བདུན་ཅེས། བསྐྲད་པ་མཚམས་ཀྱི་ཕུར་པ་དང༌། བཀོད་པ་ལྷ་ཡི་ཕུར་པ་དང༌། མངགས་པ་ཕོ་ཉའི་ཕུར་པ་དང༌། དབང་དུ་སྡུད་པའི་ཕུར་པ་དང༌། གདབ་པ་ཕྲིན་ལས་ཀྱི་ཕུར་པ་དང༌། འཛིན་ཅིང་མི་གཏོང་བའི་ཕུར་པ་དང༌། གནས་སྲུང་བའི་ཕུར་པའོ། །ཞེས་འབྱུང་བའི། དང་པོ་ནི། ཁྲོ་བཅུའི་མཚམས་གཅོད་ལ་འདེབས་པར་བྱ་བ་རྣམས་སོ། །གཉིས་པ་ནི། ཁ་ཅིག་ཏུ་སྒྲུབ་ཕུར་ཞེས་གསུངས་པ་དང་དོན་གཅིག་སྟེ་གཙོ་ཕུར་རམ་འགྱིང་ཕུར་དང༌། བསྙེན་པའི་སྐབས་ལྷ་ཕུར་རྣམས་ཕྱོགས་གཅིག་སྦམ་ནས་ཐོད་པ་ལ་སོགས་པར་འགོད་པ་ལ་སྦམ་ཕུར་ཡང་ཟེར་ཏེ་ལྷ་གྲངས་ཡོངས་སུ་རྫོགས་པའོ། །གསུམ་པ་ནི་དབང་སྡུད་དང་མནན་པ་དང་ངན་སྔགས་དྲུག་སོགས་འཕྲལ་འཕྲལ་ལས་ལ་སྦྱོར་དགོས་པའི་ཕུར་པ་རྣམས་སོ། །བཞི་པ་ནི། དམ་ཅན་གནད་འབེབས་ཀྱི་ཕུར་པ་རྣམས་སོ། །ལྔ་པ་ནི། གདབ་ཁའི་ལས་ལ་འདེབས་པར་བྱ་བ་རྣམས་སོ། །དྲུག་པ་ནི་བསྙེན་ཕུར་སྟེ་འདིའང་སྲས་མཆོག་དང་ཐ་དད་དུ་ཕྱེ་བ་དང་གཅིག་ཏུ་འདོད་པའི་ལུགས་གཉིས་སུ་ཡོད་དོ། །བདུན་པ་ནི་རང་འདུག་པའི་ཚེ་སྔས་སུ་བཏབ་ཅིང་འགྲོ་བའི་ཚེ་སྐེད་ལ་གཟིར་བར་བྱ་བ་ཉིད་དོ། །གསུམ་པ་ཚད་ནི། ཞུས་ལན་ [5a] ལས། ཚད་ནི་གཙོ་ཕུར་སོར་བཅོ་བརྒྱད། གིང་ཕུར་སོར་བཅུ་གཉིས་སམ་ཡང་ན་བཅུ་དྲུག །མགྱོགས་ཕུར་སོར་བཅུ་གཉིས། གདབ་ཕུར་སོར་བརྒྱད་པ། ཕྲིན་ལས་བཞི་ལའང་མཐེབ་སོར་བརྒྱད་པ། མངགས་ཕུར་སོར་བརྒྱད་པ། སྲུང་ཕུར་སོར་བཅུ་དྲུག་པ། ཟློག་ཕུར་སོར་བཞི་པ། ཐུན་ཕུར་སོར་གསུམ་པར་སྤྱི་རྒྱུད་དུ་གསུངས་པ་དང༌། ཡང་ན་གཙོ་ཕུར་སོར་བཅུ་དྲུག །ཁྲོ་བོ་སོར་བཅུ་གཉིས། ཟ་གསོད་མཐོ་རེ། སྲས་མཆོག་མར་བཅད་སོར་བརྒྱད་པ་བྱ་བར་གསུངས། དེ་དག་ཀྱང་སོར་བཅུ་དྲུག་པ་ལ་དབུ་ལ་སོར་དོ། སྐུ་སྟོད་སོར་བཞི། ལྟེ་བ་དང་མཚན་མ་སོར་དོ་རེ། དབལ་སོར་དྲུག །སོར་བཅུ་གཉིས་པ་ལ་ཁྲོ་ཞལ་ལམ་རྒྱ་མདུད་གཉིས་སོར་ཕྱེད་དོ་རེ། ཆང་བཟུང་སོར་གསུམ། ཆུ་སྲིན་སོར་གཅིག །དབལ་སོར་ལྔ། སོར་བརྒྱད་པ་ལ། རྒྱ་མདུད་གོང་འོག་སོར་རེ། ཆང་བཟུང་སོར་དོ། ཆུ་སྲིན་ཁ་སོར་གང༌། དབལ་སོར་གསུམ་དུ་བྱ་ཞིང༌། བཅོ་བརྒྱད་པ་སོགས་གཞན་ལའང་དེ་དག་གིས་རིགས་འགྲེ་སྟེ་མདོན་ན་ཕྱེད་ཆ་སྟོད་དང་ཕྱེད་ཆ་དབལ་དུ་བྱ་བར་བཤད་དོ། །བཞི་པ་དབྱིབས་ནི། ཐུགས་རྡོ་ཁྲོས་པ་རྩ་རྒྱུད་ལས། མགོ་བོ་རྒྱ་མདུད་རྩེ་ཟུར་གསུམ། །སྐེད་པ་རྒྱ་མདུད་གཞལ་ཡས་ཁང༌། །བཅུམ་གཞོག་ལ་ [5b] ནི་སོར་བཅུ་གཉིས། །བསྙེན་པའི་ཕུར་པ་དེ་བཞིན་བྱ། །ཞེས་དང༌། འཇིག་རྟེན་སྣང་བྱེད་ཀྱི་རྒྱུད་ལས། །མཐེབ་གང་རྒྱ་མདུད་དག་ཏུ་བྱ། །སོར་བཞི་བཅུམ་གཞོག་འོག་མའང༌། །གོང་མ་བཞིན་དུ་ཤེས་པར་བྱ། །དབལ་ནི་ཆུ་སྲིན་ཁ་ནས་ཕྱུང༌། །ཚིག་བཞི་ཀུན་ལ་སྦྲུལ་གྱིས་བརྒྱན། །ཞེས་སོགས་དང༌། ལྷ་ཞལ་ཕྱུང་བའང་གཏེར་མའི་ཕྱོགས་ལས་གསལ་བར་གསུངས་ཤིང༌། ད་ལྟའི་ཕྱག་ལེན་དུ། གཙོ་ཕུར་ལ་རབ་ཞལ་གསུམ་ཕྱག་དྲུག་རྒྱན་ཆ་ཕྱག་མཚན་གཤོག་པ་དང་བཅས་པའི་སྨད་ཕུར་ཞབས་ཅན། འབྲིང་ཞལ་གསུམ་གྱིས་མཚན་པའི་ཕུར་རྐྱང༌། ཐ་མ་ཁྲོ་ཞལ་གཅིག་པ། ཀཱི་ལ་རིགས་ལྔ་དང་ཁྲོ་བཅུ་རྣམས་ལའང་ཁྲོ་ཞལ་གསུམ་མམ་རེ་རེ། ཟ་གསོད་སྒོམ་རྣམས་ལ་སོ་སོའི་མགོ་བརྙན་ཅན། སྲས་ཕུར་ཉེར་གཅིག་ལ་ཁྲོ་ཞལ་མེད་པའི་རྒྱ་མདུད་ཅན། ལས་བཞིའི་ཕུར་པ་རྩེ་མོ་རྡོ་རྗེ། རིན་པོ་ཆེ། པདྨ། རྒྱ་གྲཾ། སྨད་ཀྱི་ཕུར་ཞབས་ཟླུམ་པོ། གྲུ་བཞི། ཟླ་གམ། ཟུར་གསུམ་ཅན་དུ་བྱ་ཞིང༌། དམ་ཅན་དང་དབང་ཕྱུག་མ་རྣམས་ལ་རྩང་ཕུར་ཁོ་ན་སྟེ། དེ་དག་ཀྱང་སྦོམ་པའི་སྐྱོན་སྦིས་སྦིས་པོ་མ་ཡིན་པ། ཕྲ་བའི་སྐྱོན་ཐུར་མ་ལྟ་བུ་མ་ཡིན་པ། གྲོག་སྐེད་ཀྱི་སྐྱོན་ཁ་ཅིག་སྦོམ་ཞིང་ཁ་ཅིག་ཕྲ་ཆེས་པ་མ་ཡིན་པ། [6a] གཙོ་བོ་དང་ཁྲོ་བཅུ་བརྗིད་ཆགས་པ་རྒྱལ་པོ་གདན་ལ་བཞུགས་པ་འདྲ་བ། མགྱོགས་ཕུར་རྣམས་གསོར་འཕང་བདེ་བ་སྐྱེས་པ་དམག་ལ་ཆས་པ་འདྲ་བར་བྱ། གལ་ཏེ་ལྷ་ཞལ་དང་མགོ་བརྙན་སོགས་མི་འགྲུབ་པའི་ཕྱོགས་ལ་རྒྱ་མདུད་ཅན་ཁོ་ན་བྱས་པས་ཀྱང་རྒྱུད་ལུང་གི་དགོངས་པ་དང་འབྱོར་བས་ཆད་སྐྱོན་དུ་མི་འགྱུར་རོ། །ལྔ་པ་ཇི་ལྟར་འདུ་བྱ་བ་ནི། འཇིག་རྟེན་སྣང་བྱེད་ཀྱི་རྒྱུད་ལས། མཁས་པར་བསླབས་པའི་བཟོ་མཁན་ནི། །ཤེས་རབ་རྣམ་པ་དུ་མར་སྦྱངས། །ཞེས་དང༌། ཁ་ནི་ཛ་པྲ་དང་མི་འབྲལ་བས། །ཞེས་པས། ལྷ་ཕུར་སོགས་བཟོ་བའི་ཚེ་ཀཱི་ལ་ཡའི་སྔགས་ཟློ་བཞིན་པས་ཕལ་ཆེར་མངོན་སྤྱོད་ཀྱི་ལས་གཙོ་ཆེ་བས་ཁ་ལྷོར་ཕྱོགས་ལ། དབང་དུ་སྡུད་པའི་ཕྱིར་གྲི་སོ་རང་ལ་བསྟན་པའམ་ཚར་གཅོད་པའི་དོན་དུ་ཕྱིར་བསྟན་ལ་གཞོག །ལྕགས་ལ་བྱེད་ཀྱང་དེས་འགྲེ། གཞན་ཡང་མྱང་འདས་ཀྱི་རྒྱུད་ལས། རྩ་བའི་ཕྱོགས་སུ་རྒྱ་མདུད་བྱ། །རྩེ་མོའི་ཕྱོགས་སུ་ཕྲིན་ལས་བཞིའི། །སོ་སོ་རང་གི་གཞུང་བཞིན་གཞོག །ཅེས་དང༌། ལས་རྒྱུད་ལས། ཤིང་གི་རྩ་བ་རྒྱ་མདུད་དེ། །རྩེ་མོའི་ངོས་སུ་སོ་སོའི་དབལ། །ཞེས་སོགས་ཡང་ཡང་གསལ་བར་གསུངས་པ་ལྟར་ཤིང་གི་རྩ་བ་ལ་ཕུར་པའི་མགོ་བྱ་བ་ལུགས་ [6b] འདིའི་ཁྱད་ཆོས་རྟེན་འབྲེལ་གྱི་ཆེ་བ་ཡིན་པས། གལ་ཏེ་དེ་ལས་ལྡོག་ན་གདབ་ཡུལ་ལ་མི་ཐེབས་པ་དང་རང་ལ་ལྡོག་པ་སོགས་ཀྱི་ཉེས་པ་འབྱུང་ངོ༌། །དྲུག་པ་བྱིན་གྱིས་བརླབ་པ་ལ་སྤྱི་དང་ཁྱད་པར་གཉིས་ཀྱི། དང་པོ་ནི། ཕུར་པའི་མགུལ་དུ་སངས་རྒྱས་ཀྱི་རིང་བསྲེལ། སོ་སོའི་སྙིང་པོའི་ཤོག་དྲིལ། ཐུན་རྫས་ཐུམ་པོ་རྣམས་བཏགས་ཤིང༌། ཁྱད་པར་ཡུངས་ཀར་གུ་གུལ་ཆུས་བྲན་པ་དར་ནག་གི་ཁུ་དུ་བསྟུམས་ནས་བཏགས་པ་གལ་ཆེ་སྟེ། རྩ་རྒྱུད་རྡོ་རྗེ་ཁྲོས་པ་ལས། བསྙེན་ཕུར་ལ་ཡང་རྣམ་པ་གཉིས། །ཡུངས་ཀར་དང་ནི་ཕུར་བུ་དངོས། །ཞེས་ཕུར་པའི་བྱེ་བྲག་ཏུ་གསུངས་ཤིང༌། གཞན་ཡང་རྒྱུད་དེ་ཉིད་ལས། མཐིང་ནག་དར་གྱི་ཅོད་པན་གདགས། །ཞེས་པས་ཐམས་ཅད་ལ་དར་མཐིང་ནག་གི་ཅོད་པན་ནམ་སྤྲོས་བཅས་སུ་གཙོ་བོ་ལ་དར་སྣ་ལྔ་དང༌། གཞན་ལ་རང་མདོག་གི་ཅོད་པན་སོགས་བྱེད་དོ། །དེའི་དབལ་ཟུར་ལ་རྫས་དགུས་ངར་བླུད་པ་ནི། ར་ཁྱི་ཕག་གསུམ་གྱི་ཁྲག་སྟེ་ཁྲག་སྣ་གསུམ། བཙན་དུག་ར་དུག་སྤྱང་དུག་སྟེ་དུག་སྣ་གསུམ། ལྕགས་ཟངས་རྦབ་རྡོའི་ཕྱེ་མ་སྟེ་ཕྱེ་གསུམ་མམ། ཡང་ན་གུ་གུལ་ཉུངས་ཀར་ཚིལ་ཆེན་ཏེ་རྫས་སྣ་གསུམ་རྣམས་བསྡོམས་པའི་རྫས་དགུས་ངར་བླུད་ནས་ཁྱད་པར་གྱི་ [7a] བྱིན་རླབས་གཞུང་བཞིན་བྱ། དེ་ལྟར་ཚད་དང་ལྡན་པར་བསྒྲུབས་པའི་ཕུར་བུ་དེ་དག་བཞུགས་ཚུལ་ཀྱང༌། རྒྱུད་ཡེ་ཤེས་རྩེ་མོ་ལས། སྒྲུབ་པ་འབད་པས་མི་བྱེད་ཀྱང༌། །དབྱིངས་དང་མཐུན་པའི་སྣོད་དག་ཏུ། །གཙང་མའི་གནས་སུ་གཞུག་ནས་ཀྱང༌། །དགབ་དང་བདུག་དང་བསྐོར་བ་ཡིན། །མཆོད་དང་གདུགས་ཀྱི་ཆོ་ག་བྱ། །ཞེས་པས། བཞུགས་ཁང་དྲག་པོའི་བཀོད་པ་དང་ལྡན་པའི་སྒྲོམ་ལ་སོགས་པར་རུས་སྦལ་གྱི་ཁོག་པའམ་ལྕགས་ཟངས་སོགས་སམ་དྲག་པོའི་ས་ལ་བཅོས་པའི་གྲུ་གསུམ་མཐིང་ནག་ཨེ་དབུས་སུ་བཙུག་སྟེ་དར་མཐིང་ནག་གིས་དགབ་ཅིང་གུ་གུལ་དང་ཚིལ་ཆེན་གྱིས་བདུག་ལ་མཆོད་པ་དང་བཅས་བཞུགས་སུ་གསོལ་ལོ། །བདུན་པ་མཚོན་དོན་ནི། མྱང་འདས་ལས། ཁམས་གསུམ་ཡེ་ནས་ཕུར་པའི་ངང༌། །སྲིང་གསུམ་ཡེ་ནས་རྣམ་དག་ཅིང༌། །ཕུར་བུ་ཡེ་ནས་མྱང་འདས་ཀྱང༌། །བདེན་པ་གཉིས་ཀྱི་ཆ་ལ་གདགས། །ཞེས་གསུངས་པ་ལྟར་འཁོར་འདས་ཀྱི་ཆོས་ཐམས་ཅད་རྡོ་རྗེ་ཕུར་པར་མ་གྱུར་པ་གཅིག་ཀྱང་མ་མཆིས་པས་དོན་གྱི་ཕུར་པ་མཚོན་བྱེད་ཀུན་རྫོབ་བརྡའི་ཕུར་པ་འདིས་སྐུ་གསུམ་མཚོན་ཏེ། དེ་ལས། དབུ་ཡི་རྒྱ་མདུད་ཆོས་ཀྱི་སྐུ། །གཉིས་པ་ལོངས་སྤྱོད་རྫོགས་པ་སྟེ། །རྩེ་མོ་སྤྲུལ་པའི་ [7b] སྐུ་ཡིན་ནོ། །ཞེས་དང༌། དཀྱིལ་འཁོར་ཡོངས་རྫོགས་ཀྱང་མཚོན་ཏེ། དབུ་དང་རྩེ་ནི་ཡབ་ཡུམ་གཉིས། །རྡོ་རྗེ་གཞོན་ནུ་བཞུགས་པའི་གནས། །དོན་ལ་གཞལ་ཡས་མཚོན་བྱའི་རྟགས། །རྒྱ་མདུད་གཉིས་སུ་བསྟན་པ་ཡང༌། །ཐབས་དང་ཤེས་རབ་གཉིས་མེད་པའི། །དབྱིངས་དང་ཡེ་ཤེས་ཆེ་བའི་རྟགས། །རྩེ་མོ་དྲག་པོ་ཟུར་གསུམ་ནི། །ཡེ་ཤེས་རྩེ་གཅིག་དྲག་པོར་བཤད། །ཅེས་དང༌། བཤད་རྒྱུད་ལས། རྒྱ་མདུད་གོང་མ་ཧཱུཾ་མཛད། བཅུམ་གཞོག་བརྒྱད་ཁྲོ་བོ་བརྒྱད་ཟ་གསོད་བཅུ་དྲུག་བཅས། རྒྱ་མདུད་འོག་མ་སྟོབས་པོ་ཆེ། དེ་ཡི་ལོགས་བཞི་སྒོ་མ་བཞི་སོགས་མཚོན་ཚུལ་རྒྱས་པར་གསུངས། འཁོར་འདས་གཉིས་ཀ་རྫོགས་ཚུལ་རྒྱུད་ལས། དབལ་ནི་ངན་སོང་འཁོར་བའི་གནས་བཅུ་རྫོགས། །རྒྱ་མདུད་འོག་མ་འདོད་ཁམས་གནས་ཀྱི་རིས། །བཅུམ་གཞོག་སྨད་ལ་གཟུགས་ཁམས་གནས་བཅུ་བདུན། །སྟོད་ལ་གཟུགས་མེད་སྐྱེ་མཆེད་མུ་བཞིའི་ལྷ། །རྒྱ་མདུད་གོང་མ་བདེ་གཤེགས་གཞལ་ཡས་ཁང༌། །དཀྱིལ་འཁོར་ཆེན་པོར་རང་བཞིན་གནས། །ཞེས་གསུངས་ལ། སོར་ཚད་རྣམས་ཀྱི་དོན་ཀྱང༌། གསང་རྒྱུད་ལས། སོར་བཞི་འབྱུང་བ་བཞི་ཡི་ཚད། །སོར་བརྒྱད་རྣམ་ཤེས་བརྒྱད་ [8a] ཀྱི་ཚད། །བཅུ་གཉིས་སྐྱེ་མཆེད་བཅུ་གཉིས་ཚད། །བཅོ་བརྒྱད་ཚད་དུ་བསྟན་པ་ནི། །ཁམས་ནི་བཅོ་བརྒྱད་འཇོམས་པ་ཡིན། །ཞེས་སོགས་གསུངས་པ་ལྟར་རོ། །བརྒྱད་པ་བྱེད་ལས་ནི། ཨོ་རྒྱན་ཆེན་པོས། ཕུར་པའི་ལས་ནི་མགོ་བོ་རྒྱ་མདུད་དུག་ལྔ་འཇོམས༔ སྐུ་སྟོད་ཁྲོ་བོས་ཐ་མལ་གྱི་རྟོག་པ་འཇོམས༔ སྐུ་སྨད་ཟུར་བརྒྱད་རྣམ་ཤེས་ཚོགས་བརྒྱད་ཀྱི་རྟོག་པ་སྦྱོང་༔ ཆུ་སྲིན་ཁ་ནས་ཟུར་དྲུག་སྦྲུལ་ཆུན་དབང་པོ་དྲུག་གིས་ལོངས་སྤྱོད་སྒྲུབ་ཅིང༌ཐུགས་རྗེས་འཛིན་ཤེས་གཏོང་མི་ཤེས་ཀྱི་ལས་བྱེད༔ སྨད་ཟུར་གསུམ་གྱིས་དུག་གསུམ་ལས་བསྐྱེད་གདུག་པའི་དགྲ་བགེགས་སྒྲོལ་བའི་ལས་བྱེད་དོ༔ ཞེས་གསུངས་ཤིང༌། ཀརྨ་ལས་རྒྱུད་ལས། ཡེ་ཤེས་ཐུགས་ཀྱི་ཕུར་པ་འདིས། །ཉོན་མོངས་དུག་ལྔ་རབ་རྒྱས་ཏེ། །ཞེན་པ་ཕྱིན་ཅི་ལོག་ལ་བརྟས། །གནོད་གདུག་སྤང་སེམས་ལྡན་པ་རྣམས། །བསྒྲལ་ཏེ་མི་རྟོག་དོན་ལ་བཞག །ཅེས་ཕྱི་དགྲ་གདོན་བགེགས་རིགས། ནང་ཉོན་མོངས་དུག་ལྔ། གསང་བ་གཟུང་འཛིན་གྱི་མཚན་རྟོག་རྣམས་བསྒྲལ་ནས་མི་རྟོག་དེ་བཞིན་ཉིད་ཡེ་ཤེས་ཁྲོ་བོ་འགྲུབ་པར་བྱེད་པ་ཕུར་པ་སྤྱིའི་བྱེད་ལས་དང༌། བྱེ་བྲག་ཏུ་གསང་རྒྱུད་ལས། ཙནྡན་དཀར་པོའི་ཕུར་པ་ཡིས། །ནད་རྣམས་མ་ལུས་ཞི་བར་བྱེད། །སྐྱེར་པའི་ [8b] ཕུར་པ་ཟུར་བཞི་ཡིས། །ཚེ་དད་ལོངས་སྤྱོད་རྒྱས་པར་བྱེད། །སེང་ལྡེང་ཕུར་པ་ཟླ་གམ་གྱིས། །ཐམས་ཅད་དབང་དུ་སྡུས་པར་བྱེད། །བསྭེ་ཤིང་ཕུར་པས་རིགས་རྒྱས་བྱེད། །གསེར་གྱིས་བྱང་ཆུབ་སེམས་རྒྱས་བྱེད། །ཙནྡན་དམར་བོའི་ཕུར་པ་ཡིས། །བུ་མོ་དབང་དུ་སྡུད་པར་བྱེད། །མཛོ་མོས་བློན་པོ་དབང་དུ་སྡུད། །བསྭེ་ཤིང་དམངས་རིགས་དབང་དུ་སྡུད། །ཟངས་ཀྱིས་རྒྱལ་པོ་དབང་དུ་སྡུད། །ཤིང་གིས་གདོན་རྣམས་དབང་དུ་སྡུད། །ཅེས་གསུངས་པ་དང༌། སྐྱེར་ཕུར་གྱིས་མནན་པའི་ལས་བྱེད་ཅིང༌། མི་བཟད་པའི་ཕུར་པ་དྲུག་གིས་ངན་སྔགས་ཀྱི་ལས་དྲུག་བྱེད་པ་སོགས་ཕུར་པའི་རྒྱུ་སོ་སོ་ལ་དེ་ལྟ་བུའི་ནུས་པའི་ས་བོན་རང་བཞིན་གྱིས་གནས་པ་སྔགས་དང་དམིགས་པའི་རྟེན་འབྲེལ་གྱིས་སྟོབས་སུ་གྱུར་ཏེ་བྱ་བ་བྱེད་ལ། མཆོག་ཏུ་སྒྲུབ་པ་རྟགས་ཐོན་པའི་བསྙེན་ཕུར་གྱིས་ནི་གདེངས་པ་རྩམ་གྱིས་གདོན་བགེགས་འདུལ་བ་དང༌། ཐོག་སེར་ཟློག་པ་དང༌། ཆར་པ་དབབ་གཅོད་སོགས་ལས་གང་བརྩམ་པ་ཐོགས་མེད་དུ་བྱེད་པར་གསུངས་སོ། །དགུ་པ་གདབ་པའི་ཡུལ་ནི། སྤྱིར་ཞི་བའི་ཕུར་པ་ནད་གདོན་འཇིགས་བརྒྱད། རྒྱས་པའི་ཕུར་པ་ཚེ་བསོད་འབྱོར་དྲུག །དབང་གི་ཕུར་པ་སྲིད་གསུམ་སྐྱེ་འགྲོ ། དྲག་པོའི་ཕུར་པ་དགྲ་བགེགས་ [9a] གདུག་པ་ཅན་ལ་གདབ་པར་གསུངས་ཤིང༌། བྱེ་བྲག་ཏུ་མངོན་སྤྱོད་དང་འབྲེལ་བའི་ཕུར་བུ་རྣམས་གདབ་པའི་ཡུལ་ནི་སྨད་ལས་ཀྱི་མན་ངག་བཞིན་གདབ་པར་བྱ་བ་སྟེ། དེ་དག་ཀྱང་ཞེ་སྡང་གིས་ཀུན་ནས་བསླངས་ཏེ་སྡང་བའི་ཡུལ་ལ་མཚོན་འདེབས་པ་ལྟ་བུ་མ་ཡིན་པར། ངོ་བོ་སྙིང་རྗེ། རྣམ་པ་ཞེ་སྡང༌། བྱེད་པ་ཐུགས་རྗེ་དང་ཡེ་ཤེས་ཆེན་པོས་སེམས་ཅན་དེའི་མ་རིག་པ་དང་ཉོན་མོངས་པ་ལ་བཏབ་པས། ལས་སྒྲིབ་དག་ནས་འཁོར་བའི་སྡུག་བསྔལ་ལས་སྒྲོལ་བ་སྟེ། ལས་རྒྱུད་ལས། སྙིང་རྗེས་ཟིན་པའི་ཞེ་སྡང་གིས། །ཉོན་མོངས་གནས་སུ་དག་བྱས་བསྒྲལ། །ཞེས་སོ། །བཅུ་པ་དགོས་པ་ནི། སྤྱིར་ཡི་དམ་གྱི་ལྷ་གང་སྒྲུབ་ཀྱང་རྒྱས་བསྡུས་ཙམ་ལས་རང་རང་གི་དམ་ཚིག་གི་རྟེན་སྒྲུབ་པའི་རྫས་ཐུན་མོང་མ་ཡིན་པ་མེད་དུ་མི་རུང་བར་རྒྱུད་ལུང་རྣམས་ནས་ཆེ་ཐང་དུ་གསུངས་ལ། བྱེ་བྲག་ཏུ་མྱང་འདས་ལས། རྟོགས་པའི་དོན་ལ་གཉིས་མེད་ཀྱང༌། །མ་རྟོགས་བསྒྲལ་བའི་དོན་ཆེད་དུ། །བཀའ་ལས་བྱུང་བའི་རྒྱུ་དག་ལ། །ཚུལ་དང་ལྡན་ཞིང་ལེགས་པར་བྱ། །རང་དགར་བྱས་ན་བཀའ་ལས་ཉམས། །རྙེད་བཙན་བྱས་ན་བྱིན་རླབས་ཆུང༌། །ངན་དགུར་ཤོམ་ན་རྟོག་པར་འགྱུར། །ཚོགས་པར་གསོག་ན་གཞུང་དང་མཐུན། །བཀའ་བཞིན་ [9b] བྱས་ན་བྱིན་རླབས་ཆེ། །ཞེས་དང༌། གསང་རྒྱུད་ལས། བཤད་པའི་དམ་རྫས་མི་འཆང་བ། །འདི་ཡང་དམ་ཚིག་ཉམས་པ་ཡིན། །ཞེས་དམ་ཚིག་ཉམས་པའི་རྒྱུའི་གཙོ་བོ་གཅིག་དམ་ཚིག་གི་རྫས་མི་འཆང་བ་ལ་གསུངས་པས་ནུས་པ་དང་སྦྱར་ནས་ཇི་ཙམ་འཚོགས་པར་བྱ་དགོས་ལ། ཆག་ཚད་རབ་གནས་བྱིན་རླབས་དང་ལྡན་པའི་ཕུར་པ་དེ་ཉིད་བཞུགས་པའི་ས་ཕྱོགས་ཀྱང་མཆོད་རྟེན་གྱི་རང་བཞིན་དུ་འགྱུར་ཏེ། ཡེ་ཤེས་རྩེ་མོའི་རྒྱུད་ལས། བསྐལ་པ་ཇི་སྲིད་སྟོངས་ན་ཡང༌། །ས་དང་ནམ་མཁའ་ཕྱོགས་ཀུན་ཀྱང༌། །མཆོད་རྟེན་ཆེན་པོ་ཁོ་ནར་ངེས། །འདི་ལ་རྣམ་པར་དཔྱད་མི་དགོས། །གང་གིས་བསྒྲུབ་པ་མ་སོང་ཡང༌། །དེ་ལ་འབད་པ་མི་དགོས་པར། །འབྲས་བུ་གྱ་ནོམ་ཕུན་སུམ་ཚོགས། །ཞེས་དང༌། བཤད་རྒྱུད་ལས། སེར་བ་གཅོད་ཅིང་འབེབས་པ་དང༌། །ཆར་པ་གཅོད་འབེབས་ལས་རྣམས་ཀུན། །ཕུར་པ་འདི་ཡིས་འགྲུབ་པར་འགྱུར། །སྲོག་ཆགས་འབྲུ་ལ་གནོད་པ་ཡང༌། །ཕུར་པ་འདི་ཡིས་གནོད་པ་འཇོམས། །ནད་དང་གདོན་གྱིས་གནོད་པ་ཡང༌། །ཕུར་པ་འདི་ཡིས་སྲུང་བར་བྱེད། །ཚེ་ཐུང་བ་ཡང་ཚེ་རིང་འགྱུར། །མི་སྟག་སེང་གེའི་འཇིགས་པ་དང༌། །སྦྲུལ་གདུག་གླང་ཆེན་སྨྱོན་པ་དང༌། །དྲེད་མོ་མེ་དང་ཆུར་བཅས་རྣམས། །ཕུར་པ་འདི་ཡིས་འཇིགས་པ་སེལ། །མཛེ་ཡི་ནད་འཇོམས་ [10a] ཀླུ་དུག་སེལ། །ལས་རྣམས་ཐམས་ཅད་འགྲུབ་པར་འགྱུར། །ཞེས་དང༌། དེ་ཡང་ཆག་ཚད་ལྡན་པས་རྟགས་མྱུར་རོ། །ཞེས་པས། ཕུར་པ་ཚད་དང་ལྡན་པ་ལ་འདིས་མཚོན་ཏེ་དགོས་པ་དང་ཕན་ཡོན་ཚད་མེད་པར་གསུངས་སོ། །གསུམ་པ་གཏོར་མཆོད་ཚོགས་ཀྱི་ཡོ་བྱད་ནི། ཐོག་མར་ལས་དང་དངོས་གྲུབ་ཐམས་ཅད་ཀྱི་གཞི་གཏོར་མའི་ཚུལ་ལ། སློབ་དཔོན་ཆེན་པོས། བརྟེན་པའི་གཏོར་མ་མི་ཤེས་ན། །སྣང་སྲིད་ལྷ་འདྲེ་དམ་མི་འདུ། །རྨད་བྱུང་གཏོར་མ་མི་ཤེས་ན། །ཡེ་ཤེས་མཁའ་འགྲོ་མཉེས་མི་འགྱུར། །མྱུར་མགྱོགས་གཏོར་མ་མི་ཤེས་ན། །རྦད་ཀྱང་འགྲོ་བར་མི་འགྱུར་རོ། །ཞེས་གསུངས་པས། འདི་ལ་ལྔ་སྟེ། དབྱེ་བ། དགོས་པ། བཤམ་ཚུལ། བྱིན་གྱིས་བརླབ་ཚུལ། བཅང་ཚུལ་ལོ། །དང་པོ་ནི། རྟེན་གཏོར་ལྷའི་ངོ་བོར་ཡུན་རིང་དུ་འཇོག་པ་དང༌། རྟག་གཏོར་ལོ་ཟླའི་དུས་ཚིག་ངེས་པ་ཅན་གྱི་བར་སྤྱན་རྟེན་མཆོད་པའི་ཚུལ་དུ་འཇོག་པ་དང༌། ཐུན་གཏོར་ལས་གང་གི་ཚེ་ཡང་ཆོ་གའི་ཐུན་མཚམས་བརྔན་གྱི་ཚུལ་དུ་བཏང་བའོ། །གཉིས་པ་དགོས་པ་ནི། རྟེན་གཏོར་གྱིས་ལྷ་ཚོགས་བརྟན་པར་བཞུགས་པས་བར་ཆད་མི་འབྱུང་ཞིང་ལས་བཞིའི་དངོས་གྲུབ་མྱུར། ཕོ་ཉ་དབང་དུ་འདུ། རྒྱུན་གཏོར་གྱིས་ [10b] ལས་སྒྲུབ་ཀྱི་དཔུང་བསྐྱེད་ཅིང་འཕྲལ་འབྲས་མྱུར་དུ་འབྱིན། ཐུན་གཏོར་གྱིས་མགྲོན་རྣམས་སྙིང་ཉེ་ཞིང༌། གནས་སྐབས་ཀྱི་འདོད་འབྲས་མྱུར་དུ་འབྱིན་པའོ། །གསུམ་པ་ཇི་ལྟར་བཤམ་ཚུལ་ལ་གསུམ་ལས། དང་པོ་རྟེན་གཏོར་ནི། རང་ངམ་དམ་ཚིག་ཅན་ལས་བླངས་པའི་འབྲུ་གཙང་ས་རྡུལ་མེད་པའི་ཟན་ལ་ཤ་ལྔ་བདུད་རྩི་ལྔ། ཟས་ནོར་འཕེལ་ཕྱིར་རིན་པོ་ཆེ་དང་འབྲུ་སྣ་ཤ་སྣ། ནད་ཞི་ཕྱིར་སྨན་སྣ་ཚོགས། དྲག་ལས་རྣོ་མྱུར་གྱི་རྫས་གྲི་ཁྲག་དང་ས་རྫས་མེ་ཏོག་གི་ཕྱེ་རྣམས་ཐལ་བ་ཅུང་ཟད་དང་བསྲེས་ལ་ཞིང་ལྤགས་སམ་དེར་བསམ་པའི་སྣོད་དུ་བཀྲམ་པ་ལ་ཨོཾ་ཨཱཿཧཱུཾ་གསུམ་བརྩེགས་མར་བྲི། དེ་ལས་འོད་ཟེར་དཀར་དམར་མཐིང་གསུམ་འཕྲོས། སངས་རྒྱས་སྲས་དང་བཅས་པའི་སྐུ་གསུང་ཐུགས་ཡེ་ཤེས་ཀྱི་བདུད་རྩི་འོད་ཟེར་དཀར་དམར་མཐིང་གསུམ་དུ་སྤྱན་དྲངས། ཡི་གེ་གསུམ་ལ་ཐིམ། ཡི་གེ་གསུམ་ཡང་ཧཱུཾ་གི་བར་རིམ་པར་འོད་དུ་ཞུ། ཧཱུཾ་གི་འོད་ཟེར་བདུད་རྩིའི་རང་བཞིན་གཏོར་རྒྱུ་ལ་འདྲེས་པར་བསམ་ཞིང་འབྲུ་གསུམ་བརྒྱ་རྩ་བརྒྱད་བཟླས་པས་བརླབས། དཀར་གསུམ་མངར་གསུམ་ཅུང་ཟད་བསྲེས་པའི་མར་ཁུ་བཙགས་ཆོད་ཚིག་སླད་མེད་པ་དང༌། ཆང་བཟང་པོའི་ཉིང་ཁུ་ཆོས་སྨན་བཏབ་པ་མར་ཁུའི་ལྔ་ཆ་ [11a] ཙམ་དང༌། ཤ་སྣ་སྙིང་སྣ་སྤོས་དང་དྲི་བཟང་སོགས་ཀྱིས་བཀྲུས་པའི་ཁྲག་གཙང་དེའི་བཞི་ཆ་ཙམ་གྱིས་འདྲེས་ཤིང་མཆེད་པར་སྦོལ་ལ་ཧ་ཅང་སྲ་བ་མ་ཡིན་པའི་ཟན་ལས། ཕོ་ཐོད་མཚན་ལྡན་ནམ་རིན་པོ་ཆེའི་པད་སྣོད་དུ་འཁོར་ལོ་རྩིབས་བཅུ་རྩིབས་བཞི་བརྩེགས་མའི་གདན་ལ་དཔལ་གྱི་གཏོར་མ་ཆེ་ཞིང་བརྗིད་ཆགས་བར་བཅོས་པ་ལ་སྤྲོ་ན་འཁོར་གྱི་གཏོར་ཕྲན་གཙོ་བོའི་སུམ་གཅིག་གི་ཚད་དུ་སླེབ་པའང་རྩིབས་རེར་འགོད། གཏོར་སྣོད་དང་གཏོར་མའི་བར་སྟོངས་རྣམས་སུ་འབྲུ་སྣ། སྨན་སྣ། ལ་དུ། ཁུར་བ། ཆན་སོགས་ཟས་སྣ་ཚོགས་པས་བྲུམ་ཞིང་གཅེར་ཏེ་གཏོར་སྣོད་ཁེངས་ཤིང་ཕྱིར་གཞལ་བ་བྱ། སྙིང་པོའི་སྲོག་ཤིང་ལྕགས་སམ་སྨྱུག་མ་སྦུ་གུ་ཅན་གྱི་ནང་དུ་རྩ་སྔགས་མཐར། དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་རྣམས་ཀྱིས་བདག་སྒྲུབ་པ་པོའི་འགལ་རྐྱེན་ཞི་ཞིང་མཐུན་རྐྱེན་འབྱོར་བ་དང་ཚེ་འདི་ཉིད་ལ་མཆོག་ཐུན་གྱི་དངོས་གྲུབ་མ་ལུས་པ་ཐོབ་པར་མཛད་དུ་གསོལ། ཅེས་སྤེལ་ཚིག་ཅན་གསེར་རམ་མཚལ་ལམ་སྣག་ཚ་གཙང་མས་བྲིས་པ་ལ་ཆོས་སྨན་དང་དྲི་བཟང་བྱུགས། ལྷར་བསྐྱེད་རབ་གནས་བྱ། ཞུ་བ་ལས་སྔགས་ཕྲེང་དུ་བསམ་ཞིང་མགོ་ནས་དྲིལ་ལ་དར་ [11b] སྐུད་ཀྱིས་བཅིངས་ཏེ་སྲོག་ཤིང་གི་སྦུབས་སུ་དབུ་ཞབས་མ་ལོག་པར་གཞུག །དམར་རྩིས་བྱིལ་པོར་བྱུགས་ཤིང་ཕྱག་མཚན་སོགས་མར་གྱིས་བཀྲ་བས་མཛེས་པར་བྱས་པའི་རྩེ་མོར་མདའ་དར་སྐུ་ཙཀ་མེ་ལོང་སོགས་ཀྱིས་བརྒྱན་པ་བཙུགས་པ་ཉིད། དཀྱིལ་འཁོར་དབུས་ཀྱི་མཉྫིའམ་ཕུག་ལོགས་དམ་ཚིག་གི་བྲིས་སྐུ་བཀྲམ་པའི་མདུན་སྟེགས་གཡང་གཞི་སོགས་ཀྱིས་བཀབ་པའི་ཁར་འབྲུ་སྣ་ཚོགས་བཀྲམ་པའི་སྟེང་དུ་བརྟན་པར་འགོད། སྟེང་ནས་དར་མཐིང་ནག་གི་གུར་ཕུབ་ཅིང་མཐའ་ཡོལ་བས་བསྐོར་ཏེ་རྡུལ་ཙམ་གྱིས་མི་གོས་པར་བྱ། གཞན་ཆོས་སྐྱོང་གི་རྟེན་གཏོར་འཛུག་པའི་ཚེ་ནའང་སོ་སོའི་གཟོ་དབྱིབས་དང་ནང་གཞུག་སྐུ་ཙཀ་གསང་རྟེན་སོགས་ཀྱི་ཁྱད་པར་ལས་སྤྱིའི་ལག་ལེན་ཚུལ་འདི་ཁོ་ནས་ཤེས་པར་བྱ་བ་ཡིན་ནོ། །གཉིས་པ་རྟག་གཏོར་ནི། རིན་པོ་ཆེའི་པད་སྣོད་དུ་ཕྱེ་གཙང་ཆང་གི་ཉིང་ཁུ་རཀྟ་མར་ཁུ་རྣམས་ཀྱིས་སྦྲུས་ཤིང་ཆོས་སྨན་བཏབ་པའི་ཟན་བཟང་པོ་ལས། བཟོ་དབྱིབས་གོང་དང་འདྲ་བ་ལ་དམར་རྩིས་བྱུགས་ཤིང་མར་རྒྱན་གྱིས་བརྒྱན། ཤ་ཆང་ཁུར་བ་སྨན་འབྲུ་ཤིང་ཏོག་སོགས་བཟའ་བཅའ་བཏུང་བ་བཟང་པོ་ཇི་སྙེད་པས་བསྐོར། དར་ཚོན་བཟང་པོའི་བ་དན་ནམ་གུར་གྱིས་ཀྱང་ [12a] བརྒྱན་ཏེ་རྟེན་གཏོར་གྱི་མདུན་སྟེགས་ཁེབས་ལྡན་འབྲུ་སྨན་གཅལ་དུ་བཀྲམ་པའི་ཁར་འགོད། དེ་ལས་འཕྲོས་པའི་སྐོང་གཏོར་སྤྲོ་ན། དེའི་མདུན་དུ་གོང་གི་རྒྱུ་ལས་བཤོས་བུ་དམར་ནག་གྲུ་གསུམ་བཅུར་བྱས་པ་ལ་སྐོང་རྫས་རྣམས་རི་མོའམ་འབུར་དུ་བྱས་པའི་རྒྱན་གྱིས་བསྐོར་བ་གྲལ་སྟབས་སུ་བསྒྲིག་གོ །གསུམ་པ་རྒྱུན་གཏོར་རམ་ཐུན་གཏོར་ནི། དེ་རྣམས་ཀྱི་མདུན་དུ། གཏོར་ཟན་གཙང་མ་ལ་བླ་མ་ཡི་དམ་ཆོས་སྐྱོང་ལྕམ་དྲལ། གཏེར་བདག་དང་གཞི་བདག་སྤྱི་གཏོར་རྣམས་བཟོ་དབྱིབས་ལག་ལེན་ལྟར་དཀར་དམར་གྱི་རྒྱན་ཅན་ཚར་དུ་དངར་བ་བཤམ་མོ། །བཞི་པ་བྱིན་གྱིས་བརླབ་ཚུལ་ལ་གསུམ་ལས། དང་པོ་རྟེན་གཏོར་བྱིན་གྱིས་བརླབ་པ་ནི། བདག་གི་རྣལ་འབྱོར་སྔོན་དུ་འགྲོ་བས་གུ་གུལ་གྱིས་བདུག་ཅིང་བགེགས་སྦྱང༌། ལས་བུམ་གྱི་ཆུས་ཁྲུས་གསོལ་ཏེ་དག་པར་བྱ། རྃ་ཡྃ་ཁྃ། རང་གི་ཐུགས་ཀ་ནས་རྃ་ཡྃ་ཁྃ་འཕྲོས་པ་ཡེ་ཤེས་ཀྱི་མེ་རླུང་ཆུར་གྱུར་པས་གཏོར་མའི་མ་དག་པའི་དངོས་འཛིན་ཐམས་ཅད་བསྲེག་གཏོར་སྦྱངས་ཏེ་སྟོང་པར་གྱུར། སྟོང་པའི་ངང་ལས་ཡྃ་ལས་རླུང༌། རྃ་ལས་མེ། ཀེཾ་ལས་མི་མགོའི་སྒྱེད་པུ་གསུམ་ལ་བརྟེན་པའི་ཨ་ལས་ལས་བཞིའི་ཀ་པཱ་ལ་བཞི་རིམ་ [12b] ཡངས་ཤིང་རྒྱ་ཆེ་བའི་ནང་མ་གྲུ་གསུམ་གྱི་སྟེང་དུ་ཉི་མའི་དཀྱིལ་འཁོར་གྱི་དབུས་དང་ཕྱོགས་བཞིར་ཧཱུཾ་ཨོཾ་སྭཱ་ཨཱྃ་ཧཱ་ལས་མི་བ་གླང་ཁྱི་རྟ་གླང་པོ་ཆེའི་ཤ་རྣམས་ཡི་གེ་དེ་དག་གིས་མཚན་པ། དབུས་དང་མེ་ནས་བརྩམས་ཏེ་མཚམས་བཞིར་མཱུྃ་ལཱྃ་མཱྃ་པཱྃ་ཏཱྃ་ལས་བྱང་སེམས་དྲི་ཆེན་ཀླད་པར་རཀྟ་དྲི་ཆུ་རྣམས་ས་བོན་དེ་དག་གིས་མཚན་པའི་མཐར་བཟའ་བཅའ་བཏུང་མྱང་བལྡག་གཞིབ་སོགས་འདོད་པའི་ལོངས་སྤྱོད་མཐའ་ཡས་པས་ཡོངས་སུ་བསྐོར་བ། དེའི་སྟེང་དུ་ཧཱུཾ་སྔོན་པོ། ཨཱཿདམར་པོ། ཨོཾ་དཀར་པོ་རྣམས་སྟེང་ནས་སྟེང་དུ་བརྩེགས། ཨོཾ་ཨཱཿ་ཧཱུཾ། གསུམ་བརྗོད། རང་གི་ཐུགས་ཀའི་ས་བོན་གྱི་འོད་ཟེར་གྱིས་བསྐུལ་བས་རླུང་གཡོས། མེ་སྦར། རྫས་རྣམས་ཞུ་ཞིང་ཁོལ་བས་ཆེར་འཕེལ། ནང་ནས་རིམ་བཞིན་ཐོད་པའི་སྣོད་གང་བས་ནམ་མཁའི་མཐའ་དང་མཉམ་པར་གྱུར། རླངས་པ་གྱེན་དུ་སོང་བས་ཡི་གེ་གསུམ་ལ་ཕོག །དེ་ལས་བྱུང་བའི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་དཀར་དམར་མཐིང་གའི་རྣམ་པ་ཅན་དུ་སྤྱན་དྲངས་ནས་ཡི་གེ་གསུམ་ལ་ཐིམ། དེ་གསུམ་ཡང་ཨོཾ་ནས་རིམ་པར་ཞུ་བ་དམ་ཚིག་རྫས་ལ་ཐིམ་པས་རོ་གཅིག་ཏུ་གྱུར། ཟག་མེད་ཀྱི་བདུད་རྩིའི་རྒྱ་ [13a] མཚོ་ཆེན་པོ་ཕྲིན་ལས་བཞིའི་རོལ་པར་འཆར་བའི་གཟུགས་སྒྲ་དྲི་རོ་རེག་བྱ་སོགས་འདོད་པའི་ཡོན་ཏན་བསམ་གྱིས་མི་ཁྱབ་པའི་སྤྲིན་ཕུང་འཕྲོ་བར་བསམ་ཞིང༌། རྟེན་གཏོར་ལ་གཏད་པའི་གཟུངས་ཐག་ནས་འཇུས་ཏེ་གཏོར་མ་བྱིན་བརླབ་ཀྱི་སྔགས་བརྒྱ་རྩ་སོགས་བརྗོད། དེ་ནས་གཏོར་མ་ཉིད་ལྷར་བསྐྱེད་པ་ལ་མཆོད་བསྟོད་སོགས་བྱེད་པ་ཡིན་ནོ། །གཉིས་པ་རྟག་གཏོར་བྱིན་གྱིས་བརླབ་པ་ནི། རྃ་ཡྃ་ཁྃ་གིས་བསྲེག་གཏོར་སྦྱངས། སྟོང་པའི་ངང་ལས་ཡྃ་ལས་རླུང་སོགས་ནས་སྔགས་ཀྱིས་བྱིན་གྱིས་བརླབ་པའི་བར་གོང་བཞིན་ལ། གཏོར་མ་འདོད་ཡོན་གྱི་ཕུང་པོར་མོས་པའོ། །གསུམ་པ་རྒྱུན་གཏོར་རམ་ཐུན་གཏོར་བྱིན་གྱིས་བརླབ་པ་ནི། ཕྲིན་ལས་ཀྱི་ཆོ་གའི་དཀྱུས་སུ་བཀོད་པ་དེ་གས་ཆོག་ཅིང༌། ཐུན་མཐར་གཏོར་མ་སྐྱོང་བའི་ཚེ་དམིགས་པའི་ཁྱད་པར། རང་གི་ཐུགས་ཀ་ནས་ཕོ་ཉ་གྲངས་མེད་པར་སྤྲོས་པས་དམིགས་བྱ་གཏོར་མའི་སྟེང་དུ་བཀུག་པར་མོས་ལ་དགུག་གཞུག་དྲག་པོ་བྱ། དེ་ནས་རང་གི་ཐུགས་ཀ་ནས་ཛ་ཡིག་དམར་པོ་རྣོ་ལ་ཆེ་བ་གཅིག་འཕྲོས་དམིགས་བྱའི་བཤང་སྒོར་ཞུགས། སྙིང་གར་སླེབ་པ་ན་གནམ་ལྕགས་ཀྱི་འཁོར་ལོ་རྣོ་ངར་གཅོད་པའི་དབལ་ཅན་དུ་གྱུར་ཏེ་གཡས་གཡོན་དུ་དྲག་ཏུ་འཁོར་ [13b] བས་ཤ་ཆོམ་ཁྲག་ཆོམ་དུ་དམར་འདུར་གྱིས་བཏང་ནས་གཏོར་མ་ལ་ཐིམ་པས་བདུད་རྩིར་བྱས་པ་ལྷ་ཚོགས་རྣམས་ཀྱིས་ལྷག་མ་མེད་པར་ཧབ་དིར་གྱིས་རོལ་པར་བསམ་ཞིང་བསྔོའོ། །ལྔ་པ་བཅང་བའི་ཚུལ་ལ་གསུམ་གྱི། དང་པོ་རྟེན་གཏོར་ནི། གནས་དགོན་ཇི་སྲིད་གནས་ཀྱི་བར་དེ་སྲིད་མི་གཡོ་མི་བསྒུལ་ཞིང་བྱིན་རླབས་གསོ་བའི་ཕྱིར་ནུབ་རེ་བཞིན་མཐེབ་ཀྱུ་ཆུང་ངུ་རེས་གསོ། །རྒྱུན་དུ་ལྷ་སོ་སོའི་སྐུ་དང་གཉིས་སུ་མེད་པར་བསྒོམས་པ་ལ་རྟག་གཏོར་སོགས་འབུལ་ཞིང༌། ཐུན་མཐའི་ཡེ་ཤེས་བརྟན་བཞུགས་ཀྱང་སྐུ་དང་རྟེན་གཏོར་གཉིས་ཀ་ལ་བྱེད་དོ། །གལ་ཏེ་ཡི་དམ་གྱི་གཏོར་མ་དངོས་སུ་བདུད་རྩིར་ཞུ་བ་སོགས་གྲུབ་པའི་མཚན་མ་ངེས་པ་ཅན་མཐོང་ན་ཡེ་ཤེས་པ་སྐུ་རྟེན་ལ་བསྟིམས་ཤིང་དམ་ཚིག་པ་བདུད་རྩིར་ཞུ་བ་དངོས་གྲུབ་ཏུ་རོལ། ཡང་དམ་ཅན་གྱི་གཏོར་མ་རྣམས་གནས་དགོན་འཇིག་པ་ལ་ཐུག་པ་དང་བླ་མའི་སྐུ་དགྲ་སོགས་བསྟན་པ་སྤྱིའི་དོན་དུ་འབྱུང་ན། བསྙེན་སྒྲུབ་ལས་རུང་གི་སྔགས་པས་ཡེ་ཤེས་པ་སྐུ་ལ་བསྟིམས་ནས། དེ་ཉིད་དྲག་པོའི་མན་ངག་གིས་ཟོར་དུ་འཕང་ཞིང༌། དེ་ལྟ་བུའི་དགོས་པ་མེད་ན་གཡོ་བསྒུལ་གཏན་ནས་མི་བྱ་སྟེ། རྣལ་འབྱོར་པ་གཏོར་མའི་རིམ་ཞིག །སྨན་རཀ་མཚོ་མ་སྐམ། ཞེས་པའི་ངག་སྒྲོས་དེ་ [14a] ཡང་འདི་ཡིན་ནོ། །གཉིས་པ་རྟག་གཏོར་ནི། ལོ་ཟླའི་དུས་ཚིག་ངེས་པ་ཅན་དེ་སྲིད་དུ་མི་བསྒུལ་བར་སྤྱན་རྟེན་མཆོད་པའི་ཚུལ་དུ་འཇོག་ཅིང་ནུབ་རེ་བཞིན་མཐེབ་ཀྱུས་གསོ་བ་དང་བྱིན་གྱིས་བརླབས་ནས་འབུལ་བ་རྣམས་བྱེད། ལོ་ཟླའི་བརྗེ་མཚམས་ལ་བབས་པ་ན་ཁྱད་པར་གྱི་དུས་དང་འབྲེལ་བར་གཏོར་མ་རྣམས་ཁ་ལེགས་པར་གསོས། ཁ་ཟས་བཟང་པོ་གཞན་དུ་མས་ཀྱང་གསར་དུ་བརྒྱན་ལ། མཆོད་བསྟོད་སྐོང་བཤགས་ཕྲིན་ལས་གསོལ་བ་རྣམས་རྒྱས་པར་བྱས་ཏེ་སྒྲུབ་ཁང་གི་ཡང་ཐོག་སོགས་སུ་འབུལ། དེའི་ཕྱི་ལ་ནུབ་གཞན་གྱིས་བར་མ་ཆོད་པར་སྔར་ལས་མི་དམན་པའི་གཏོར་མ་ལེགས་པར་བཤམ་ཞིང་བྱིན་གྱིས་བརླབ་པ་སོགས་འཛུག་དུས་ལྟར་རྒྱས་པར་བྱའོ། །གལ་ཏེ་རྣལ་འབྱོར་པའི་ལུས་སྲོག་ལོངས་སྤྱོད་ལ་འཁུ་བའམ། བསྟན་པའི་སྤྱི་དགྲ་ལངས་པ་དང་ནད་ཡམས་ཁ་མཆུ་སོགས་རྐྱེན་གློ་བུར་བ་བྱུང་ན་སྟོབ་པ་དྲག་པོའི་ལས་རིམ་དང་སྦྲེལ་ནས་བརྗེ་ཞིང༌། དེ་ལྟར་མིན་ཡང་གཏོར་མ་རུལ་བའམ་འགྱེལ་ཞིང་སྲོག་ཆགས་ཀྱི་གནོད་པས་ཡིད་མ་བདེ་བ་སོགས་བྱུང་ན་བར་ཆད་ཀྱི་ཉེན་ཡོད་པས་དེའི་ཆོ་ལོང་བཏང་ནས་བརྗེ་དགོས་ཤིང༌། སྐབས་དེར་ནི་སྐོང་བ་མང་དུ་བསགས་ [14b] པ་དང་བཤགས་པའི་དུས་སུ་ཡི་གེ་བརྒྱ་བ་འབུམ་ཕྲག་སོགས་བཟླས་པས་འཁོན་གཅུག་བྱང་སྟེ་འདོད་འབྲས་མྱུར་དུ་འགྲུབ་པའི་དགོས་པ་ཡོད་དོ། །གསུམ་པ་རྒྱུན་གཏོར་རམ་ཐུན་གཏོར་ནི། ཉིན་རེ་བཞིན་ཆོ་གའི་ཐུན་ཐ་མའི་ཚེ་གཏོང་ཞིང་བསྙེན་སྒྲུབ་སོགས་གལ་ཆེ་བའི་དུས་སུ་ཐུན་རེ་རེ་བཞིན་ཡང་གཏོར་མ་འབུལ། གཏོར་སྒྲུབ་ཉི་མ་སྦྲེལ་བར་བྱེད་པའི་ཚེ་སྒྲུབ་པ་མ་ཐོན་གྱི་བར་དུ་རྒྱུན་གཏོར་རྒྱས་པ་གཏའ་མར་འཛུག་ཅིང༌། ཉིན་རེ་བཞིན་ཐུན་གཏོར་བཟང་བ་རེ་བཤམས་ནས་འབུལ། ཆོ་ག་གྲོལ་བའི་ཉིན་རྒྱུན་གཏོར་དེ་ཉིད་སྒྲུབ་ཁང་གི་ཡང་ཐོག་སོགས་ནས་གཏོར་མ་རྒྱས་པའི་ཆོ་ག་དང་སྦྱར་རོ། །དེ་ལྟར་གོང་དུ་སྨོས་པའི་གཏོར་མའི་ཚུལ་འདི་དག་གནས་གཅིག་ཏུ་རྩེ་གཅིག་སྒྲུབ་པའི་དབང་དུ་བྱས་ཀྱི། གསང་སྔགས་སྔ་འགྱུར་བའི་ཁྱད་ཆོས་གཏོར་མ་གཅིག་གི་ཤེས་པ་བཞི་ལྡན་སོགས་སུ་གསུངས་པའང་ཡོད་དེ། མན་ངག་གཅེས་ལྡེ་ལས། ལག་ལེན་ཤེས་པ་བཞི་ལྡན་ཏེ༔ བ་ལིཾགཏོར་མ་ཆེན་པོ་ཉིད༔ མཆོད་པར་ཤེས་དང་ལྷར་ཤེས་དང་༔ དམག་དཔུང་ཤེས་དང་ཟོར་ཤེས་བྱ༔ ཞེས་པས། མཆོད་པའི་སྐབས་མཆོད་རྫས། སྒྲུབ་པ་དང་དབང་དུས་ལྷར། ཟློག་པ་ལ་དམག་དཔུང༌། འཕང་བ་ལ་ཟོར་དུ་ཤེས་པར་བྱ་བའམ། ཡང་ན་སྒྲུབ་དུས་ལྷར། མཆོད་ [15a] དུས་དམ་རྫས། གྲུབ་ནས་དངོས་གྲུབ་ཏུ་ཤེས་པ་སྟེ། ནོར་བུ་གཅིག་ཉིད་དར་གྱི་ཚོན་མདོག་གིས་ཁ་དོག་མང་པོར་སྣང་བ་ལྟར་བསམ་པའི་རང་གཟུགས་སྣ་ཚོགས་སུ་འགྱུར་བས་གང་ཡང་མོས་པ་ཁོ་ནའི་རྗེས་སུ་འབྲང་བའི་ཕྱིར། སྒྲུབ་མཆོད་གཏོར་ཟློག་སོགས་ཞག་དུས་གྲངས་བཅད་ཅན་རྣམས་ལ་མཆོད་སྒྲུབ་གཏོར་མ་གཅིག་ཁོ་ནས་འཐུས་པར་མཛད་དོ། དེ་ལས་འཕྲོས་པའི་མཆོད་རྫས་གཞན་ནི། མ་ནིང་གི་ཐོད་པར་རྩ་བརྒྱད་སྟོང་སྦྱར་ཛ་གད་དང་སྦྱར་བའི་བདུད་རྩི། མོ་ཐོད་དུ་རཀྟ་སོ་ལྔ་པ་སྦྱར་བའི་ཁྲག་གཙང༌། ཏིང་ཕོར་སོགས་སུ་ཆུ་གཉིས་ཉེར་སྤྱོད་ལྔ་སྤྱི་ལྟར་དང༌། ཐོད་པའམ་ལྕགས་སྣོད་དུ། ཁྲག་གཙང་སྨན་ཕབས་ཀྱིས་སྦག་པའི་མཆོད་ཡོན། དུག་སྣ་ཁྲག་སྣ་མྱོས་བྱེད་ཆུ་སེར་དང་སྦྱར་བའི་ཞབས་བསིལ། ཟན་ལ་མིའི་སྙིང་གཟུགས་བྱས་པར་ལྕེ་དང་སྣ་གཉིས་སྟེང་དུ་བརྩེགས་པའི་གཡས་གཡོན་དུ་མིག་དང་རྣ་བའི་གཟུགས་རྣམས་ཚོན་གྱིས་བསྒྱུར་ཞིང་དངོས་ཉམས་དག་པར་བྱས་པའི་དབང་པོའི་མེ་ཏོག་འབྲུ་ནག་གི་ཚོམ་བུར་བཙུགས་པ། གུ་གུལ་ཚིལ་ཆེན་སྒོག་སྐྱ་བཙན་དུག་རཀྟ་རྣམས་རེང་བུ་ལ་སྦྱར་བའི་བདུག་སྤོས། མིའི་རྐང་མར་ཚིལ་ཞུན་འབྲུ་མར་དང་སྦྱར་བ་རོ་རས་ཀྱི་སྡོང་བུ་ལ་སྤར་བའི་མར་མེ། མཁྲིས་ཆེན་བདུད་ [15b] རྩི་ལྔ་དང་སྦྱར་བའི་དྲི་ཆབ། ཤ་དང་རུས་པ་སྣ་ཚོགས་ཀྱི་ཕྱེ་མ་སྤོད་ཀྱིས་བྲན་པ་རཀྟས་སྦྲུས་པའི་དཔལ་གྱི་ཞལ་ཟས་གྲུ་གསུམ་རྣམས་ཕྲེང་བར་སྤེལ་ཏེ་བཀོད། གཞན་ཡང་རྒྱུད་ལས། སྤྱང་ཀུ་འཕར་བ་ཝ་དང་ཁྱི། །ཤྭ་ན་མ་ཡི་རྫས་སུ་བཞག །མར་ཁུ་ཞག་དང་འོ་མ་ཁྲག །བསྭེ་མོ་བཞི་ཡི་རྫས་སུ་བཞག །མདའ་དར་སྟག་རས་གཟིག་རས་རྣམས། །སྐྱེས་བུ་གིང་གི་རྫས་སུ་བཞག །ལུག་ནག་རྟ་ནག་ནལ་བུའི་ཤ། །རེ་མ་ཏཱི་ཡི་རྫས་སུ་བཞག །ཅེས་གསུངས་པ་ལྟར། སོ་སོའི་བཤོས་བུ་མཐུན་རྫས་ཀྱིས་གཏམས་པ། ཤྭ་ན་ཤར་ལྷོ། བསྭེ་མོ་ལྷོ་ནུབ། གིང་ནུབ་བྱང༌། རེ་མ་ཏཱི་བྱང་ཤར་དུ་འཇོག་པའམ། ཡང་ན་ཤྭ་ན་ཤར། བདག་ཉིད་ལྷོ། ས་བདག་ནུབ། གིང་བྱང་དུ་བཞག་སྟེ། རྫས་ཡོད་ན་དམ་ཅན་རང་ཤུགས་སུ་འདུ་ཞིང་ལས་བྱེད་དོ། །ཚོགས་ཀྱི་ཡོ་བྱད་ནི། རྒྱུད་མྱང་འདས་ལས། ཛ་གད་ཚེ་དང་ཚིམས་བྱེད་གསུམ། །ཀུན་ཏུ་རྒྱུ་དང་གལ་ཕྱེ་ལྔ། །ཀ་ཏ་རི་ལ་ཟླ་ཚེས་བདུན། །ཟླ་ཁྲོམ་ཟླ་རྒྱས་མངར་གསུམ་རྫས། །སྒྲུབ་པ་ཚོགས་ཀྱི་རྫས་སུ་བསགས། །ཞེས་པ་ལྟར་འདུ་བྱའོ། །བཞི་པ་བྱུག་བདུག་བརྡེག་གསུམ་ནི། རྒྱུད་ལས། ཁྲོས་པའི་རྒྱལ་པོ་བསྐུལ་བའི་ཕྱིར། །ཉུང་ནག་བྱིན་རླབས་ཁྲོ་ཆུང་བསྐྱེད། །ཕུར་པ་ངར་རྣམས་བསྐྱེད་པའི་ཕྱིར། །ལྕེ་སོག་ [16a] ནག་པོའི་དུ་བས་བདུག །གདུག་པ་བརླག་པར་བྱ་བའི་ཕྱིར། །ར་ཁྱི་ཕག་པའི་ཁྲག་གིས་བྱུག །ཅེས་གསུངས་པ་ལྟར་ཡུངས་ཀར་ནག །གུ་གུལ་ནག་པོ། ར་ཁྱི་ཕག་གསུམ་གྱི་ཁྲག་བཅས་ཐོད་པའམ་ཟངས་ལྕགས་ཀྱི་སྣོད་དུ་ཉེ་བར་བསྔོགས་ལ་ཕུར་བུ་བྱིན་གྱིས་རློབ་པའི་ཚེ་བྱུག་བདུག་བྲབ་གསུམ་བྱའོ། །ལྔ་པ་རྔ་དང་དུར་ཁྲོད་ཀྱི་རྫས་ནི། ཐོད་པའི་རྡེའུ་ཆུང་དང༌། སེང་ལྡེང་སོགས་དྲག་པོའི་ཤིང་ལས་བཟོས་ཤིང་ཞིང་ཆེན་པགས་པ་སོགས་ཀྱིས་གཡོགས་ནས་ནང་ངོས་སུ་སྙིང་པོ་དང་འབོད་བསྐུལ་གྱི་སྔགས་བྲིས་པའི་རྔ་ཆེན་དང༌། རྐུན་ལག་སོར་མོ་བསྐུམ་པའི་རྔ་དབྱུག་དངོས་སམ་གཟུགས་བརྙན་གྱི་ཞིང་ཆེན་གྱི་བླ་བྲེ། ཞིང་ཆུང་གི་ཟར་ཚགས། ཙིཏྟའི་ཕོ་ཏོ། བྷནྡྷ་སྐམ་རློན་གྱི་ཚར་ཚར། རྒྱུ་རློན་གྱི་དྲྭ་ཕྱེད། ཀེང་རུས་དང་སྟག་གཟིག་གི་རྒྱལ་མཚན། ནང་ཁྲོལ་གྱི་འཕྱང་འཕྲུལ། སྦྲུལ་ནག་གི་ཆུན་པོ། མི་ལྤགས་དང་དར་ནག་གི་གཡབ་མོ། ཤ་རུས་ཐང་མར་བརྡལ་བར་བྱ་སྟེ། དེ་རྣམས་ཀྱི་དགོས་པ་ཧེ་རུ་ཀའི་ཕོ་བྲང་དུར་ཁྲོད་ཀྱི་གཞལ་ཡས་ཁང་དུ་མཐོང་ནས་མ་མོ་དང་མཁའ་འགྲོ་རང་བཞིན་གྱིས་འདུ་ཞིང༌། ལོག་འདྲེན་འབྱུང་པོ་ཉེ་མི་ནུས་ལ། རྣལ་འབྱོར་པར་ཏིང་ངེ་འཛིན་སྒྲུབ་པའི་རྐྱེན་བྱེད་པ་སོགས་ཡོན་ཏན་མཐའ་ཡས་པ་དང་ལྡན་ [16b] པ་སྟེ། མྱང་འདས་ཀྱི་རྒྱུད་ལས། བཀའ་བཞིན་བསྒྲུབ་ལ་གཞུང་བཞིན་བྱ། །གཞུང་ལས་འབྱུང་བ་དེ་བྱས་ན། །རབ་ཀྱིས་ཟླ་བ་གཅིག་གིས་འགྲུབ། །འབྲིང་གིས་ལོ་གཅིག་བར་གྱིས་འགྲུབ། །ཐ་མས་ལོ་གསུམ་ཚུན་ཆད་ཀྱིས། །གདོན་མི་ཟ་བར་འགྲུབ་པར་བཤད། །ཅེས་གསུངས་སོ། །དྲུག་པ་སྨད་ལས་དང་འབྲེལ་བའི་བཅས་ལ་གསུམ། ཙཀྲ་འབྲི་བ། རཱུ་པ་བཅའ་བ། རྫས་བསགས་པའོ། །དང་པོ་ནི། འབྲི་མཁན་ལྷའི་རྣལ་འབྱོར་དང་ལྡན་པས་བསང་སྦྱང་སྔགས་ཀྱིས་ཡོ་བྱད་རྣམས་བྱིན་གྱིས་བརླབ་པ་སྔོན་དུ་འགྲོ་བས། འབྲི་བྱ་ཙཀྲ་ལ་སྲུང་ཟློག་གཉིས་ཀྱི། དང་པོ་སྲུང་པའི་ཙཀྲ་ནི། དར་དཀར་རམ་རྒྱ་ཤོག་ལ་མཚལ་ལམ་རྒྱ་སྣག་གིས་མུ་ཁྱུད་རིམ་པ་དགུ་བསྐོར་བའི་ལྟེ་བར་ཧཱུཾ་གི་མཐར་སྙིང་པོ་འབྲུ་བཅུ་བདུན་པ་དང༌། མ་མ་ཀཱ་ཝཱ་ཙི་རཀྵ་རཀྵ༔ ཞེས་སྤེལ་སྔགས་སྦྱར་བ་བྲི། དེ་རྒྱབ་མུ་ཁྱུད་འཁོར་ལོ་རྩིབས་བཞི་པར་ལྟེ་བའི་ཧཱུཾ་གི་མདུན་ཕྱོགས་ཤར་དུ་བྱས་པའི་རྩིབས་སོ་སོར་ཀཱི་ལ་རིགས་བཞིའི་སྙིང་པོ་དང༌། ཤར་ལྷོ་སོགས་རྩིབས་མཆན་བཞི་ལམ་མ་སོགས་སྤེལ་སྔགས་བྲི། དེ་རྒྱབ་མུ་ཁྱུད་རྩིབས་བཅུ་ལ་ཤར་སྟོད་སྟེང་དང་ནུབ་སྨད་འོག་ཏུ་བྱས་ཏེ་ཕྱོགས་མཚམས་མ་འཆོལ་བར། ཨོཾ་བཛྲ་ཀྲོ་དྷ་ཧཱུཾ་ཀཱར་ཧཱུཾ་གརྫ་ [17a] གརྫ་ཧཱུཾ་ཕཊ༔ ཅེས་སོགས་ཁྲོ་བཅུའི་སྔགས་དང༌། རྩིབས་མཆན་རྣམས་སུ་རིམ་བཞིན། སྟེང་ཕྱོགས་ལྷའི་གནོད་པ་སྲུངས་ཤིག་རཀྵ༔ ཤར་ཕྱོགས་དྲི་ཟའི་གནོད་པ་སྲུངས་ཤིག་རཀྵ༔ ཤར་ལྷོ་མེ་ལྷའི་གནོད་པ་སྲུངས་ཤིག་རཀྵ༔ ལྷོ་ཕྱོགས་གཤིན་རྗེའི་གནོད་པ་སྲུངས་ཤིག་རཀྵ༔ ལྷོ་ནུབ་སྲིན་པོའི་གནོད་པ་སྲུངས་ཤིག་རཀྵ༔ ནུབ་ཕྱོགས་ཀླུའི་གནོད་པ་སྲུངས་ཤིག་རཀྵ༔ འོག་ཕྱོགས་ས་བདག་གི་གནོད་པ་སྲུངས་ཤིག་རཀྵ༔ ནུབ་བྱང་རླུང་ལྷའི་གནོད་པ་སྲུངས་ཤིག་རཀྵ༔ བྱང་ཕྱོགས་གནོད་སྦྱིན་གྱི་གནོད་པ་སྲུངས་ཤིག་རཀྵ༔ བྱང་ཤར་འབྱུང་པོའི་གནོད་པ་སྲུངས་ཤིག་ཀྵ༔ ཞེས་བྲི། དེ་རྒྱབ་མུ་ཁྱུད་ཆེ་གསུམ་དུ་བགོས་པའི་གཡས་ཀྱི་ཆར་ཀརྨ་ཀྲོ་དྷ་སོགས་སྲས་མཆོག་གི་སྙིང་པོར་མ་མ་ཀཱ་ཡ་རཀྵ༔ ཞེས་རེ་རེ་བཞིན་སྦྱར་བ་བདུན། གཡོན་གྱི་ཆར་ཝཱ་ཀ་རཀྵ་སྦྱར་བ་བདུན། མདུན་གྱི་ཆར་ཙིཏྟ་རཀྵ་སྦྱར་བ་བདུན་རེ་བཅས་བྲི། དེ་རྒྱབ་མུ་ཁྱུད་ཆ་བཞིར་བགོས་པར་སྒོ་སྐྱོང་བཞིའི་སྙིང་པོར་གོང་བཞིན་སྤེལ་སྔགས་སྦྱར་བ་བྲི། དེ་རྒྱབ་མུ་ཁྱུད་ལ་བཞི་སྙིང་གཅིག་དྲིལ་ཚར་གཅིག་གིས་འཁོར་བ་བྲི། མ་ཁེང་ན་སྤེལ་ཚིག་གང་འོས་སྦྱར། དེ་རྒྱབ་མུ་ཁྱུད་ལ། དེང་འདིར་བདག་ཅག་ [17b] དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་ཕ་རོལ་གྱི་བྱད་ཕུར་རྦོད་གཏོང་ལྷ་སྲིན་སྡེ་བརྒྱད་ཕྱོགས་བཅུའི་གདོན་བགེགས་ཀྱི་གནོད་བ་ལོ་ཟླ་ཞག་དུས་ཀྱི་ཀེག་སྲི་རྨི་ལྟས་མཚན་ངན་མི་ཁ་བྲ་མཆུ་ཆགས་ཆེ་ཉམ་ང་མི་མཐུན་པའི་ཕྱོགས་ཐམས་ཅད་ལས་བསྲུང་བར་མཛད་དུ་གསོལ། སྐྱོབ་པར་མཛད་དུ་གསོལ། སྦ་བར་མཛད་དུ་གསོལ་སྭཱ་ཧཱ། ཞེས་སོགས་འདོད་གསོལ་ཇི་ལྟར་རིགས་པ་བྲི། དེ་རྒྱབ་མུ་ཁྱུད་ལ་དབྱངས་གསལ་དང་རྟེན་སྙིང༌། དེ་རྒྱབ་རྡོ་ར། དེ་རྒྱབ་མེ་རི་གཡས་སུ་འཁོར་བ་བྲི། ཡི་གེ་རྣམས་མགོ་ཕྱིར་བསྟན་བྱ། བཟང་པོ་དྲུག་དང་བདུད་རྩི་ཆོས་སྨན་གྱིས་བྱུགས། ཚོན་ཐོབ་ལྟེ་བ་མཐིང༌། རྩིབས་རྣམས་སྔོ། རྩིབས་མཆན་སེར། མུ་ཁྱུད་མཛེས་ཚོན། རྡོ་ར་མེ་རི་སྤྱི་མཐུན་ནོ། །གཉིས་པ་ཟློག་འཁོར་ནི། དུག་ཤོག་ལ་དུག་ཁྲག་བསྲེས་པའི་སྣག་ཚས་མུ་ཁྱུད་རིམ་པ་དགུ་བསྐོར་བའི་ལྟེ་བར་ཧཱུཾ་གི་མཐར་སྙིང་པོ་འབྲུ་བཅུ་བདུན་པའི་གཤམ་དུ། དགྲ་བགེགས་འབྱུང་པོ་ནྲྀ་ཤ་ཀྲོ་དྷ་མཱ་ར་ཡ་བྷྱོ་ཟློག༔ ཅེས་བྲི། དེ་རྒྱབ་རྩིབས་བཞི་ལ་མདུན་ནས་གཡས་སྐོར་དུ། ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་མཱ་ར་ཡ་ཧཱུཾ་ཕཊ༔ དེས་འགྲེས་ཏེ། རཏྣ། པདྨ། ཀརྨ། ཞེས་བསྒྱུར་བ་དང༌། རྩིབས་མཆན་བཞིར་ཟློག་སྔགས་ཤམ་བུ་གོང་ [18a] བཞིན་བྲི། དེ་རྒྱབ་རྩིབས་བཅུ་ལ། ཨོཾ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་དགྲ་བགེགས་མཱ་ར་ཡ་ཧཱུཾ་ཕཊ༔ ཅེས་སོགས་ཁྲོ་བཅུའི་སྔགས་གོ་རིམ་མ་ལོག་པ་དང༌། རྩིབས་མཆན་རྣམས་སུ། སྟེང་ཕྱོགས་ལྷ་ཡི་གནོད་པ་ཟློག༔ ཅེས་སོགས་སྲུང་བའི་སྐབས་ལྟར་ཁ་བསྒྱུར་བ་བྲི། དེ་རྒྱབ་མུ་ཁྱུད་ལ། ཨོཾ་ཀརྨ་ཀྲོ་དྷ་བཛྲ་ཀཱི་ལི་ཀཱི་ལ་ཡ་དགྲ་བགེགས་མཱ་ར་ཡ་ཧཱུཾ་ཕཊ༔ ཅེས་བདུན་གསུམ་ཉེར་གཅིག་གིས་འཁོར་བ་བྲི། དེ་རྒྱབ་མུ་ཁྱུད་ཀྱི་ཕྱོགས་བཞིར་སྒོ་སྐྱོང་བཞིའི་སྔགས་ལ་ཟློག་སྔགས་ཤམ་བུ་སྦྱར་བ་བྲི། དེ་རྒྱབ་མུ་ཁྱུད་ལ་བཞི་སྙིང་གཅིག་དྲིལ་ཟློག་ཤམ་ཅན། དེ་རྒྱབ་མུ་ཁྱུད་ལ་སྤུ་གྲིའི་དྲག་སྔགས་ཟློག་ཤམ་ཅན་དང༌། དེ་རྒྱབ་མུ་ཁྱུད་ལ། དེང་འདིར་བདག་ཅག་སོགས་འདོད་གསོལ་སྲུང་བའི་སྐབས་ལྟར་ལས། མི་མཐུན་པའི་ཕྱོགས་ཐམས་ཅད་ཕྱིར་བཟློག་པར་གྱུར་ཅིག་མེད་པར་གྱུར་ཅིག་ཞི་བར་གྱུར་ཅིག་ཅེས་བྲི། དེ་རྒྱབ་མུ་ཁྱུད་ལ་མཚོན་ཆ་སྣ་ཚོགས་རྩེ་མོ་ཕྱིར་བསྟན་པ། དེ་རྒྱབ་མེ་རི་གཡོན་འཁོར་དུ་བྲི། ཡི་གེ་རྣམས་མགོ་ནང་དུ་བསྟན། བོང་ཐང་ཕྲོམ་གྲི་ཁྲག་ཐལ་ཆེན་གུ་གུལ་ནག་པོས་བྱུགས། ཚོན་ཐོབ་གོང་བཞིན་ནོ། །དེ་ལྟར་སྲུང་ཟློག་སོགས་ཀྱི་འཁོར་ལོ་གང་ལའང་འབྲི་གཞི་ལ་རལ་རྡོལ་མེད་པ། རྩིབས་ཀྱི་རྩ་རྩེ་མུ་ཁྱུད་ལ་མ་རེག་ཅིང༌། མུ་ཁྱུད་རྣམས་མ་ཆད་པ། སྟེང་འོག་གི་དབྱེ་བ་ཐ་དད་པའི་སྔགས་དང་ཤམ་བུ་སོགས་མ་འཁྲུགས་ [18b] པ། ཡི་གེ་འབྲི་འཕྲོ་ལུས་པ་ལྟར་མ་ཁེངས་པས་འབྱམས་པ་དང་མ་ཤོང་བས་ཡི་གེ་ཕན་ཚུན་འབྲེལ་བ་སོགས་མ་ཡིན་ཅིང་ཡིག་ཕྲེང་འཁྱོགས་འཆུས་མ་འཁྲུགས་པ། མིག་ཟུམ་པ་བྲིས་བསུབས་ལྷག་ཆད་སོགས་ཀྱི་སྐྱོན་མེད་པར་བྱ་སྟེ། ཕན་གནོད་ཀྱི་ལས་རྣམས་བྱེད་རྐྱེན་རིག་སྔགས་ཀྱི་སྦྱོར་བ་དང་རྫས་ཀྱི་ཁྱད་པར་ཕྲ་མོ་ལའང་ལྟོས་པས་ན་བློ་བཟོ་དང་རས་ཆོད་མི་བྱ་བར་དཔེའུ་རིས་དང་སྔགས་བྱང་གུང་སྤྲད་དེ་དག་ཅིང་ཡིད་གཞུངས་པར་བྱས་ལ་བྲི། དེ་ལྟར་བྲིས་ཟིན་པ་ན་དེ་ཉིད་སྒྲུབ་པའི་ཚུལ་ནི། ལྟ་བ་དང་ཏིང་འཛིན་ལས་སུ་རུང་བའི་སྔགས་པས་ནི་བྲིས་པ་ཉིད་ནས་རབ་ཏུ་གནས་པར་ཡང་འགྱུར་མོད། འོན་ཀྱང་གང་ཟག་གཞན་རྣམས་མཚན་མའི་ཆོ་ག་ཁོ་ན་ལ་ལྟོས་པས་ན། སྟེགས་བུའི་དབུས་སུ་མཉྫིའི་ཁར་རིན་པོ་ཆེའི་སྣོད་འབྲུས་བཀང་བའི་ནང་དུ་སྲུང་བའི་འཁོར་ལོ་བཀྲམ་ལ་མཐར་མཆོད་པས་བསྐོར། བདག་གི་རྣལ་འབྱོར་ལ་གནས་པའི་སྒོ་ནས་འཁོར་ལོ་ལ་སྦྱོང་ཁྲུས་མདོར་བསྡུས་ཙམ་སྤྱི་ལྟར་བྱས་ནས། བསང་སྦྱངས། སྟོང་པའི་ངང་ལས་ཧཱུཾ་ཡིག་ལས་བྱུང་བའི་རྡོ་རྗེའི་གུང་ཁར་མེའི་རབས་ཡོངས་སུ་བསྐོར་བའི་ནང་དུ་འཁོར་ལོ་རྟེན་གྱི་དཀྱིལ་འཁོར་ཆེན་པོར་གྲུབ་པའི་ལྷ་གནས་སུ་ཧཱུཾ་ལས་དཔལ་ཆེན་རྡོ་རྗེ་གཞོན་ནུ་ཡབ་ [19a] ཡུམ་རང་རྩལ་སྤྲུལ་པའི་འཁོར་ཚོགས་དང་བཅས་པ་སྐད་ཅིག་གིས་གསལ་བར་གྱུར་བའི་སྤྱི་བོར་ཨོཾ། མགྲིན་པར་ཨཱཿཐུགས་ཀར་ཧཱུཾ་གིས་མཚན་པ། ཧཱུཾ་གི་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས་པར་མོས་པ། ཧཱུཾ༔ ཆོས་ཀྱི་དབྱིངས་ཀྱི་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུ་ཆེ༔ ཡབ་ཡུམ་འཁོར་དང་བཅས་པ་རྣམས༔ རང་བཞིན་དབྱིངས་ནས་སྤྱན་འདྲེན་ན༔ འཁོར་ལོ་འདི་ལ་བརྟག་པར་བཞུགས༔ མཐུ་དང་བྱིན་རླབས་དངོས་གྲུབ་སྩོལ༔ ཚེ་སྲིངས་དཔལ་སྐྱེད་གཟི་བརྗིད་སྤེལ༔ གདོན་དང་ནད་དང་གནོད་པ་སྲུངས༔ ས་མ་ཡ་ཨ་བེ་ཤ་ཡ་ཨཱཿ ཞེས་ཡེ་ཤེས་ཀྱི་འཁོར་ལོ་བསྲུང་བྱའི་མིང་ཡིག་དང་པོའི་རྣམ་པས་སྤྱན་དྲངས་པ་དམ་ཚིག་གི་འཁོར་ལོ་ལ་ཛཿཧཱུཾ་བཾ་ཧོཿ ས་གཉིས་མེད་དུ་ཐིམ་པར་བསམ་ཞིང༌། མཆོད་བསྟོད་མདོར་བསྡུས་ཙམ་བྱ། ལྷ་རྣམས་འོད་དུ་ཞུ་བ་འཁོར་ལོར་གྱུར་པའི་སྔགས་ཕྲེང་རྣམས་ལས་ཡེ་ཤེས་བདུད་རྩིའི་རང་བཞིན་ཅན་གྱི་འོད་ཟེར་འཕྲོས་པ་སྤྲིན་བཞིན་འཁྲིགས་ནས་བསྲུང་བྱའི་མིང་ཡིག་ལ་གོ་ཆ་བཞིན་བགོས་ཏེ་ཅིས་ཀྱང་མི་ཤིགས་པ་རྡོ་རྗེའི་རང་བཞིན་དུ་བཅིངས་པར་བསམ་ལ། རྩ་སྔགས་ལ་སྲུང་སྔགས་བཏགས་པ་བརྒྱ་རྩ་དང༌། རྟེན་འབྲེལ་ [19b] སྙིང་པོ་ཉེར་གཅིག་གིས་བསྔགས་པའི་མེ་ཏོག་འཐོར་ཞིང་ཤིས་བརྗོད་བྱ། སྒྲུབ་པ་ཐོན་ནས་ལྟེ་བ་མ་ཉམས་པར་བལྟེབས་ལ་ཚོན་སྐུད་སྣ་ལྔས་བཅིངས་ཏེ་བསྲུང་བྱའི་མགུལ་དུ་གདགས་པའམ། པུ་རིའི་ལྟེ་བའམ་གནས་ཁང་གི་ཐོག་ཁར་དབུབ་པ་སོགས་བྱའོ། །ཟློག་འཁོར་རབ་གནས་ལ། སྟོང་པའི་ངང་ལས་ཧཱུཾ་ཡིག་ལས་བྱུང་བའི་འཁོར་ལོ་རྟེན་གྱི་དཀྱིལ་འཁོར་ཆེན་པོར་གོང་བཞིན་གསལ་ནས། སྤྱན་འདྲེན་སྐབས་ཚེ་སྲིངས་དཔལ་སྐྱེད་སོགས་ཚིག་རྐང་གཉིས་ཀྱི་མལ་དུ། གནོད་བྱེད་དགྲ་བགེགས་ཉམས་པའི་ཚོགས། །ཕྱིར་ཟློག་ཚར་གཅོད་ཕྲིན་ལས་མཛོད། །ཅེས་བསྒྱུར། མཐར་ལྷ་རྣམས་འོད་དུ་ཞུ་བ་འཁོར་ལོར་གྱུར་པའི་སྔགས་ཕྲེང་རྣམས་ལས་འོད་ཟེར་དྲག་ཅིང་རྩུབ་པ་མེ་སྟག་གི་ཚྭ་ཚྭ་ལྟ་བུ་འཕྲོས་པས་དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་རྩ་སྦུར་མེས་བསྲེགས་པ་བཞིན་དུ་སོང་བའི་དམིགས་པ་དང་བཅས་རྩ་སྔགས་ལ་ཟློག་སྔགས་བཏགས་པ་བརྒྱ་རྩ་སོགས་ཀྱིས་བྱིན་གྱིས་བརླབ། ཟློག་པ་གྲུབ་ནས་མེ་ལ་སྲེག་གོ །གཉིས་པ་རཱུ་པ་བཅས་བ་ལ། བསད་འཁོར་ལིངྒ་དངོས་དང༌། མནན་པའི་བསྒྱུར་ཁ་བཤད་པ་གཉིས་ཀྱི། དང་པོ་ནི། རྒྱུ་ལས། ལིངྒ་ [20a] དང་ནི་ཉ་བོ་གཉིས། །དམིགས་པ་གཅིག་སྟེ་རྒྱུ་མི་གཅིག །ལིངྒ་ཉ་བོའི་སྙིང་གར་གཞུག །ཅེས་པས་ཐོག་མར་ཉ་བོ་བཅའ་སྟེ། དུར་ཁྲོད་ཀྱི་འཇག་མ་ཡུགས་སྐྲའམ་རོ་རས་ཀྱི་སྐུད་པས་བསྡམས་པའི་རུས་ཤིང་ལ། རྒྱུད་ལས་བཤད་པའི་རྒྱུ་དྲུག་ཕར་རྐན་ཚུར་རྐན་མི་བསྐྱོད་ཤུལ་ཏེ་ས་གཉིས། གངས་ཀྱི་དུམ་བུ་རྣམ་སྣང་ཤུན་རས་ཏེ་དྲི་མ་གསུམ། དཔག་བསམ་གྱི་ལོ་མ་བཅས་གྲོག་མཁར་དང་ཕུང་ཤུལ་གྱི་ས་ལ་བསྲེས་ཏེ་རཱུ་པ་སྐྱེ་མཆེད་དོད་པའི་གནས་གང་འདོད་དུ་དུག་ཁྲག་ཚད་ནད་གྲིར་བསད་པའི་ལས་དང་སྦྱར་ལ་དུག་ཁྲག་དྲོད་སྨན་གྲི་ཁྲག་བསྣན། བགེགས་ལ་བྱེད་ན། རི་རུལ་གྲོག་པོ་ཕུག་རྡུག་ལྷ་ཁང་དང་མཆོད་རྟེན་རྙིང་པ་འདྲེ་འཚུབས་པ་རྣམས་ཀྱི་སའམ། བགེགས་གང་ཡིན་དེའི་རྟེན་གྱིས་བོང་བུའི་གཅིན་གྱིས་སྦྲུལ་ལ་རྐང་པ་ཕྱིར་བསྟན་པའི་གཟུགས་སམ། རྨི་ལམ་དུ་གང་གནོད་ཀྱི་གཟུགས་ལ་སོགས་པ་བྱ། དེའི་སྙིང་གར་ལིང་ག་བཅའ་སྟེ། འབྲི་མཁན་གིང་གི་ཏིང་ངེ་འཛིན་དུ་ཞུགས་ལ་ཤ་ཆེན་ཁྲག་ཆེན་མུར། སྐྲ་སྤྱི་བོརབཅིངས། ལག་གཡས་དཔུང་པ་མན་ཆད་ཁྲག་ཆེན་གྱིས་བྱུགས་ལ། བྲི་གཞི་ཕོ་མོ་གང་བྱེད་སོ་སོར་གྲིར་ [20b] ཤི་བའི་པགས་པའམ་རོ་རས་དེའི་སྙིང་ཁྲག་གི་སྣག་ཚ་མཆོག་ཕུར་གྱི་སྨྱུ་གུའམ། སྤྱི་ཙམ་དུ་དུག་ཤོག་ལ་དུག་ཁྲག་སྦྱར་བས་དུག་ཤིང་ཚེར་མ་ཅན་ནམ་མི་གསོད་པའི་མདས་སྨྱུ་གུ་བྱས་ཏེ། རྒྱལ་པོ་ལ་རྐྱང་ཁྲུ་གང༌། བནྡྷེ་ལ་བསྐུམ་ཁྲུ་གང༌། སྐྱེས་པ་ལ་མཐོ་གང༌། བུད་མེད་ལ་མཛུབ་གང༌། བྱིས་པར་སོར་བཞི། བགེགས་ལ་ཆག་གང་བའི་རང་གཟུགས་རིད་ཅིང་སྐྱེ་མཆེད་དོད་པ་བསོད་ནམས་དང་མཐུན་པའི་ཚད་ཅན་དུ་བྲི། དངོས་གཞི་སྲོག་གཅོད་སྤུ་གྲིའི་འཁོར་ལོ་ནི། མུ་ཁྱུད་གསུམ་པའི་ལྟེ་བ་ཤིན་ཏུ་ཡངས་པར་འཁོར་ལོ་རྩིབས་དྲུག་པར་ལག་གཉིས་མགོ་བོ་བཅས་རྩིབས་གསུམ་ལ་གཟུད། རྐང་པ་གཉིས་གསང་བ་བཅས་རྩིབས་གསུམ་ལ་གཟུད། སྙིང་གར་ཛ་ཁ་སྤྲོད་ཀྱི་བར་དུ་ནྲྀའམ་ཏྲིའི་མཐར་མིང་དང༌། དཔྲལ་བར་རུས། བརླར་བླ་དྭགས། ཡན་ལག་བཞིར་ཛཿཧཱུཾ་བཾ་ཧོ། སྟེང་དུ་ནན། འོག་ཏུ་ཁུག །གསང་གནས་སུ་ཕཊ། རྐང་མཐིལ་དུ་ཡཾ། རྣ་བར་འོན། མིག་ལ་ལོང༌། ཁ་ལ་དུང་དུང༌། དཔྲལ་བར་ལྷ་དང་དབྲལ་བ། ལྟེ་བར་གཟུགས་ལ་དབབ་པ། ལག་ངར་རྗེ་ངར་ལ་བྱད་དུ་གཞུག་པ། ལྕེ་ལ་སྨྱོ་རུ་གཞུག་པ། སྤྱི་བོར་རྡུལ་དུ་བརླག་པ། འདོམས་ལ་ཞལ་དུ་བསྟབ་པ་སྟེ་ [21a] གབ་པའི་སྔགས་དྲུག་བྲི། ཕྱི་རིམ་མུ་ཁྱུད་ཀྱི་ནང་ངོས་སུ་འཁོར་ལོ་རྩིབས་དགུའི་རྩེ་མོ་ནང་དུ་བསྟན་པའི་རྩིབས་རེ་ལ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ ཅེས་འབྲུ་རེ་བྲི། དེ་རྒྱབ་མུ་ཁྱུད་ལ་ལིངྒའི་མགོ་ཕྱོགས་ནས་བརྩམས་ཏེ་སྤུ་གྲིའི་དྲག་སྔགས་དང༌། དེ་རྒྱབ་མུ་ཁྱུད་ལ་ཨོཾ་ལཾ་ཧཱུཾ་ལཾ་སོགས་ཀྱིས་བསྐོར་བ་བྲི། མཐར་ཛ་ཁྲམ་ཉེར་བརྒྱད་ཀྱིས་བསྐོར་རོ། །གཉིས་པ་མནན་པའི་བསྒྱུར་ཁ་ནི། དེའང་གཟུགས་ཅན་དགྲ་མནན་གཙོ་བོར་བྱེད་ན། ལིང་ག་སྤྱི་མཐུན་གྱི་བྲང་དཀྱིལ་འཁོར་ལོ་རྩིབས་བརྒྱད་པའི་ལྟེ་བར་རྡོ་རྗེ་རྒྱ་གྲམ་བྲིས་པའི་སྙིང་གར་ནྲྀ། དཔྲལ་བར་དམིགས་བྱའི་རུས་ཤེས་ན་དེ་ཀའི་མཐར་ཁུག་ཛཿབྲི། མ་ཤེས་ན་ཐམས་ཅད་རུས་ཆེན་སྡེ་ལྔར་འདུ་བས། ཇིའུ་ཀུང་ཀེག་ཤངས་ཁུག་ཛཿ ཞེས་བྲི། གནས་ཡིག་རྣམས་གོང་བཞིན་ལས། མནན་ལིང་འདི་རིགས་ལ་གབ་པའི་སྔགས་དྲུག་མི་དགོས། དེ་ནས་རྒྱ་གྲམ་ལྟེ་བར་ནྲྀ་ཡིག་གི་སྟེང་ནས་བརྩམས་ཏེ་ཡིག་མགོ་ཕྱིར་བསྟན་གྱིས་མནན་གཞུང་ལྟར་སྤུ་གྲིའི་དྲག་སྔགས་འགུག་ཤམ་ཅན་དང༌། ཕྱི་རོལ་དུ་མགོ་བོ་ནས་བརྩམས་སྤུ་གྲིའི་མནན་སྔགས་མཐར། དམོད་མོ། སྔ་དགྲ་ལག་གིས་བསྡར་བ་ཐམས་ཅད་མཱ་ར་ཡ་ཆིངས་བྲུབ་ནན། ད་དགྲ་ཐད་དུ་ལངས་པ་ཐམས་ཅད་མཱ་ར་ཡ་ཆིངས་བྲུབ་ནན། ཕྱི་དགྲ་ཞེ་ལ་འཆང་བ་ཐམས་ [21b] ཅད་མཱ་ར་ཡ་ཆིངས་བྲུབ་ནན། སྤྱི་དགྲ་རླུང་ལྟར་འཚུབས་པ་ཐམས་ཅད་མཱ་ར་ཡ་ཆིངས་བྲུབ་ནན། སྒོས་དགྲ་རྦབ་ལྟར་རྒྱུག་པ་ཐམས་ཅད་མཱ་ར་ཡ་ཆིངས་བྲུབ་ནན། ཟུར་དགྲ་ཁྱི་ལྟར་ཟུག་པ་ཐམས་ཅད་མཱ་ར་ཡ་ཆིངས་བྲུབ་ནན། རྐྱེན་དགྲ་ཐོག་ལྟར་འབབས་པ་ཐམས་ཅད་མཱ་ར་ཡ་ཆིངས་བྲུབ་ནན། ཤར་ཤིང་ཁམས་པའི་དགྲ་བོ་ཐམས་ཅད་མཱ་ར་ཡ་ཆིངས་བྲུབ་ནན། ལྷོ་མེ་ཁམས་པའི་དགྲ་བོ་ཐམས་ཅད་མཱ་ར་ཡ་ཆིངས་བྲུབ་ནན། ནུབ་ལྕགས་ཁམས་པའི་དགྲ་བོ་ཐམས་ཅད་མཱ་ར་ཡ་ཆིངས་བྲུབ་ནན། བྱང་ཆུ་ཁམས་པའི་དགྲ་བོ་ཐམས་ཅད་མཱ་ར་ཡ་ཆིངས་བྲུབ་ནན། མཚམས་བཞིས་ཁམས་པའི་དགྲ་བོ་ཐམས་ཅད་མཱ་ར་ཡ་ཆིངས་བྲུབ་ནན། སརྦ་ཏྲིག་ནན་རྦད་ནན་བྷིནྡྷ་ཙིཏྟ་རྦད་ནན་ལཾ་ནན་ནན༔ ཞེས་བྲི། མཐར་ཛ་ཁྲམ་གྱིས་བསྐོར་རོ། །ཡང་འདྲེ་བགེགས་ལ་དམིགས་པའི་སྲི་མནན་གཙོ་བོར་བྱེད་ན། ལིངྒ་བཤད་མ་ཐག་པ་ལྟར་ལ་མི་འདྲ་བའི་ཁྱད་པར་དམ་སྲི་བྱ་མགོ །དུར་སྲི་ཁྲ་མགོ །ཕུང་སྲི་རྔ་མོའི་མགོ །དགྲ་སྲི་གཡག་མགོ །ཕོ་སྲི་སྤྱང་མགོ །མོ་སྲི་ཁྱི་མགོ་ཆུང་སྲི་སྲེ་མོང་མགོ །གོད་སྲི་ཕག་མགོ་སོགས་མགོ་བོ་སོ་སོར་བསྒྱུར། སྙིང་གར་ནྲྀའི་ཚབ་ཏུ་ཏྲི་བྲི། གནས་ཡིག་དང་ལྟོ་བའི་འགུགས་སྔགས། ཕྱི་རོལ་གྱི་མནན་སྔགས་རྣམས་གོང་ [22a] བཞིན་ལས། དམོད་ཚིག་ནི། ལོ་སྲི་ལོ་བཅུ་གཉིས་ལ་འཁོར་བ་ཐམས་ཅད་མཱ་ར་ཡ་ཆིངས་བྲུབ་ནན། ཟླ་སྲི་བཅུ་གཉིས་ཟླ་བར་བབས་པ་ཐམས་ཅད་མཱ་ར་ཡ་ཆིངས་བྲུབ་ནན། ཞག་སྲི་སུམ་ཅུའི་ཞག་ཏུ་འགྱུ་བ་ཐམས་ཅད་མཱ་ར་ཡ་ཆིངས་བྲུབ་ནན། དུས་སྲི་དྲུག་ཅུའི་སྲང་དུ་བསྡིག་པ་ཐམས་ཅད་མཱ་ར་ཡ་ཆིངས་བྲུབ་ནན། དམ་སྲི་སྣང་སྲིད་འབྱུང་བ་དཀྲུག་པ་ཐམས་ཅད་མཱ་ར་ཡ་ཆིངས་བྲུབ་ནན། འགོང་སྲི་བསྟན་སེལ་ཕུགས་སུ་ཞུགས་པ་ཐམས་ཅད་མཱ་ར་ཡ་ཆིངས་བྲུབ་ནན། ཀེག་སྲི་སྤར་སྨེ་དུར་དུ་ཚུད་པ་ཐམས་ཅད་མཱ་ར་ཡ་ཆིངས་བྲུབ་ནན། བྱད་སྲི་སྡེ་བརྒྱད་ཟ་ཁ་ཟུག་པ་ཐམས་ཅད་མཱ་ར་ཡ་ཆིངས་བྲུབ་ནན། ཡོད་སྲི་སྟོང་སྡེའི་མི་ཁ་ཟུག་པ་ཐམས་ཅད་མཱ་ར་ཡ་ཆིངས་བྲུབ་ནན། མེད་སྲི་ལྟོག་འགོང་སྲིས་ལ་རྐུ་བ་ཐམས་ཅད་མཱ་ར་ཡ་ཆིངས་བྲུབ་ནན། བགེགས་སྲི་ཅི་བྱེད་བར་དུ་གཅོད་པ་ཐམས་ཅད་མཱ་ར་ཡ་ཆིངས་བྲུབ་ནན། གནོད་སྲི་འཚེ་བའི་བདུད་རིགས་ཐམས་ཅད་མཱ་ར་ཡ་ཆིངས་བྲུབ་ནན། དགྲ་སྲི་ཕྱོགས་བཞི་མཚམས་ནས་ལྡངས་པ་ཐམས་ཅད་མཱ་ར་ཡ་ཆིངས་བྲུབ་ནན། དུར་སྲི་གཤིན་ཡུལ་འོག་ནས་དོན་པ་ཐམས་ཅད་མཱ་ར་ཡ་ཆིངས་བྲུབ་ནན། [22b] ཕུང་སྲི་སྒོ་བཞིའི་ཟུར་ནས་ལྡངས་པ་ཐམས་ཅད་མཱ་ར་ཡ་ཆིངས་བྲུབ་ནན། མདོར་ན་བར་དུ་གཅོད་པའི་སྲི་ངན་ཐམས་ཅད་མཱ་ར་ཡ་རྦད་ཐུཾ། དྷ་ར་ཡ་དྷ་ར་ཡ་ནན། མཱ་ར་ཡ་མཱ་ར་ཡ་ནན། ཡ་མ་དམ་སྲི་ཀཱ་ཡ་ཝཱཀ་ཙིཏྟ་སྟམྦྷ་ཡ་ནན། ཅེས་དང་ཛ་ཁྲམ་སྔར་བཞིན་བཀོད། ཡང་སྟོད་ལས་སྒྲུབ་ཆེན་སྐབས་ཀྱི་དམ་སྲི་མནན་པ་ལ། ལིང་ག་མི་གདོང་བྱ་རོག་གི་མཆུ་ཅན་སྐྲ་འབལ་བ། ཡན་ལག་ལྕགས་སུ་བཅུག་པའི་སྙིང་གར་ཏྲི་དང་ཛ་ཁ་སྤྲོད་བྲི། དེ་མཐར་མགྲིན་པ་ནས་བརྩམས་ཡིག་མགོ་ཕྱིར་བསྟན་གྱིས། ཡ་མ་དམ་སྲི་གཾ་པ་རི་ཏྲི་ཡཾ་ཛཿ ཏྲིའུ་ཏྲིའུ་ཤོ་ན་ཛཿ པ་རི་ཁུག་ཛཿ ཨེ་ཧུར་ཐུཾ་ཁཾ་ཤག་རོ་མྱག་རྨུག་ཏི་རྦད་ཡཾཿ ཙིཏྟ་གཏུབ་གཏུབཿ རྩ་ཁྲག་སྙིང་ལ་མཱ་ར་ཡ་ཀཱ་ཡ་ཝཱཀ་ཙིཏྟ་སྟཾ་བྷ་ཡ་ནན༔ ཞེས་དང༌། གནས་ཡིག་རྣམས་གོང་བཞིན་བྲི། གཟུགས་ཀྱི་མཐར་ཡིག་མགོ་ནང་བསྟན་གྱིས་དཔུང་པ་གཡས་ནས་བརྩམས། གནོད་བྱེད་དམ་སྲི་རྒྱལ་འགོང་འབྱུང་པོ་ཕོ་མོ་རྣམས་ཀྱི་ལུས་ངག་ཡིད་གསུམ་མཐུ་དང་ནུས་སྟོབས་རྫུ་འཕྲུལ་ཐམས་ཅད་ནོན་ཅིག༔ བསྐལ་པ་མ་སྟོང་གི་བར་དུ་མ་ལྡང་ཞིག༔ ཨོཾ་ལཾ་ཨཱཿལཾ་ཧཱུཾ་ལཾ་སྟྭཾ་བྷ་ཡ་ནན༔ ཞེས་བྲི། [23a] མཐར་ཛ་ཁྲམ་གྱིས་བསྐོར། དེ་དང་འབྲེལ་བར་ཉུ་ལེའི་ལིངྒ་ནི། ལིངྒ་ཁྱིམ་བྱ་མོའི་མགོ་ཅན་གྱི་སྙིང་གར་ཏྲི་དང་ཛ་ཁ་སྤྲོད། དེ་མཐར་མགྲིན་པ་ནས་བརྩམས་ཡིག་མགོ་ཕྱིར་བསྟན་གྱིས། དམ་སྲི་ཉུ་ལེ་ཤ་ཀྲིང་བུ་མོ་སྐད་འགྱུར་མ། འབྲོག་རྐུན་ནག་མོ། གཏི་མུག་རྒྱན་བྱེད། འདོད་ཆགས་ར་ནུ། ཞེ་སྡང་དུན་ཙེ། གཟའ་ཡི་བུ་མོ། གནམ་ཐིལ་དཀར་པོ། ཀླུ་སྲིན་ནག་པོ། ཀླུ་ཐིལ་རིགས་བཞི། ས་བདག་མ་ཡམ། མ་བདུད་ཐེའུ་རང༌། བདུད་དང་དམ་སྲི་ཐམས་ཅད་ཏྲི་ཡཾ་ཛཿ ཁཾ་ཏྲག་རཀྴ་མུཀྟི་རྦད་ཡ། སྲོག་ལ་དུང་དུང༌། ཙིཏྟ་ཕྱུང་ཕྱུང༌། སྲོག་རྩ་ལ་རྦད་རྦད། ཕྱེ་མ་ཕྱེ་མ། རྡུལ་ཕྲན་རྡུལ་ཕྲན། ཞེས་བྲི། གནས་ཡིག་རྣམས་གོང་བཞིན་དང༌། མཐར་ཛ་ཁྲམ་ཉེར་གཅིག་གིས་བསྐོར་བ་བྲིའོ། །དེ་དག་གང་ལའང་འབྲི་མཁན་གྱི་ཁ་རླངས་མི་བཏང༌། ལག་རྗེན་གྱིས་མི་འཇུ། སྣག་ཚ་སོགས་གསར་དུ་སྦྱར་ཏེ་ཆད་ལྷག་བྲིས་བསུབས་བསྐུང་ཡིག་སོགས་ཀྱི་སྐྱོན་མེད་པར་བྲིའོ། །དེ་ནས་དྲི་མ་སྦྱོང་བའི་ཐོག་མར་རང་གྲིབ་སྦྱོང་བ་ནི། རང་ཉིད་ཐ་མལ་གནས་པ་ཡི༔ སྤྱི་མགྲིན་སྙིང་གའི་གནས་གསུམ་དུ༔ རྡོ་རྗེ་སེམས་དཔའ་དཀར་དམར་མཐིང་༔ གསལ་བའི་ [23b] སྐུ་ལས་བདུད་རྩིའི་རྒྱུན༔ བབས་པས་སྒོ་གསུམ་སྒྲིབ་དག་གྱུར༔ ཅེས་མོས་ལ་ཡིག་བརྒྱ་བཟླ། སླར་ཡང་གནས་གསུམ་རྡོར་སེམས་ཀྱི༔ སྐུ་ལས་འོད་ཟེར་ཡར་འཕྲོས་པས༔ རབ་འབྱམས་ཞིང་གི་རྒྱལ་བ་མཆོད༔ ཐུགས་རྗེའི་བྱིན་རླབས་ཚུར་འདུས་པ༔ བདག་གི་གནས་གསུམ་ཐིམ་པ་ཡིས༔ ཉམས་ཆག་ཉེས་ལྟུང་དྲི་མ་སྦྱངས༔ ཕ་རོལ་བྱད་མའི་བསམ་ངན་གྱིས༔ གནོད་བྱས་ཉེས་ཚོགས་ཐམས་ཅད་སྦྱངས༔ ཡིག་བརྒྱའི་ཤམ་བུར། ཨེ་ཧོཿ ཤུདྡྷེ་ཤུདྡྷེ༔ ཡཾ་ཧོཿ ཤུདྡྷེ་ཤུདྡྷེ༔ བཾ་ཧོཿ ཤུདྡྷེ་ཤུདྡྷེ༔ རཾ་ཧོཿ ཤུདྡྷེ་ཤུདྡྷེ༔ ལཾ་ཧོཿ ཤུདྡྷེ་ཤུདྡྷེ་༔ ཨ་ཧ་རཾ༔ ཨེ་ནེ་རཾ༔ བི་ན་ཤུདྡྷེ་སྭཱཧཱ༔ ཨ་ཨ་ཨ་སྭཱཧཱ༔ ཞེས་པ་བདུན་ནམ་ཉེར་གཅིག་བཟླས༔ སྨན་སྤོས་ཆུར་བཏབ་བཏུང་ཞིང་བྱུག༔ ཉེས་ཚོགས་ཐམས་ཅད་དག་པར་བསམ༔ དེ་ནས་ལིངྒའི་དྲི་མ་སྦྱོང་བ་ནི། བྱེ་མ་གཤེར་ལྡན་གྱིས་ལིངྒའི་ཕྱི་ནང་ལེགས་པར་འཕུར་ཞིང༌། སྲིད་པ་བྱེ་མའམ་ཞིང་ས་གཙང་མས་བསྐོར་ལ། ལཾ་ཧོཿ ཤུདྡྷེ་ཤུདྡྷེ་ཡེ་སྭཱཧཱ༔ ཆུ་མིག་ལྐུག་པའམ་ཕུག་རྡུགས་ཀྱི་ཆུས་འཐོར་ཞིང༌། བཾ་ཧོཿ ཤུདྡྷེ་ཤུདྡྷེ་ཡེ་སྭཱཧཱ༔ བྲ་རྐང་ངམ་ཤིང་ཚེ་ཟད་ཀྱི་མེས་བསྐོར་ཞིང༌། རཾ་ཧོཿ ཤུདྡྷེ་ཤུདྡྷེ་ཡེ་སྭཱཧཱ༔ ཕོ་ [24a] རོག་དང་འུག་སྒྲོས་རླུང་གཡབ་ཅིང༌། ཡཾ་ཧོཿ ཤུདྡྷེ་ཤུདྡྷེ་ཡེ་སྭཱཧཱ༔ ཞེས་ལན་གསུམ་གསུམ་དང༌། གོང་གི་རང་གྲིབ་སྦྱོང་བའི་སྔགས་བརྒྱ་རྩ་གཅིག་བཟླས་རྗེས། ཨེ་ཧོཿ ཤུདྡྷེ་ཤུདྡྷེ་སོགས་ཉེར་གཅིག་རེའི་མཇུག་ཏུ་ལིངྒ་བར་སྣང་ལ་གཡབ་ཅིང༌། རྣལ་འབྱོར་པ་བདག་འཁོར་དང་བཅས་པ་ཐམས་ཅད་ཀྱི་ལུས་ཀྱི་དྲི་མས་མ་གོས། ངག་གི་དྲི་མས་མ་གོས། ཡིད་ཀྱི་དྲི་མས་མ་གོས། ལུས་ངག་ཡིད་གསུམ་གྱི་དྲི་མས་མ་གོས་སོ། །ཨེ་ཧོཿ སོགས་དང་དབུགས་ཐེངས་གཅིག་ལ་ཨ་ཉེར་གཅིག་བརྗོད་པས་ཐམས་ཅད་སྟོང་པར་བལྟའོ། །དེ་ནས་དགྲ་ལ་དམིགས་པའི་དྲི་མ་དྲུག་དང༌། བགེགས་ལ་གནས་རྟེན་ས་སྣ་གང་ཡིན་ལྕགས་སྣོད་དུ་རླངས་པ་ཐོན་ཙམ་མེ་ལ་བསྲོས་ནས་བྱུགས་ཤིང་གུ་གུལ་གྱིས་བདུག་ལ། བལྟབ་ཚུལ་མཚོན་ཆ་བལྟབ་བམ་གཤེད་པ་བལྟབ་ནྲྀ་ཁར་འཇུག །རོ་བལྟབ་གསང་གནས་ཁར་འཇུག །འདྲེ་བལྟབ་ཏྲི་གཅོག་པ་སྟེ་གང་བྱེད་ཀྱང་ཕོ་མོའི་དབྱེ་བས་གཡས་གཡོན་ནས་བལྟབ་ཚུལ་མ་ལོག་པར་བྱས་ལ་ཉ་བོའི་སྙིང་གར་གན་རྒྱལ་དུ་གཞུག །ཚོན་སྐུད་སྔོ་དམར་དང་ཤི་སྐྲའི་བྱད་ཐག་ནྲྀ་མི་གནས་དྲངས་པའམ་རྐེ་ལ་བཏགས་ཏེ་ཁམས་གསུམ་རྣམ་རྒྱལ་གྱི་ཕུར་པ་ལ་འདོག་གོ ། [24b] བྲུབ་ཁུང་ནི། ཕུང་ཤུལ་གཡུལ་འཐབ་རོ་བསྲེག་གྲོག་མཁར་དམར་པོ་འདྲེ་འདུལ་རེ་ལྕག་པའི་ས་རྣམས་དང་དུག་ཁྲག་བོང་གཅིན་རྣམས་སྦྱར་ཏེ་ཕྲིན་ལས་བཞི་རྫོགས་ཀྱི་ཚུལ་ལམ། ཡང་ན་གྲུ་གསུམ་རྒྱ་དཔང་ཁྲུ་གང་བ། ཁ་ཁྱེར་སོར་བཞིའི་ཕྱེད་ཕྱིར་འཕྱངས་པའི་ཟུར་གསུམ་དུ་ཁྲོ་ཞལ། ལོགས་གསུམ་དུ་མདའ་གཞུས་མཚན་པ། ཁ་ཁྱེར་ལ་རྩང་དམར་སྲིན་མོ་འགྲོས་སུ་བཙུག་ཅིང༌། རྨང་གི་བང་རིམ་ལ་མཚོན་ཆ་ལྔས་བསྐོས། རོ་གཡམ་གྲུ་གསུམ་རྒྱ་གྲམ་བྲིས་པས་ཁ་གཅོད་བྱའོ། །གསུམ་པ་རྫས་གསག་པ་ནི། རྡོ་རྗེ་ཁྲོས་པ་རྩ་བའི་རྒྱུད་ལས། རྫས་ནི་རྣམ་པ་དྲུག་ཡིན་ཏེ། །གུ་གུལ་ཚིལ་ཆེན་དྲི་ཆེན་གསུམ། །རྐང་དྲེག་གུ་གུལ་ར་ཡི་གཞོབ། །ལྷ་དང་ཕྲལ་བའི་རྫས་ཡིན་ནོ། །དབབ་ལ་ཉུངས་ཀར་རྒྱལ་པོ་དང༌། །སྨད་དཀྲིས་རཀྟ་ཚང་བ་ཡིན། །ཚོན་སྣ་ལྔ་ཡིས་བྱད་དུ་གཞུག །སྨྱོ་བ་དུག་གི་ཆུ་ཡིན་ནོ། །རྡོ་རྗེ་ཐོ་བས་རྡུང་དུ་བརླག །བསྟབ་པ་མེ་ཡི་དཀྱིལ་འཁོར་རོ། །ཞེས་གསུངས་ཤིང༌། གཞན་ཡང་འབུམ་ནག་དང་གཏེར་མ་རྣམས་ལས་དབྱེ་བ་མང་དུ་བཤད་ཀྱང༌། རྒྱུན་གྱི་རིམ་གྲོ་ལྟ་བུར་ནི་དེ་ཙམ་མ་ཚོགས་ཀྱང་རུང་སྟེ། གབ་པ་འཁོར་ལོའི་རྒྱུད་ལས། དབྲལ་ལ་ [25a] འདྲེ་གསོད་ཤིས་པར་བཤད། །དབབ་པ་ལ་ནི་ཉུངས་ཀར་རྒྱལ། །བཅིང་ལ་ཚོན་སྣ་ལྔ་ཡིས་སོ། །སྨྱོ་ལ་དུག་ཉིད་ཤིས་པར་བཤད། །རྡུལ་དུ་བརླག་ན་ཕྱག་མཚན་ནོ། །བསྟབ་ལ་ཧོམ་གཟར་ཤིས་པར་བཤད། །ཅེས་སོ། །སྐམ་ཐུན་ལ། ཡུངས་ནག་ར་ནག་ཏིལ་ཏེ་འབྲུ་གསུམ། ཀེ་ཚེ་ཤང་ཚེ་བྲག་ཚེ་སྟེ་ཚེ་གསུམ། ལྕགས་ཕྱེ་ཟངས་ཕྱེ་རྡོ་ཕྱེ་སྟེ་ཕྱེ་གསུམ་རྣམས་དང༌། རློན་ཐུན་ལ། རྷ་དྷུ་ར། སྒ་པི་ཕོ་གསུམ། སྔོ་ཚ་བ་གསུམ། བཙན་དུག་ར་དུག་སྤྱང་དུག་རྣམས། བུད་མེད་ཀྱི་མངལ་ཁྲག །རིམས་ཀྱིས་ཤི་བའི་ཁྲག །བམ་གྱི་སྙིང་ཁྲག །མི་རྟའི་ཁྲག་སྣ་གཞན་དང་བཅས་བོང་དྲེལ་གྱི་སྦང་ཁུས་སྦོལ་ཏེ་རྭའམ་བསྭེ་ལྕགས་ཐོད་ངན་གྱི་སྣོད་དུ་བླུགས། གཞན་ཡང་གྲི་ལྕགས་ཀྱི་ལྕགས་ཀྱུ། ཞགས་པ། ལྕགས་སྒྲོག །སྒྲོལ་གྲི། ཐོ་བ། ཧོམ་གཟར་ལ་སོགས་པ་ཚགས་སུ་ཚུད་པར་བྱ་ཞིང༌། མནན་བསྲེག་འཕང་བའི་རྫས་དང་ཡོ་བྱད་ཁྱད་པར་བ་རྣམས་ནི་འདིར་སྨོས་ཀྱིས་མ་ལོངས་པས་སོ་སོའི་གཞུང་ལས་ཤེས་པར་བྱ་བ་ཡིན་ལ། མདོར་ན་བསྐྱེད་རྫོགས་ཀྱི་རྣལ་འབྱོར་ཟབ་མོར་བློ་ [25b] གདེང་ཁེལ་བའི་ཉམས་མྱོང་མེད་བཞིན་སྤྲོས་པས་མ་ལྕོགས་པ་དང་མ་འབྱོར་པར་དོན་དམ་གོ་ཡུལ་ཁ་ཁྱེར་ལ་རྒྱུ་མཚན་དུ་བྱས་ཏེ་ཀུན་རྫོབ་མཚན་མའི་རྫས་དང་ཡོ་བྱད་མཐའ་དག་ལ་ཇི་མི་སྙམ་པའི་གསང་ཆེན་རྒྱུད་ལུང་མན་ངག་གི་དགོངས་དོན་རས་བོར་ཁྱད་གསོད་ཀྱི་ལས་ནམ་ཡང་མི་བྱ་སྟེ། སྔགས་ཀྱི་དངོས་གྲུབ་དང་ཕྲིན་ལས་ནི་རྫས་སྔགས་ཏིང་ངེ་འཛིན་ཚོགས་པའི་རྟེན་འབྲེལ་ལ་རག་ལས་པ་ཉིད་ཀྱི་ཕྱིར་རོ། །ཐུན་མིན་བསྐྱེད་རྫོགས་ཟབ་གནད་ལྟ་ཞོག་གི །ཐུན་མོང་མཚན་མའི་བཅས་ཀྱི་རྣམ་དབྱེ་ཙམ། །མི་ཤེས་བཞིན་དུ་ད་དུང་ཡིན་རློམ་པའི། །ཡི་མུག་སྔགས་པས་ལྗོངས་ཀུན་གཏམས་པ་མཐོང༌། །གྲོང་ཆོག་ཟོང་དུ་འཚོང་ལ་མི་མཁོ་ཡང༌། །གསང་སྔགས་ཚུལ་བཞིན་སྒྲུབ་ལ་མེད་ཐབས་མེད། །མཐོང་བས་དོན་རྟོགས་ལག་ལེན་གསལ་བྱས་མཐུས། །སྐལ་བཟང་གྲུབ་གཉིས་འདོད་འཇོའི་དཔལ་ཐོབ་ཤོག །དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་སྨད་ཀྱི་ཕྲིན་ལས་ལ་ཉེ་བར་མཁོ་བ་བཅས་ཀྱི་རྣམ་བཞག་རྨོངས་པའི་མིག་འབྱེད་གནད་ཀྱི་གསེར་ཐུར་ཞེས་བྱ་བ་འདི་ནི། རྗེས་སུ་འཇུག་པའི་སྔགས་པ་གསར་བུ་རྣམས་ [26a] ལ་ཉེ་བར་མཁོ་བའི་ཕྱིར། སྔགས་ཀྱི་བནྡྷེ་རལ་པ་ཅན་འཇིགས་བྲལ་ཡེ་ཤེས་རྡོ་རྗེས་རང་ལོ་སོ་གསུམ་པའི་ཐོག་ཏུ་སོན་པ་འཛིན་བྱེད་ཀྱི་ལོ་སྣྲོན་ཉ་བའི་ཡར་ངོ་རྒྱལ་བ་གཉིས་པར་གྲུབ་པའི་བསྟི་གནས་འཆི་མེད་དགའ་ཚལ་གྱི་སྨན་ལྗོངས་སུ་སྦྱར་བ་སྟེ། འདིས་ཀྱང་ལས་དང་དངོས་གྲུབ་རྒྱ་མཚོ་ཡིད་བཞིན་དུ་འགྲུབ་པའི་རྒྱུར་གྱུར་ཅིག །སརྦ་དཱ་མངྒ་ལཾ།། །།