TTDL-ZABTER-10-THA-012

༄༅། །ཨེ་མ་ཧོ། བདེ་གཤེགས་སྙིང་པོའི་ངང་མདངས་ཟླ་རྒྱས་བཞིན། །གདུལ་བྱའི་སྣང་ངོར་ཆུ་ཟླའི་རྣམ་འགྱུར་ངོམས། །རང་སྣང་སྟོན་པ་མཆོག་དེར་གསོལ་བ་འདེབས། །བདག་རྟོག་འཁྲུལ་པ་ཞིག་པར་བྱིན་གྱིས་རློབས། །མེད་བཞིན་འཁྲུལ་པ་མངོན་ཞེན་འཐས་པ་ཡི། །གདུལ་བྱ་བློ་དམན་རིགས་རྣམས་ཁ་དྲང་ཕྱིར། །བརྒྱུད་གསུམ་བླ་མར་གྲགས་ལ་གསོལ་བ་འདེབས། །གནས་ལུགས་མངོན་དུ་འགྱུར་བར་བྱིན་གྱིས་རློབས། །བསྐལ་བཟང་སངས་རྒྱས་མངོན་བྱེད་བླ་མ་མཆོག །རྣལ་འབྱོར་དབང་ཕྱུག་ནུས་ལྡན་རྡོ་རྗེར་གྲགས། །ཤེས་རབ་ཕུལ་ཕྱིན་འཕགས་པ་ཤཱ་རིའི་བུ། །ཡང་དག་མངོན་གྱུར་སློབ་དཔོན་ཧཱུྃ་ཀཱ་ར། །གྲོ་ལོད་མངོན་གྱུར་འབྲོག་བན་ཁྱེའུ་ཆུང༌། །ཆོས་ཉིད་མངོན་གྱུར་གྲུམ་གྱི་མཁར་ནག་པ། །སྨོན་ལམ་གྲུབ་པ་ཧེ་པ་ཆོས་འབྱུང་བ། །གྲུབ་པ་བརྒྱད་བརྙེས་བདུད་འདུལ་རྡོ་རྗེ་རྩལ། །མཁའ་སྤྱོད་གནས་ཉུལ་བདུད་འདུལ་རོལ་པ་རྩལ། །ཆོས་ཉིད་ཀློང་རྡོལ་རྡོ་རྗེ་གྲོ་བོ་ལོད། །འགྲོ་འདྲེན་སྤྲུལ་པ་བརྒྱ་ཕྲག་རིམ་བཞིན་ཤར། །རྒྱལ་ཀུན་དགོངས་པ་འདུས་པར་གསོལ་བ་འདེབས། །འཁོར་བ་དོར་སྤྲུགས་ནུས་པར་བྱིན་གྱིས་རློབས། །ཕྱི་མའི་དུས་སུ་རྡོ་རྗེ་དྲག་པོ་རྩལ། །གདུལ་བྱ་ཐེར་འབུམ་དང་བཅས་དབྱེར་མེད་དུ། །ཤམ་བྷ་ལ་རུ་རྡོ་རྗེ་རྣོན་པོར་འགྱུར། །མ་འོངས་སངས་རྒྱས་མོས་པ་མཐའ་ཡས་ཀྱིས། །ཁམས་གསུམ་འཁོར་བ་དོང་ནས་སྤྲུགས་པར་མཛད། །བླ་མེད་བླ་མ་མཆོག་ལ་གསོལ་བ་འདེབས། །ཁྱེད་ལ་རྩེ་གཅིག་གསོལ་བ་བཏབ་པའི་མཐུས། །ཁྲེགས་ཆོད་ཆོས་ཉིད་བདེན་པ་མངོན་མཐོང་ཞིང༌། །ཐོད་རྒལ་སྣང་བཞིའི་ཉམས་ལེན་མཐར་ཕྱིན་ནས། །གཞོན་ནུ་བུམ་སྐུར་ཡང་དག་སངས་རྒྱས་ཤོག །ཅེས་པ་འདི་ཡང་ཐེག་པ་མཆོག་གི་ལམ་ལ་སྔོན་སྨོན་ལས་ཀྱིས་འབྲེལ་བའི་སྐྱེས་བུ་མཉྫུ་ཤྲཱི་པས་ནན་དུ་བསྐུལ་ངོར་བདུད་འཇོམས་པས་སྨྲས་པའོ། །དགེ་ལེགས་འཕེལ།། །།