TTDL-ZABTER-18-TSHA-052

མཁའ་འགྲོ་ཆོས་ཀྱི་སྤྱན་ལྡན་མས།ཨེ་ཨེ།ཉམས་སྣང་གོང་འཕེལ་གྱི་རྣལ་འབྱོར། །སྣང་སེམས་ལས་རླུང་གིས་བསྐྱོད་ནས། །དག་དང་མ་དག་གི་སྣང་བ། །གཏད་མེད་འཚུབས་མ་བཞིན་ལྡང་ལ། །བདེན་ཞེན་གོལ་ས་རུ་ཨེ་གོ། །ན་ཚ་མི་བདེ་བའི་ཟུག་རྔུ། །བདུད་ཀྱི་ཕོ་ཉ་རུ་སླེབ་པ། །བདེན་ཞེན་འཁོར་བ་ཡི་གནས་ཡིན། །དེ་ཟློག་འཁྲུལ་པ་དང་ཉམས་སྣང་། །སྒྱུ་མའི་རྫུན་རིས་སུ་ཤེས་པའི། །བདག་མེད་ཤེས་རབ་ཞིག་ཡོད་ན། །མི་རིང་མྱུར་ལམ་མཆོག་ཐོབ་ནས། །རྣམ་མཁྱེན་སངས་རྒྱས་ལ་སླེབ་འགྲོ། །འདི་དུས་བསླུ་བ་ཡི་ཡུལ་ངན། །འགའ་ཞིག་ཡིག་རིས་ལ་ཞེན་འཁྲུལ། །འགའ་ཞིག་ཐོས་ཡུལ་དུ་འཆོལ་འགྲོ། །དེ་ཚུལ་རང་རྒྱུད་ལ་སྦྱོར་ལ། །རང་ས་བཟུང་བ་ཞིག་གནད་ཡིན། །མཁའ་འགྲོ་ཆོས་དབྱིངས་སུ་ཐིམ་ནས། །བརྡལ་ཁྱབ་ཟང་ཐལ་ལ་ཡན་འགྲོ། །ཅེས་ཟེར་ཞིང་ཡལ། །མི་རྒན་འཁྲུལ་པའི་སྣང་ཉམས་སོ། །། །༈ཚེ་འདིའི་སྣང་བ་སྒྱུ་མའི་དཔེ་བཅུ་ལྟར། །མཐོང་ནས་བྱ་བཏང་བསྟན་འགྲོའི་དོན་ཕྱིར་དགོངས། །འཇིགས་མེད་རྡོ་རྗེའི་ཞབས་ལ་གསོལ་བ་འདེབས། །བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས། །། །