TTDL-ZABTER-01-KA-065

༠༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ རྩ་གསུམ་དྲིལ་སྒྲུབ་ དངོས་གྲུབ་གཏེར་མཛོད་བཞུགས་སོ༔ ༠༠༠༠༠༠བརྡ་ཡིག༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠༠བརྡ་ཡིག༦༠༠༔ མ་འོངས་ལྔ་བརྒྱ་སྙིགས་མའི་དུས༔ པདྨ་བདག་གི་བརྒྱུད་འཛིན་རྣམས༔ ཐར་པ་དོན་དུ་གཉེར་འདོད་ཀྱང་༔ བརྩོན་འགྲུས་སྙིང་སྟོབས་ཆུང་བ་དང་༔ ལེ་ལོའི་དབང་དུ་གྱུར་པ་ཡིས༔ སྒྲུབ་ལ་ལོངས་མེད་རིགས་རྣམས་ལ༔ གདམས་པ་འདི་ནི་མཆོག་ཏུ་ཟབ༔ རྩ་གསུམ་རྒྱ་མཚོའི་དབང་ཐོབ་མཐར༔ ཉིན་རེ་བཞིན་དུ་སྒོ་གསུམ་ལྷར༔ མ་གསལ་བས་ནི་དམ་ཉམས་པས༔ ཉེས་ལྟུང་ཆེན་པོ་འབྱུང་འགྱུར་གྱིས༔ དེ་ཕྱིར་འདི་ལ་བརྩོན་པ་གནད༔ དང་པོ་སྐྱབས་འགྲོ་སེམས་བསྐྱེད་ལ༔ ན་མོ༔ བདག་དང་མཐའ་ཡས་སེམས་ཅན་ཀུན༔ རྩ་གསུམ་རྒྱ་མཚོའི་དཀྱིལ་འཁོར་ལ༔ རྣམ་གསུམ་དད་པས་སྐྱབས་སུ་མཆི༔ འགྲོ་བའི་དོན་དུ་བྱང་སེམས་བསྐྱེད༔ དེ་ནས་བགེགས་བསྐྲད་སྲུང་འཁོར་ནི༔ ཧཱུྃ༔ མ་རིག་གཉིས་འཛིན་འཁྲུལ་པའི་བགེགས༔ ཡུལ་མེད་ཟང་ཐལ་ཆེན་པོར་ཕཊ༔ འཁོར་འདས་དག་མཉམ་རོལ་པ་ལ༔ བགེགས་དང་ལོག་འདྲེན་མིང་ཡང་མེད༔ ཛྙཱ་ན་ཙཀྲ་རཀྵ་ཧཱུྃ༔ དེ་ནས་བྱིན་དབབ་ཅིང་མཆོད་རྫས་བྱིན་བརླབ་ལ༔ ཧཱུྃ༔ སྐུ་གསུམ་ལྷུན་གྲུབ་གཞལ་ཡས་ནས༔ བཀོད་པ་རབ་འབྱམས་བྱིན་ཆེན་ཕོབ༔ ཧཱུྃ༔ ཡུལ་དྲུག་སྣང་བ་འདོད་ཡོན་གཏེར༔ ཀུན་བཟང་མཆོད་པའི་སྤྲིན་དུ་སྤེལ༔ ཀཱ་ཡ་ཛྙཱ་ན་ཙཀྲ་ཨ་བེ་ཤ་ཡ་ཨ་ཨ༔ མ་ཧཱ་གྷ་ཎ་སརྦ་པཱུ་ཛ་ཧོཿདེ་ནས་རྟེན་དང་བརྟེན་པའི་དཀྱིལ་འཁོར་གསལ་བ་ནི༔ ཨ༔ སྟོང་ཉིད་སྤྲོས་པའི་མཐའ་དང་བྲལ༔ ཀུན་ཁྱབ་ཡེ་ཤེས་ཆེན་པོར་བརྡལ༔ ཐབས་ཤེས་སྙིང་པོ་ཧཱུྃ་དུ་ཤར༔ སྐུ་ལྔ་ལྷུན་གྲུབ་ཞིང་ཁམས་སུ༔ ཡེ་ཤེས་ལྔ་ཡི་གཞལ་ཡས་ཁང་༔ ཚད་དང་མཚན་ཉིད་རྫོགས་པའི་དབུས༔ བྱོལ་སོང་གཙོ་བརྒྱད་ཀྱིས་བཏེགས་པའི༔ རིན་ཆེན་ཁྲི་སྟེང་པད་ཟླ་དང་༔ ཉི་སྟེང་བདུད་ཆེན་བསྣོལ་བའི་ཁྲིར༔ རིག་པ་ཧཱུྃ་གི་འཕྲོ་འདུ་ལས༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་ཁྲོ་གཏུམ་རྔམས༔ ཞལ་གདངས་ལྗགས་འདྲིལ་མཆེ་བ་གཙིགས༔ སྤྱན་དགུ་སྡང་མིག་གཡོ་ཞིང་འཁྲུགས༔ ཁམ་ནག་དབུ་སྐྲ་གྱེན་དུ་བརྫེས༔ སྨ་ར་སྨིན་མར་མེ་སྟག་འཕྲོ༔ ཕྱག་དྲུག་གཡས་གཉིས་གསེར་རྡོ་རྗེ༔ རྩེ་དགུ་དང་ནི་རྩེ་ལྔ་ཕྱར༔ གཡོན་གཉིས་ཁ་ཊྭཱྃ་མེ་དཔུང་བསྣམས༔ མཐའ་གཉིས་རི་རབ་ཕུར་པ་འདྲིལ༔ ཞབས་བཞི་གྱད་ཀྱི་འདོར་སྟབས་བསྒྲད༔ དུར་ཁྲོད་དཔལ་ཆས་གར་ཉམས་རྫོགས༔ ཡི་དམ་ཡོངས་འདུས་ངོ་བོར་བསྐྱེད༔ སྦྱོར་ཡུམ་འཁོར་ལོ་རྒྱས་འདེབས་འཁྲིལ༔ ཕྱག་གཉིས་ཁ་ཊྭཱྃ་ཐོད་ཁྲག་བསྣམས༔ ཞབས་གཡོན་ཡབ་ཀྱི་སྐེད་ལ་འཁྱུད༔ གཡས་པས་འཁོར་བའི་སྒོ་འཕར་གནོན༔ ཁྲོ་མོ་རྔམས་བརྗིད་གཟིག་ཤམ་ཅན༔ གཡང་གཞི་ཐོད་སྦྲུལ་རྒྱན་དུ་འཆང་༔ མཁའ་འགྲོ་ཡོངས་རྫོགས་ངོ་བོར་གསལ༔ སྤྱི་བོར་པདྨ་ཉི་གདན་ལ༔ གུ་རུ་མཚོ་སྐྱེས་རྡོ་རྗེ་ནི༔ མཐིང་ནག་ལོངས་སྤྱོད་རྫོགས་པའི་ཆས༔ ཕྱག་གཉིས་རྡོར་དྲིལ་བསྣོལ་ཐབས་འཛིན༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ གཞོན་ནུ་མཚན་དཔེའི་ལང་ཚོས་མཛེས༔ ཡུམ་ཆེན་ཡེ་ཤེས་མཚོ་རྒྱལ་མ༔ དཀར་དམར་མདངས་ལྡན་མཚན་དཔེས་སྤྲས༔ ཕྱག་གཡས་གྲི་གུག་གཡོན་བྷནྡྷ༔ ཞབས་གཉིས་ཡབ་ཀྱི་སྐེད་ལ་འཁྲིལ༔ བླ་མ་ཡོངས་རྫོགས་ངོ་བོར་གསལ༔ དཔལ་ཆེན་རྡོ་རྗེ་གཞོན་ནུ་ཡི༔ ཐུགས་ཀར་དྭངས་མའི་ཐིག་ཀློང་དུ༔ རྡོ་རྗེ་རྩེ་དགུའི་ལྟེ་བ་རུ༔ ཧཱུྃ་མཐིང་ཉིད་ལ་སྔགས་ཀྱིས་བསྐོར༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དབྱིངས་བཞུགས་ཡེ་ཤེས་པ༔ མཚོ་ལ་ཁ་ཆར་བབས་པ་བཞིན༔ སྤྱན་དྲངས་གཉིས་སུ་མེད་པར་གྱུར༔ དེ་ནས་སྤྱན་འདྲེན་བཞུགས་གསོལ་ཕྱག་འཚལ་ལ༔ ཧཱུྃ༔ སྐུ་གསུམ་རྒྱལ་བའི་དཀྱིལ་འཁོར་ནས༔ རྩ་གསུམ་ཞི་ཁྲོ་རྟེན་བརྟེན་པ༔ མ་ལུས་སྤྱན་འདྲེན་གཤེགས་སུ་གསོལ༔ གདན་གསུམ་ཚང་བའི་ངོ་བོར་བཞུགས༔ གདོད་ནས་དམ་ཚིག་ཡེ་ཤེས་པ༔ གཉིས་མེད་རིག་པའི་བརྡ་ཕྱག་འཚལ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་ཌཱ་ཀི་ནཱི་ས་མ་ཡ་ཛ་ཛཿཏིཥྛ་ལྷན༔ ན་མོ་ན་མ་ཧོཿདེ་ནས་མཆོད་པ་འབུལ་བ་ནི༔ ཧཱུྃ༔ ཁམས་གསུམ་སྣང་ཞིང་སྲིད་པའི་ཚོགས༔ ཕྱི་ནང་གསང་མཆོད་སྤྲིན་དུ་ཤར༔ ཡེ་ཤེས་རོལ་པའི་ལྷ་ལ་འབུལ༔ འཁོར་འདས་དག་མཉམ་ཆེན་པོར་རོལ༔ མ་ཧཱ་སརྦ་པཉྩ་པཱུ་ཙ་གྷ་ཎ་ཙཀྲ་པཱུ་ཛ་ཧོཿདེ་ནས་བསྟོད་པ་བྱ་བ་ལ༔ ཧཱུྃ༔ དུས་གསུམ་བདེ་བར་གཤེགས་པ་ཆོས་ཀྱི་སྐུ༔ ལྷུན་གྲུབ་ལོངས་སྤྱོད་རྫོགས་སྐུའི་བཀོད་པ་ངོམས༔ གདུལ་དཀའ་འདུལ་མཛད་ཐབས་ཀྱིས་གཟུགས་སྐུར་སྟོན༔ རྩ་གསུམ་རྒྱལ་བ་རྒྱ་མཚོའི་ཚོགས་ལ་བསྟོད༔ དེ་ནས་བཤགས་པ་བྱ་བ་ལ༔ ཧོཿརྩ་གསུམ་རྒྱལ་བ་རྒྱ་མཚོའི་སྤྱན་སྔ་རུ༔ བདག་གི་སྒོ་གསུམ་མ་རིག་དབང་གྱུར་པས༔ མི་དགེ་སྡིག་པའི་ལས་རྣམས་ཅི་བགྱིས་པ༔ མི་འཆབ་མི་སྦེད་གནོང་འགྱོད་སེམས་ཀྱིས་བཤགས༔ ཡི་གེ་བརྒྱ་པ་ཅི་འགྲུབ་བརྗོད༔ དེ་ནས་བསྙེན་པ་བཟླ་བ་ལ༔ ཧཱུྃ༔ སྒོ་གསུམ་རྡོ་རྗེ་གསུམ་གྱི་རོལ་པ་རུ༔ གསལ་བའི་ཐུགས་ཀར་དྭངས་མའི་ཐིག་ལེའི་ཀློང་༔ རིག་པ་ཧཱུྃ་ལ་སྔགས་ཀྱི་ཕྲེང་བས་བསྐོར༔ འོད་ཀྱིས་ཡེ་ཤེས་དཔག་མེད་སྤྱན་དྲངས་བསྟིམས༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ༔ དེ་ནས་སྒྲུབ་པ་བྱ་བ་ལ༔ ཧཱུྃ༔ དུས་གསུམ་རྒྱལ་བ་སྲས་བཅས་ཀྱི༔ ཡེ་ཤེས་ཡོན་ཏན་དབང་བྱིན་རླབས༔ དངོས་གྲུབ་མ་ལུས་ཇི་སྙེད་པ༔ འོད་ལྔའི་རྣམ་པར་བསྡུས་ཏེ་བསྟིམ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ༔ དེ་ནས་ལས་སྦྱོར་བྱ་བ་ལ༔ རང་ཉིད་གདན་གསུམ་ཚང་བའི་ལྷའི༔ ཐུགས་ཀའི་སྔགས་ལས་འོད་འཕྲོས་པས༔ སེམས་ཅན་ཀུན་གྱི་སྒྲིབ་པ་སྦྱངས༔ འཁོར་འདས་གཟི་བྱིན་བདག་ལ་བསྡུས༔ ཚེ་བསོད་དཔལ་འབྱོར་རབ་རྒྱས་ཏེ༔ ཁམས་གསུམ་དཔལ་ཡོན་དབང་དུ་བསྡུས༔ དགྲ་བགེགས་གནོད་བྱེད་མ་ལུས་པ༔ སྦུར་མ་མེ་ལ་བསྲེགས་བཞིན་བསྒོམ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ༔ ཤཱནྟིཾ་པུཥྚིཾ་པཱ་ཤཾ་མཱ་ར་ཡ་ཕཊ༔ སྨྲ་བཅད་གྲངས་བསྙེན་བྱེ་བ་བཅུ༔ སྒྲུབ་སྔགས་བྱེ་བ་གཅིག་དང་ནི༔ ལས་སྦྱོར་འབུམ་གྱིས་འགྲུབ་འགྱུར་རོ༔ རྟགས་ཀྱི་རིམ་པ་འདི་ལྟ་སྟེ༔ ནམ་མཁའ་སྤྲིན་དང་བྲལ་བ་དང་༔ ཉི་ཟླ་ཤར་དང་ལོ་ཏོག་དང་༔ མེ་ཏོག་པད་ཚལ་རྒྱས་པ་དང་༔ མཁའ་ལ་འཕུར་དང་རི་རྩེར་འཛེག༔ བདུད་རྩི་བྷན་ཆང་རོལ་བ་དང་༔ ཉམས་རྟོགས་གསར་དུ་སྐྱེ་བ་རྣམས༔ འགྲུབ་པའི་ལྟས་སུ་ཤེས་པར་བྱ༔ བསྒོམ་དང་བཟླས་པའི་གནད་ལྡན་ན༔ ཚེ་འདིར་གྲོལ་བ་ངེས་པར་ཐོབ༔ བཀའ་སྲུང་གནོད་སྦྱིན་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཨ་ཐམ་རྒྱ༔ ཞེས་པ་འདི་ཉིད་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་ཤྭ་བྲག་རྡོ་རྗེ་ནས་གཏེར་ནས་བཏོན་ཏེ་མི་ལོ་སུམ་ཅུ་རྩ་བདུན་བར་དུ་བཀའ་རྒྱ་བྱས་མཐར་སློབ་བུ་འཇམ་དཔལ་གྱིས་ནན་དུ་བསྐུལ་ངོར་ལི་སྟོད་སྐལ་བཟང་དགོན་དུ་གཏན་ལ་ཕབ་པའི་ཡི་གེ་པ་ནི་རྣལ་འབྱོར་སེམས་ཉིད་རྡོ་རྗེའོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།