TTDL-ZABTER-16-MA-011

༠༠༠༠༠༠བརྡ་ཡིག༤༣མཁའ་འགྲོ་ཡེ་ཤེས་མཚོ་རྒྱལ་མས༔ སྐྱབས་གནས་དཀོན་མཆོག་གསུམ་དང་སྐུ་གསུམ་ལྷ༔ བརྒྱུད་གསུམ་བླ་མ་ཡི་དམ་ཌཱཀྐིའི་ཚོགས༔ བཀའ་སྡོད་དམ་ཅན་རྒྱ་མཚོའི་ཚོགས་རྣམས་དང་༔ རིགས་བརྒྱའི་ཁྱབ་བདག་བླ་མ་དེ་མཁྱེན་ནོ༔ སྐད་ཅིག་མི་འབྲལ་རྗེས་སུ་བཟུང་དུ་གསོལ༔ འཁོར་བར་ཞེན་པ་ལོག་པར་བྱིན་གྱིས་རློབས༔ ད་ནས་བཟུང་སྟེ་ཇི་སྲིད་འཚོ་ཡི་བར༔ ངེས་མེད་རི་ཁྲོད་དམ་པར་སྒོ་གསུམ་པོ༔ བྱར་མེད་བྱ་བཏང་ངང་དུ་བརྟན་ཐོབ་ནས༔ འཇིགས་མེད་རྡོ་རྗེ་འཛིན་པའི་ས་ཐོབ་ཤོག༔ མ་ཧཱ་ཡོ་ག་ཉམས་སུ་བླངས་ཙམ་གྱིས༔ སྒོ་གསུམ་རྡོ་རྗེ་གསུམ་དུ་སྨིན་གྲོལ་ཤོག༔ ཨ་ནུ་ཡོ་ག་ཉམས་སུ་བླངས་ཙམ་གྱིས༔ སྐུ་གསུམ་མཉམ་སྦྱོར་ཆེན་པོར་གྲོལ་བར་ཤོག༔ ནམ་མཁའ་རླུང་གི་བཅུད་ལེན་ཉམས་བླངས་པས༔ ཟག་བཅས་ཕུང་པོ་འཇའ་སྐུར་གྲོལ་བར་ཤོག༔ ཁྲེགས་ཆོད་གདམས་པ་ཉམས་སུ་བླངས་ཙམ་གྱིས༔ ཀ་དག་རྫོགས་པ་ཆེན་པོར་གྲོལ་བར་ཤོག༔ ཐོད་རྒལ་གསང་ལམ་ཉམས་སུ་བླངས་ཙམ་ནས༔ སྣང་བ་བཞི་ཡི་ཉམས་རྟོགས་ཡོན་ཏན་དང་༔ ལམ་རྟགས་རྒྱུད་ལུང་མན་ངག་དང་བསྟུན་པར༔ ཚངས་ལ་མ་འཆུག་ཕྱིན་ཅི་མ་ལོག་པ༔ ཉམས་སུ་མྱོང་ཞིང་རིམ་བཞིན་མྱུར་བསྒྲོད་དེ༔ ལམ་གྱི་གནད་ལས་གོལ་འཆུག་མེད་པ་ཡིས༔ གཞོན་ནུམ་བུམ་པའི་སྐུ་རུ་གྲོལ་བར་ཤོག༔ དུས་གསུམ་རྒྱལ་དང་རྒྱལ་སྲས་ཐམས་ཅད་ཀྱིས༔ ཐུགས་རྒྱུད་རྣམ་པར་མི་རྟོག་ཡེ་ཤེས་ཉིད༔ དེ་རིང་ཉིད་དུ་བདག་རྒྱུད་ལ་འཕོས་ཏེ༔ རིང་པོར་མི་ཐོགས་འཇའ་ལུས་འཕོ་ཆེན་དུ༔ ཡང་དག་རྫོགས་པའི་སངས་རྒྱས་ཐོབ་པར་ཤོག༔ བདག་དང་བདག་གི་འབྲེལ་ཐོགས་སེམས་ཅན་ཀུན༔ ཕྱམ་གཅིག་གདོད་མའི་གཞི་རུ་སངས་རྒྱས་ཤོག༔ དེ་མཐར་སྨོན་ལམ་འགྲུབ་སྔགས་བདེན་བརྗོད་བསགས༔ སྒྱུ་མའི་རྣལ་འབྱོར་བདུད་འཇོམས་རྡོ་རྗེ་ཡིས།།སློབ་བུ་ཚུལ་ཁྲིམས་རྒྱ་མཚོས་ནན་བསྐུལ་ངོར།།ཆོས་ཉིད་ནམ་མཁའི་མཛོད་ལས་བསྒྱུར་བའོ།།དགེའོ།།སརྦ་མངྒ་ལཾ།། ༈ རྨད་བྱུང་སྲས་བཅས་རྒྱལ་བའི་བྱིན་རླབས་དང་།རྟེན་འབྲེལ་བསླུ་བ་མེད་པའི་བདེན་པ་དང་།།བདག་གི་ལྷག་བསམ་དག་པའི་མཐུ་སྟོབས་ཀྱིས།།རྣམ་དག་སྨོན་པའི་གནས་ཀུན་མྱུར་འགྲུབ་ཤོག།