TTDL-ZABTER-13-PA-107

ཆོས་ཉིད་ནམ་མཁའི་ཀློང་མཛོད་ལས༔ སྡེ་བརྒྱད་འཁྲུགས་བསྐང་དགེ་ལེགས་ཀུན་འབྱུང་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ སྡེ་བརྒྱད་འཁྲུགས་པ་བསྐང་བའི་ཕྱིར༔ འབྲུ་སྣ་ཟས་སྣ་ཤ་དུམ་དང་༔ གཟུགས་འགྲོས་རྣམ་པ་སྣ་ཚོགས་པ༔ མཆོད་པའི་རྫས་སུ་བཤམས་བྱས་ཏེ༔ སྡེ་བརྒྱད་བཤོས་བུ་སྤྱི་ལྟར་བཀོད༔ རང་ཉིད་ཡི་དམ་ལྷར་གསལ་ཏེ༔ ཧཱུྃ་ཛཿསྐུ་གསུམ་རྒྱལ་བ་རྒྱ་མཚོའི་ཚོགས༔ ཕྱི་ནང་གསང་བའི་དཀོན་མཆོག་གསུམ༔ མ་ལུས་ལུས་པ་མེད་པ་རུ༔ མཆོད་པའི་གནས་འདིར་གཤེགས་སུ་གསོལ༔ ཡེ་ཤེས་འཇིག་རྟེན་དྲེགས་པའི་ཚོགས༔ ཕྱི་ནང་གསང་བ་མཆོག་དང་ནི༔ སྤྲུལ་པ་སྣང་སྲིད་སྡེ་བརྒྱད་ཚོགས༔ མ་ལུས་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛཿཞེས་ལན་གསུམ་བརྗོད༔ སྭ་བྷཱ་ཝ་ཡིས་སྟོང་པར་སྦྱངས༔ ནམ་མཁའ་མཛོད་སྔགས་ལན་བདུན་དང་༔ རྟེན་འབྲེལ་སྙིང་པོ་དེ་བཞིན་བརྗོད༔ མཆོད་སྤྲིན་ནམ་མཁའ་དང་མཉམ་སྤེལ༔ ཨོཾ་ཨཱཿཧཱུྃ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ འདོད་རྒུའི་དཔལ་ཡོན་ནམ་མཁའ་མཛོད༔ མི་ཟད་རྒྱན་གྱི་འཁོར་ལོ་འདིས༔ མཆོག་གསུམ་སྐུ་གསུམ་རྩ་གསུམ་དང་༔ བཀའ་སྲུང་ཡོངས་ཀྱི་ཐུགས་དམ་བསྐང་༔ ལྷ་དང་ལྷ་མིན་དབང་པོ་དང་༔ ཀླུ་དང་མི་འམ་ཅི་ཡི་དབང་༔ གནོད་སྦྱིན་མཁའ་ལྡིང་མགོན་པོའི་ཚོགས༔ མ་ལུས་འཁོར་བཅས་ཐུགས་དམ་བསྐང་༔ ཐུགས་དང་འགལ་གྱུར་ཅི་མཆིས་བཤགས༔ དྲི་ཟ་གཤིན་རྗེ་ཆུ་བདག་དང་༔ གནོད་སྦྱིན་མེ་ལྷ་སྲིན་པོ་དང་༔ རླུང་ལྷ་དབང་དང་ལྡན་པའི་ལྷ༔ མ་ལུས་འཁོར་བཅས་ཐུགས་དམ་བསྐང་༔ འགལ་གྱུར་ཉེས་ཚོགས་ཅི་མཆིས་བཤགས༔ ནང་དང་གསང་བ་མཆོག་དང་ནི༔ སྤྲུལ་པ་སྣང་སྲིད་སྡེ་བརྒྱད་ཚོགས༔ མ་ལུས་འཁོར་དང་བཅས་པ་ལ༔ གསོལ་ལོ་མཆོད་དོ་ཐུགས་དམ་བསྐང་༔ གཞན་ཡང་སྣང་ཞིང་སྲིད་པ་ལ༔ དབང་བསྒྱུར་ལེགས་ཉེས་སྟངས་འཛིན་ཅིང་༔ དམ་ཚིག་གཉན་པོའི་རྗེས་གཅོད་པའི༔ ཀོ་ལོང་རུ་ང་ཕྲག་དོག་ཅན༔ མི་སྲུན་སྟོབས་ལྡན་དྲེགས་པའི་ཚོགས༔ མ་ལུས་འཁོར་དང་བཅས་པ་ལ༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཅག་མངོན་ཤེས་སྤྱན་དང་ལྡན༔ ཀུན་ཀྱང་བདག་ལ་དགོངས་སུ་གསོལ༔ ཀུན་བཟང་རྡོར་འཆང་རྡོ་རྗེ་ཅན༔ རྗེ་བཙུན་པདྨ་ཐོད་ཕྲེང་དང་༔ བརྒྱུད་གསུམ་རིག་འཛིན་བླ་མ་ཡི༔ བཀའ་དམ་གཉན་པོ་དཔང་བཙུགས་ཏེ༔ ཉེས་འགལ་འཁོན་འཁྲུགས་མ་ལུས་པ༔ དེ་རིང་བཤགས་སོ་བཟོད་པར་བཞེས༔ བདག་ནི་མ་རིག་དབང་གྱུར་ཏེ༔ སྒོ་གསུམ་བག་མེད་ཅི་མཆིས་པ༔ དེ་རིང་བཤགས་སོ་གནོང་ཞིང་འགྱོད༔ འབྱོར་ཚོགས་མཆོད་པའི་ཡོ་བྱད་ལ༔ ཏིང་འཛིན་སྔགས་རྒྱས་བྱིན་རླབས་ཏེ༔ དྲེགས་པ་ཁྱེད་ལ་འབུལ་ལགས་ཀྱིས༔ བཞེས་ནས་མཁོན་འཁྲུགས་ཀུན་སྦྱངས་ཏེ༔ མཉེས་ཚིམས་བརྩེ་དགོངས་བྱམས་སེམས་ཀྱིས༔ བདག་སྐྱོང་རབ་འབྱམས་ཕྲིན་ལས་སྒྲུབས༔ ཕྱིན་ཆད་འཁྲུག་པར་མ་གྱུར་ཅིག༔ མི་སྲུན་སྐྱེ་བོའི་ལོག་སྤྱོད་ཀྱིས༔ དྲེགས་པའི་ཐུགས་དང་འགལ་བའི་རྐྱེན༔ མི་ཕྱུགས་ནད་རིམས་གོད་ཡམས་དང་༔ དུས་འཁྲུགས་ནད་མཚོན་མུ་གེའི་ཚོགས༔ ཐམས་ཅད་བཟློག་བསྒྱུར་ཕྲིན་ལས་མཛོད༔ རྫོགས་ལྡན་དུས་ཀྱི་བསྐལ་པ་ཡི༔ བདག་ཅག་ལྷ་མི་འཁོར་དང་བཅས༔ ཟག་མེད་བདེ་ལ་སྤྱོད་གྱུར་ཅིག༔ དམ་ཚིག་གཉན་ལ་མ་འདའ་བར༔ བཅོལ་བའི་ཕྲིན་ལས་འགྲུབ་པར་མཛོད༔ དེ་ལྟར་གྲངས་ལྡན་བསྐྱར་གྱུར་ན༔ སྲུང་མ་མཉེས་ཤིང་མཁོན་པ་འདུམ༔ མཐུན་རྐྱེན་འདོད་དོན་འབད་མེད་འགྲུབ༔ ས་མ་ཡ༔ ཨྠིྀ༔ ཞེས་པ་འདི་སློབ་བུ་ཆོས་འབྱོར་གྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་འཇམ་དཔལ་རྡོ་རྗེས་སོ།།དགེའོ།།དགེའོ།།དགེའོ།།སརྦ་མངྒ་ལཾ།།།།