TTDL-ZABTER-07-JA-004

༠༠༠༠བརྡ་ཡིག༡༤༣ཟབ་གསང་མཁའ་འགྲོའི་སྙིང་ཐིག་ལས༔ ཐུགས་སྒྲུབ་ཡེ་ཤེས་ཉི་མའི་སྐོར༔ རྣལ་འབྱོར་རྒྱུད་ལ་བརྟེན་ནས་སུ༔ ཞུན་མར་བཅུད་ལེན་འོད་གསལ་སྙིང༔ གུ་ཧྱ༔ དཔལ་ཆེན་རྡོ་རྗེ་ཁྲོ་ལོད་སྐུ་ལ་འདུད༔ ༠༠༠༠བརྡ་ཡིག༡༤༣བདུད་འདུལ་པདྨ་ཐོད་ཕྲེང་ངས༔ མ་འོངས་ལས་ཅན་དོན་ཆེད་དུ༔ བཅུད་ལེན་འོད་གསལ་སྙིང་པོ་བསྟན༔ རྣལ་འབྱོར་དབེན་ཁྲོད་འགྲིམ་པའི་དུས་སུ་ནི༔ འཚོ་བ་ཆུང་ངུ་ལ་བརྟེན་རླུང་ལ་འཇུག༔ དང་པོ་སྨན་གྱིས་སྡེབ་སྦྱོར་བྱེད་པ་ནི༔ ཨ་རུ་གཙོ་ལ་སེ་འབྲུ་ཤིང་མངར་བློན༔ བཅའ་ལྒ་བུ་རམ་སྦྲང་རྩི་ཀ་ར་བྲན༔ གཙོ་བོའི་ཕྱེད་ཆ་བློན་ལ་སྦྱར་བ་དང་༔ བློན་པོའི་ཕྱེད་ཆ་རེ་རེ་བྲན་ལ་སྦྱར༔ རིལ་བུ་སྲན་མ་ཙམ་རེ་དུས་གསུམ་བཟའ༔ དེ་ཡང་རླུང་ཤས་ཆེ་བ་མ་གཏོགས་པ༔ ཞུན་མར་ཟོས་ན་སྨན་གྱི་དགོས་ཆེད་མེད༔ སྨན་ལ་བརྟེན་ན་ཞུན་མར་ཡང་མི་དགོས༔ རླུང་ཤས་ཆེ་ན་གཉིས་ཀ་བརྟེན་ཀྱང་རུང་༔ སྙིང་སྲན་ཆེ་བ་རླུང་དང་སྨན་ལ་བརྟེན༔ མི་ཐུབ་པ་རྣམས་ཞུན་མར་རླུང་གཉིས་པོ༔ འདི་ལ་གོམས་འདྲིས་བྱེད་པ་རྣམས་ཀྱིས་ནི༔ ནངས་པར་སྔ་ཐོག་ཇ་ཕོར་གང་ཙམ་བཏུང་༔ གོང་ལ་ཟན་རིལ་མཐེ་བོང་ཙམ་བདུན་བཟའ༔ ཇ་ཡང་ཆབ་སྣོད་བདུན་ཙམ་བཏུང་བར་བཤད༔ མུན་དགོང་མཚམས་སུ་ཇ་ནི་གོང་ལྟར་རོ༔ ཟན་ནི་ཆུ་ཚན་འམ་ནི་མར་ཁུ་རུ༔ བཙོས་ཏེ་དྲོད་མ་ཡལ་བར་བཟའ་བར་བྱ༔ གོམས་འདྲིས་སོང་བཞིན་ཟན་གྱི་རིལ་བུ་རྣམས༔ རེ་རེ་བཞིན་ཏུ་ཇེ་ཉུང་འདོད་ཀྱང་བྱ༔ དེ་ལ་དང་པོ་མལ་ནས་ཡར་ལངས་ཏེ༔ སྐྱབས་སེམས་སྔོན་འགྲོས་བླ་མར་དབང་བཞི་བླང་༔ རྩ་རླུང་བྱིན་རླབས་བཅུད་ལེན་སྡོམ་བཟུང་བརྗོད༔ དེ་ནས་རྣམ་སྣང་མཛད་ཀྱི་ཆོས་བདུན་བྱ༔ རང་ཉིད་གསང་བ་ཡེ་ཤེས་མཁའ་འགྲོ་མའི༔ སྐུ་དབུས་རྩ་གསུམ་འཁོར་ལོ་ལྔ་ལྡན་གསལ༔ རླུང་རོ་དགུ་བསལ་སྐྱིལ་བཤིག་ཧ་སྤྲུག་བྱ༔ དེ་ནས་སྙིང་དབུས་པདྨ་གེ་སར་ཁར༔ ཟླ་དཀྱིལ་དབུས་སུ་བཟང་མོའི་སྐུ་བསྒོམ་པའི༔ ཐུགས་ཀར་འཇའ་ཐིག་ཀློང་དུ་རིག་པ་ཨཱཿགསལ་ཏེ་ཡེ་ཤེས་ལྔ་ཡི་རླུང་རྔུབ་སྟེ༔ དྭངས་མ་ཨཱཿལ་ལྷག་མ་ལྟེ་འོག་མནན༔ རླུང་ཁུག་ཐུགས་སྒྲུབ་གསང་བའི་རྒྱ་ཅན་ལྟར༔ དེ་མཐར་འབར་འཛག་དྲོད་ཀྱི་གདམས་ངག་ནི༔ རྩ་མཆོག་རྒྱལ་པོ་ཀུན་དར་མའི༔ མར་སྣར་རྒྱལ་ཀུན་ཡུམ་དངོས་གཏུམ༔ ཡར་སྣར་རིགས་འདུས་ཧཾཿཡིག་དཀར༔ བྱིན་རླབས་ཡེ་ཤེས་རོ་རྐྱང་ལེན༔ མར་སྣའི་ཡུམ་ལ་ཕོག་པ་ཡིས༔ ཤེས་རབ་ཡེ་ཤེས་མེ་འབར་བས༔ འཁོར་ལོ་ལྔ་ལ་རིམ་པར་གཞིལ༔ ཡབ་ཡུམ་རེག་པ་འཕྲོད་ཙམ་ལས༔ བདུད་རྩི་རིམ་འབེབས་ཚོགས་བསགས་ལམ༔ རྡོ་རྗེའི་རྩེར་འཐོན་རྩེ་འདྲེན་ཞིང་༔ མས་དེད་འཁོར་ལོ་ཡར་འདྲེན་འགྲམ༔ དབང་དང་དགའ་བཞི་རིམ་ཐོབ་བསྐྱེད༔ འཛིན་པ་གཞི་ལ་ལྔ་ཐིག་འདུས༔ མས་རིམ་ཚོགས་བསགས་སྒྲིབ་སྦྱངས་ལམ༔ ཡས་རིམ་དབང་དགའ་སྒྲུབ་རྒྱུན་ལམ༔ རྩ་ཁམས་ཡེ་ཤེས་མེས་ཁྱབ་དང་༔ རླུང་གི་ཡང་ཟབ་རླུང་གི་མཆོག༔ མི་འཛིན་འཛིན་པའི་རླུང་བུམ་ཅན༔ རིག་པ་དང་ནི་དབྱེར་མེད་འགྲོགས༔ རྒྱུན་དུ་མ་སྤངས་མི་འདོར་བར༔ རྣལ་འབྱོར་ལམ་གྱི་དམ་པ་ཡིན༔ མངོན་སུམ་རང་ཐོག་མི་ཕོབ་ན༔ ཐབས་ཀྱི་ལམ་ལ་བརྟེན་པས་གྲོལ༔ ལམ་འདིས་རྩ་མདུད་གྲོལ་གྱུར་ནས༔ གྲོལ་མ་ཐག་ཏུ་ས་ལམ་རྫོགས༔ དེས་ན་ཐབས་ཀྱི་ལམ་ཞེས་བྱ༔ ཟས་སྐོམ་རྩ་མི་འགགས་ཙམ་ལས༔ མ་བརྟེན་པས་ནི་རླུང་སེམས་གཉིས༔ གནད་དུ་ཆུན་དེ་མྱུར་བའི་ལམ༔ བཅུད་ལེན་པ་ལ་དོན་བཞི་སྟེ༔ རིལ་བུ་སྣོད་དུ་བཞག་བྱས་ནས༔ རང་གི་འོད་ཀྱིས་རྒྱལ་ཀུན་བསྐུལ༔ རྒྱལ་བའི་ཐུགས་རྗེའི་ལྕགས་ཀྱུ་ཡིས༔ སྣོད་བཅུད་སྣང་སྲིད་འབྱུང་བཞིའི་བཅུད༔ བསྡུས་བསྟིམ་ལུས་ལྷར་ཚོགས་སུ་རོལ༔ རླུང་དང་རིག་པ་དབྱེར་མེད་དོ༔ དེ་ནི་ཕྱི་ཡི་བཅུད་ལེན་ནོ༔ རིག་པ་བཟང་མོའི་ཨཱཿདཀར་ལ༔ ཡེ་ཤེས་ལྔ་ཡི་རླུང་བཅུད་བསྟིམ༔ འདི་ནི་ནང་གི་བཅུད་ལེན་ནོ༔ བདེ་སྟོང་བདུད་རྩི་གཏུམ་མོའི་མེ༔ བྱིན་རླབས་ཡེ་ཤེས་རླུང་གསུམ་གྱིས༔ རྩ་ཁམས་གསང་བའི་དཀྱིལ་འཁོར་མཆོད༔ དབང་དགའ་ལེན་པ་གསང་བ་སྟེ༔ མི་འཛིན་འཛིན་པ་ཆེན་པོའི་རླུང་༔ མི་སྒོམ་སྒོམ་དང་འདྲེས་པ་ནི༔ ཡང་གསང་མཆོག་གི་བཅུད་ལེན་ནོ༔ འཚོ་བ་གཏན་ནས་སྤངས་པ་ན༔ རྩ་ཡི་ལམ་ཆད་ནུས་པ་མེད༔ དེ་ཕྱིར་ཅུང་ཟད་ཙམ་ལ་བརྟེན༔ འཚོ་བ་ཆུང་ངུ་ལ་བརྟེན་ན༔ རླུང་རིག་དབྱེར་མེད་བརྟན་ཐོབ་འགྱུར༔ བརྩོན་འགྲུས་མི་བརྩོན་ངང་ནས་ཆེ༔ འཚོ་བ་ཆེན་པོ་ལ་བརྟེན་ན༔ འདི་ལ་བརྩོན་འདོད་བརྩོན་འགྲུས་ཞན༔ ནུས་པ་མངོན་དུ་གྱུར་ཉིན་མེད༔ ངག་གི་སྨྲ་བརྗོད་མང་བས་ན༔ རྣམ་རྟོག་རག་སྟེ་གནད་དོན་འཆོར༔ དེས་ན་སྨྲ་བ་བཅད་པར་བྱ༔ འདི་ལ་ལམ་རྟགས་ཡོན་ཏན་ནི༔ བསམ་གྱིས་མི་ཁྱབ་མངོན་པར་འབྱུང་༔ ནམ་མཁའི་དབྱིངས་སུ་འཕུར་བ་དང་༔ ས་འོག་ཟང་ཐལ་འཛུལ་ཡང་ནུས༔ སྤྱན་དང་མངོན་ཤེས་ལ་སོགས་པ༔ ཐུན་མོང་ཡོན་ཏན་དཔག་མེད་འབྱུང་༔ དྲི་ཆེན་དྲི་མེད་དྲི་ཆུ་བསུང་༔ དེ་ལ་གཉིས་སུ་འཛིན་པ་དང་༔ མངོན་ཞེན་སྐྱེས་ན་བསླུ་བར་འཆོལ༔ སངས་རྒྱས་དང་ནི་སེམས་ཅན་གཉིས༔ འཛིན་མེད་གཟུང་འཛིན་གཉིས་ཀྱིས་ཁྱད༔ གང་ཡང་ཁྱབ་གདལ་ངང་ལ་བཞག༔ དེས་ནི་གྲོལ་བ་མངོན་འཐོབ་བོ༔ གཟུང་འཛིན་ལ་ནི་མངོན་ཞེན་ཚད༔ ཐམས་ཅད་འཁྲུལ་པའི་དུཿཁར་འཁྱོལ༔ ཐབས་ལམ་ལ་བརྟེན་ངེས་དོན་དུ༔ གྲོལ་བར་གྱུར་པ་ལམ་གྱི་གནད༔ ཟབ་གསང་ཨ་ཏི་ཡོ་གའི་ཀློང་༔ གྲོལ་ན་ཐམས་ཅད་འདི་ལ་གྲོལ༔ འདིར་མ་ལྟོས་པའི་གྲོལ་བ་འགགས༔ རེ་རློམ་དགའ་བྲོད་ང་རྒྱལ་དང་༔ ཁེངས་སེམས་མངོན་ཞེན་མེད་པ་རུ༔ འཁོར་འདས་རིག་པ་རྗེན་པར་རྫོགས༔ སྣང་ཚད་བདག་མེད་ཆོས་སྐུར་རྟོགས༔ འཁྲུལ་རྟོག་ཁྱབ་གདལ་གཞི་རུ་བཤིག༔ འཛིན་འཆིང་འཛིན་མེད་ངང་དུ་བཤིག༔ གཟུང་ཡུལ་སྒྱུ་མ་ཟང་ཐལ་ངང་༔ འཛིན་པ་གཞི་མེད་རྩ་བྲལ་ངང་༔ གང་ཤར་ཤར་གྲོལ་དུས་མཉམ་ངང་༔ ཀློང་ཤར་ཀློང་ཐིམ་ཀློང་གྲོལ་ངང་༔ འགྱུ་དྲན་རང་ཤར་རང་གྲོལ་ངང་༔ རེ་ཡུལ་རང་སེམས་ཆོས་སྐུའི་ངང་༔ དོགས་ཡུལ་རང་རྩལ་རིག་པའི་ངང་༔ མ་ཡེངས་མི་བསྒོམ་ཁྱབ་གདལ་ངང་༔ མ་བཅོས་རིག་པ་རང་ངོར་སངས༔ མ་བསླབ་ཤེས་བྱ་ཀློང་ནས་རྒྱས༔ ས་མ་ཡ༔ རྒྱ་རྒྱ་རྒྱ༔ བདག་འདྲ་ཡེ་ཤེས་མཚོ་རྒྱལ་ངས༔ ཕ་ཅིག་པདྨའི་བཀའ་བཞིན་དུ༔ སྙིང་གི་ཡང་ཏིག་ཡི་གེར་བྲིས༔ དཔལ་ལྡན་རང་བྱུང་རྒྱལ་མོ་དང་༔ གནོད་སྦྱིན་ཤན་པ་དམར་ནག་དང་༔ ཞིང་སྐྱོང་ཀུན་དགའ་གཞོན་ནུ་སོགས༔ སྔགས་སྲུང་མ་མོ་ཡོངས་ལ་གཉེར༔ ཐུབ་པར་སྲུངས་ཤིག་ས་མ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཟབ་གསང་རྫོགས་པ་ཆེན་པོ་ཀློང་ཡངས་ནམ་མཁའི་རྣལ་འབྱོར་པ།གླིང་པ་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ནས་བཏོན་ཏེ་མཐར་ཡང་ངེས་དོན་རྫོགས་པ་ཆེན་པོའི་རྣལ་འབྱོར་མ་ཅིག་སྤྲུལ་སྐུའི་སྲས་ཀྱི་ཐུ་བོ་འགྱུར་མེད་བསྟན་འཛིན་གྱིས་བསྐུལ་ངོར་རཱུ་ཊའི་སྙིང་ལྤགས་ཤོག་སེར་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་སྔགས་བཙུན་ཕུན་ཚོགས་བཀྲ་ཤིས་སོ།།།།