TTDL-ZABTER-16-MA-021

༠༠༠༠༠༠བརྡ་ཡིག༧༡དག་སྣང་ཡེ་ཤེས་དྲྭ་བ་ལས༔ བདེ་བ་ཅན་གྱི་སྨོན་ལམ་ཐར་བའི་སྒོ་འབྱེད་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ཞིང་ཁམས་རྣམ་དག་ཡིད་ལ་དྲན་བྱས་ནས༔ དད་གུས་གདུང་ཤུགས་དྲག་པོས་འདི་བརྗོད་བྱ༔ ཨེ་མ་ཧོཿརང་སྣང་རྣམ་དག་བདེ་བ་ཅན་གྱི་ཞིང༔ བཀོད་པ་འཕྲུལ་གྱི་ལོངས་སྤྱོད་མཐའ་ཡས་དཔལ༔ དགའ་བདེའི་ཡོན་ཏན་མི་ཟད་རྒྱན་དུ་ཤར༔ ཞིང་དེའི་མགོན་པོ་སངས་རྒྱས་འོད་དཔག་མེད༔ དམར་གསལ་མཉམ་བཞག་སྐྱིལ་ཀྲུང་པད་ཟླར་བཞུགས༔ ཞི་འཛུམ་མདངས་ལྡན་མཚན་དང་དཔེ་བྱད་བརྒྱན༔ སྤྲུལ་སྐུའི་ཆས་རྫོགས་ཆོས་གོས་རྣམ་གསུམ་གསོལ༔ འོད་དང་གཟི་བརྗིད་མཐའ་ཡས་དཔག་ཏུ་མེད༔ སྤྲུལ་པའི་བྱང་སེམས་འཕགས་པའི་དགེ་འདུན་འཁོར༔ སྐུ་ལ་དཔག་ཡས་རྒྱལ་བའི་དཀྱིལ་འཁོར་རྫོགས༔ སྐུ་དང་ཞིང་ཁམས་ཡིད་ལ་དྲན་བྱས་ནས༔ རྩེ་གཅིག་གུས་ཤིང་གདུང་བས་ཕྱག་འཚལ་ལོ༔ ལུས་དང་ལོངས་སྤྱོད་ཐམས་ཅད་མཆོད་པར་འབུལ༔ སྒོ་གསུམ་མི་དགེའི་ལས་ཀུན་མཐོལ་ལོ་བཤགས༔ བསོད་ནམས་དགེ་ཚོགས་ཀུན་ལ་རྗེས་ཡི་རང་༔ ཆོས་ཀྱི་འཁོར་ལོ་དམ་པ་བསྐོར་བར་བསྐུལ༔ མྱ་ངན་མི་འདའ་བཞུགས་པར་གསོལ་བ་འདེབས༔ དགེ་ཚོགས་ཅི་མཆིས་འགྲོ་བ་ཡོངས་ལ་བསྔོ༔ ནམ་ཞིག་ཚེ་ཡི་འདུ་བྱེད་བསྟུང་བའི་ཚེ༔ མགོན་པོ་འོད་དཔག་མེད་ཀྱི་ཞལ་མཐོང་ཞིང་༔ དབང་བསྐུར་བྱིན་རླབས་ལུང་བསྟན་མངོན་ཐོབ་ཤོག༔ འཁྲུལ་བ་ལུགས་འབྱུང་སྲིད་པ་ཡས་ལྡོག་ཚེ༔ སྐུ་གསུམ་ལྷུམས་འཇུག་གདོད་མའི་ནང་དབྱིངས་སུ༔ དང་པོའི་སངས་རྒྱས་འོད་མི་འགྱུར་བ་ཡི༔ ངང་དུ་ངོ་ཤེས་གདིང་ཐོབ་རང་གྲོལ་ཤོག༔ གལ་ཏེ་རང་ས་དེ་ལས་འདས་གྱུར་ན༔ ཤེས་པ་དང་པོ་བདེ་ཆེན་ཞིང་མཆོག་གི༔ ལྷུན་གྲུབ་བཀོད་པ་ཡོན་ཏན་ཚད་ཕེབས་ནས༔ གདོད་མའི་སངས་རྒྱས་འོད་དཔག་མེད་མགོན་གྱི༔ སྲས་ཀྱི་ཐུ་བོར་གྱུར་ནས་སངས་རྒྱས་ཤོག༔ གང་འདུལ་ཐབས་དང་ཐུགས་རྗེའི་རོལ་གར་གྱིས༔ སྲིད་མཚོར་དུབ་པའི་སྐྱེ་འགྲོ་དབུགས་དབྱུང་ཞིང་༔ སླར་ཡང་ཁམས་གསུམ་འཁོར་བ་ཆམ་གཅིག་ཏུ༔ སྐུ་གསུམ་ལྷུན་རྫོགས་ཆེན་པོར་འུབ་ཆུབ་ནས༔ ཁྱབ་བདག་གདོད་མའི་མགོན་པོར་སངས་རྒྱས་ཤོག༔ དེ་མཐར་སྨོན་ལམ་འགྲུབ་སྔགས་བདེན་ཚིག་བརྗོད༔ རྟག་ཏུ་འདིར་བརྩོན་ལས་ཅན་གང་སུ་དག༔ ཡང་དག་ལམ་ལ་ཕྱོགས་ཅིང་ཉེ་བར་འགྱུར༔ དུས་གསུམ་ཀུན་ཏུ་ཉམས་སུ་ལེན་པར་གྱིས༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཅེས་པ་འདི་ནི་ཧོར་གྱི་བནྡེ་བསོད་ནམས་དཔལ་འབར་གྱིས་བསྐུལ་ངོར་ཁྲག་འཐུང་བདུད་འཇོམས་དཔའ་བོས་འོད་གསལ་སྒྱུ་འཕྲུལ་དྲྭ་བའི་དབྱིངས་ལས་བསྒྱུར་བ་ཡོངས་སུ་དགེ་བར་གྱུར་ཅིག།དགེའོ།།དགེའོ།།དགེའོ།།སརྦ་མངྒ་ལཾ།།