TTDL-ZABTER-13-PA-022

ཆོས་ཉིད་ནམ་མཁའི་ཀློང་མཛོད་ལས༔ ལྷ་ཆེན་དབང་ཕྱུག་ཆེན་པོའི་བསང་མཆོད་བསྡུས་པ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ཀྱཻ༔ དད་པ་དང་ནི་དམ་ཚིག་གིས༔ དབང་ཕྱུག་ཆེན་པོ་གཤེགས་སུ་གསོལ༔ ཨུ་མ་དཱེ་ཝི་གཤེགས་སུ་གསོལ༔ སྤྲུལ་པའི་མ་བཞི་གཤེགས་སུ་གསོལ༔ འཁོར་དང་བཅས་པ་གཤེགས་སུ་གསོལ༔ བཟང་ཤིང་ཕྱེ་མར་གསུར་དུད་དང་༔ བཟང་དྲུག་སྨན་གྱི་ནུས་པ་དང་༔ བཙོས་དང་རྗེན་ཤ་ཁུ་བ་རྐང་༔ ལ་དུ་མྱོས་བྱེད་ཡིད་བཞིན་ཟས༔ ཕྱི་ནང་གསང་མཆོད་འདོད་ཡོན་སྤྲིན༔ འདོད་རྒུའི་དཔལ་ཡོན་ནམ་མཁའ་མཛོད༔ དངོས་སུ་འབྱོར་དང་ཡིད་སྤྲུལ་ཏེ༔ དབང་ཕྱུག་མ་ཧཱ་དཱེ་ཝ་ལ༔ བསང་ཞིང་བརྔན་ནོ་ཐུགས་དམ་བསྐང་༔ ཡུམ་མཆོག་ཨུ་མ་དཱེ་ཝི་ལ༔ བསང་ཞིང་བརྔན་ནོ་ཐུགས་དམ་བསྐང་༔ སྤྲུལ་པའི་ལྷ་མོ་རྣམ་བཞི་ལ༔ བསང་ཞིང་བརྔན༴དཔལ་མགོན་བདུན་ཅུ་རྩ་ལྔ་ལ༔ བསང་ཞིང་བརྔན༴སྣང་སྲིད་དྲེགས་པའི་འཁོར་ཚོགས་ལ༔ བསང་ཞིང་བརྔན་ནོ་ཐུགས་དམ་བསྐང་༔ ཐུགས་དང་འགལ་བའི་ཉེས་ཀུན་བཤགས༔ དེ་ལྟར་བསང་མཆོད་ཕུལ་བའི་མཐུས༔ མི་འདོད་ཉེར་འཚེ་ཀུན་ཞི་ཞིང་༔ ཚེ་བསོད་དཔལ་འབྱོར་མཐུ་ནུས་བསྐྱེད༔ སྣང་སྲིད་དབང་དུ་འདུ་བ་དང་༔ དགྲ་བགེགས་ཚར་གཅོད་ཕྲིན་ལས་མཛོད༔ དུས་གསུམ་རྒྱལ་བ་སྲས་བཅས་ཀྱི༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ ཕྲིན་ལས་སྒྲུབས་ཤིག་ས་མ་ཡ༔ དབང་ཕྱུག་ཆེན་པོ་བསྒྲུབ་པ་ཡི༔ སྐྱེས་བུ་རྣམས་ཀྱིས་འདིར་བརྩོན་ན༔ བཀྲ་ཤིས་བདེ་ལེགས་དཔལ་རྒྱས་འགྱུར༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་སྐྱེས་བུ་ངག་དར་གྱིས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།།དགེའོ།།།།