TTDL-ZABTER-14-PHA-053

༄༅།།བླ་མའི་གསོལ་འདེབས་ཐུགས་རྗེའི་སྤྲིན་ཕུང་བཞུགས་སོ༔ ན་མོ་གུ་རུ༔ རང་རིག་ཡེ་ཤེས་བླ་མར་ཤར་བ་ཡི༔ ངང་ལས་མི་འདའ་དད་པས་འདི་བརྗོད་བྱ༔ ཨེ་མ་ཧོཿགདོད་ནས་མ་བཅོས་སྐྱེ་མེད་ཆོས་ཀྱི་སྐུ༔ ལྷུན་གྲུབ་རོལ་པ་བདེ་ཆེན་ལོངས་སྤྱོད་རྫོགས༔ ཐུགས་རྗེའི་སྤྲུལ་སྐུ་འགྲོ་བའི་དཔལ་དུ་ཤར༔ སྐུ་གསུམ་ངོ་བོ་དྲིན་ཆེན་བླ་མ་མཁྱེན༔ ཡེ་གཞི་འཁོར་འདས་དག་མཉམ་རོལ་པའི་དབྱིངས༔ ལམ་མཆོག་རིག་པ་མཁྱེན་གཟིགས་མངོན་གྱུར་དབྱིངས༔ འབྲས་བུ་རང་ཐོག་རང་གྲོལ་རྒྱལ་བའི་དབྱིངས༔ དབྱིངས་ཀྱི་བདག་ཉིད་དྲིན་ཅན་བླ་མ་མཁྱེན༔ བདག་མེད་མཐའ་གྲོལ་བརྡལ་ཁྱབ་ལྟ་བའི་ཀློང་༔ དམིགས་མེད་ཡེ་ཤེས་མངོན་གྱུར་བསྒོམ་པའི་ཀློང་༔ ངང་ལས་མི་འདའ་རང་བབ་སྤྱོད་པའི་ཀློང་༔ ཀློང་ཆེན་རྣལ་འབྱོར་དྲིན་ཅན་བླ་མ་མཁྱེན༔ བསྐྱེད་རིམ་སྟོབས་ཀྱིས་སྒོ་གསུམ་རྡོ་རྗེར་སྨིན༔ རྩ་རླུང་ཐིག་ལེ་ཡེ་ཤེས་འཁོར་ལོ་དག༔ ཁྲེགས་ཆོད་ཆོས་ཉིད་བདེན་པ་མངོན་མཐོང་ཞིང་༔ ཐོད་རྒལ་སྣང་བཞིའི་ཉམས་རྟོགས་མཐར་ཕྱིན་ནས༔ མཐར་ཐུག་ཁམས་གསུམ་འཁོར་བ་སྐུ་གསུམ་ངང་༔ གཞོན་ནུ་བུམ་སྐུར་ཡང་དག་སངས་རྒྱས་ཤོག༔ ཅེས་པ་འདི་ནི་རེབ་ཀོང་ཕྱོགས་ཀྱི་སྔགས་སྐྱེས་དགེ་འདུན་དང་རྡོ་རྗེ་རྣམ་རྒྱལ་གཉིས་ཀྱིས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་སྨྲས་པའོ།།དགེའོ།།།།