TTDL-ZABTER-01-KA-011

༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ རིག་འཛིན་བླ་མ་འདུས་པའི་གསོལ་འདེབས་དབང་གི་བུམ་པ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠བརྡ་ཡིག་༡༤༩༔ རིག་འཛིན་བླ་མ་སྒྲུབ་པ་ཡི༔ སྐལ་བཟང་དད་ལྡན་སྐྱེས་བུ་རྣམས༔ བྱིན་རླབས་རྒྱུད་ལ་འཇུག་པའི་ཕྱིར༔ གསོལ་འདེབས་འདི་ནི་བླ་ན་མེད༔ ཨེ་མ་ཧོཿཆོས་སྐུའི་སྟོན་པ་ཀུན་ཏུ་བཟང་པོ་དང་༔ ལོངས་སྐུའི་སྟོན་པ་རིགས་ལྔ་གངས་ཆེན་མཚོ༔ སྤྲུལ་སྐུའི་སྟོན་པ་རིགས་གསུམ་འགྲོ་བའི་མགོན༔ གསོལ་བ་འདེབས་སོ་བདག་རྒྱུད་སྨིན་གྲོལ་མཛོད༔ དགའ་རབ་ཤྲཱི་སེང་པད་འབྱུང་བི་མ་ལ༔ སྤྲུལ་པའི་རྗེ་འབངས་ཉི་ཤུ་རྩ་ལྔ་དང་༔ དེ་འཁོར་ཡང་འཁོར་རིག་འཛིན་ཚོགས་རྣམས་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་མཛོད༔ རིགས་དང་དཀྱིལ་འཁོར་བདག་པོ་བླ་མ་རྗེ༔ སྐུ་ཡི་རིག་འཛིན་འཇམ་དཔལ་བཤེས་གཉེན་དང་༔ གསུང་གི་རིག་འཛིན་ཀླུ་སྒྲུབ་སྙིང་པོ་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་མཛོད༔ ཐུགས་ཀྱི་རིག་འཛིན་ཧཱུྃ་ཆེན་ཀཱ་ར་དང་༔ ཡོན་ཏན་རིག་འཛིན་རྡོ་རྗེ་ཐོད་པ་རྩལ༔ ཕྲིན་ལས་རིག་འཛིན་པྲ་ཆེན་ཧསྟི་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་མཛོད༔ རྦོད་གཏོང་རིག་འཛིན་དྷ་ན་སཾསྐྲྀ་ཏ༔ མཆོད་བསྟོད་རིག་འཛིན་རམྦུ་གུ་ཧྱ་དང་༔ དྲག་སྔགས་རིག་འཛིན་ཤཱནྟིཾ་གརྦྷ་ཏར༔ གསོལ་བ་འདེབས་སོ་བདག་རྒྱུད་སྨིན་གྲོལ་མཛོད༔ རྣམ་སྨིན་རིག་འཛིན་ཚེ་དབང་རིག་འཛིན་དང་༔ ཕྱག་ཆེན་རིག་འཛིན་ལྷུན་གྲུབ་རིག་པ་འཛིན༔ རིག་འཛིན་རྣམ་བཞི་འཁོར་དང་བཅས་པ་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་མཛོད༔ ཡེ་ཤེས་འཇིག་རྟེན་བཀའ་སྲུང་དྲེགས་པའི་སྡེ༔ རྒྱལ་པོ་རིགས་བཞི་ཡབ་ཡུམ་སྲས་བཅས་དང་༔ གནོད་སྦྱིན་ཤན་པ་དམར་ནག་འཁོར་བཅས་ལ༔ གསོལ་བ་འདེབས་སོ་ཕྱི་ནང་བར་ཆད་སོལ༔ བསམ་པའི་དོན་ལ་བར་ཆད་མི་འབྱུང་ཞིང་༔ ཚེ་སྒྲུབ་མཐར་ཕྱིན་ཡང་དག་དོན་ལྡན་ཅིང་༔ འཇའ་ལུས་འཕོ་བ་ཆེན་པོར་སངས་རྒྱས་ནས༔ འཁོར་བ་དོང་སྤྲུག་ནུས་པའི་དཔལ་ཐོབ་ཤོག༔ དད་གུས་མོས་པའི་གདུང་ཤུགས་ཀྱིས༔ གསོལ་བཏབ་སྒྲུབ་པ་མཐའ་རུ་ཕྱིན༔ ཕྱི་ནང་བར་ཆད་ཀུན་སེལ་ཞིང་༔ ཕྲིན་ལས་རབ་འབྱམས་ཡོངས་འགྲུབ་འགྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདིའང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།།།