TTDL-ZABTER-18-TSHA-049

རྒྱལ་ཀུན་སྤྱི་གཟུགས་པདྨ་རྒྱལ་པོས་སྐྱོངས། །སྨོན་ལམ་ལས་ཀྱིས་འབྲེལ་བའི་སྐྱེས་བུ་ཁྱོད། །ངེས་པར་དམ་པའི་ཆོས་ཞིག་བསྒྲུབ་འདོད་ན། །མི་དགེ་བཅུ་པོ་དུག་བཞིན་སྤང་བར་མཛོད། །འཆི་བ་མ་བརྗེད་སྲོག་གི་གཏའ་རུ་ཟུངས། །ཟོལ་མེད་དོན་གྱི་སྒྲུབ་པ་ལྷུར་ལེན་མཛོད། །ལམ་གྱི་ལམ་མཆོག་མྱུར་ལམ་རྫོགས་པ་ཆེ། །རྩོལ་མེད་བྱ་བཏང་ཆེན་པོར་རང་ཡན་པས། །གནད་དེ་ཉམས་སུ་ལེན་པའི་སྐལ་ལྡན་ན། །འཁོར་འདས་སྟོང་ཉིད་ཆེན་པོ་གཏན་ལ་དབབ། །སྟོང་ཉིད་དྭངས་གསལ་རྙོགས་མ་བྲལ་བའི་ངང་། །ཆོས་ཀུན་མ་འདྲེས་ཅིར་ཡང་སྣང་བ་ནི། །དཔེར་ན་རྒྱ་མཚོའི་གཟའ་སྐར་བཞིན་དུ་སྣང་། །སྣང་ཙམ་ཉིད་ནས་གཉིས་མེད་རོལ་པར་སྣང་། །མཉམ་ཉིད་ཀ་དག་གཞི་དབྱིངས་མངོན་གྱུར་པའི། །ཆོས་སྐུ་གཞིར་གནས་རིག་པ་ངོ་འཕྲོད་ནས། །སླར་ཡང་མ་དག་སྙིགས་མའི་སྣང་སེམས་ཀུན། །དྭངས་མ་འོད་གསལ་ཆེན་པོའི་སྣང་བ་རུ། །བཙན་ཐབས་ཉིད་དུ་འཕོ་བའི་ལམ་ཆེན་པོ་། །ཉམས་སུ་ལེན་ཚེ་སྣང་བཞིའི་ཉམས་འབྱུང་སྟེ། །དང་པོ་མངོན་སུམ་སྣང་བ་འབྱུང་བའི་ཚེ། །གནས་ཉམས་ལྷོད་འབོལ་བ་ལ་ཆགས་ཞེན་ཆོད། །རྣལ་འབྱོར་ཉམས་སྣང་གོང་དུ་འཕེལ་བའི་ཚེ། །ན་ཚ་བདེ་སྡུག་ཆུ་ཡི་གཉེར་མ་བཞིན། །འབྱུང་ཚེ་བདེན་མེད་ཉམས་ཀྱི་རི་མོ་རུ། །ཤེས་ནས་རེ་དོགས་བྲལ་བའི་དབྱིངས་སུ་བསྐྱལ། །ཉམས་ཀྱིས་བསླུས་ནས་འགྲོ་སྙིང་འདོད་པ་ཡི། །རྗེས་འབྲང་རྒྱལ་ཁམས་བསྐོར་ཀྱང་ཟིན་པ་མེད། །བསྒྲུབ་གནས་བྱིན་རླབས་ལྡན་པ་ཞིག་ལ་བརྟེན། །རྣམ་པར་གྲོལ་བའི་ས་ལ་བགྲོད་པར་གྱིས།ཞལ་གདམས་དགོས་ཟེར་དོ་གལ་ཆེ་བ་ཁྱོད། །གནད་འདི་ཉམས་སུ་བླང་ན་དོན་ཆེན་གདའ། །མདོ་མེད་ཡལ་བར་དོར་ན་དགོས་བ་མེད། །དེ་དོན་མ་བརྗེད་རྒན་པོའི་སྙིང་གཏམ་ཡིན། །ཅེས་སློབ་བུ་ཟང་ཐལ་དྲི་མེད་ཀྱིས་ནན་དུ་བསྐུལ་ངོར་མི་རྒན་བདུད་འཇོམས་པས་དེ་ལྟར་ལབ། །། །