TTDL-ZABTER-12-NA-037

༠༠༠༠༠བརྡ་ཡིག༢༡༩འོད་གསལ་སྒྱུ་འཕྲུལ་དྲྭ་བ་ལས༔ རྗེ་བཙུན་བཞད་པ་རྡོ་རྗེ་ཡི༔ ཚོགས་མཆོད་ཉམས་ཆག་རང་གྲོལ་བཞུགས༔ ༠༠༠༠༠བརྡ་ཡིག༢༡༩ན་མོ་གུ་རུ་པདྨ་ཀ་ར་ཡེ༔ རྣལ་འབྱོར་ཉམས་ཆག་བསྐང་བ་དང་༔ ཚོགས་རྫོགས་སྒྲིབ་པ་སྦྱང་བའི་ཐབས༔ ཚོགས་ཀྱི་འཁོར་ལོ་བསྐོར་བ་ལ༔ ཤ་ཆང་ལ་སོགས་ཟས་ཀྱི་རིགས༔ འབྱོར་ཚོགས་རྣམ་པ་ཅི་རིགས་པ༔ རི་རབ་རོལ་མཚོའི་ཚུལ་དུ་སྤུངས༔ གཙང་མའི་ཆབ་ཀྱིས་རབ་བྲན་ཏེ༔ སྦྱངས་སྤེལ་བསྒྱུར་དང་འབུལ་བ་ལ༔ ཧཱུྃ༔ རང་ཉིད་ལྷ་ཡི་ཐུགས་ཀ་ནས༔ འབྱུང་བའི་སྙིང་པོ་རཾ་ཡཾ་ཁཾ༔ འཕྲོས་པས་ཚོགས་ཀྱི་ཉེས་སྐྱོན་ཀུན༔ བསྲེགས་གཏོར་སྦྱངས་བཀྲུས་བདུད་རྩིར་གྱུར༔ ཨོཾ་ཨཱཿཧཱུྃ༔ ལན་གསུམ༔ དེ་ནས་སྤྱན་འདྲེན་པ་ནི༔ ཧཱུྃ༔ རང་སྣང་དོན་གྱི་འོག་མིན་ན༔ རྗེ་བཙུན་བཞད་པ་རྡོ་རྗེ་ལ༔ དཔའ་བོ་མཁའ་འགྲོ་འབུམ་གྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ གུ་རུ་ཧ་ས་བཛྲ་ས་པ་རི་ཝཱ་ར་བཛྲ་ས་མ་ཡ་ཛ་ཛཿདེ་ནས་བདུད་རྩི་ཚོགས་མཆོད་ལ༔ ཧཱུྃ༔ རྗེ་བཙུན་བཞད་པ་རྡོ་རྗེ་དང་༔ བླ་མ་རིག་འཛིན་སྟོན་འཁོར་ལ༔ ཟག་མེད་ཡེ་ཤེས་བདུད་རྩི་དང་༔ ཞལ་ཟས་ཚོགས་ཀྱི་མཆོད་པ་འབུལ༔ གུ་རུ་ཧ་ས་བཛྲ་བིདྱཱ་དྷ་ར་སརྦ་ས་པ་རི་ཝཱ་ར་པཉྩ་ཨ་མྲྀ་ཏ་ཁཱ་ཧི༔ ག་ཎ་ཙཀྲ་ལ་ཁཱ་ཧི༔ དེ་ནས་བཤགས་པ་བྱ་བ་ནི༔ ཧོཿརྗེ་བཙུན་བླ་མ་དགོངས་སུ་གསོལ༔ བདག་གི་སྒོ་གསུམ་བག་མེད་པའི༔ དབང་གྱུར་ཉམས་ཆག་ཉེས་ལྟུང་ཀུན༔ ཞལ་ཟས་ཚོགས་ཀྱིས་བསྐང་ཞིང་བཤགས༔ ཨོཾ་ག་ཎ་ཙཀྲ་སཏྭ༴ཚང་བར་བརྗོད༔ དེ་ནས་བསྒྲལ་ཞིང་བསྟབ་པ་ནི༔ དཀོན་མཆོག་རྩ་གསུམ་བདེན་པའི་མཐུས༔ བསྟན་ལ་སྡང་བའི་དགྲ་བགེགས་ཁུག༔ རྣམ་ཤེས་ཆོས་ཀྱི་དབྱིངས་སུ་སྒྲོལ༔ གཟུགས་ཕུང་སྐྱེ་མཆེད་ལྷག་མེད་རོལ༔ ཨ་མུ་ཀ་དུ་ཏྲི་མཱ་ར་ཡ་སོད་ཁཱ་ཧི༔ དེ་ནས་ལྷག་མ་བསྔོ་བ་ནི༔ ཧཱུྃ༔ ལྷག་ལ་དབང་བའི་ལྷག་སྐྱོང་ཚོགས༔ འདོད་ཡོན་ལྷག་མའི་ལོངས་སྤྱོད་རོལ༔ ཕྲིན་ལས་རབ་འབྱམས་ཡོངས་འགྲུབ་ཅིང་༔ དགྲ་བགེགས་མ་ལུས་རྡུལ་དུ་རློག༔ ས་མ་ཡ་ཨུཙྪིཥྚ་བ་ལིཾ་ཏ་ཁཱ་ཧི༔ དེ་ནས་ཆད་མདོ་བརྟན་སྐྱོང་ནི༔ ཧཱུྃ༔ ཆད་མདོ་དམ་ཅན་རྒྱ་མཚོ་དང་༔ བརྟན་མ་སྐྱོང་མཛད་མ་སྲིང་ཚོགས༔ འདིར་གཤེགས་དམར་གྱི་གཏོར་མ་ལོངས༔ བསྟན་དང་བསྟན་འཛིན་སྡེ་སྐྱོངས་ལ༔ དགྲ་བགེགས་ཚར་གཅོད་ཕྲིན་ལས་མཛོད༔ དམ་ལ་མ་འདའ་ས་མ་ཡ༔ སརྦ་དྷརྨ་པཱ་ལ༔ སརྦ་ཀྵེ་ཊ་པཱ་ལ༔ སརྦ་ལོ་ཀ་པཱ་ལ༔ སརྦ་ས་པ་རི་ཝཱ་ར་ཨེ་དཾ་བ་ལིཾ་ཏ་ཁ་ཁ་ཁཱ་ཧི༔ དེ་ནས་བྲོ་མནན་ལ༔ ཧཱུྃ༔ ཆོས་ཉིད་རོལ་པའི་ཨེ་ཀློང་དུ༔ ལོག་རྟོག་མི་སྲུན་རཱུ་ཏྲ་བྲུབ༔ ཡེ་ཤེས་འབར་བའི་བྲོ་བརྡུངས་པས༔ བྱང་ཆུབ་བར་དུ་མ་ལྡང་ནན༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སུཾ་ལཾ༔ སྟྭཾ་བྷ་ཡ་ནན༔ དེ་ནས་དངོས་གྲུབ་བླང་ཞིང་བཤགས་པ་བྱ་བ་ལ༔ ཧཱུྃ༔ བརྒྱུད་གསུམ་བླ་མའི་དཀྱིལ་འཁོར་ལྷའི༔ གསང་གསུམ་རྡོ་རྗེའི་དངོས་གྲུབ་སྩོལ༔ བདག་གི་སྒོ་གསུམ་བག་མེད་པས༔ ཉམས་ཆག་ཉེས་ལྟུང་ཐམས་ཅད་བཤགས༔ དེ་ནས་བསྔོ་བ་སྨོན་ལམ་ལ༔ ན་མོ༔ དུས་གསུམ་བསགས་པའི་རྣམ་དཀར་དགེ༔ འཁོར་གསུམ་དམིགས་མེད་དབྱིངས་སུ་བསྔོ༔ ཁམས་གསུམ་འཁོར་བའི་སེམས་ཅན་ཀུན༔ རྣམ་གྲོལ་སྐུ་གསུམ་ཐོབ་པར་ཤོག༔ དེ་ནས་རྟག་ཆད་མཐའ་བསལ་ནི༔ ཧཱུྃ༔ རྟེན་དང་བརྟེན་པའི་དཀྱིལ་འཁོར་ལྷ༔ རྨི་ལམ་དབྱིངས་སུ་སད་བཞིན་ཡལ༔ ཨ་ཨཱཿམཁའ་ལ་འཇའ་ཚོན་ཤར་བ་བཞིན༔ རྗེ་བཙུན་བཞད་པ་རྡོ་རྗེ་དཔལ༔ འཇའ་ལུས་སྒྱུ་མའི་སྐུ་རུ་གསལ༔ དེ་ནས་བཀྲ་ཤིས་བྱ་བ་ལ༔ ཧཱུྃ༔ དག་མཉམ་གཞི་ཡི་བཀྲ་ཤིས་ཤོག༔ མ་བསྒོམ་ལམ་གྱི་བཀྲ་ཤིས་ཤོག༔ ཡེ་གྲོལ་འབྲས་བུའི་བཀྲ་ཤིས་ཤོག༔ འཇའ་ལུས་ཆེན་པོའི་བཀྲ་ཤིས་ཤོག༔ འདི་ལྟར་བསྒོམ་བཟླས་གནད་ལྡན་ན༔ རྡོ་རྗེ་འཆང་གི་ས་ཐོབ་འགྱུར༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་སློབ་བུ་བདེ་འབྱུང་གིས་ནན་ཆེར་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའོ།།དགེའོ།།དགེའོ།།དགེའོ།།སརྦ་མངྒ་ལཾ།།།།