TTDL-ZABTER-07-JA-019

༠༠༠༠བརྡ་ཡིག༢༧༧ཚོགས་རྫས་བྱིན་བརླབ་ནི༔ ཧཱུྃ༔ སྣང་ཞིང་སྲིད་པའི་ཆོས་ཀུན་ཕྱི་ཡི་ཚོགས༔ འབྱོར་ཚོགས་ཡོ་བྱད་བཤམས་པ་ནང་གི་ཚོགས༔ ཡིད་སྤྲུལ་འདོད་རྒུའི་དཔལ་ཡོན་གསང་བའི་ཚོགས༔ ཡེ་ཤེས་རོལ་པའི་མྱང་གྲོལ་བདུད་རྩིར་བསྒྱུར༔ རཾ་ཡཾ་ཁཾ༔ དེ་ནས་སྤྱན་འདྲེན་པ་ནི༔ ཧཱུྃ༔ རང་སྣང་དོན་གྱི་འོག་མིན་ནས༔ གསང་བ་ཡེ་ཤེས་མཁའ་འགྲོ་མ༔ འབུམ་ཕྲག་མཁའ་འགྲོའི་ཚོགས་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛཿདེ་ནས་ཚོགས་ཕུད་འབུལ་བ་ནི༔ ཧཱུྃ༔ བཅུད་ལྡན་དཔལ་གྱི་ཞལ་ཟས་དང་༔ ཛ་གད་དཔའ་བོའི་བདུད་རྩི་འདི༔ གསང་བ་ཡེ་ཤེས་མཁའ་འགྲོ་དང་༔ འབུམ་ཕྲག་ཡངས་པའི་མཁའ་འགྲོར་འབུལ༔ མ་ཧཱ་ག་ཎ་ཙཀྲ་ལ་ཁཱ་ཧི༔ དེ་ནས་བཤགས་པ་བྱ་བ་ནི༔ ཧོཿམཁའ་འགྲོ་གསང་བ་ཡེ་ཤེས་དང་༔ རྩ་གསུམ་དམ་ཅན་རྒྱ་མཚོ་དགོངས༔ བདག་གི་ཉམས་ཆག་སྡིག་སྒྲིབ་ཀུན༔ ཞལ་ཟས་ཚོགས་ཀྱིས་བསྐང་ཞིང་བཤགས༔ ཨོཾ་བཛྲ་སཏྭ་ས་མ་ཡ༔ སོགས༔ དེ་ནས་དགྲ་བགེགས་བསྒྲལ་བ་ལ༔ ཧཱུྃ༔ འཁོར་འདས་ཡོངས་ཀྱི་དབང་ཕྱུག་མོ༔ གསང་བ་ཡེ་ཤེས་སྐུར་བཞེངས་ཤིག༔ ལོག་པར་འདྲེན་པའི་དགྲ་དང་བགེགས༔ འཁྲུལ་མི་ཤེས་པའི་དབྱིངས་སུ་སྒྲོལ༔ དེ་ནས་བསྟབ་པ་ནི༔ ཧཱུྃ༔ ཞིང་བཅུ་ཚང་བའི་དགྲ་དང་བགེགས༔ བསད་ཅིང་བསྒྲལ་བའི་ཤ་རུས་ཁྲག༔ རྩ་གསུམ་སྲུང་མའི་ཞལ་དུ་བསྟབས༔ ལྷག་མ་མེད་པར་བཞེས་ཏེ་རོལ༔ རཱུ་ཏྲ་ཨ་མུ་ཀ་མཱ་ར་ཡ་ཁཱ་ཧི༔ དེ་ནས་ལྷག་མ་འབུལ་བ་ནི༔ ཧཱུྃ༔ རྒྱལ་བའི་བཀའ་ཉན་ཕྲིན་ལས་བདག༔ ལྷག་ལ་དབང་བའི་ལྷག་སྐྱོང་ཚོགས༔ འདོད་ཡོན་ལྷག་མ་འདི་བཞེས་ལ༔ ཕྲིན་ལས་རབ་འབྱམས་ཡོངས་གྲུབ་མཛོད༔ ས་མ་ཡ་ཨུཙྪིཥྚ་བ་ལིཾ་ཏ་ཁཱ་ཧི༔ དེ་ནས་ཆད་མདོ་བཏང་བ་ནི༔ ཧཱུྃ༔ སྔོན་གྱི་བསྐལ་པ་དང་པོ་ལ༔ བསྟན་པ་བསྲུང་བར་ཞལ་བཞེས་པའི༔ ཆད་མདོ་དམ་ཅན་སྲུང་མའི་ཚོགས༔ གཏོར་མ་བཞེས་ལ་འདོད་དོན་སྒྲུབས༔ དེ་ནས་བརྟན་མ་ལ༔ ཧཱུྃ༔ མ་སྲིང་བརྟན་མ་བཅུ་གཉིས་དང་༔ དེ་འཁོར་ཡང་འཁོར་བྲན་དང་གཡོག༔ འདིར་གཤེགས་བཤལ་ཆུའི་གཏོར་མ་ལོངས༔ བསམ་པའི་དོན་ཀུན་ཡོངས་གྲུབ་མཛོད༔ མ་མ་བཛྲ་ས་མ་ཡ༔ དེ་ནས་རྟ་བྲོ་བརྡུང་བ་ནི༔ ཧཱུྃ༔ ཡེ་ཤེས་རོལ་པའི་ཆོ་འཕྲུལ་ལས༔ མཉམ་པ་ཉིད་ཀྱི་བྲོ་བརྡུང་བས༔ མ་རིག་གཉིས་སྣང་འཁྲུལ་པའི་བགེགས༔ བདག་མེད་རྟོགས་པའི་མཁའ་རུ་བྲུབ༔ མཱ་ར་ཡ་སྟྭཾ་བྷ་ཡ་ནན༔ དེ་ནས་དངོས་གྲུབ་བླང་བ་ནི༔ ཧཱུྃ༔ མཁའ་འགྲོ་གསང་བ་ཡེ་ཤེས་དང་༔ འབུམ་ཕྲག་མཁའ་འགྲོའི་ཚོགས་དང་བཅས༔ མཁྱེན་བརྩེ་ནུས་པའི་གཟི་བྱིན་དབང་༔ མཆོག་དང་ཐུན་མོང་དངོས་གྲུབ་སྩོལ༔ ཨ་ལ་ལ་སིདྡྷི་ཕ་ལ་ཧཱུྃ༔ དེ་ནས་བཤགས་པ་བྱ་བ་ནི༔ ཧཱུྃ༔ སྐུ་གསུམ་ཡེ་ཤེས་མཁའ་འགྲོ་དང་༔ ཞི་ཁྲོ་སྒྱུ་འཕྲུལ་འཁོར་ལོ་དགོངས༔ བདག་ནི་མ་རིག་འཁྲུལ་དབང་གིས༔ ཉེས་བྱས་ཉམས་ཆག་ཅི་མཆིས་བཤགས༔ ཡི་གེ་བརྒྱ་པ་བརྗོད༔ དེ་ནས་བསྔོ་བ་སྨོན་ལམ་ནི༔ ཧཱུྃ༔ བདག་གིས་དུས་གསུམ་དགེ་བསགས་པ༔ འགྲོ་ཀུན་སངས་རྒྱས་ཐོབ་ཕྱིར་བསྔོ༔ མར་གྱུར་འགྲོ་བ་སེམས་ཅན་རྣམས༔ ཕྱམ་གཅིག་རྫོགས་སངས་རྒྱས་གྱུར་ཅིག༔ དེ་ནས་བཀྲ་ཤིས་བྱ་བ་ལ༔ ཧཱུྃ༔ སངས་རྒྱས་བསྟན་པ་དར་བ་དང་༔ འགྲོ་ལ་ཕན་བདེ་འབྱུང་བ་དང་༔ སྒྲུབ་ལ་བར་ཆད་མེད་པ་དང་༔ དངོས་གྲུབ་ཀུན་འབྱུང་བཀྲ་ཤིས་ཤོག༔ དེ་ནས་རྟག་ཆད་མཐའ་བསལ་ནི༔ ཧཱུྃ༔ མཚན་བཅས་ཆོས་ཀུན་སྟོང་པར་ཞིག༔ སྐད་ཅིག་སྟོང་གསལ་ཆེན་པོའི་མཁར༔ མཁའ་ལ་འཇའ་ཚོན་ཤར་བ་ལྟར༔ རང་རིག་ཡེ་ཤེས་མཁའ་འགྲོར་ཤར༔ ཨོཾ་གུ་རུ་ཛྙཱ་ན་ཌཱ་ཀི་ནཱི་ཧ་རི་ནི་ས་སིདྡྷི་ཧཱུྃ༔ དེ་ལྟར་བསྒོམ་བཟླས་གནད་ལྡན་ན༔ རྣམ་སྨིན་རིག་འཛིན་ཉེར་ཐོབ་འགྱུར༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་ཆོས་ཀྱི་སྒྲོན་མའི་ངོར་བདུད་འཇོམས་རྡོ་རྗེས་ནམ་མཁའི་ཀློང་མཛོད་ལས་བསྒྱུར་བའོ།།དགེའོ།།ལེགས་སོ།།སརྦ་མངྒ་ལཾ།།།།