TTDL-ZABTER-15-BA-056

ལྟ་བའི་ཀློང་བཤགས་བཞུགས་སོ།།ཧཱུྃ།སྐྱེ་མེད་ཆོས་དབྱིངས་ནམ་མཁའི་མཐའ་དང་མཉམ།།ཀ་དག་རྩལ་ལས་ལྷུན་གྲུབ་རོལ་པ་རུ༔ རང་བྱུང་ཡེ་ཤེས་སྐུ་གསུམ་ལྷུན་གྲུབ་ལྷ༔ སྒྱུ་འཕྲུལ་ཞི་ཁྲོ་རྡོ་རྗེ་དབྱིངས་ཀྱི་དཔལ།།མངོན་གྱུར་རིག་པའི་ངང་ནས་བརྡ་ཕྱག་འཚལ།།དབྱིངས་དང་ཡེ་ཤེས་མཉམ་བརྡལ་ཆོས་ཉིད་ཆེ།།དཔང་དུ་བཙུག་གོ་ཉམས་ཆག་དག་ཚངས་སྩོལ།།དེ་ནས་ཚིག་རྗེས་དོན་དྲན་ནས་འགྱོད་ཚངས་དྲག་པོས་བཤགས་པ་འདི་བརྗོད་དོ།།ཀྱེ།ཀུན་ཏུ་བཟང་པོ་ཆོས་ཀྱི་སྐུ།།སངས་རྒྱས་ཀུན་ལས་སྔར་སངས་རྒྱས།།རང་ངོ་མ་ཤེས་འཁྲུལ་པའི་བག།ཡུལ་མེད་ཆེན་པོར་མཐོལ་ཞིང་བཤགས༔ འཁོར་འདས་དག་མཉམ་ཁྱབ་བརྡལ་དབྱིངས།།མ་རིག་ངར་འཛིན་དྲི་མས་སྒྲིབ།།བག་ཆགས་རྐྱེན་སྣང་འཐས་པ་ཡིས།།རྒྱུ་རྐྱེན་རྟེན་འབྲེས་དབྱིངས་སུ་བཤགས།།ངར་འཛིན་ཤེས་པ་གཅིག་པུའི་གདངས།།སྣོད་བཅུད་འདོད་ཡོན་སྣང་བར་ཤར།།གཉིས་མེད་གཉིས་སུ་འཛིན་པའི་བག།ཆོས་ཉིད་དག་མཉམ་ཆེན་པོར༴ཡིན་པ་མེད་ལ་མིན་པ་མེད།།ཡིན་མིན་ཉེར་ལེན་རེ་དོགས་པའི།།ཞེན་ཆགས་དགག་སྒྲུབ་འཁྲུལ་པའི་སེམས།།ཡིན་མིན་མེད་པའི་མལ་དུ་བཤགས།།ས་དང་ལམ་མེད་འབྲས་བུ་མེད།།རང་ངོར་རང་སངས་རྒྱས་པ་ཉིད།།གང་གིས་མ་བཅོས་ཉིད་ལ་གྲོལ།།རྒྱུ་འབྲས་མངོན་རློམ་ཞེན་གོལ༴མདོར་ན་ཁམས་གསུམ་འཁོར་བ་རུ།།འཁྲུལ་པའི་རྒྱུ་རྐྱེན་རྟེན་འབྲེལ་ཆོས།།བདག་མེད་ཡུལ་མེད་ཆེན་པོར་བཤགས།།བཤགས་བྱ་བཤགས་བྱེད་གཉིས་མེད་དུ།།ཆོས་ཉིད་ཆམ་བརྡལ་ཆེན་པོའི་ཀློང་།།དག་ནས་མངོན་སངས་རྒྱས་པ་རུ།།ཆོས་ཉིད་བདེན་པས་བྱིན་གྱིས་རློབས།ཡི་གེ་བརྒྱ་པ་བརྗོད་དོ།།ཆོས་གསལ་གྱིས་དོ་གལ་ཆེན་པོས་འདི་འདྲ་ཞིག་ཡང་ཡང་དགོས་ཟེར་པའི་ངོར་བདུད་འཇོམས་རྡོ་རྗེས་སྨྲས་པའོ།།དགེའོ།།མངྒ་ལཾ།།།།