སྣང་མཐས་མངོན་སུམ་གསུངས་པའི་སྨོན་ལམ་སོགས་གསོལ་འདེབས་སྨོན་ལམ་བརྟན་བཞུགས་བཅས་འདྲེས་མ་ནང་གསེས་ཚན་པ་བརྒྱད་ཅན་ལ་ལྡེབ།

Previous Text Back to Volume Page Next Text

Wylie title	snang mthas mngon sum gsungs pa'i smon lam sogs gsol 'debs smon lam brtan bzhugs bcas 'dres ma nang gses tshan pa brgyad can la ldeb
Location	bdud 'joms gling pa zab gter Volume 16, Text 22, Pages 73-76 (Folios 2 to 2b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Snang mthas mngon sum gsungs pa'i smon lam sogs gsol 'debs smon lam brtan bzhugs bcas 'dres ma nang gses tshan pa brgyad can la ldeb/. In Sprul pa'i gter chen bdud 'joms gling pa'i zab gter gsang ba'i chos sde, Vol. 16: 73-76. Thimphu, Bhutan: Lama Kuenzang Wangdue, 2004.
Side notes	Recto: smon lam Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Prayers - smon lam
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ སྣང་མཐས་མངོན་སུམ་གསུངས་པའི་སྨོན་ལམ་བཞུགས་སོ༔ ན་མོ་གུ་རུ་ཡེ༔ རང་རིག་བྱང་ཆུབ་སེམས་ཀྱི་གདིང་ཆེན་པོས༔ ཨེ་མ་ཧོཿ རང་སྣང་རྣམ་དག་དོན་གྱི་འོག་མིན་དབྱིངས༔ ཡེ་ཤེས་བཀོད་པ་འཕྲུལ་གྱི་ཞིང་ཁམས་སུ༔ གཞི་ཡི་ཆོས་སྐུ་རྒྱལ་བ་འོད་དཔག་མེད༔ རང་རྩལ་བྱང་སེམས་ཚོགས་ཀྱི་ཚོམ་བུར་ངོམས༔ ཤེས་རབ་ཡེ་ཤེས་མངོན་གྱུར་རྩལ་ཤུགས་ཀྱིས༔ ནམ་ཞིག་སྣང་བ་གནས་སུ་འགྱུར་བའི་ཚེ༔ གདོད་མའི་ཡེ་གདངས་མཆོག་དེ་ཚད་ཕེབས་ནས༔ དོན་གཉིས་མཐར་ཕྱིན་སྐུ་བཞི་མངོན་གྱུར་ཤོག༔ རང་སྣང་བདེ་བ་ཅན་གྱི་རྟེན་བརྟེན་པ༔ ཡིད་ལ་མངོན་བྱེད་སྨོན་པ་འདི་བརྗོད་བྱ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཁྲག་འཐུང་བདུད་འཇོམས་རྡོ་རྗེས་སྙན་གྲགས་ཀྱི་ངོར་ཕབ་པའོ། །དགེའོ།། ༈ ཕྱི་ནང་གསང་བའི་སྐྱབས་འགྲོ་བཞུགས་སོ༔ དཀོན་མཆོག་གསུམ་དང་རྩ་གསུམ་སྐུ་གསུམ་ལྷ༔ ངོ་བོ་རང་བཞིན་ཐུགས་རྗེའི་བདག་ཉིད་དཔལ༔ བསླུ་མེད་གཏན་གྱི་མགོན་པོ་བླ་མ་ལ༔ སྐྱབས་སུ་མཆིའོ་རྗེས་སུ་བཟུང་དུ་གསོལ༔ སརྦ་གུ་རུ་རཏྣ་སིདྡྷི་ཧཱུྃ༔ འོད་ཟེར་གྱིས་བསྐུལ་ངོར་བདུད་འཇོམས་པས་སོ། །དགེའོ། ༈ ཕཊ༔ རང་རིག་ཡེ་ཤེས་ཁྲོས་མ་གྲི་ཐོད་ཅན༔ ཕྱག་གཡས་གྲི་གུག་བེམ་པོར་ཚད་ཙམ་གྱིས༔ ཤ་རི་ཁྲག་མཚོ་རུས་པའི་གྲམ་ཁྲོད་བརྡལ༔ འདོད་ཡོན་མི་ཟད་ནམ་མཁའ་མཛོད་དུ་སྤེལ༔ ཕཊ་ཕཊ་ཕཊ༔ དཀོན་མཆོག་སྲི་ཞུའི་མགྲོན་གྱུར་ཐམས་ཅད་དང་༔ མགོན་པོ་ཡོན་ཏན་མགྲོན་རྣམས་ཀུན་ལ་མཆོད༔ འགྲོ་བ་རིགས་དྲུག་བར་དོའི་སེམས་ཅན་དང་༔ བགེགས་རིགས་ལན་ཆགས་མགྲོན་རྣམས་ཐམས་ཅད་མཆོད༔ ཚོགས་རྫོགས་སྒྲིབ་དག་བུ་ལོན་ལན་ཆགས་སྦྱངས༔ ཐམས་ཅད་གཞོན་ནུ་བུམ་སྐུར་སངས་རྒྱས་ཤོག༔ འཁོར་གསུམ་དམིགས་མེད་དབྱིངས་སུ་འབྱམས་ཀླས་སོ༔ ཨ་ཨ་ཨཱཿ ཕཊ༔ བདུད་འཇོམས་པས་སོ།། ༈ དག་སྣང་ཡེ་ཤེས་དྲྭ་བ་ལས༔ བདེ་ཆེན་ཞིང་གི་གསོལ་འདེབས་སྨོན་ལམ་བཞུགས༔ ན་མོ་གུ་རུ༔ གསོལ་འདེབས་སྨོན་ལམ་ནི༔ ཨོཾ་མ་ཎི་པདྨེ་ཧཱུྃ་ཧྲཱིཿཨེ་མ་ ཧོཿ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ འགྲོ་བའི་མགོན་པོ་སངས་རྒྱས་འོད་དཔག་མེད༔ སྤྲུལ་པའི་བྱང་སེམས་དགེ་འདུན་འཕགས་པའི་ཚོགས༔ བཟོད་མེད་གདུང་ཤུགས་དྲག་པོས་གསོལ་བ་འདེབས༔ བདག་ནི་ནམ་ཞིག་འཆི་བའི་དུས་བྱུང་ཚེ༔ མཚོ་རྒྱལ་དང་ནི་ཡོན་ཏན་མགོན་པོ་ལྟར༔ མངོན་སུམ་ལག་པའི་སོར་མོ་ནས་བཟུང་སྟེ༔ བདེ་བ་ཅན་གྱི་ཞིང་དེར་འདྲེན་པར་ཤོག༔ ཨོཾ་ཨ་མི་ཏ་བྷ་ཧྲཱིཿ རྟག་ཏུ་འདིར་བརྩོན་གྲོལ་བ་ཐོབ༔ སྔགས་པ་བདུད་འཇོམས་དཔའ་བོ་ཡིས༔ དད་ལྡན་ཆུང་ལི་མ་ལ་གདམས༔ དགེའོ།། ༈ ནམ་ཡང་ཀུན་གྱིས་སྨོན་ལམ་འདི་བརྗོད་འབད༔ དཀོན་མཆོག་རིན་ཆེན་གསུམ་གྱི་བདེན་སྟོབས་ཀྱིས༔ ཚེ་རབས་སྐྱེ་བའི་ཕྲེང་བ་ཐམས་ཅད་དུ༔ བདག་ནི་གང་དུ་གནས་པའི་ས་ཕྱོགས་དེར༔ སངས་རྒྱས་བསྟན་པ་དར་ཞིང་རྒྱས་པར་ཤོག༔ སེམས་ཅན་ཐམས་ཅད་བདེ་ཞིང་སྐྱིད་པར་ཤོག༔ རྟག་ཏུ་དམ་པའི་ཆོས་ལ་སྤྱོད་པར་ཤོག༔ དོན་གཉིས་ལྷུན་གྲུབ་སྐུ་གཉིས་མངོན་གྱུར་ཤོག༔ ཀླ་ཀློ་བདུད་ཀྱི་བསྟན་པ་ནུབ་པར་ཤོག༔ ཨོ་རྒྱན་ཆེན་པོའི་ཕྲིན་ལས་དཔལ་འབར་ནས༔ བཤད་སྒྲུབ་བསྟན་པ་ཕྱོགས་མཐར་རྒྱས་པར་ཤོག༔ གསང་བདག་ཕྱག་ན་རྡོ་རྗེས་འདི་གདམས་ནས༔ ཆོས་བཞིན་སྤྱོད་འདོད་ཀུན་གྱིས་འདི་བརྗོད་མཛོད༔ ཅེས་གསུངས་བདུད་འཇོམས་རྡོ་རྗེས་ཡི་གེར་བྲིས༔ ༈ དུས་གསུམ་རྒྱལ་བ་རྒྱ་མཚོའི་ཐུགས་རྗེ་དང་༔ གསང་སྔགས་ཟབ་མོའི་རྟེན་འབྲེལ་ནུས་པའི་མཐུས༔ བདག་ཅག་ཚེ་དང་སྒྲུབ་པ་མཉམ་གྱུར་ནས༔ འཇའ་ལུས་འཕོ་བ་ཆེན་པོར་སངས་རྒྱས་ཤོག༔ བདུད་འཇོམས་པས་སོ།། ༈ གསོལ་འདེབས་ནི༔ སྔོན་ཚེ་ཨོ་རྒྱན་ཆེན་པོའི་ཕྲིན་ལས་གར༔ དཔལ་གྱི་ཡེ་ཤེས་སྨོན་ལམ་མཐུ་ལས་འཕྲུལ༔ ལྔ་བརྒྱའི་གདུལ་བྱ་འདུལ་ཕྱིར་སྤྲུལ་པའི་སྐུ༔ ཐུགས་རྗེ་འོད་ཟེར་དཔལ་ལ་གསོལ་བ་འདེབས༔ འདི་ཕྱི་བར་དོ་གསུམ་དུ་ཐུགས་རྗེས་ཟུངས༔ དུས་གསུམ་རྒྱུན་ཆད་མེད་པར་བྱིན་གྱིས་རློབས༔ ཞབས་བརྟན་ལ༔ སྐྱབས་གནས་མཆོག་གསུམ་བདེན་པའི་བྱིན་རླབས་དང་༔ ཆོས་ཉིད་རྣམ་དག་རྟེན་འབྲེལ་བསླུ་མེད་མཐུས༔ ཨོ་རྒྱན་རྒྱལ་ཚབ་ཐུགས་རྗེའི་འོད་ཟེར་གྱི༔ ཞབས་པད་རབ་བརྟན་མཛད་ཕྲིན་འཕེལ་རྒྱས་ཤོག༔ ཨོ་རྒྱན་ཆེན་པོས་དངོས་སུ་གསུངས་པ་ཐོས༔ ཁྲག་འཐུང་བདུད་འཇོམས་དཔའ་བོས་བྲིས་པའོ། །དགེའོ།། །།