TTDL-ZABTER-13-PA-047

ཆོས་ཉིད་ནམ་མཁའི་ཀློང་མཛོད་ལས༔ གཟའ་མཆོག་ཆེན་པོའི་བསང་མཆོད་ཡེ་ཤེས་བདུད་རྩི་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ གཟའ་མཆོག་ཆེན་པོའི་བསང་མཆོད་ལ༔ དཀར་དམར་ཕྱེ་མའི་འཕུར་མ་ལ༔ བཟང་ཤིང་སྣ་ཚོགས་དུ་བ་བཏང་༔ སྭཱ་བྷཱ་ཝ་ཡིས་སྦྱངས་ནས་སུ༔ ནམ་མཁའ་མཛོད་ཀྱི་སྔགས་ཀྱིས་བརླབ༔ ཨོཾ་ཨཱཿཧཱུྃ༔ སྔགས་དང་ཕྱག་རྒྱས་བྱིན་བརླབས་པའི༔ འདོད་འཇོའི་བདུད་རྩིའི་བསང་མཆོད་འདིས༔ གཟའ་རྒོད་ཁྱབ་འཇུག་ཆེན་པོ་བསང་༔ ཡུམ་མཆོག་དབྱིངས་ཀྱི་རྗེ་མོ་བསང་༔ སྡོང་ཟླ་གདོང་མོ་མཆེད་བཞི་བསང་༔ སྤྲུལ་པའི་གཟའ་ཆེན་རྣམ་བརྒྱད་བསང་༔ རྒྱུ་སྐར་ཉི་ཤུ་རྩ་བརྒྱད་བསང་༔ བཀའ་སྡོད་ལྷ་སྲིད་སྡེ་བརྒྱད་བསང་༔ སྣང་སྲིད་དྲེགས་པའི་འཁོར་ཚོགས་བསང་༔ བཟང་ཤིང་ཕྱེ་མར་སྤོས་སྣ་དང་༔ ར་ཡི་ཤ་ཁྲག་གསུར་དུད་ཀྱིས༔ སྣང་སྲིད་བདག་པོ་འཁོར་བཅས་དང་༔ དམ་ཚིག་ཅན་གྱི་སྲུང་མ་ལ༔ གསོལ་ལོ་མཆོད་དོ་བསང་ཞིང་བརྔན༔ ཕྱག་ན་རྡོ་རྗེའི་བཀའ་དམ་བཞིན༔ སྒྲུབ་པའི་རྣལ་འབྱོར་བདག་ཉིད་ལ༔ ཕ་མ་བུ་ཚ་བཞིན་བརྩེས་སྐྱོངས༔ ཞི་རྒྱས་དབང་དྲག་མངོན་སྤྱོད་ལས༔ འདོད་དོན་འབད་མེད་ལྷུན་གྲུབ་མཛོད༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདིའང་པདྨ་དགའ་བས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།།།