TTDL-ZABTER-18-TSHA-054

རིགས་བརྒྱའི་ཁྱབ་བདག་པདྨ་རྒྱལ་པོས་སྐྱོངས། །ཡང་གསང་སྒོར་ཞུགས་སྐྱེས་བུ་དམ་པ་ཁྱོད། །རང་སེམས་ངོ་བོ་གདོད་ནས་རྣམ་པར་དག།ཁྱབ་བརྡལ་ནམ་མཁའི་འཁོར་ཡུག་ཆེན་པོ་ཉིད། །ཆོས་སྐུ་བྱ་བྲལ་ཀློང་ཆེན་རོལ་པ་སྟེ། །ད་ལྟའི་ཤེས་པ་སྤྲོས་བྲལ་རྒྱ་ཡན་པ། །ངོ་ཤེས་རང་སོར་བཞག་པ་ཤེས་རབ་སྤྱན། །དེ་ལ་ལྟ་སྒོམ་འཛིན་རྩོལ་བློས་བྱས་ཆོས། །བྲལ་བའི་བྱ་བྲལ་ངང་ལ་ཡན་གྱུར་པ། །རིག་པའི་ཡེ་ཤེས་བརྗོད་དུ་མེད་པ་ཡིན། །བདེ་གཤེགས་ཀུན་གྱི་བགྲོད་པ་བླ་ན་མེད། །འདི་མཐོང་རྣལ་འབྱོར་ཡང་དག་ལམ་དུ་ཚུད། །དེ་ལས་ཆོས་ཟབ་ཚོལ་བ་ཤིན་ཏུ་འཁྲུལ། །ད་ནི་ལྟ་སྒོམ་སྤྱོད་པ་ཟུར་ཙམ་བཤད། །དུས་གསུམ་རྒྱལ་བ་མ་ལུས་བྱང་ཆུབ་སེམས། །ཁས་གསུམ་འཁོར་བའི་ཆོས་ཀྱང་བྱང་ཆུབ་སེམས། །བྱང་ཆུབ་སེམས་ལ་སྐྱེ་འཆི་བསྒྲེས་རྒུད་མེད། །ཡུལ་མེད་ཀློང་ཆེན་ངང་མཐོང་ལྟ་བ་ལགས། །བྱ་ཞིང་བྱེད་པ་མེད་པའི་ཆོས་ཉིད་ལ། །སྤྲོས་བཅས་བློ་ཡིས་མ་བསྒྱུར་རང་སར་བཞག།རྣམ་ཐར་སྒོ་གསུམ་ལྡན་པའི་ཆོས་ཉིད་ལ། །མཚན་མའི་གཟེབ་ཀྱིས་མ་བཅིང་སྒོམ་པའི་གནད། །ལུས་གནད་མི་རོ་བཞིན་དུ་ཅི་བདེར་གནས། །ངག་གནད་ལྐུག་པ་ལྟ་བུར་སྨྲ་བརྗོད་སྤང་། །སེམས་གནད་ཡེ་ཡིན་རང་ཡན་ཆེན་པོར་འབྱམས། །རྟག་ཏུ་མཉམ་བཞག་གནད་འདི་བརྟེན་པ་གལ། །ཟ་ཉལ་སྤྱོད་འགྲོས་གང་གི་སྐབས་སུ་ཡང་། །གུ་ཡང་བློ་བདེར་ཡན་པ་སྤྱོད་པའི་གནད། །འདི་ལྟར་དུས་དང་རྣམ་པ་ཐམས་ཅད་དུ། །ངེས་པར་ལྷུར་ལེན་བྱེད་པའི་སྐྱེས་བུ་ནི། །ཚེ་གཅིག་སངས་རྒྱས་འགྲུབ་པར་གདོན་མི་ཟ། །མ་ནུས་རྒན་པོའི་སྙིང་གཏམ་གཏན་ཚིག་ཡིན། །ཞེས་པ་འདི་ནི་དགེ་ལོའི་ངོར་བདུད་འཇོམས་པས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །། །