ལྷག་པའི་ལྷ་ཡིས་རྗེས་བཟུང་བྱིན་བརླབས་ཤིང།

Previous Text Back to Volume Page Next Text

Wylie title	lhag pa'i lha yis rjes bzung byin brlabs shing
Location	phrin las nor bu'i gsung 'bum Volume 1, sde tshan 6, Text 18, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Lhag pa'i lha yis rjes bzung byin brlabs shing. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །ལྷག་པའི་ལྷ་ཡིས་རྗེས་བཟུང་བྱིན་བརླབས་ཤིང་། །ལས་འཕྲོའི་དབང་གིས་མཁའ་འགྲོའི་གསང་མཛོད་འཛིན། །འབྲེལ་ཚད་པདྨ་འོད་དུ་འཁྲིད་མཛད་པ། །བདུད་འདུལ་རོལ་པ་རྩལ་ལ་གསོལ་བ་འདེབས། །སྤྱིར་ལྷ་ཞེས་པ་ནི་འཇིག་རྟེན་ན་སྔོན་བྱུང་ལོ་རྒྱུས་སུ་རྒྱལ་པོས་སྐྱོང་བའི་ཡུལ་ཁམས་མང་པོར་མཐོ་རིས་ལྟ་ལས་མཆེད་པར་གྲགས་པའི་མིའི་རིགས་དབང་ཐང་ཆེ་བའི་དཔོན་པོའམ། རྒྱལ་པོ་ལ་ལྷ་ཞེས་འབོད་པ་དང་། རྟག་པར་ལྟ་བའི་གྲུབ་མཐའ་འཛིན་པ་རྣམས་ནས་ཚངས་པ་དང་། བརྒྱ་སྦྱིན་དང་། དབང་ཕྱུག་དང་། ཁྱབ་འཇུག་སོགས་འཇིག་རྟེན་སྣོད་བཅུད་ཀྱི་བྱེད་པ་པོར་དམིགས་པའི་ཡུལ་ཁྱད་པར་ཅན་ཞིག་ལ་ལྷ་ཞེས་འབོད་པ་དང་། ཡང་འདོད་ལྷ་རིགས་དྲུག གཟུགས་ཁམས་གནས་རིས་བཅུ་བདུན། གཟུགས་མེད་སྐྱེ་མཆེད་མུ་བཞི་སྟེ་འཇིག་རྟེན་པའི་ལུས་སེམས་ཀྱི་དགའ་བདེ་ལ་ལོངས་སུ་སྤྱོད་པའི་མཐོ་རིས་ཀྱི་འགྲོ་བ་རྣམས་ལ་ལྷ་ཞེས་འབོད་པ་སྟེ། དེ་དག་ཐམས་ཅད་ལས་ཀྱང་ཆེས་མཆོག་ཏུ་འཕགས་པ་དཀོན་མཆོག་གསུམ་མམ། སྔགས་ལྟར་ན་བླ་མ་ཡི་དམ་མཁའ་འགྲོ་ལ་སོགས་འཇིག་རྟེན་ལས་འདས་པའི་ལྷག༵་པ༵འི་ལྷ༵་ཡི༵ས་རྗེས༵་སུ་བཟུ༵ང་ནས་སྣང་གྲགས་རིག་གསུམ་སྐུ་གསུང་ཐུགས་རྡོ་རྗེ་གསུམ་གྱི་རང་བཞིན་དུ་བྱིན༵་གྱིས་བརླ༵བས་ཤི༵ང་། བསྐལ་མང་གོང་ནས་ཚོགས་གཉིས་རླབས་པོ་ཆེ་བསགས་པའི་ལ༵ས་འཕྲོ༵འི་དབ༵ང་གི༵ས་འཁོར་འདས་ཀྱིས་བསྡུས་པའི་ཆོས་ཐམས་ཅད་ཟག་མེད་བདེ་བ་ཆེན་པོར་དག་མཉམ་དུ་རོལ་པའི་ཡེ་ཤེས་དབྱིངས་ཀྱི་མཁ༵འ་འགྲོ༵འི་གས༵ང་བའི་མཛོ༵ད་ཁང་འཛི༵ན་ཅིང་། བཟང་ངན་གྱི་འབྲེ༵ལ་པ་ཐོགས་ཚ༵ད་པ༵དྨ༵་འོ༵ད་ཀྱི་ཞིང་དུ༵་ཁྲི༵ད་པར་མཛ༵ད་པ༵། བདུད་བཞི་སྐྱེ་བ་མེད་པའི་དབྱིངས་སུ་འདུལ་བའི་དཔའ་བོ་ཆེན་པོའི་ཕྲིན་ལས་ཀྱི་རོལ་པ་ཅིར་ཡང་རྩེན་པ་རྒྱལ་བའི་སྲས་པོ་བསོད་ནམས་ལྡེའུ་བཙན་གྱི་སྤྲུལ་པའི་རྣམ་རོལ་དེ་མ་ཐག་པ་བདུད་འདུལ་རོ༵ལ་པ༵་རྩལ༵་ཏེ་དེ་ལ༵་གསོ༵ལ་བ༵་འདེ༵བས་སོ། །དེ་ཡང་འདི་ཉིད་མདོ་ཁམས་ཆུ་བཞི་སྒང་དྲུག་ལས། མདོ་སྨད་ཟལ་མོ་སྒང་གི་ཆ་ས་ཡི་མདུད་བཞིར་གྲགས་པའི་བྱེ་བྲག་རེ་ཁེ་ས་ཡི་མདུད་པ་སྟེ། གང་དུ་གཏེར་ཆེན་བདུད་འདུལ་རྡོ་རྗེ་དང་རིག་འཛིན་ཀློང་གསལ་སྙིང་པོ་རྣམ་གཉིས་ནས་ཟབ་གཏེར་བཞེས་ཤིང་། བདེ་ཆེན་གླིང་པ་དང་། རིག་འཛིན་ཚེ་དབང་ནོར་བུ་སོགས་དམ་པ་དུ་མས་རྡོ་རྗེའི་གནས་སུ་བསྔགས་ཤིང་། ཕྲིན་ལས་ཕུར་པའི་བཀའ་སྲུང་ལྕགས་ཀྱི་སྐྱེས་བུས་བདེ་བར་སྐྱོང་བའི་ཡུལ་ལྗོངས་ས་ངན་རེ་ཁེའི་ནང་གསེས་ཨ་བྱམས་ཞེས་པའི་ས་ཡི་ཆར། ཡབ་མེས་རིག་འཛིན་རྩལ་འཆང་གི་བརྒྱུད་པ། གུ་རུའི་རྒྱལ་ཚབ་ནུས་ལྡན་ཉེར་ལྔའི་ཡ་གྱལ་བདུད་འདུལ་ནུས་ལྡན་རྡོ་རྗེའི་གདུང་བརྒྱུད་མདོ་ཁམས་གསེར་ཐང་ཕྱོགས་སུ་བཞུགས་སྟན་ཆགས་པ་ཀཿཐོག་བདུད་འདུལ་རྒྱལ་སྲས་པདྨ་རྣམ་རྒྱལ་ཞེས་དུས་གསུམ་སྒྲིབ་མེད་དུ་གཟིགས་པའི་མངོན་པར་ཤེས་པ་མངའ་བ་ཞིག་བྱུང་ལ། དེ་ཉིད་ཀྱི་སྲས་གསེར་པ་གཏེར་རྒན་བདུད་འདུལ་རོལ་པ་རྩལ་ནུས་ལྡན་ནམ་མཁའི་རྣལ་འབྱོར་ཞེས་མཁྱེན་བརྩེ་ནུས་པའི་ཡོན་ཏན་འགྲན་ཟླ་དང་བྲལ་བ་འདི་ཉིད་འཁྲུངས། སྐུ་ཚེ་ལ་མངའ་བརྙེས་པས་དགུང་ལོ་བརྒྱ་དང་བརྒྱད་ཅུ་ཙམ་བཞུགས་ཤིང་། ཁྱུང་དམར་མེ་གཤོག་སོགས་ཟབ་གཏེར་ཡང་མང་དུ་བཞེས། སྐུ་ཚེའི་སྨད་ལ་བྲག་ཡབ་དང་ས་ངན་ཕྱོགས་སུ་རིམ་པར་ཕེབས། མི་དང་མི་མིན་གྱི་འགལ་བྱེད་མ་རུངས་པ་མཐའ་དག་མངོན་སྤྱོད་ཀྱི་ནུས་མཐུ་དྲག་པོས་ཚར་བཅད་ཅིང་དབང་དུ་བསྡུད་པ་སོགས་ཚར་གཅོད་རྗེས་འཛིན་གྱི་ཕྲིན་ལས་ལ་མངའ་དབང་བསྒྱུར། ཀཿཐོག་རྡོ་རྗེ་གདན་ཆོས་སྡེ་ཆེན་པོ་ནས་ས་ངན་ཕྱོགས་ཀྱི་དགོན་བདག་ཏུ་མངའ་གསོལ་བ་བཞིན་ཆིབས་ཞལ་བསྒྱུར་ཏེ་བཞུགས་གདན་ཆགས་པར་གྲགས་སོ། །