TTDL-ZABTER-01-KA-063

༠༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ ཆེ་མཆོག་རྡོ་རྗེ་གྲོ་ལོད་ཀྱི༔ སྲེག་བླུག་ཡེ་ཤེས་མེ་ལྕེ་བཞུགས༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠༠བརྡ་ཡིག༥༩༡༔ ཆེ་མཆོག་རྡོ་རྗེ་གྲོ་ལོད་ཀྱི༔ སྒྲུབ་པ་ལྷུར་ལེན་སྐྱེས་བུ་ལ༔ ལས་བཞིའི་སྲེག་བླུག་མེ་ལྕེ་གཅེས༔ མེ་ཐབ་ལས་བཞི་གང་ལ་ཡང་༔ དབྱིབས་དང་ཁ་དོག་སྤྱི་ལྟར་ཤེས༔ ལྟེ་བར་ཆོས་འབྱུང་བསྣོལ་མ་ཡི༔ དབུས་སུ་པདྨ་འདབ་བརྒྱད་བྲི༔ དེ་དབུས་རྃ་ཡིག་གཅིག་བྲིས་ལ༔ ཞི་བར་གླང་མ་བལ་དཀར་དང་༔ རྒྱས་པར་ཤུག་པ་དཀར་པོ་དང་༔ དབང་ཤིང་འོམ་བུ་དྲག་པོ་ལ༔ ཚེར་མ་ཅན་གྱི་ཤིང་རྣམས་ཀྱིས༔ ཟླུམ་དང་གྲུ་བཞི་ཟླ་གམ་དང་༔ གྲུ་གསུམ་དབྱིབས་སོགས་སྤྱི་དང་མཐུན༔ འབྲུ་སྣ་ཟས་ཚོགས་ཅི་རིགས་བསགས༔ དྲག་པོར་ལིང་ག་མིང་བྱང་དང་༔ འབྲུ་ནག་དག་གིས་འབུལ་རྫས་བྱ༔ གོས་དང་མེ་དར་ལས་མདོག་བྱ༔ མེ་ཡང་ཞི་རྒྱས་དབང་དྲག་ལས༔ རིམ་བཞིན་ཤར་ལྷོ་ནུབ་བྱང་ནས༔ སྦར་བ་ལག་ལེན་གནད་དུ་གཅེས༔ ཨོཾ༔ ཆོས་དབྱིངས་ཡེ་ཤེས་ཆེན་པོའི་མེ༔ མཐིང་ནག་འོད་ཟེར་རབ་ཏུ་འཁྲིགས༔ ཧཱུྃ༔ མེ་ལོང་ཡེ་ཤེས་ཆེན་པོའི་མེ༔ དཀར་གསལ་ཟླུམ་ལ་འཁྱིལ་ཞིང་འབར༔ སྭཱ༔ མཉམ་ཉིད་ཡེ་ཤེས་ཆེན་པོའི་མེ༔ སེར་གསལ་གྲུ་བཞིའི་དབྱིབས་སུ་འབར༔ ཨཱཿསོར་རྟོག་ཡེ་ཤེས་ཆེན་པོའི་མེ༔ དམར་གསལ་ཟླ་གམ་དབྱིབས་སུ་འབར༔ ཧཱ༔ བྱ་གྲུབ་ཡེ་ཤེས་ཆེན་པོའི་མེ༔ ལྗང་ནག་གྲུ་གསུམ་དབྱིབས་སུ་འབར༔ ཧཱུྃ༔ ལྷུན་གྲུབ་བདེ་ཆེན་མེ་ཡི་ལྷ༔ ཁ་དོག་སྣ་ཚོགས་འབར་བའི་འོད༔ ཀུན་ཏུ་རྟོག་པ་ཐམས་ཅད་བསྲེགས༔ གསལ་སྟོང་ཡེ་ཤེས་མངོན་དུ་བྱེད༔ གདོད་ནས་དམ་ཡེ་གཉིས་སུ་མེད༔ འདོད་ཡོན་མཆོད་པ་རྒྱན་དུ་ཤར༔ སྐབས་འདིར་ལྷ་བསྐྱེད་མཆོད་འབུལ་བཅས་པ་རྫོགས་མཐར༔ དང་པོ་མར་ཁུ་འབུལ་བ་བྱོན་པའི་སྐྱེམས་ལ༔ ཧཱུྃ༔ སྣང་བ་ཐབས་མཆོག་རྒྱལ་པོ་ཡིས༔ ཤེས་རབ་སྟོང་ཉིད་ཆེན་པོའི་མཁར༔ གཉིས་མེད་སྦྱོར་བའི་བཅུད་ཆེན་པོ༔ ཡེ་ཤེས་བདུད་རྩི་མཆོག་ཏུ་འབུལ༔ རྩ་སྔགས་མཐར༔ པཉྩ་ཨ་མྲྀ་ཏ་ཁཱ་ཧི༔ དེ་ནས་ཡང་༔ ཧཱུྃ༔ གདོད་ནས་ལྷ་དང་རང་སྣང་སེམས༔ གཉིས་མེད་ཆེན་པོར་རོལ་པ་ལ༔ སྒྱུ་འཕྲུལ་རོལ་པའི་ཏིང་འཛིན་གྱིས༔ སྣ་ཚོགས་མཆོད་པ་རྒྱན་དུ་འབུལ༔ ཚོགས་གཉིས་རྫོགས་ཕྱིར་བཞེས་སུ་གསོལ༔ སྤྲོ་ན་རྫས་སྣ་བཅུ་གསུམ་ལ༔ རྩ་སྔགས་རང་སྔགས་མཐའ་མ་རུ༔ ལས་ཀྱང་སོ་སོའི་ཤམ་བུ་སྦྱར༔ ཡང་ན་རྩ་སྔགས་ལས་བཞིའི་སྔགས༔ བཏགས་ནས་བརྒྱ་སྟོང་ཁྲི་སོགས་འབུལ༔ རྫས་ཀྱང་སྐོར་གཅིག་བྱས་པས་ཆོག༔ རྒྱས་པར་བྱེད་ན་གོང་བཞིན་དུ༔ མཆོད་འབུལ་ནས་བཟུང་གཏང་རག་བྱ༔ བསྡུས་པ་ལྟར་ན་བསྟོད་བྱས་ནས༔ དངོས་གྲུབ་ལེན་ཅིང་གཤེགས་སྐྱེམས་ལ༔ ཧཱུྃ༔ ཆོས་ཉིད་བརྡལ་ཁྱབ་ཆེན་པོ་ལས༔ ཡེ་ཤེས་སྒྱུ་འཕྲུལ་བཀོད་པ་ལ༔ སྣང་སྲིད་བདུད་རྩིར་བསྒྱུར་ཏེ་འབུལ༔ འཁོར་འདས་དག་མཉམ་ཆེན་པོར་རོལ༔ རྩ་སྔགས་ཤམ་བུ་སྦྱར་ནས་ཅི་འགྲུབ་བཟླ༔ དེ་ནས་བཤགས་པ་བྱ་བ་ལ༔ ཧཱུྃ༔ ཁྱབ་བདག་མགོན་པོ་དགོངས་སུ་གསོལ༔ མ་འབྱོར་མ་རྙེད་མ་ཚང་དང་༔ འགལ་འཁྲུལ་ནོངས་པ་ཅི་མཆིས་པ༔ མི་གསང་མི་སྦེད་མཐོལ་ཞིང་བཤགས༔ དག་ཚངས་མཆོག་ཐུན་དངོས་གྲུབ་སྩོལ༔ ཡི་གེ་བརྒྱ་པ་བཟླ༔ དེ་ནས་གཤེགས་བསྡུ་ལ༔ ཧཱུྃ༔ ཡེ་ཤེས་དབྱིངས་ལས་བཞེངས་པའི་ལྷ༔ ཆོས་ཉིད་བརྡལ་ཁྱབ་ཆེན་པོར་གཤེགས༔ དུས་གསུམ་དབྱེར་མེད་རྗེས་སུ་ཟུངས༔ མཐར་ཐུག་གཉིས་མེད་མཉམ་བརྡལ་རོལ༔ བཛྲ་མུཿདེ་ནས་བཀྲ་ཤིས་བྱ་བ་ནི༔ ཧཱུྃ༔ ཤེས་རབ་ཡེ་ཤེས་བརླན་ཆེན་པོས༔ སྒྲིབ་གཉིས་བག་ཆགས་དྲི་མ་སྦྱངས༔ དག་གྲོལ་ཆོས་ཉིད་སྤྲོས་མཐའ་བྲལ༔ ཞི་བ་ལྷུན་གྲུབ་བཀྲ་ཤིས་ཤོག༔ ཧཱུྃ༔ གཞི་སྣངལོངས་སྤྱོད་རྫོགས་པའི་ངང་༔ མཁྱེན་དང་གཟིགས་པའི་ཡེ་ཤེས་ཀྱིས༔ མངོན་བྱེད་མི་སློབ་ཡོན་ཏན་ཀུན༔ མི་ནུབ་མཐའ་རྒྱས་བཀྲ་ཤིས་ཤོག༔ ཧཱུྃ༔ དབང་ཆེན་གནས་ལུགས་རྫོགས་པ་ཆེ༔ འཁོར་འདས་སྒྱུ་འཕྲུལ་རྩལ་དུ་ངོམས༔ ཤེས་རབ་ཡེ་ཤེས་སྟོབས་ཤུགས་ཀྱིས༔ དབང་བསྒྱུར་ཕྲིན་ལས་བཀྲ་ཤིས་ཤོག༔ ཧཱུྃ༔ མཐུ་སྟོབས་གཞིར་གནས་ཧེ་རུ་ཀའི༔ ཤེས་རིག་རྡོ་རྗེ་རྩེ་མོ་ཡིས༔ བདག་ལྟའི་རཱུ་ཏྲ་དབྱིངས་སུ་བསྒྲལ༔ མངོན་སྤྱོད་ལྷུན་གྲུབ་བཀྲ་ཤིས་ཤོག༔ བླ་མ་དྲག་པོའི་རྣལ་འབྱོར་གྱིས༔ བསྐྱེད་རིམ་གནད་ཀྱིས་འདིར་བརྩོན་ན༔ ཚོགས་རྫོགས་ཕྲིན་ལས་རབ་འབྱམས་འགྲུབ༔ ལས་ལ་བསྒྱུར་ཁ་ཞལ་ལས་ཤེས༔ བཀའ་སྲུང་གནོད་སྦྱིན་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་ཉེར་གཅིག་བར་དུ་བཀའ་རྒྱས་བཏབ་སྟེ་མཐར་རང་སློབ་དམ་པ་ཧོར་གྱི་བླ་སེར་འགས་བསྐུལ་ངོར་དག་པར་ཕབ་པའི་ཡི་གེ་པ་ནི་སྐྱེས་མཆོག་བློ་བཟང་རྡོ་རྗེའོ།།དགེའོ།།།།