TTDL-ZABTER-18-TSHA-035

དུས་གསུམ་སངས་རྒྱས་མ་ལུས་འདུས་པའི་དཔལ། །ཨོ་རྒྱན་མཚོ་སྐྱེས་རྡོ་རྗེས་རྟག་ཏུ་སྐྱོངས། །ཁྱོད་ཀྱིས་ངེས་པར་ཆོས་ཤིག་བསྒྲུབ་འདོད་ན། །བླ་མར་མོས་གུས་བསྙེན་བཀུར་བྱ་བ་དང་། །མཆེད་ལྕམ་རྣམ་ལ་བརྩེ་གདུང་བྱ་བ་དང་། །སེམས་ཅན་རྣམས་ལ་སྙིང་རྗེ་བསྒོམ་པ་དང་། །ཕན་དང་བདེ་བའི་ཐབས་སུ་འབད་པར་གྱིས། །ཚེ་འདིའི་སྣང་བ་རྨི་ལམ་གནས་སྐབས་ཙམ། །རྟག་འཛིན་ཞེན་པ་ཆོད་ལ་བློ་སྣ་བསྟུང་། །ཆོས་ལ་ཕྱི་བཤོལ་མ་བྱེད་འཕྲལ་དུ་འབུང་། །དལ་འབྱོར་མི་ལུས་རིན་ཆེན་གླིང་དང་མཚུངས། །མདོ་མེད་སྟོང་ལོག་མ་བྱེད་དོན་ལྡན་མཛོད། །གདམས་ངག་ནོར་བུ་རིན་ཆེན་རྙེད་དུས་འདིར། །དོན་མེད་ཆུད་ཟོས་མ་བྱེད་ཉམས་སུ་ལོངས། །ཐར་དང་རྣམ་མཁྱེན་གོ་འཕང་བགྲོད་འདོད་ན། །དམ་ཚིག་སྡོམ་པ་སྲོག་གི་གཏའ་རུ་ཟུངས། །ཚེ་དང་སྒྲུབ་པ་མཉམ་པ་ཞིག་བྱུང་ན། །འཆི་དུས་བློ་ལྷག་མེད་པའི་གདམས་པ་ཡིན། །ཆོས་ཀུན་གདོད་ནས་མེད་པར་སྟོང་པ་སྟེ། །མེད་བཞིན་སྣང་སྟེ་སྣང་ཙམ་ཉིད་ནས་སྟོང་། །འཁོར་འདས་ལམ་གསུམ་ཆོས་ཉིད་གཅིག་གི་རྩལ། །སྣང་བ་གཞན་དུ་འཛིན་པའི་འཕྱང་པ་ཁྲོལ། །ཐམས་ཅད་ཀ་དག་གཞི་ཡི་རོལ་པ་སྟེ། །གཞི་ཉིད་སྐྱོན་བྲལ་ཕྱལ་ཡས་ཆེན་པོར་དག།འཁོར་འདས་ལམ་གསུམ་ལྷུན་གྲུབ་རོལ་པར་རྫོགས། །རྫོགས་ཆེན་གཞི་ཡི་གནས་ལུགས་མངོན་གྱུར་པའི། །རིག་པ་སྐུ་བཞི་ཡེ་ཤེས་ལྔ་ཡི་དཔལ། །རང་བྱུང་རང་བབ་ངང་གནས་ཆེན་པོ་རུ། །མ་བཅོས་རང་སར་ཡན་པའི་ངང་དུ་ཞོག།བྱ་བ་བཏང་བས་བྱར་མེད་ཆེན་པོ་རུ། །སྙིང་པོའི་སྒྲུབ་པ་བྱེད་པ་གནད་དུ་ཟུངས། །དེ་ལྟར་བར་མེད་སྒོམ་པ་ལྷུར་བླངས་ནས། །རང་ཐོག་རང་གྲོལ་ཆོས་སྐུ་ཀུན་བཟང་ཀློང་། །རང་གྲོལ་ཆེན་པོ་འབྲས་བུ་བླ་ན་མེད། །མྱུར་ལམ་སྒྲོན་མ་དྲུག་གི་ཀློང་མཛོད་དུ། །ཤེས་རིག་རྒྱལ་པོའི་བཙན་ས་འཛིན་ནུས་ན། །སྣང་བ་བཞི་ཡི་ཉམས་རྟོགས་མཐར་ཕྱིན་ནས། །འཇའ་ལུས་འཕོ་བ་ཆེན་པོར་སངས་རྒྱས་པར། །གདོན་མི་ཟ་འོ་སྐལ་བཟང་སྐྱེས་བུ་ཁྱོད། །སྡེབས་སྦྱོར་ཁ་གཏིང་ཟབ་མོ་མི་ཤེས་ཀྱང་། །འདི་བཞིན་ཉམས་སུ་བླང་ན་ངེས་པར་གྲོལ། །ཞེས་སློབ་བུ་ཡེ་ཤེས་རྒྱ་མཚོས་བསྐུལ་ངོར་བླུན་པོའི་ཐ་ཤལ་བདུད་འཇོམས་རྡོ་རྗེས་སྨྲས་པ་ཡོངས་སུ་དགེ་བར་གྱུར་ཅིག། །།