TTDL-ZABTER-07-JA-014

༠༠༠༠བརྡ་ཡིག༢༤༡ཟབ་གསང་མཁའ་འགྲོའི་སྙིང་ཐིག་ལས༔ མཁའ་འགྲོའི་ཐུགས་སྒྲུབ་ཡེ་ཤེས་ཉི་མ་ལས༔ འཛབ་དམིགས་འོད་གསལ་སྙིང་པོ་བཞུགས་སོ༔ མཚོ་སྐྱེས་རྡོ་རྗེའི་ཞབས་ལ་ཕྱག་འཚལ་ལོ༔ ༠༠༠༠བརྡ་ཡིག༢༤༡བདག་འདྲ་རྗེ་བཙུན་པདྨ་འགྲོ་འདུལ་ངས༔ མ་འོངས་ལས་ཅན་སྐལ་བར་གསལ་མཛོད་གདམས༔ འདི་ཉིད་ཉམས་སུ་ལེན་པའི་རིམ་པ་ནི༔ བདག་བདུན་ལྷར་གསལ་ནོར་བ་ཐམས་ཅད་སྤངས༔ དེ་ནས་ཡུལ་ཞེན་འཁྲི་བ་ཀུན་བཅད་དེ༔ སྒོ་གསུམ་གསང་བ་གསུམ་གྱི་དཀྱིལ་འཁོར་དང་༔ སྣང་གྲགས་འགྱུ་གསུམ་ལྷ་སྔགས་ཆོས་ཉིད་དུ༔ ལམ་ཁྱེར་བྱ་ཞིང་ཐུགས་རྗེའི་ཐབས་མང་གིས༔ འགྲོ་རྣམས་རྣམ་མཁྱེན་སངས་རྒྱས་ལམ་འགོད་གྱིས༔ བྱམས་དང་སྙིང་རྗེའི་ཐུགས་བསྐྱེད་དཔའ་བོའི་གདིང་༔ རྒྱལ་བའི་སྲས་ཀྱི་མཛད་སྤྱོད་བླ་ན་མེད༔ དེ་མིན་དེའི་ཚུལ་རྗེས་སུ་འཛིན་པས་ཀྱང་༔ ཕ་ཡི་རྒྱལ་ཁྲིམས་བུ་ཡིས་སྐྱོང་བའི་དཔེས༔ མཚོན་པའི་འགྲོ་རྣམས་སྙིང་རྗེའི་སེམས་ཀྱིས་ནི༔ སྡུག་བསྔལ་གསུམ་གྱིས་བཅིངས་པ་གྲོལ་པའི་ཕྱིར༔ མ་སེམས་བུ་བཙོན་ཚུད་ལ་སྙིང་རྗེའི་སེམས༔ ཐར་བར་འདོད་ཕྱིར་ཐབས་ལ་སེམས་པ་ལྟར༔ མ་འམ་བུ་རྣམས་ངན་སོང་འོབས་སུ་མནར༔ རང་ལ་རྒོལ་བ་སྤུ་ཙམ་མི་བཟོད་ན༔ བཟོད་མེད་སྡུག་བསྔལ་ཆུ་བོས་གཞུང་བཞིན་དུ༔ བར་མཚམས་མེད་པར་མནར་བ་འདི་རྣམས་ཀུན༔ ཐར་ཐབས་ཕྱིར་ན་བདག་ཀྱང་དེའི་ཚབ་འཇུག༔ དེ་ལྟར་སྙིང་ནས་དྲན་པ་དཔའ་བོའི་གདིང་༔ ལུས་ཀྱི་གྲུར་ཞོན་དཀའ་བ་དང་དུ་ལེན༔ ལུས་འདིའི་རིང་ལ་འགྲོ་རྣམས་བསྒྲལ་བའི་གྲུ༔ སྲིད་མཚོ་ཁ་ཡངས་གཏིང་ཟབ་འདི་ཉིད་ནི༔ ད་ལྟ་ཉིད་དུ་འདོར་རམ་སྐམ་སར་འདོན༔ སྙིང་སྟོབས་ཆེ་ཞིང་བསམ་རྒྱ་མཐའ་ཡས་ཀྱིས༔ སྒོ་གསུམ་རྡོ་རྗེ་གསུམ་དུ་འཇུག་པར་བྱ༔ ཧཱུྃ་ཧྲཱིཿསྒོ་གསུམ་གནས་དག་ཡེ་ཤེས་མཁའ་འགྲོར་འཕོས༔ རྣམ་པར་སྨིན་པའི་གསང་བ་ཡེ་ཤེས་མ༔ དམར་གསལ་གྲི་ཐོད་འཛིན་པའི་ཐུགས་ཀློང་དུ༔ ཉི་མ་ཟླ་བའི་གའུ་ཁ་སྦྱོར་ནང་༔ དྭངས་མ་ལྔ་ལྡན་གསལ་འཚར་ཐིག་ལེའི་ཀློང་༔ ཐུགས་སྲོག་ཧྲཱིཿཡིག་དམར་གསལ་འོད་འབར་གྱིས༔ མཐའ་མར་སྔགས་ཀྱི་ཕྲེང་བས་འཁོར་བ་ལས༔ འོད་ཟེར་ཡར་འཕྲོས་རྒྱལ་བ་མཆོད་པས་མཉེས༔ མཁྱེན་བརྩེ་ནུས་པའི་ཐུགས་རྗེ་བྱིན་རླབས་དང་༔ དབང་དང་དངོས་གྲུབ་འོད་ཟེར་ཚུར་འདུས་ཏེ༔ རང་ཉིད་ཡེ་ཤེས་མཁའ་འགྲོའི་ཐུགས་ཀར་བསྟིམས༔ གཟི་བྱིན་རབ་འབར་ནུས་པ་རྩལ་ལྡན་གྱིས༔ འཁོར་འདས་ཡོངས་ལ་དབང་བསྒྱུར་དབང་ཐོབ་ཅིང་༔ སྐུ་གསུམ་ཡེ་ཤེས་མཉམ་སྦྱོར་བདེ་ཆེན་ཀློང་༔ ཨོཾ་གུ་ཧྱ་ཛྙཱ་ན་ཌཱ་ཀི་ནཱི་ཨ་ཡརྫྙཱ་ན་སིདྡྷི་ཧཱུྃ༔ དེ་ནས་གཙོ་འཁོར་བསྒྲིལ་ལ་བསྙེན་པ་ནི༔ ཧཱུྃ་ཧྲཱིཿགཞི་དབྱིངས་རང་ངོར་སངས་པ་ཆོས་སྐུར་འཕོས༔ དབྱིངས་ལས་མ་གཡེལ་གཟུགས་ཀྱི་སྐུར་བཞེངས་པ༔ ལོངས་སྤྱོད་རྫོགས་སྐུ་གསང་བ་ཡེ་ཤེས་མའི༔ རོལ་པའི་གར་གྱི་རྩལ་སྣང་སྒྱུ་མའི་འཕྲུལ༔ སོ་སོའི་ཐུགས་ཀར་རང་རང་སྲོག་ཡིག་ལ༔ སྔགས་ཀྱི་ཕྲེང་བས་འཁོར་བའི་འོད་ཟེར་གྱིས༔ རིགས་ཀུན་རྒྱལ་བ་རྒྱ་མཚོ་མ་ལུས་པ༔ ཡེ་ཤེས་མཁའ་འགྲོའི་རྣམ་པར་སྤྱན་དྲངས་ནས༔ མཚོ་ལ་ཆར་བཞིན་བདག་འདུན་གཉིས་ལ་བསྟིམས༔ མར་འཕྲོས་འགྲོ་བའི་རྒྱུད་སྦྱངས་མཁའ་འགྲོའི་སྐུ༔ སྣང་གྲགས་འགྱུ་གསུམ་ལྷ་སྔགས་ཆོས་ཉིད་ངང་༔ ཨོཾ་གུ་ཧྱ་ཛྙཱ་ན་ཌཱ་ཀི་ནཱི་ཨ་ཡུརྫྙཱ་ན་ཧྲཱིཿམ་ཧ་རི་ནི་ས་སརྦ་སིདྡྷི་ཕ་ལ་ཧཱུྃ་ཨཱཿམཐར་ཡང་འཛབ་སྔགས་དངོས་གྲུབ་རྒྱ་མཚོ་ནི༔ ཨོཾ་གུ་ཧྱ་ཛྙཱ་ན་ཌཱ་ཀི་ནཱི་ཨ་ཡུརྫྙཱ་ན་སིདྡྷི་ཧཱུྃ་ཧྲཱིཿཨོཾ་བཛྲ་ས་མནྟ་བྷ་དྲ་ཨོཾ༔ ཨོཾ་ཛྙཱ་ན་ཌཱ་ཀི་ནཱི་སརྦ་སིདྡྷི་ཧཱུྃ༔ ཨོཾ་བཛྲ་ཌཱ་ཀི་ནཱི་སརྦ་སིདྡྷི་ཧཱུྃ༔ ཨོཾ་རཏྣ་ཌཱ་ཀི་ནཱི་སརྦ་སིདྡྷི་ཧཱུྃ༔ ཨོཾ་པདྨ་ཌཱ་ཀི་ནཱི་སརྦ་སིདྡྷི་ཧཱུྃ༔ ཨོཾ་ཀརྨ་ཌཱ་ཀི་ནཱི་སརྦ་སིདྡྷི་ཧཱུྃ༔ ཨོཾ་བཛྲ་ཨངྐུ་ཤ་ཛཿཨོཾ་རརླ་པ་ཤ་ཧཱུྃ༔ ཨོཾ་པདྨ་སྥོ་ཊ་བཾ༔ ཨོཾ་ཀརྨ་གྷནྜེ་ཧོ༔ ཧྲཱིཿམ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛཿདེ་ནས་ལས་སྦྱོར་འཛབ་དམིགས་ནི༔ ཧཱུྃ་ཧཱུྃ༔ ཧཱུྃ་ཧྲཱིཿགཟུང་འཛིན་གཉིས་མེད་གཞི་དབྱིངས་ཉིད༔ ཁྱབ་གདལ་ཡེ་ཤེས་མཁའ་འགྲོའི་ཀློང་༔ ཡུལ་མེད་ཡུལ་ལ་འོད་ཟེར་འཕྲོས༔ མ་རིག་གཉིས་འཛིན་འཁྲུལ་པ་བཤིག༔ རྣམ་རྟོག་ཡེ་ཤེས་དབྱིངས་སུ་བསྒྲལ༔ ཆོས་དབྱིངས་མཁའ་ལ་ཆོས་ཉིད་སྤྲིན༔ ཡེ་ཤེས་རང་མདངས་ལུ་གུ་རྒྱུད༔ རྣམ་རྟོག་མཚན་མའི་མིང་ཡང་མེད༔ གཉིས་སྣང་འགོང་པོ་ཡེ་ཤེས་སུ༔ བསྒྲལ་ཏེ་རྡོ་རྗེ་དམ་ཚིག་རྒྱ༔ ཨོཾ་གུ་ཧྱ་ཛྙཱ་ན་ཌཱ་ཀི་ནཱི་ཧྲཱིཿམ་ཧ་རི་ནི་ས་ས་མ་ཡ་སརྦ་ཤ་ཏྲུཾ་རཱུ་ཏྲ་མ་ར་ཡ་ཕཊ༔ ས་མ་ཡ༔ རྒྱ་རྒྱ་རྒྱ༔ ཆོས་སྐུ་མ་བཅོས་སྐྱེ་མེད་ཀློང་༔ ཡེ་ནས་ཡེ་རིག་ཡེ་ཤེས་ལྷ༔ རྟག་ཆད་འཛིན་ཞེན་ཨ་འཐས་མིན༔ མཉམ་ཤར་མཉམ་རྫོགས་རྫོགས་པའོ༔ ས་མ་ཡ༔ རྒྱ་རྒྱ་རྒྱ༔ འདི་ཉིད་ཚུལ་བཞིན་ཉམས་ལེན་པའི༔ རྣལ་འབྱོར་ཕོ་མོ་འདིས་གྲོལ་གྱུར༔ ཕ་ཅིག་རྡོ་རྗེ་གཤོག་རྒོད་བཀའ་བཞིན་དུ༔ བུད་མེད་མཚོ་རྒྱལ་བདག་གིས་ཡི་གེར་བཀོད༔ བཀའ་འདི་གནོད་སྦྱིན་ཤན་དམར་ཁྱོད་ལ་གཏད༔ ཐུབ་པར་སྲུངས་ཤིག་བཛྲ་ས་མ་ཡ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་སྔགས་པ་བདུད་འཇོམས་རྡོ་རྗེའི་གཏེར་མའོ།།ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།སརྦ་མངྒ་ལཾ།།ཞལ་གྲོ།ཤུ་བྷཾ།།།།