TTDL-ZABTER-13-PA-112

ཆོས་ཉིད་ནམ་མཁའི་ཀློང་མཛོད་ལས༔ བཀའ་སྲུང་སྤྱིའི་གཉེར་གཏད་བར་ཆད་ཀུན་སེལ་བཞུགས༔ ན་མོ་གུ་རུ་པདྨ་ཀ་ར་ཡེ༔ བཀའ་སྲུང་གཉན་པོའི་གཉེར་གཏད་ལ༔ རང་གི་མི་ནོར་ལོངས་སྤྱོད་ཀུན༔ བསྲུང་བ་གཞན་ལས་འདི་ལྷག་སྟེ༔ བཀའ་སྲུང་གཉན་པོར་གཉེར་བཅོལ་བྱ༔ ཧོཿདགོངས་སུ་གསོལ་ལོ༔ བླ་མ་དཀོན་མཆོག་གསུམ་དང་རྩ་བ་གསུམ༔ རབ་འབྱམས་རྒྱལ་བའི་དཀྱིལ་འཁོར་དཔང་དུ་བཞུགས༔ བཀའ་སྲུང་དྲེགས་པ་བྲན་དུ་ཁོལ་བར་མཛོད༔ ལྷ་ཆེན་མ་ཧཱ་དཱེ་ཝ་དགོངས་སུ་གསོལ༔ གནོད་སྦྱིན་ཤན་དམར་འཁོར་བཅས་དགོངས་སུ་གསོལ༔ དྲང་སྲོང་གཟའ་མཆོག་འཁོར་བཅས་བདག་ལ་དགོངས༔ ཞིང་སྐྱོང་མགོན་པོ་སེང་གདོང་ཡབ་ཡུམ་དགོངས༔ གཙུག་ལག་ཆོས་འཁོར་སྐྱོང་མཛད་ཙི་མ་ར༔ སྐྱེས་བུ་རོལ་པ་སྐྱ་བདུན་དང་བཅས་དགོངས༔ མ་མགོན་ལྕམ་དྲལ་དམ་ཅན་རྡོ་རྗེ་ལེགས༔ ཚེ་རིང་མཆེད་ལྔ་རྡོ་རྗེ་གཡུ་སྒྲོན་དགོངས༔ ཁྱད་པར་བདག་གིས་བསྙེན་བསྒྲུབ་མཆོད་གསོལ་བརྟེན༔ མ་སྒྲུབ་རང་འཁོར་སྲུང་མ་དང་བཅས་དགོངས༔ དུས་གསུམ་རྒྱལ་བའི་བཀའ་དམ་གཉན་པོ་དེ༔ གཏའ་རུ་བཞག་ནས་དཀའ་བ་དང་བླང་ནས༔ དམ་ཅན་ཁྱེད་མཆོད་ཁྱེད་བསྒྲུབ་ཁྱེད་བསྟེན་ན༔ སྲིད་འཚོའི་བར་དུ་མི་ཕྱུགས་ལོངས་སྤྱོད་ཀྱི༔ གཉེར་འཛིན་མཚན་གྱི་མེལ་ཚེ་བྱེད་པ་དང་༔ དཀོར་ནོར་ལོངས་སྤྱོད་བསྲུང་བའི་དོན་ཆེད་དེ༔ དེ་ལས་ཁྱེད་ཅག་བསྒྲུབ་པའི་དོན་མ་མཆིས༔ དེ་བཞིན་ཀུན་གྱི་ཐུགས་ལ་ངེས་པར་མཛོད༔ སེམས་ཅན་མ་རིག་འཁྲུལ་པས་བསླུས་པ་ལ༔ སྐྱོན་མཐོང་ཙམ་གྱིས་ཆད་པ་གཅོད་གྱུར་ན༔ ཁྱི་ཕག་བུད་མེད་ངན་མ་དང་མཚུངས་པའི༔ ཚུལ་སོམས་ཕ་མ་བུ་ཚ་ཇི་བཞིན་སྐྱོངས༔ ངས་ནི་དེ་རིང་གོ་བའི་ཚིག་བཅོལ་གྱིས༔ དོན་འདི་བསླུ་བ་མེད་པར་འགྲུབ་མཛོད་ཅིག༔ ཀྱཻ༔ རྒན་གྱི་ཕ་ཁུ་མན་ཆད་ནས༔ བྲན་གཡོག་ཉམ་ཆུང་ཡན་ཆད་ཀུན༔ འདི་དག་ཁྱོད་ཀྱི་འཁོར་ཡིན་པས༔ འཁོར་འདི་སྐྱོངས་ལ་སྐྱབས་མཛོད་ཅིག༔ གཙོ་བོ་བློ་འཛིན་མན་ཆད་ནས༔ བྱིས་པ་ཕོ་མོ་ཡན་ཆད་ཀུན༔ འདི་དག་ཁྱོད་ཀྱི་བསྲུང་བྱ་སྟེ༔ བསྲུང་བྱ་སྐྱོངས་ལ་སྐྱབས་མཛོད་ཅིག༔ ཆུང་མ་གཞི་འཛིན་མན་ཆད་ནས༔ མཐའ་འཛིན་སྲིང་མོ་ཡན་ཆད་ཀུན༔ འདི་དག་ཁྱོད་ཀྱི་སྲིད་མཚོ་སྟེ༔ སྲིད་མཚོ་སྐྱོང་ལ་སྐྱབས་མཛོད་ཅིག༔ རྗེ་དཔོན་མི་ཆེན་མན་ཆད་ནས༔ བརྟེན་པའི་འབངས་འཁོར་ཡན་ཆད་ཀུན༔ འདི་དག་ཁྱོད་ཀྱི་གྲོགས་དཔུང་གཉེན༔ གྲོགས་འདི་སྐྱོངས་ལ་སྐྱབས་མཛོད་ཅིག༔ ཁྲབ་བེམ་ཚེམ་ཚེམ་མན་ཆད་ནས༔ གོས་མཐའ་དུག་པོ་ཡན་ཆད་ཀུན༔ འདི་དག་ཁྱོད་ཀྱི་གོས་ཡིན་པས༔ གོས་འདི་སྐྱོངས་ལ་སྐྱབས་མཛོད་ཅིག༔ ཟ་འོག་ཐེར་ཕྲུག་མན་ཆད་ནས༔ རེག་བྱ་སྲོག་ཆགས་ལྤགས་པའི་རིགས༔ འདི་དག་ཁྱོད་ཀྱི་རེག་བྱ་སྟེ༔ རེག་བྱ་སྐྱོངས་ལ་སྐྱབས་མཛོད་ཅིག༔ གསེར་དངུལ་ཟངས་ལྕགས་མན་ཆད་ནས༔ རིན་ཆེན་རིགས་བྱེད་ཕྲ་མོའི་རིགས༔ འདི་དག་ཁྱོད་ཀྱི་ནོར་ཡིན་པས༔ ནོར་འདི་སྐྱོངས་ལ་སྐྱབས་མཛོད་ཅིག༔ ཁང་ཁྱིམ་སྦྲ་གུར་མན་ཆད་ནས༔ ཆར་སྐྱོབ་ཕྲ་མོ་ཡན་ཆད་ཀུན༔ འདི་དག་ཁྱོད་ཀྱི་གནས་ཁང་སྟེ༔ གནས་ཁང་སྐྱོངས་ལ་སྐྱབས་མཛོད་ཅིག༔ དཔོན་གྱི་དཀོར་ནོར་མན་ཆད་ནས༔ བྲན་ནོར་ཚལ་བུ་ཡན་ཆད་ཀུན༔ འདི་དག་ཁྱོད་ཀྱི་དཀོར་རྫས་ཏེ༔ དཀོར་འདི་སྐྱོངས་ལ་སྐྱབས་མཛོད་ཅིག༔ རྟ་དང་གླང་པོ་མན་ཆད་ནས༔ བེའུ་ལུག་ཕྲ་མོ་ཡན་ཆད་ཀུན༔ འདི་དག་ཁྱེད་ཀྱི་ཕྱུགས་ཡིན་པས༔ ཕྱུགས་འདི་སྐྱོངས་ལ་སྐྱབས་མཛོད་ཅིག༔ གསོད་གཅོད་མཚོན་ཆ་མན་ཆད་ནས༔ བཤའ་གྲི་ཕྲ་མོ་ཡན་ཆད་ཀུན༔ འདི་དག་ཁྱེད་ཀྱི་མཚོན་ཡིན་པས༔ མཚོན་འདི་སྐྱོངས་ལ་སྐྱབས་མཛོད་ཅིག༔ རས་གོས་སྐུད་པ་མན་ཆད་ནས༔ གྲུ་གུ་ཕུད་པ་ཡན་ཆད་ཀུན༔ འདི་དག་ཁྱོད་ཀྱི་འབྲང་ཡིན་པས༔ འབྲང་འདི་སྐྱོངས་ལ་སྐྱབས་མཛོད་ཅིག༔ ནས་འབྲས་གྲོ་དང་སྲན་མ་སོགས༔ བཟའ་བར་འོས་པའི་ཟས་སྣ་ཚོགས༔ འདི་དག་ཁྱོད་ཀྱི་ཟས་ཡིན་པས༔ ཟས་འདི་སྐྱོངས་ལ་སྐྱབས་མཛོད་ཅིག༔ མདོར་ན་ང་ཡིས་བདག་བཟུང་བའི༔ ལོངས་སྤྱོད་འདོད་རྒུའི་བྱེ་བྲག་ཀུན༔ ཁྱེད་ཅག་རྣམས་ལ་གཉེར་དུ་གཏད༔ ཉིན་གསུམ་ཉིན་གྱི་བྱ་ར་མཛོད༔ མཚན་གསུམ་མཚན་གྱི་མེལ་རྩེ་མཛོད༔ མི་ལ་གནོད་པའི་དགྲ་གདོན་བགེགས༔ ནད་རིམས་ཡམས་ནད་ཐམས་ཅད་དང་༔ ཕྱུགས་ལ་གནོད་པའི་གོད་ཁ་དང་༔ གོད་འདྲེ་དབུལ་སྲི་རྡུལ་དུ་རློག༔ མི་ལ་དཔའ་རྩལ་སྙིང་སྟོབས་དང་༔ ཕྱུགས་ལ་རྐང་གྲངས་འཕེལ་རྒྱས་མཛོད༔ སྡང་བའི་དགྲ་དང་གནོད་བའི་བགེགས༔ ལྷ་འམ་འོན་ཏེ་བདུད་ཀྱང་རུང་༔ མ་ལུས་ཐལ་བའི་རྡུལ་དུ་རློག༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ བཅོལ་བའི་ཕྲིན་ལས་གྲུབ་པར་མཛོད༔ ཨོཾ་མ་ཧཱ་བཛྲ་སཏྭ་སོགས་ཨཱཿས་མ་ཡ༔ དེ་ལྟར་བཅོལ་གཏམ་བྱས་པ་ཡིས༔ སྲུང་མས་བསྲུང་ཞིང་དགེ་ལེགས་འཕེལ༔ དགྲ་བགེགས་གནོད་བྱེད་ཀུན་ཞི་འགྱུར༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ སྐྱེས་བུ་ཤེས་རབ་ཀྱིས་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའོ།།དགེའོ།།དགེའོ།།དགེའོ།།།།