TTDL-ZABTER-18-TSHA-060

དུས་གསུམ་སངས་རྒྱས་འདུས་པའི་ཞལ། །པདྨ་འབྱུང་གནས་བདག་སྐྱོངས་ཤིག།སྨོན་ལམ་ལས་འབྲེལ་སྐྱེས་བུ་ཁྱོད། །ངའི་འབངས་ཆོས་ཉིད་འོད་ཟེར་དེ། །འོད་ཟེར་མིང་གཞིའི་ལུང་བསྟན་པའི། །གཅིག་ནི་དཔལ་ཡེའི་སྤྲུལ་པ་ལགས། །དེ་ལ་ཁྲེགས་ཆོད་ཐོད་རྒལ་གྱི། །གདམས་པ་ཞུས་ལ་དབེན་པའི་སར། །སྙིང་པོའི་སྒྲུབ་པ་ལྷུར་ལེན་མཛོད། །སྣང་སྲིད་འཁོར་འདས་ཐམས་ཅད་ཀུན། །རང་སྣང་ཉིད་དུ་རོ་གཅིག་པའི། །ཚུལ་དེ་ངེས་པར་རྟོགས་བྱས་ནས། །ངང་དུ་མཉམ་པར་བཞག་པའི་ཚེ། །རྒྱ་མཚོའི་གཟའ་སྐར་ཅི་བཞིན་དུ། །རང་སྣང་ཉིད་དུ་བབ་ཀྱིས་རྫོགས། །འདི་ནི་ལྟ་བའི་རྒྱལ་པོ་ལགས། །མ་བཅོས་རང་བབ་རང་ཡན་པའི། །ཤེས་རིག་མངོན་གྱུར་ཆེན་པོ་ནི། །སྒོམ་པའི་རྒྱལ་པོར་ལྷུན་གྱིས་གྲུབ། །རིག་པ་སེམས་སུ་མ་འཁྲུལ་བའི། །རང་གནས་རང་བབ་སྤྱོད་པའི་མཆོག།འདི་ནི་དུས་གསུམ་སངས་རྒྱས་ཞལ། །ནམ་ཡང་མི་འདོར་ལག་ལེན་གནད། །ཤེས་པ་དང་པོ་འོད་གསལ་དུ། །མཆེད་པའི་ཆོས་ཉིད་མངོན་སུམ་ཞལ། །མཐོང་ནས་སྣང་བ་དྭངས་མའི་ཆ། །གོང་འཕེལ་ཚད་ཕེབས་དབྱིངས་སུ་སྐྱོལ། །མི་འགྱང་མྱུར་དུ་འཇའ་ལུས་ཆེར། །མངོན་འཚང་རྒྱ་བར་གདོན་མི་ཟ། །ཚིག་མང་མདོ་དོན་གཅིག་དྲིལ་བའི། །མན་ངག་ཟབ་མོའི་ཡང་བཅུད་འདི། །གཅེས་པའི་ནོར་དུ་ཁྱོད་ལ་སྟེར། །ཉམས་སུ་ལོངས་ཤིག་སྐལ་ལྡན་བུ། །བདུད་འཇོམས་པས་སོ། །དགེའོ། །། །