TTDL-ZABTER-14-PHA-006

བརྡ་ཡིག༠༠༠༠༠༠༡༧༔ ཆོས་ཉིད་ནམ་མཁའི་ཀློང་མཛོད་ལས༔ ངག་སྦྱང་ནུས་པ་སྟོབས་འབྱིན་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ངག་སྦྱང་ནུས་པ་སྟོབས་འབྱིན་ལ༔ ནངས་པར་མལ་ནས་ལངས་མ་ཐག༔ བྱིན་རླབས་རིམ་པ་འདི་ལྟར་བྱ༔ ཨོཾ་སྭ་བྷཱ་ཝ་སོགས༔ ལྕེ་མི་དམིགས་པ་སྟོང་པ་ཉིད་དུ་གྱུར༔ སྟོང་པའི་ངང་ལས་ལྕེ་ཡི་དབང་པོ་གནས་སུ་གྱུར་པ་ལས་དྷཱིཿཡིག་དམར་སེར་འོད་ཟེར་འབར་བ་ཞིག་ཏུ་གྱུར༔ དེ་ལས་འོད་ཟེར་འཕྲོས༔ དོན་གཉིས་བྱས་ཚུར་འདུས་དྷཱིཿཡིག་ཡོངས་སུ་གྱུར་པ་ལས་འཇམ་དཔལ་གཞོན་ནུར་གྱུར་པ་ཞི་འཛུམ་མཚན་དཔེའི་ལང་ཚོ་འབར་བ་ལོངས་སྤྱོད་རྫོགས་སྐུའི་ཆས་ཀྱིས་སྤྲས་པ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་གནས་གསུམ་ལས་འོད་ཟེར་འཕྲོས་པས་རྒྱལ་བ་སྲས་དང་བཅས་པ་ཐམས་ཅད་ཀྱི་གསུང་གསང་བའི་དབང་བྱིན་དངོས་གྲུབ་ཐམས་ཅད་འོད་ཕུང་དམར་པོའི་རྣམ་པར་བསྡུས་ཏེ་ལྗགས་ཀྱི་དབང་པོ་ལ་ཐིམ་པས་གནས་སུ་གྱུར་ཏེ་ལྗགས་ཤེས་རབ་ཀྱི་རལ་གྲི་འོད་དང་འོད་ཟེར་དཔག་ཏུ་མེད་པ་འབར་བའི་རྩེ་ནས་ཆོས་ཉིད་ཀྱི་རང་སྒྲ་འབྲུག་ལྟར་གྲགས་པར་གྱུར༔ ཨོཾ་ཨ་ཨཱ་ཨི་ཨཱི་སོགས་དབྱངས་གསལ་རྟེན་སྙིང་དང་བཅས་པ་ལན་བདུན་རེ་བརྗོད༔ འགྱུར་སྔགས་ཀྱི་རིགས་ཅུང་ཟད་བཟླས་མཐར༔ ན་མོ༔ དཀོན་མཆོག་གསུམ་གྱི་བདེན་པ་དང་༔ ཆོས་ཉིད་རྣམ་པར་དག་པ་དང་༔ རྟེན་འབྲེལ་ཟབ་མོའི་བདེན་པའི་མཐུས༔ ངག་གི་ནུས་སྟོབས་རབ་འབར་ཞིང་༔ རྒྱལ་བ་རྣམས་ཀྱི་གསུང་གསང་བཅུད༔ མ་ལུས་བདག་གི་ངག་ལ་ཐིམ༔ ངག་ལ་བདེན་པ་གྲུབ་པ་དང་༔ གཅིག་བཟླས་གྲངས་མེད་འགྱུར་བར་ཤོག༔ དག་དང་མ་དག་ཚིག་རྣམས་ཀུན༔ དམ་ཚིག་གསུང་གསང་རྡོ་རྗེའི་ཚིག༔ གསུང་གསང་ཆེན་པོར་འགྱུར་བར་ཤོག༔ དྷཱི་དྷཱིཿབརྒྱ་རྩ་བཟླས༔ ཧྲཱིཾ་ཧྲཱིཾ༔ ཅི་མང་བཟླའོ༔ དེ་ཡིས་ངག་སྒྲིབ་ཀུན་དག་ནས༔ དག་པ་གསུང་གི་འཁོར་ལོ་རུ༔ ནུས་སྟོབས་འབྱིན་པར་ཐེ་ཚོམ་མེད༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་ཡང་སློབ་བུ་པཎ་ཆེན་ནས་བསྐུལ་ངོར་རིག་འཛིན་བདུད་འཇོམས་རྡོ་རྗེས་སྨྲས་པ་ཡི་གེ་པ་ནི་ངག་དབང་ཕྲིན་ལས་ཀྱིས་བྲིས་པ་ཡོངས་སུ་དགེ་བར་གྱུར་ཅིགདགེའོ།།སརྦ་མངྒ་ལཾ།།།།