TTDL-ZABTER-01-KA-006

༠༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ སྔོན་འགྲོའི་གདམས་པ་ ཐར་པའི་ཤིང་རྟ་བཞུགས་སོ༔ ༠༠༠༠༠༠བརྡ་ཡིག༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠༠བརྡ་ཡིག༡༠༨༔ མ་འོངས་པདྨའི་བརྒྱུད་འཛིན་རྣམས༔ ཐར་པ་དོན་དུ་གཉེར་བ་ཡིས༔ ཟབ་ལམ་ཉམས་སུ་ལེན་པ་ལ༔ དང་པོ་སྔོན་དུ་འགྲོ་བ་ཡི༔ ཆོ་ག་ཟབ་མོ་ལག་ལེན་གནད༔ ལམ་རྣམས་ཀུན་གྱི་ས་མཁན་ཡིན༔ ཕྱི་ནང་བར་ཆད་འདིས་གྲོལ་བྱེད༔ ས་མ་ཡ༔ ན་མོ༔ དུས་གསུམ་རྒྱལ་དང་རྒྱལ་སྲས་ཐམས་ཅད་ཀྱི༔ སྤྱི་གཟུགས་མཁྱེན་བརྩེ་ནུས་པའི་བདག་ཉིད་དཔལ༔ གཏན་གྱི་སྐྱབས་གཅིག་དྲིན་ཆེན་བླ་མ་རྗེ༔ མི་འབྲལ་སྤྱི་གཙུག་བདེ་ཆེན་འཁོར་ལོར་བཞུགས༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ དལ་འབྱོར་འདི་ནི་ཤིན་ཏུ་རྙེད་པར་དཀའ༔ མི་ལུས་དོན་ལྡན་སྙིང་པོ་ལོན་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཚེ་འདིའི་སྣང་བ་རྨི་ལམ་གནས་སྐབས་ཙམ༔ མི་རྟག་འཆི་བ་སྙིང་ནས་དྲན་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཁམས་གསུམ་འཁོར་བ་སྡུག་བསྔལ་རང་བཞིན་ལ༔ ཆགས་ཞེན་འཁྲི་བ་གཏིང་ནས་ཆོད་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ དགེ་སྡིག་ལས་ཀྱི་རྣམ་སྨིན་བསླུ་བ་མེད༔ བླང་དོར་གནས་ལ་མཁས་ཤིང་ཚུལ་ལྡན་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ དེ་ནས་སྐྱབས་སུ་འགྲོ་བ་ནི༔ ན་མོ༔ བདག་དང་མཐའ་ཡས་ཕ་མ་མཁའ་མཉམ་འགྲོ༔ ཇི་སྲིད་བྱང་ཆུབ་སྙིང་པོར་མཆིས་ཀྱི་བར༔ བླ་མ་དཀོན་མཆོག་གསུམ་ལ་སྐྱབས་སུ་མཆི༔ སྐད་ཅིག་མི་འབྲལ་བརྩེ་བས་རྗེས་སུ་ཟུངས༔ དེ་ནས་སེམས་བསྐྱེད་པ་ནི༔ མགོན་པོ་སྲས་དང་བཅས་པ་བདག་ལ་དགོངས༔ ཚད་མེད་རྣམ་བཞིས་འགྲོ་དོན་དང་དུ་ལེན༔ བྱང་ཆུབ་སེམས་བཟུང་ཕར་ཕྱིན་དྲུག་ལ་བསླབ༔ དོན་གཉིས་ལྷུན་གྱིས་གྲུབ་པའི་དཔལ་ཐོབ་ཤོག༔ དེ་ནས་རྡོར་སེམས་བསྒོམ་བཟླས་ནི༔ རང་གི་སྤྱི་བོར་པདྨ་ཟླ་གདན་ལ༔ བླ་མ་རྡོ་རྗེ་སེམས་དཔའ་ཤེལ་གྱི་མདོག༔ ཞི་འཛུམ་སྐྱིལ་ཀྲུང་མཚན་དཔེའི་ལང་ཚོ་འབར༔ ལོངས་སྐུའི་ཆས་རྫོགས་རྡོར་དྲིལ་བསྣོལ་སྟབས་འཛིན༔ སྙེམས་མ་ཡུམ་དང་འཁྲིལ་བའི་སྦྱོར་མཚམས་ནས༔ བདུད་རྩིའི་རྒྱུན་བབས་ནད་གདོན་སྒྲིབ་སྦྱངས་གྱུར༔ ཨོཾ་བཛྲ་སཏྭ་ས་མ་ཡ༔ སོགས་ཡི་གེ་བརྒྱ་པ་ཅི་ནུས་བཟླས་མཐར༔ སྡིག་སྒྲིབ་ཀུན་དག་ཤེལ་སྒོང་ལྟ་བུར་གྱུར༔ སླར་ཡང་འོད་དཀར་རྣམ་པར་མེར་གྱིས་ཞུ༔ བདག་སྣང་དང་འདྲེས་རྡོར་སེམས་སྐུ་རུ་གྱུར༔ སྣང་སྲིད་དག་པ་རབ་འབྱམས་རོལ་པར་བལྟ༔ ཨོཾ་བཛྲ་སཏྭ་ཧཱུྃ༔ དེ་ནས་མཎྜལ་འབུལ་བ་ནི༔ ཨོཾ་ཨཱཿཧཱུྃ༔ སྟོང་གསུམ་མི་མཇེད་བཀོད་པ་མཐའ་ཡས་དཔལ༔ བདག་ལུས་ལོངས་སྤྱོད་བསོད་ནམས་དགེ་རྩར་བཅས༔ ཡོངས་རྫོགས་བཀོད་པ་མཛེས་ལྡན་མཎྜལ་འདི༔ ཚོགས་གཉིས་རྫོགས་ཕྱིར་དཀོན་མཆོག་གསུམ་ལ་འབུལ༔ དེ་ནས་བླ་མའི་རྣལ་འབྱོར་ནི༔ རང་སྣང་རྣམ་དག་དོན་གྱི་འོག་མིན་ཞིང་༔ རང་ཉིད་མཁའ་སྤྱོད་དབང་མོ་གྲི་ཐོད་ཅན༔ དམར་གསལ་དོར་སྟབས་མཚན་དཔེའི་ལང་ཚོས་མཛེས༔ རིངས་པའི་ཚུལ་གྱིས་སྟེང་གི་ནམ་མཁར་གཟིགས༔ སྣ་ཚོགས་དར་དང་རཏྣ་རུས་པས་བརྒྱན༔ མདུན་གྱི་ནམ་མཁར་འཇའ་འོད་འཁྲིགས་པའི་ཀློང་༔ མ་ཆགས་པདྨ་ཉི་ཟླའི་གདན་སྟེང་དུ༔ བླ་མའི་ངོ་བོ་པདྨ་འབྱུང་གནས་སྐུ༔ དཀར་དམར་མདངས་ལྡན་གཟི་བརྗིད་འོད་ཕུང་འབར༔ གཞོན་ཚུལ་མཚན་དཔེ་རབ་རྫོགས་ཞི་མ་ཁྲོ༔ པད་ཞྭ་བེར་མཐིང་ཆོས་གོས་ཐང་ཤམ་གསོལ༔ ཕྱག་གཡས་རྡོ་རྗེ་གཡོན་པས་བུམ་ཐོད་བསྣམས༔ ཞབས་གཉིས་རོལ་སྟབས་ཁ་ཊྭཱཾ་མཆན་དུ་བརྟེན༔ སྣང་སྲིད་ཟིལ་གྱིས་གནོན་པའི་སྐུར་བསྒོམ་མོ༔ ཧཱུྃ༔ རྔ་ཡབ་གླིང་དབུས་ཟངས་མདོག་དཔལ་རིའི་རྩེར༔ བདེ་ཆེན་པདྨ་འོད་ཀྱི་གཞལ་ཡས་སུ༔ རྗེ་བཙུན་བླ་མ་ཨོ་རྒྱན་སྤྲུལ་པའི་སྐུ༔ རིག་འཛིན་དཔའ་བོ་མཁའ་འགྲོའི་ཚོགས་དང་བཅས༔ བརྒྱུད་འཛིན་བྱིན་གྱིས་བརླབ་ཕྱིར་གཤེགས་སུ་གསོལ༔ བཛྲ་གུ་རུ་པདྨ་སིདྡྷི་ཧཱུྃ༔ ཀྱེ་ཧོཿདུས་གསུམ་སངས་རྒྱས་ཐམས་ཅད་ཀྱི༔ སྤྱི་དཔལ་བླ་མ་རིན་པོ་ཆེ༔ མཐོང་བས་མ་རིག་མུན་པ་སེལ༔ ཐོས་པས་ཐེ་ཚོམ་དྲྭ་བ་གཅོད༔ དྲན་པས་དགོངས་རྒྱུད་རྟོགས་པ་འཕོ༔ རེག་པས་བྱིན་རླབས་དངོས་གྲུབ་སྟེར༔ བཀའ་དྲིན་བསམ་ན་བརྗོད་ལས་འདས༔ ཡོན་ཏན་ནམ་མཁའི་མཐའ་དང་མཉམ༔ བཟོད་མེད་གདུང་ཤུགས་དྲག་པོ་ཡིས༔ གསོལ་བ་འདེབས་སོ་ཐུགས་རྗེས་དགོངས༔ བདག་ལུས་ལོངས་སྤྱོད་དགེ་རྩར་བཅས༔ ཆགས་ཞེན་མེད་པར་ཁྱོད་ལ་འབུལ༔ འདི་ནས་ཚེ་རབས་ཐམས་ཅད་དུ༔ སྐྱབས་དང་སྐྱེལ་མ་མགོན་དང་དཔུང་༔ གཏན་གྱི་མགོན་པོ་ཁྱོད་ལས་མེད༔ བློ་སྙིང་བྲང་གསུམ་ལིང་གིས་བཀལ༔ སྐྱིད་སྡུག་ལེགས་ཉེས་ཐམས་ཅད་དང་༔ མཐོ་དམན་གར་གཏོང་བླ་མ་མཁྱེན༔ བདག་ནི་ཚེ་རབས་ཐོག་མེད་ནས༔ མ་རིག་འཁྲུལ་པའི་དབང་གྱུར་ཏེ༔ ཁམས་གསུམ་འཁོར་བའི་བཙོན་ཁང་དུ༔ བཟོད་མེད་སྡུག་བསྔལ་གསུམ་གྱིས་གདུངས༔ ཉམས་ཐག་ཟུག་རྔུ་ཁུར་མ་བཟོད༔ སྙིང་ནས་རྗེ་བཙུན་བླ་མར་འབོད༔ བདེ་འདོད་སྡུག་བསྔལ་ལས་ལ་བརྩོན༔ སྣང་བའི་ཡུལ་དུ་བདུད་ཀྱིས་བསླུས༔ ཞེན་པས་གཉིས་འཛིན་འཁྲུལ་པར་འཕྱན༔ དེ་འདྲའི་ལས་ངན་སྐལ་ངན་ལ༔ སྐྱབས་མགོན་ཁྱོད་ལས་སྐྱོབ་པ་སུ༔ གསོལ་བ་འདེབས་སོ་བླ་མ་རྗེ༔ ཐུགས་རྗེས་ཟུངས་ཤིག་བཀའ་དྲིན་ཅན༔ བྱིན་གྱིས་རློབས་ཤིག་ནུས་མཐུ་ཅན༔ རྗེས་སུ་ཟུངས་ཤིག་སྤྱི་དཔལ་མཆོག༔ བློ་སྣ་ཆོས་ལ་བསྒྱུར་དུ་གསོལ༔ དབང་བཞི་བསྐུར་བར་མཛད་དུ་གསོལ༔ སྒྲིབ་བཞི་དག་པར་མཛད་དུ་གསོལ༔ སྐུ་བཞི་ཐོབ་པར་མཛད་དུ་གསོལ༔ དགོངས་རྒྱུད་བྱིན་རླབས་བདག་ལ་འཕོས༔ མ་རིག་མུན་པ་དྲུང་འབྱིན་ནས༔ གཟུང་འཛིན་འཁྲུལ་པའི་འཕྱངས་པ་ཁྲོལ༔ མཁྱེན་གཟིགས་ཡེ་ཤེས་མངོན་གྱུར་ཅིང་༔ ཆོས་ཟད་བློ་འདས་ཆེན་པོར་སྐྱོལ༔ ལྷུན་གྲུབ་གཞོན་ནུ་བུམ་པའི་སྐུ༔ འཇའ་ལུས་ཆེན་པོར་དབུགས་འབྱིན་མཛོད༔ དེ་ནས་དབང་བཞི་ལེན་པ་ནི༔ བླ་མའི་དཔྲལ་བར་ཨོཾ་དཀར་པོ་གསལ་བ་ལས་འོད་ཟེར་དཀར་པོ་སྐར་མདའ་ཆད་པ་ལྟར་འཕྲོས་ཏེ་རང་གི་སྤྱི་བོ་ནས་ཞུགས༔ ལུས་དང་རྩ་ཡི་སྒྲིབ་པ་སྦྱངས༔ སྐུ་བུམ་པའི་དབང་ཐོབ༔ ལུས་རྡོ་རྗེ་སྐུ་ཡི་རོལ་པར་བྱིན་གྱིས་བརླབས༔ སྤྲུལ་སྐུའི་གོ་འཕང་གི་སྐལ་བ་རྒྱུད་ལ་བཞག་པར་བསམ༔ མགྲིན་པར་ཨཱཿཡིག་དམར་པོ་གསལ་བ་ལས་འོད་ཟེར་དམར་པོ་གློག་ཞགས་འཁྱུགས་པ་ལྟ་བུར་བདག་གི་མགྲིན་པ་ནས་ཞུགས༔ ངག་དང་རླུང་གི་སྒྲིབ་པ་སྦྱངས༔ གསུང་གསང་བའི་དབང་ཐོབ༔ ངག་རྡོ་རྗེ་གསུང་གི་རོལ་པར་བྱིན་གྱིས་བརླབས༔ ལོངས་སྤྱོད་རྫོགས་སྐུའི་གོ་འཕང་གི་སྐལ་བ་རྒྱུད་ལ་བཞག་པར་བསམ༔ ཐུགས་ཀའི་ཧཱུྃ་ཡིག་མཐིང་ནག་གསལ་བ་ལས་འོད་ཟེར་མཐིང་ནག་སྤྲིན་དཔུང་འཐིབས་པ་ལྟ་བུར་བྱུང་ནས་རང་གི་སྙིང་གར་ཐིམ་པས་ཡིད་དང་ཐིག་ལེའི་སྒྲིབ་པ་སྦྱངས༔ ཐུགས་ཤེས་རབ་ཡེ་ཤེས་ཀྱི་དབང་ཐོབ༔ ཡིད་རྡོ་རྗེ་ཐུགས་ཀྱི་རོལ་པར་བྱིན་གྱིས་བརླབས༔ ཆོས་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག་པར་བསམ༔ སླར་ཡང་བླ་མའི་ཐུགས་རྣམ་པར་མི་རྟོག་པའི་ངོ་བོ་ཐིག་ལེ་ཁ་དོག་ལྔ་དང་ལྡན་པ་ཞིག་རང་གི་སྙིང་གར་ཐིམ་པས་སྒྲིབ་གཉིས་བག་ཆགས་ཐམས་ཅད་སངས་ཀྱིས་དག་ནས༔ ཚིག་དབང་རིན་པོ་ཆེ་ཐོབ༔ རྒྱལ་བ་ཐམས་ཅད་ཀྱི་ཡོན་ཏན་དང་ཕྲིན་ལས་མི་ཟད་པ་རྒྱན་གྱི་འཁོར་ལོ་ཡོངས་སུ་རྫོགས་པར་བྱིན་གྱིས་བརླབས༔ ངོ་བོ་ཉིད་ཀྱི་སྐུ་མངོན་དུ་གྱུར་པའི་ས་བོན་རྒྱུད་ལ་བཞག་པར་བསམ༔ ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱཿསླར་ཡང་བླ་མ་འོད་དུ་ཞུ་ནས་རང་ལ་ཐིམ་པས་གཉིས་སུ་མེད་པར་བསྒོམ༔ འདི་ནི་དབང་དང་བསྙེན་སྒྲུབ་ཐམས་ཅད་ཀྱི༔ ཡང་སྙིང་བཅུད་དུ་དྲིལ་བའི་མན་ངག་ཡིན༔ གང་གི་ཉམས་སུ་ལེན་པའི་སྐལ་ལྡན་བུ༔ ཚེ་གཅིག་རྡོ་རྗེ་འཆང་གི་ས་ཐོབ་འགྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཅེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་བཅོ་བརྒྱད་བར་དུ་བཀའ་རྒྱ་བྱས་ཏེ་མཐར་རང་སློབ་དམ་པ་བཞིས་བསྐུལ་ངོར་དག་པར་ཕབ་པའི་ཡི་གེ་པ་ནི་རིག་པའི་རྡོ་རྗེས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།